“Ол... тірілердің Құдайы”

Өлім Құдайдан күшті ме? Әрине, жоқ! Қалайша өлім не басқа бір “жау” “Құдіреті шексіз Құдайдан” күшті болуы мүмкін? (Қорынттықтарға 1-хат 15:26; Мысырдан шығу 6:3). Құдай өлгендерді қайта тірілту арқылы өлімді жоя алады және ол мұны жұмақ орнаған жаңа дүниеде істеуді уәде етедіa. Бұл уәде сенуге тұрарлық па? Бұл ретте Иса пайғамбардың сөздері біздің жүрегімізге үміт отын сыйлайды (Матай 22:31, 32 оқыңыз).

Қайта тірілуге сенбейтін саддукейлерге Иса пайғамбар: “Қайта тірілгендер жөнінде Құдайдың сендерге “Мен Ыбырайым, Ысқақ және Жақыптың Құдайымын” дегенін оқымап па едіңдер? Ол өлгендердің емес, тірілердің Құдайы”,— деген. Иса бұл жерде б. з. б. 1514 жылы Құдайдың жанып тұрған бұта арқылы Мұсаға айтқан сөздеріне меңзеген еді (Мысырдан шығу 3:1—6). Исаның айтуынша, Ехоба Құдайдың “Мен Ыбырайым, Ысқақ және Жақыптың Құдайымын” деген сөздері қайта тірілуге қатысты уәденің міндетті түрде орындалатынын білдіреді. Қалайша?

Алдымен мәнмәтінге назар аударайық. Ехоба Мұсаға тіл қатқан уақытта Ыбырайым, Ысқақ және Жақыптың өмірден өткендеріне көп жыл болған еді. Мысалы, Ыбырайым 329 жыл, Ысқақ 224 жыл, ал Жақып 197 жыл бұрын көз жұмған болатын. Алайда Ехоба олардың “Құдайы болғанмын”,— деп емес, “Құдайымын”,— деген еді. Демек, Ехоба бұл қайтыс болған қызметшілерін әлі де тірі деп қарастырған. Неге?

Иса пайғамбар: “Ол [Ехоба] өлгендердің емес, тірілердің Құдайы”,— деп түсіндірді. Бұл сөздердің астарында не жатқаны туралы ойланып көріңізші. Қайта тірілу мүмкін болмағанда, Ыбырайым, Ысқақ және Жақып мәңгілік бойы өлімнің құшағында қалар еді. Ал егер олар қайта тірілмесе, Ехоба өлілердің Құдайы болғаны ма? Ол өзінің адал қызметшілерін өлімнің құрсауынан босатуға дәрменсіз болса, өлім Ехоба Құдайдан күштірек дегенді білдірер еді ғой!

Өмірден өткен Ыбырайым, Ысқақ және Жақып сияқты Құдайдың басқа да адал қызметшілері туралы қандай тұжырым жасауға болады? Иса сенімділікпен: “Ол үшін бәрі тірі”,— деп айтқан (Лұқа 20:38). Иә, Ехоба қайтыс болған адал қызметшілерін қайта тірілтемін деген уәдесіне берік болғаны сонша, оларды тірі адамдар ретінде қарастырды (Римдіктерге 4:16, 17). Ехоба қайтыс болған қызметшілерін қайта тірілтетін уақыт келгенше, олардың бәрін жадында ұстайды.

Қайтыс болған жақындарымызбен қайта қауышуға деген үміт жүрегіңізге жылы тие ме? Олай болса, Ехобаның өлімнен әлдеқайда күшті екенін есте ұстағайсыз. Өлгендерді қайта тірілтуге деген уәдесін орындауға Ехобаға ешнәрсе де бөгет бола алмайды. Неге қайта тірілу жайлы уәде мен оны жүзеге асыратын Құдай жайлы көбірек мәлімет алмасқа? Осылай ететін болсаңыз “тірілердің Құдайы” Ехобаға жақындай аласыз.