Bibelimi qanoq oqaatigineqarpa?

Apersortinneq — Kristumiunut piumasarisaava?

’Saammaannermi inuuneq kuisikkatta pisarput angeqqinnermi inerittarpoq. Meeqqatut nammineq oqartussaassuseqanngeriarluta apersortinnitsinni Kristusip saammaasup sakkutoorilersarpaatigut. Angeqqinneq kuisinnerup naammassineraa.“ — Katuullit katekismusiat.

APERSORTINNEQ — imaluunniit angeqqinneq — naaggaartut amerlanersaasa sakramentetuta isiginngilaat. Upperisarsiornermilli ilisimatusarsimasoq katuuliusoq, Thomas Aquinomeersoq, 1200-kkunnili allassimavoq ’apersortinneq tassaasoq kuisinnerup sakramenteata naammassineqarnera’. Mannali apeqqutaalerpoq: Kristumiut siulliit apersortittarsimappat? Ullumikkut kristumiut ileqqulersuummik persuarsiornartumik tamatuminnga maleruaanissaat piumasarisaava?

„Iivangkiiliumi takussutissaqanngilluinnarpoq Jesus nammineq angeqqinnerup sakramenteanik atuutilersitsisimanersoq,“ New Catholic Encyclopedia-mi nassuerutigineqarpoq. Taavami sooq ilagiinnit piumasarineqarsimava inuit kuisimasut ileqqulersuummik aamma allamik aqqusaagaqaqqissasut, immaqa niaqqumikkut attorneqarnermik uuliamillu taninneqarnermik ilalimmik, ilagiinnut ilaasortavinngorsinnaaqqullugit?

Qanoq ililluni apersortittoqartalerpa?

Meeraaqqanik kuisitsisalerneq aamma allamik sakramenteqalernermut pissutaanerpaanut ilaavoq. „Ajornartorsiutit naalungiarsuit kuineranni pilersartut misiutiginagit, kuisimasut inuuneranni kingorna ’angeqqitsinnerisigut’ kuisinnerup pingaaruteqassusianik . . . ilagiinnit eqqaasinneqarniarput,“ atuakkami Christianity-mi taama allassimavoq. Ilagiinni lutherikkuusuni qallunaani apersortittarneq 1736-mi inatsisitigut atuutilersitaavoq, kingornali pinngitsaaliissutaajunnaarsinneqarluni. Apersortinneq kuisinnerup pingaaruteqassusianik uppertunik ilumut eqqaasitsisuua, imaluunniit kuisinneq pillugu sallusuissummik kimikillisitsisuuinnarpa?

Ilumoortoq tassaavoq meeraaqqanik kuisisarneq Bibelimik tunngaveqanngimmat. Naalungiarsuk niaquatigut imermik masatsilaaginnarlugu ajortimit kingornussaasumit annaanneqarsinnaanngilaq; taamaallaat Kristus Jesusip utertitsissutitut pilliutaanut uppernikkut annattoqarsinnaavoq. (Juánase 3:16, 36; 1 Juánase 1:7) Imermi kuisinneq tassaavoq Jesus aqqutigalugu Jehova Guutip piumasaanik iliorniarluni tunniulluinnarsimanermut qallikkut takussutissaq. Imermi kuisinneq ajoqersukkanut — ’uppertunut’ — atortuuvoq, meeqqanuunngitsoq. — Matîuse 28:19, 20; apustilit suliait 8:12.

„Kuisinneq sukkut atorunnaartarpa angeqqinnerlu sukkut atuutilertarpa?“ New Catholic Encyclopedia-mi aperisoqarsimavoq. Qinerlerfissiaq akivoq: „Immaqa immikkooruteqartinniarpallaartariaqanngilavut, itsarmi ilagiit ataasiinnarmik ileqqulersuuteqarsimapput.“ Aap, ukiuni hundredelinni siullerni ileqqulersuut ataasiinnaq ilagiinnut kristumiunut ilaasortannguissutaasarsimavoq, tassalu kuisinneq. — apustilit suliait 2:41, 42.

Aatsaat apersortinnikkut niaqqukkullu attorneqarnikkut anersaaq illernartoq pineqarsinnaava? Naagga, ilagiinni kristumiuni siullerni taamaallaat immikkut toqqagaanermi imaluunniit anersaap tupinnartuliorsinnaatitsinerinik ingerlatitseqqinnermi niaqqukkut attorneqarneq atorneqartarsimavoq. Anersaap tupinnartuliorsinnaatitsineri apustilit toquneranni peeruppoq. (1 Korintumiut 13:1, 8-10) Tassa niaqqukkut attorneqarneq imermi kuisinnermut atatillugu atorneqartarsimanngilaq, kisianni kristumiutut oqaluussilluni sulinermi immikkut ittunik suliaqartussanik toqqaanermi. (apustilit suliait 6:1-6; 13:1-3) Taamaattumik apustilit niaqqukkut attuisarsimanerata apersortinnermi ingerlateqqinneqartarneranik eqqarsaat, Sakramentbogen naapertorlugu, ’tarnermik piiarneqarsinnaanngitsumik ilisarnaataalersartoq taamaattumillu uteqqinneqarsinnaanngitsoq’, misissueqqissaaraanni atorsinnaanngilaq.

Apustili Paulus mianersoqqusisimavoq Bibelimi ilumoortut tunngaviusut qimannaveersaaqqullugit: ’Qaqugumi ajoqersuut peqqissinartoq ajorilerumaarpaat pilerigisaminnillu ajoqersortissarpassuarsiorumaarlutik siutimik nuannarisaat missiliorlugit; siutitillu sallusuissummik tunussisillugit oqaluttuapalaanut saakkumaarput.’ (2 Timûtiuse 4:3, 4) Apersortinnermilli pingaartitsisut Bibelimi pisimasut marluk apersortittarnermut tunngavigitinniartarpaat.

Bibelimi tunngavissaqarpa?

apustilit suliáinik agdlagkat 8:14-17-imi eqqartorneqartoq apersortittarnermut tunngavigitinniarneqartarpoq. Eqqartorneqartorli, anersaamik illernartumik tunineqarnermut atatillugu niaqqukkut attuineq, immikkut ittuuvoq. Sooq? Samariamiut juutinut ilasiaanngimmata. Taakku israelikkuunngitsuni siullersaallutik ilagiinnut kristumiunut ilanngutsitaasimapput. Ajoqersukkap Filipip oqaluussiffigereermatik Samariamiut ’angutit arnallu kuisissimapput’, ingerlaannarli anersaamik illernartumik tunineqanngillat. (apustilit suliait 8:12) Sooq?

Eqqaamajuk ’qilammiup naalagaaffiata matuersaataanik’ Kristus Jesusip tunisaa, tassa isumataartunut inuiannit assigiinngitsuneersunut ’qilammiup naalagaaffianik’ oqaluussissutiginnittussatut siullertut immikkut pisinnaatitaaffiligaa, tassaammat Peter. (Matîuse 16:19) Taamaattumik aatsaat Peter Johannesilu Samariamukarmata ajoqersukkallu juutiunngitsut taakku niaquisigut attorlugit ’qilammiup naalagaaffianut’ isersinnaatitaalernerannut ersiutitut anersaaq illernartoq taakkununnga kuineqarpoq.

Inuit ilaat isumaqarput apustilit suliáinik agdlagkat 19:1-6-imi oqaluttuarineqartoq uppernarsaataasoq kristumiut kuisinnermik kingorna immikkut ittumik ileqqulersuuteqarsimanerannut. Ersaripporli ajoqersukkut Efesusimiut tassani eqqartorneqartut anersaamik illernartumik pisimannginnerannut pissutaasoq tassaasoq ’Johannesip kuissutaanik’, atorunnaarsitaareersimasumik, kuisissimanerat. (Takujuttaaq apustilit suliáinik agdlagkat 18:24-26.) Tamatuminnga nassuiaanneqaramik erniinnaq ’Naalakkap Jesusip aqqanut kuisipput’. Paulusillu ’assamminik patippai’, imaluunniit attorpai, Guutip anersaavata illernartup tupinnartuliorsinnaatitsinerisa ilaannik pisinnaaqqullugit Guutillu anersaakkut ernerisut isigineqalersinnaaqqullugit. — Rûmamiut 8:15, 16.

Allassimaffinni eqqartorneqartut tamakku pillugit New Dictionary of Theology-mi ima allassimasoqarpoq: „Ileqqulersuuteqanngilaq pisimasunit tamakkunannga aallaaveqartunik; immaqalu najoqqutassatut isigineqarsinnaagaluartut, taamaattoq nalorninarpoq kristumiutut tunniulluinnarnermi imermi kuisinnertut ileqquusussatut isigineqarsinnaanersut. . . . apustilit suliáinik agdlagkat imermi kuisinnernik niaqqukkut attorneqarnermik malitseqanngitsunik oqaluttuanik arlaqaqisunik nassaassaqarput (taamaattumik allassimaffinni eqqartorneqartut immikkut ittuupput).“ Aap, taamaattumik pisut immikkut ittut pissutsini immikkut ittuni pisut eqqartorneqarput.

„Ileqqulersuut ’angeqqinnermik’ taaneqartartoq tassaalersimavoq ’ileqqulersuut teologiissarsiortoq’,“ New Dictionary of Theology-mi erseqqissarneqarpoq. Apersortinneq, imaluunniit angeqqinneq, tassaavoq tassaajuassallunilu ileqqulersuut Bibelimik tunngaveqanngitsoq, ajoqersuutinit ilumuunngitsunit pisoq, kristumiunullu piumasarisaanngilluinnartoq. (gD 8/8 91)

[Quppernerup ataani ilanngussaq]