Ulloq eqqaamasarialik
’Tamakkuninnga oqaluffigaassi uakkut eqqisseqqullusi. Silarsuarmi naalliussaasi; tuppalleritsili, silarsuarmut ajugaagama.’ — JUÁNASE 16:33.
1, 2. Ulloq suna oqaluttuarisaanermi ullunit allanit allaanerua, sooq?
ULLUMIKKUT silarsuarmi eqqissinissaq oqallisaaqaaq. Sorsunnersuup Aappaata kingorna eqqissineq taaneqartalersimavoq ulloq-V.a Ukiullu tamaasa ullormi juullimi ’nunami eqqissinissaq’ inuit eqqarsaatigisarpaat. (Lúkarse 2:14) Ulloqarporli inuiaat oqaluttuarisaaneranni ullunit allanit tamanit immikkooruteqarluinnartumik, tassa ulloq Jesusip oqaatsinik qulaani allassimasunik annissiffigisaa. Ulluni 2 millioninit amerlanerusuni inuiaat nunami maani inuuffigisimasaanni ulloq taanna inuiaat naassaanngitsumik siunissaannik allanngortitsilluinnartuuvoq.
2 Ulloq pingaaruteqartoq taanna tassaavoq juutit qaammatisiutaat naapertorlugu nisanip 14-ia. Aprilip aallaqqaataani seqernup tarrinnerani nisanip 14-ia ukiumi 33-mi aallartippoq. Ullormi allanngorfiusumi tassani pisimasut qimerlooriartigik.
Nisanip 14-ia
3. Jesusip nalunaaquttap-akunneri inuuffigisani kingulliit qanoq atorpai?
3 Taarsimmat qaammat imissisimasoq erserpoq, qularnanngitsumik inuit ilaannik eqqaasitsilluni piffissanik aalajangersaasartoq tassaasoq Jehova. (apustilit suliait 1:7) Inimi qullermi Jesusip apustiliisalu aqqaneq-marluk juutit ukiumoortumik poorskisiorfiannik nalliussiniarlutik katersuuffigisaanni susoqarpa? Jesus ’silamit matumannga ataatamut aallarnissaminut’ piareersartilluni ’ilani naggatissaminut allaat asavai’. (Juánase 13:1) Asanninnini tamanna qanoq ililluni ersersippaa? Oqaatsimigut maligassiamigullu inuttut pissutsit silarsuarmut ajugaanissaminnut iluaqutigisinnaasaat ajoqersukkamini ineriartortinniarlugit suliuarpoq.
Maniguunneq asanninnerlu
4. (a) Jesusip ajoqersukkani qanoq ililluni inuttut pissutsinik tunngaviusunik ilinniartippai? (b) Qanoq ililluta nalunngilarput maniguunnerup pingaaruteqassusia Peterip paasisimagaa?
4 Apustilit asooruttariaqakkaminnik ilaatigut suli ataqqinaateqarumassuseqariataartarlutillu, sinngariataartarlutillu pingaarniakujoriataartarput. Taamaattumik Jesus allarummik tigusivoq apustilillu isigaat asalerlugit. Maniguunnermut piviusuunngitsumut paavip ukiut tamaasa Romami ileqqulersuuteqartarnermini ersersittagaanut taamaaliornera assingunngeqaaq. Aap, imminut pilliutigeriaannaanermigut Jesusip ersersippaa ’ilani imminit annerutillugit’. (Filípimiut 2:2-5) Aallaqqaataani tamanna Peterip paasinngilaa isikkanilu Jesusimut asaqqunagit. Naveerneqareeramili Jesus qinnuigaa timini tamaat asaqqullugu. (Juánase 13:1-10) Sunarpiarli pineqartoq Peterip paasisimavaa, ukiummi arlaqartut tamatuma kingorna allat tamatumunnga tunngasumik eqqortumik unnersuussimavai. (1 Pîtruse 3:8, 9; 5:5) Assut pingaaruteqarpoq ullumikkut tamatta maniguulluta Kristusimut kiffartornissarput. — Takujuttaaq Ussatit 22:4; Matîuse 23:8-12.
5. Inassutip allap Jesusip saqqummiussaata suup ersersippaa inuttut pissutsip tunngaviusup allap pingaaruteqassusia?
5 Aqqaneq-marlulli taakkua ilaata ataatsip Jesusip unnersuussutaa tamanna ilinniarfiginngilaa. Tassa Judas Iskariotip. Poorskisiummik unnukkorsiornerup ingerlanerani Jesus anersaamigut eqqissiveeruttorujussuanngorpoq, Judasilu imminik killuussisussatut toqqarpaa aallartillugulu. Tamatuma kingorna aatsaat apustilini aqqanillit aalajaatsut ima oqarfigai: ’Inassummik nutaamik tunivassi, asaqatigeeqqullusi; soorlu uanga asagissi, taamattaaq ilissi asaqatigiissaasi. Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:34, 35) Tamanna ilumut tassaavoq inassut nutaaq, Jesusip nammineq maligassiaatigut pitsaangaartukkut erseqqissarneqartoq. Pilliutitut toqunissani qanilliartortillugu Jesus asanninnermik asseqanngitsumik ersersitsiuarpoq. Minuttit tamarluinnaasa ajoqersukkami ilinniartinnissaannut qiimmassarnissaannullu atorluarniarpai. Asanninnermik ersersitsinissap pingaaruteqassusia kingorna oqaatsinik ukuninnga erseqqissarpaa: ’Inassutiga tassa asaqatigiissasusi, soorlu uanga asagissi. Asanninneq tamanit anneq tassa ikinngutini pillugit inuunini iperaraanni.’ — Juánase 15:12, 13.
’Aqqut, sallusuissut, inuussut’
6. Anguniagassaq suna Jesusip ajoqersukkaminut qaninnernut saqqummiuppaa?
6 Jesusip apustilit aqqanillit aalajaatsut ima oqarfigai: ’Uummatisi annilaanngikkilit. Guutimut upperitsi, uannullu upperitsi. Ataatama illuani inissat amerlaqaat. Taamaanngippat oqarfigisimassagaluarpassi. Inissioriartorpassi.’ (Juánase 14:1, 2) Tassani ’qilammiup naalagaaffia’ eqqartorpaa. (Matîuse 7:21) Taava Jesusip ajoqersukkani aalajaatsut imminut qanimut attaveqartut taakku nassuiaappai qanoq ilillutik anguniagartik angusinnaagaat. Ima oqarpoq: ’Uanga aqqutaavunga sallusuissutaallungalu inuussutaallungalu; allakkut Ataatamut pisoqarsinnaanngilaq, uakkut kisianni.’ (Juánase 14:6) Aammattaaq nunami inuunermik naassaanngitsumik anguserusuttumut tamanna tunngavoq. — sarĸúmersitat 7:9, 10; 21:1-4.
7-9. Sooq Jesus imminut tassaanerarpa ’aqqut, sallusuissut inuussullu’?
7 Jesus ’aqqutaavoq’. Kristumiut aatsaat Jesus Kristus aqqutigalugu Guutimut qinunikkut ornigussinnaapput. Jesusip ajoqersukkani neriorsoqqissaarpai Jesusip aqqani qinnutaannik tamanik Ataatap tuniumaarai. (Juánase 15:16) Assilissanut iluartuutitanut iluartuutitanulluunniit allanut qinnutit, imaluunniit qinnutit alanngaarlugit uteqattaakkat, Ataatap tusarumanngilai akueriumanagilluunniit. (Matîuse 6:5-8) Aammalu apustilit suliáinik agdlagkat 4:12-imi Jesus pillugu ima allassimavoq: ’Allamik annaffissaqanngilaq, atermimmi allamik annassutissatsinnik qilaap ataani inunni tunniussaasoqanngilaq.’
8 Jesus ’sallusuissutaavoq’. Taanna pillugu apustili Johannes ima oqarsimavoq: ’Oqaaseq uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik salluisuissummillu ilumioqangaartoq.’ (Juánase 1:14) Jesus siulittuutinik Allakkat Epriiarisuut-niittunik hundredelippassuarnik eqquutsitsinermigut tassaalersimavoq ’sallusuissut’. (2 Korintumiut 1:20; sarĸúmersitat 19:10) Ajoqersukkaminut inuppassuarnullu tusarnaarusuttunut oqaluussisarnermigut, aammalumi upperisarsiornikkut qullersanik ilumoortuusaarniartunik oqalliseqateqartarnermigut namminerlu maligassiuinermigut, sallusuissut ilisimaneqalersissimavaa.
9 Jesus ’inuussutaavoq’. Jesus Guutip erneratut oqarsimavoq: ’Ernermut uppertoq naassaanngitsumik inuussuteqarpoq; ernermulli naalasseriitsup inuussut takussanngilaa, Guutilli kammannerata qulangersimaavassavaa.’ (Juánase 3:36) Jesusip pilliutaanut upperneq inuunermik naassaanngitsumik kinguneqassaaq — ’savarpannguanut’ kristumiunut tanitaasunut qilammi, ’savanullu allanut’ amerlangaartunut paratiisimi nunamiittumi. — Lúkarse 12:32; 23:43, NV; Juánase 10:16.
Malersugaanermi nikallujuinneq
10. Sooq ’silarsuaq ajugaaffigisariaqarparput’, tamatumunngalu atatillugu Jesus qanoq qiimmassaava?
10 Jehovap aaqqissuussaani nutaassami inuulernissaminnik neriugisaqartut silarsuarmut ajortup, Satan Diaavulup, pissaaneqarfigisaanut akiuuttariaqarput. (1 Juánase 5:19) Taamaattumik Jesusip oqaasii Juánase 15:17-19-imiittut qiimmaallannaqaat: ’Ilissinnut inassutiga tassa asaqatigiissasusi. Silamiut uumissorpasi taava ilisimassaasi ilissinnit uumissoqqaaraannga. Silamiut ilagigunisi pisik asaqqajarpaat; ilaginnginnamisili, uangali silamiunit qinerassi, taamaattumik silamiut uumissorpaasi.’ Kristumiut ilumoortut 1992 tikivillugu uumissorneqartuarsimapput, aalajaallutillu maniguullutik Guutip pissaaneranit angingaartumit nakussatsissuteqartartut maligassiaat nuannaarutigeqaavut. (1 Pîtruse 5:6-10) Uaguttaaq Jesusimut uppernitsigut misilinneqarnivut nikallujuilluta atorsinnaavavut. Taassuma ajoqersuutini oqaatsinik nuannersunik ukuninnga naggaserpaa: ’Silarsuarmi naalliussaasi; tuppalleritsili, silarsuarmut ajugaagama.’ — Juánase 16:33.
Angeruseq nutaaq pilersinneqarpoq
11. Angeruseq nutaaq pillugu Jeremias qanoq siulittuisimava?
11 Unnuk taanna, poorskimik nalliuttorsiutiginninneq naammat, Jesusip angeruseq nutaaq eqqartulerpaa. Angeruseq tamanna ukiut hundredellit arlallit tamatuma siorna pruffiitip Jeremiasip eqqartorsimavaa: „Ullussani piumaartuni, oqarpoq [Jehova], Israelikkut Judakkullu nutaamik angerfigeqatigissavakka. . . . Inatsisinnik ilumiulissavakka uummataannullu allallugit, taakkualu Guutigissavaannga, uangalu innuttarissavakka. . . . iluanngitsuliaannik isumakkeerfigissagakkit ajortuliaallu eqqaaqqinnagit.“ (Jeremia 31:31-34) Pilliut angerutsimik nutaamik tamatuminnga atuutilersitsisoq ukiumi 33-mi nisanip 14-ani pilliutigineqassaaq.
12. Jesusip qanoq ililluni angeruseq nutaaq pilersippaa, tamannalu qanoq sunniuteqassava?
12 Jesusip apustilit aalajaatsut aqqanillit taakku oqarfigai poorskisiummik tamatuminnga nereqatiginissaat assut qilanaarisimallugu. Taava timiusaq tiguaa qujariarlunilu aggorpaa, taakkununngalu agguaallugu, ima oqarluni: ’Tassa timiga pillusi tunniunneqartoq; taamaaliortaritsi eqqaallunga.’ Taamatullu viinnimik aappaluttumik ermutsimut tunivai oqarlunilu: ’Ermuseq manna tassa angerusisaaq aakkut pillusi kuisukkut.’ (Lúkarse 22:15, 19, 20) Jesusip ’aava akisooq’, uumasup aavanit Israelip angerusaanik atortuulersitsisumit naleqarneroqisoq, angerutsip nutaap atortuulissutigaa. (1 Pîtruse 1:19; Eprîarit 9:13, 14) Angerutsimut nutaamut ilaasut ajortiminnik isumakkerfigilluinnarneqassapput, taamaattumillu 144.000-inut anersaakkut Israelitut kingornussassamik naassaanngitsumik angusisussanut ilaanissaminnut piukkunnartunngorsinnaallutik. — Galâsiamiut 6:16; Eprîarit 9:15-18; 13:20; sarĸúmersitat 14:1.
’Eqqaallunga’
13. (a) Maanna eqqaaniaalluni nalliuttorsiornissaq qanilliartortillugu suut eqqarsaatigisariaqarpavut? (b) Kikkut assersuutinik ilangiisussaappat, sooq taakku kisimik?
13 Jesusip toquneranik eqqaaniaalluni nalliuttorsiornerit 1960-issaat 1992-imi aprilip 17-iani ingerlanneqassaaq. Tamanna qanilliartortillugu Jesusip pilliutaata naammalluinnartup kinguneri tamaasa eqqarsaatigissagutsigik pitsaassaaq. Aaqqissuussaq tamanna ikiortigalugu Jehovap ilisimassusianik inuiannullu asanningaarneranik paasisaqarsinnaavugut. Jesusip assuarnaassusiata, allaat naalliunnaqisumik toqulernermini assuarnaassusiata, ersersippaa Jehova ilumoortoq Satanilu ilumuunngitsoq oqarami inuit Guutip pinngortitai misilinneqarnerminni nakkaannarumaartut. (Job 1:8-11; Ussatit 27:11) Jesus aammigut pilliutaasukkut angerutsimut nutaamut, Jehovap ’eqqarleriinnik, qinikkanik, palaseqatigiinnik kunngiusunik, inuiannik iluartunik, innuttarisassarsiaminik’ toqqaanermini atugassaanut, akunnermiliuttuuvoq. Taakkua nunamiinnerminni Guutimik, Jehovap, ’taartumit qaamasumut tupinnartumut piminut qaaqqusisimik’, ajunngitsuliai sumi tamaani oqaluussissutigisarpaat. (1 Pîtruse 2:9; naleqqiuguk Mosesimik allakkat aappaat 19:5, 6.) Taakku kisimik ukiumoortumik eqqaaniaalluni nalliuttorsiornermi assersuutinik ilangiisinnaatitaapput.
14. Eqqaaniaalluni nalliuttorsiornermut najuuttut millionilikkuutaat allat qanoq pissarsiaqartarpat?
14 Siorna eqqaaniaalluni nalliuttorsiornermut nunarsuaq tamakkerlugu inuit 10.650.158-it najuussimapput. 8850-iinnaalli assersuutinik ilangiisimapput — najuuttut 1 promillii. Najuuttulli sinnerisa millionilikkuutaat nalliuttorsuaq sumik iluaqutigaat? Aap, naak eqqaaniaalluni unnukkorsiutinik ilangeeqataanngikkaluarlutik silarsuaq tamakkerlugu qatanngutigiissuarnik ataatsimooqateqarnertik anersaakkut pissarsiaqarfigilluarpaat, tassami Jehovap ernermi pilliutaa aqqutigalugu naammassisarpassui tupinnangaartut tassani tusarpaat.
15. Tanitat saniatigut allat qanoq ilillutik Jesusip pilliutaa iluaqutigissavaat?
15 Aammattaaq apustili Juánasip agdlagai sujugdlît 2:1, 2-mi ima allassimavoq: ’Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat, uaguinnaanngitsummi, silarsuarmiuttaaq tamarmik.’ Aap, naak Jesusip pilliutaa pingaarnerpaamik Johannes-katersanut, angerutsimut nutaamut ilaasunut, iluaqutissaagaluartoq, taamaattoq aammattaaq ’silarsuarmiut tamarmik’ ajortiminnik isumakkeerfigineqarnissaannik sunniuteqassaaq. Inuit allat inuiaat silarsuaanniitut Jesusillu aavanut kuisamut uppertut tamarmik ’ajortaannut matoorneqaatissaavoq’, nunami paratiisiusumi naassaanngitsumik inuulerumaarnissaannik periarfissiisoq. — Matîuse 20:28.
’Ataatama naalagaaffiani’
16. (a) Paasisat naapertorlugit Jesus kingornusseqatissaalu maannakkut sumiippat? (b) Tanitat sinnerinut amerlangaartunullu ullumikkut suna piumasarisaava?
16 Jesusip apustilini qiimmassartuarsinnarpai, oqaluttuuppaalu ullormik assersuutikkut ’viinnimik nutaamik’ Ataatami naalagaaffiani ajoqersukkani ilagalugit imerfissaminik. (Matîuse 26:29) Ima oqarfigai: ’Ilissi uanni aalajaatsuuvusi usserneqartillunga. Soorlulu Ataatama naalagaaffik uannut pigitikkaa, taama nerrivinni nerillusilu imertussanngortippassi uanga naalagaaffinni issiavissaarsuarnilu issiasussanngortillusi Israelip naggueqatigiissortai aqqaneq-marluusut eqqartuussallugit.’ (Lúkarse 22:28-30) 1914-imi Jesus Naalagaaffiup pissaanerani qilammi kunnginngortinneqarmat, naatsorsuutigisinnaavarput Jesusip kingornusseqatissai amerlanerit, ukiut hundredelikkaat ingerlaneranni katersorneqarsimasut, taamani makitinneqarsimassasut ’issiavissaarsuarni’ taassuminnga issiaqateqassallutik. (1 Tásalûníkamiut 4:15, 16) Ulloq inngilit annikilliornartup angisuup ’anorlersarfiinik sisamanik’ pitoraatsitsiffissaat qanilliartupiloorpoq! Taamanikkussamut anersaakkut Israelikkunnik 144.000-iusunik naqissusersuineq amerlangaartunullu ilaasunik millionilikkuutaanik katersuineq naammassineqarsimalissaaq. Taakku tamarmik ajugaasup akissarsiaanik, inuunermik naassaanngitsumik, piumallutik Jesusitut assuarnaassusertik attattuartariaqarpaat. — sarĸúmersitat 2:10; 7:1-4, 9.
17 ungaluligarlu. (a) Tanitaq ilumoorunnaarpat kimit taarserneqassagunarpa? (b) Qanoq ililluni Vagttårnet-imi 1938-imeersumi ilanngutassiani nunami peqatigiiffimmik teokratiskiusumik pilersitsineq allilerinerlu soqutiginartumik sammineqarpa?
17 Taavami tanitat taakkua ilaasa assuarnaassusertik attakkunnaassagaluarpassuk? Piffissami kingusissumi maani qularnanngitsumik ikittuinnaat ilumoorunnaarniassapput. Ilumoorunnaartut kuiserlaajunngitsunik, ukiorpassuarnili aalajaallutik kiffartornermikkut Jesusip misilinneqarnerini taassuminnga najuisimasunik taarserneqarnissaat ilimanaannaavoq. Anersaakkut qaamarnup 1920-kkunni 1930-kkunnilu Vagttårnet aqqutigalugu qaammaallannerata inngianartup ersersippaa tanitat sinnerinik katersuineq taamanikkut annerusutigut naammassereersimasoq. Taamanikkumiit ’atisaminnik savaaqqap aavanik errorsisimasut’ allamik nuannersumik neriuuteqarput. Taakku Jehovap anersaavata Kristus aqqutigalugu nunami paratiisiusumi ’puilasunut inuunerup piinut’ siulersorpai. — sarĸúmersitat 7:10, 14, 17.
Ilungersortumik qinuneq
18. Jesusip qinnutaa Juánase, kapitali 17-imiittoq, qanoq kimittuumik ilinniarfigisinnaavarput?
18 Jesusip ajoqersukkanilu eqqaaniummik unnukkorsiornertik qinnummik ilungersortumik, Juánase 17:1-26-mi nassaassaasumik, naggaserpaa. Siullermik qinnutigaa toqu tikillugu assuarnaattuaruni Ataatami naalannarsisissagaani. Taamaalilluni aammattaaq Jehova naalannarsisinneqassaaq aqqalu illernarsisinneqassalluni — kanngunarsagaanernik tamanik minguiagaalluni. Inuummi naammalluinnartup Jesusip uppernarsarpaa inuk Guutip pinngortitaa misilinneqarnermini allaat artornarnerpaami assuarnaassutsiminik attassiuaannarsinnaasoq. (5 Moses 32:4, 5; Eprîarit 4:15) Jesusip pilliutitut toqua aammattaaq Adamip kinguaavinik annertuumik periarfissiivoq. Jesus oqarpoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ Pingaaruteqartorujussuuvoq Jehova Guuti erneralu, Guutip savaaraa, Jehova qutsissisissinnaaqqullugu inuiaallu annassinnaaaqqullugit inuunermik pilliutiginnissimasoq, ilisarilissallugit. (Juánase 1:29; 1 Pîtruse 2:22-25) Illit asannittumik pilliut tamanna ima pingaartitsigaajuk Jehovamut taassumunngalu kiffartornermut naleqaqisumut tunniulluinnarnissamut piumassuseqarlutit?
19. ’Sinneruttut’ amerlangaartullu qanoq ilillutik ataasiussuseq naleqangaartoq nuannaarutigisinnaavaat?
19 Jesusip Ataatani illernartoq aammattaaq qinnuigaa ajoqersukkani silarsuarmut ilaanatik ersersitsisut Guutillu oqaasiinik maleruaallutillu tamakkuninnga ilumoortutut isiginnittut, Ataatamillu erneranillu ataasioqatiginnittut, paareqqullugit. Qinnut tamanna ulloq manna tikillugu tupinnaannartumik akineqannginnerpa, tassami tanitat sinneruttut amerlangaartullu asaqatigiillutik isumaqatigiillutillu kiffartoqatigiipput silamiullu peqqarniisaarniarnerinut ajussusiannullu akuliunnaveersaartuullutik? Jesusip oqaatsiminut naggasiutai Ataataata, Jehovap, nuannaarutigisimassaqai: ’Aqqillu taakkununnga nalunaarpara nalunaaqqikkumaarlugulu, uannut asannissutsit taakkunaneeqqullugu, uangalu taakkunaneeqqullunga.’ — Juánase 17:14, 16, 26.
20. Sooq ukiumi 33-mi nisanip 14-ia ilumut ulluua eqqaamasarialik?
20 Getsemanemukarnerminni Jesusip ajoqersukkani ineriartornartunik oqaluuttuarpai. Taavali akeqqaminit tiguneqarpoq. Jehovamik kanngunarsaaneq pissutigalugu Jesusip timikkut anniarnera aliasungaarneralu oqaasiinnaat atorlugit nassuiarneqarsinnaanngilaq. Pisuni tamakkunani tamani maligassaalluartumik assuarnaassutsimik ersersitsivoq. Jesus naggatissani tikillugu, unnuaq tamaat ullorlu tamaat, nikallujuittuarpoq. Nassuitsumik ersersippaa naalagaaffini silarsuarmit matumannga pinngitsoq. Anerningernissanilu sioqqutilaarlugu ima nillerpoq: ’Naammassivoq!’ (Juánase 18:36, 37; 19:30) Silarsuarmut ajugaanera tamakkiisuuvoq. Ulloq taanna, ukiumi 33-mi nisanip 14-ia, ilumut tassaavoq ulloq eqqaamasarialik! (wD 1/3 92)
[Quppernerup ataani ilanngussaq]
a Ulloq-V (tuluttut: Victory Day): Ulloq Iligiit ajugaanerata Sorsunnersuup Aappaanik kipititsiffia; ulloq-VE (Europa) aamma ulloq-VJ (Japan).
Qanoq akissavit?
□ Maniguunneq asanninnerlu pillugit Jesusip ajoqersukkani qanoq ilinniartippai?
□ Jesus qanoq ililluni ’aqqutaallunilu sallusuissutaallunilu inuussutaalerpa’?
□ Angerutsimik nutaamik suna siunertaava?
□ Tanitat sinneruttut amerlangaartullu qanoq ataasiussuseqarlutillu asaqatigiittuuppat?
[Qupp. 17-mi ungalusaq]
Ilisimassut Salomonimit annermeersoq
Ilanngutassiani „Organisation“-imik („Peqatigiiffik“) qulequtalinni Vagttårnet 1. aamma 15. augusti 1938-meersuni teokratiskiusumik aaqqissuussaanermi Jehovap Nalunaajaasuisa ulloq manna tikillugu malittarisaanni najoqqutassat tunngaviusut aalajangersarneqarput. Ilanngutassiani taakkunani piffissami maluginiarnartumi, peqatigiiffeqarnikkut ajoqersuutitigullu allanngortitsiortorfiusumi 1919-imiit aallartittumi, pisimasut malunnarnersaat eqqartorneqarput. (Jesaja 60:17) Piffissaq ukiunik 20-nik sivisussusilik tamanna Vagttårnet-ip assersuuppaa ukiunut 20-nut Salomonip Jerusalemimi naalaffiliorlunilu kunngip illussaarsualiorfigisaanut, tamatumunngalu atatillugu ima allalluni: „Bibelimi ersersinneqarpoq Salomon ukiuni 20-ni sanareerami nuna tamakkerlugu ’sananissaq’ aallartissimagaa. (1 Kunngit 9:10, 17-23; 2 Israelikkut 8:1-10) Taava Dronningi Sabameersoq ’nunap isuanit aggersimavoq Salomonip ilisimassusia tusariartorlugu’. (Matîuse 12:42; 1 Kunngit 10:1-10; 2 Israelikkut 9:1-9, 12) Tamanna ima apererusulersitsivoq: Jehovap innuttai nunamiittut siunissami qaninnerusumi, sunik atugassaqarpat? Tamanna tatiginnilluta utaqqigutta paasissavarput.“ Tatiginninneq tamanna asuliinnaanngilaq. Teokratiskimik siulersorneqarnikkut silarsuaq tamakkerlugu anersaakkut annertoorujussuarmik sanaartornerup kingunerisimavaa inuit millioninit sisamanit amerlanerusut amerlangaartunut ilaasut katersorneqarsimanerat. Dronningi Sabameersoq assigalugu inuit tamakku nunap isuinit aggiasimapput — tassa avinngarusimanerpaanit — Salomonip annerup, Jesus Kristusip, ilisimassutaa „inussiaq ilumoorlunilu silatooq“ aqqutigalugu imminnut tusarliunneqartoq tusariartorlugu. — Matîuse 24:45-47, NV.