Азия мен Таяу Шығыс

Бір адамның арқасында көп адам шындыққа келді

Филиппинде Джонатан деген Куәгер дәрігерге кірмек болып, күтіп отырады. Қабылдау бөлімінде отырған әйел оның ұқыпты киінгенін байқап: “Сіз сақтандыру агентісіз бе?”— деп сұрайды. Джонатан оған өзінің Ехоба куәгері екенін, ал мұнда емделуге келген Куәгерге қолғабыс етіп жүргенін айтады. Бұған таңғалған Лайла есімді әлгі әйел жақында қайтыс болған әкесінің “Күзет мұнарасын” үзбей оқып тұрғанын айтады. Сонда Джонатан оған Жохан 5:28, 29-ды оқып, кейін “Өлген сүйіктілер үшін қандай үміт бар?” деген буклетті береді.

Келесі жолы ауруханаға келгенде, Джонатан оған тағы әдебиеттер әкеліп береді. Кейін оны бір әйел бауырласқа табыстап, Лайла Киелі кітапты зерттеуге келіседі. Көп ұзамай оның үй ішінің бәрі — күйеуі, сіңлісі, анасы, зерттей бастайды.

Бірде көршісі Роуз Лайладан неге үйіне көп адам келіп жүргенін сұрайды. Лайла оған Ехоба куәгерлерімен Киелі кітапты зерттеп жүргенін айтады. Сөйтіп, Роуз да зерттей бастайды. Кейінірек ол ауылда тұратын сіңлісі Абигейлге барғанда, аузының суы құрып Киелі кітаптан біліп жатқандары жайлы айтып береді. Сонда ол да қызығып кетіп, зерттегісі келетінін айтады. Роуздың анасы да Киелі кітапты зерттеуге келіседі.

Лайла жақында өткен аймақтық конгресте шомылдыру рәсімінен өтті. Оның анасы да қазір шомылдыру рәсімінен өткен. Көршісі Роуз болса, сіңлісімен бірге былтыр өтті. Ал анасы қазір қауым кездесулеріне жүйелі түрде келіп тұрады. Лайланың үй ішінің кейбірі зерттеуді жалғастырып жатыр. Осылайша, бір адамның арқасында көп адам шындыққа келді!

Технологияның көмегімен құлағы естімейтіндерге уағыздау

Шри-Ланкадағы ым тілі танабында қазір зор өсім болып жатыр. 2015 жылы бауырластардың қолында бірнеше тілім қағазға жазылған 80-ге жуық саңырау адамның ғана мекенжайы болатын. Содан бері Шри-Ланкада ым тілінде алғашқы қауым құрылды. Сондай-ақ 420-ға жуық адамның есімдері мен мекенжайларының GPS координаты компьютерлік дерекқорға енгізілді. Бауырластар сол адамдардың 80 пайызымен байланысты. Олардың кейбірімен бетпе-бет көріссе, кейбірімен бейнебайланыс не хабарлама арқылы әңгімелесті. Бір миссионер ерлі-зайыпты былай деп жазды: “Қазір бізде саңырау жариялаушыларға беретін учаске бар. Бұрын олар өздері танитын адамдарға ғана уағыздайтын”.

Мемлекеттік қызметкердің ризашылық хаты

Моңғолиядағы бауырластар -30°C суыққа қарамай, ірі қалалардағы көпшілік орындарында белсене уағыздайды. Бірде бір шенеунік әдебиет арбасынан бірнеше басылым алып, кейінірек ризашылық хатын жазып жіберді. Ол былай деп жазды: “Мен буддиспін. Бірақ жан-жақты білім алуға тырысамын, өйткені өмірде адам бір ғана жолмен жүрмей, басқаларын да танып-білу керек деген қағиданы ұстанамын. Жұртшылыққа арналған бірнеше әдебиеттеріңізді оқыған соң, ризашылығымды білдіруді ұйғардым. Осындай пайдалы ақпаратты жеткізу үшін қанша уақыт пен күш жұмсағандарыңыз көрініп-ақ тұр. Әдебиеттеріңізден бір түсінгенім — Киелі кітапты әрбір адам оқып шығу керек екен. Онда ақиқат жазылған, өмірде шынымен пайдасын тигізетін ақыл-кеңес бар. Әдебиеттеріңізді моңғол тіліне аударып тер төккендердің барлығына рақметімді айтқым келеді. Бұған қоса, аптап ыстыққа не қақаған суыққа қарамай, оларды адамдарға үлестіріп жүргендердің барлығына да алғысым зор”.

Ехоба оның дұғасын естіді

Гонконгта Брет есімді ізашар бір жас жігітпен әңгіме бастап, “Отбасы бақытты болу үшін не қажет?” деген буклетті береді. Буклетті көргенде, жігіт көңілі босап, көзіне жас алады. Ол Куәгерлер отбасында өскенін, бірақ 16 жасында үйінен қашып кеткенін айтады. Бес жыл бойы үй-күйсіз көше қаңғып жүріп, ол нашақор болып кеткенін де жасырмайды. Оны бір қайырымдылық ұйымы тауып алып, қол ұшын берген екен.

Ол сол күні таңертең Құдайға: “Егер жас кезімдегі дінім тура болса, бүгін маған бір белгі көрсетші”,— деп дұға еткенін айтты. Осы жағдайды ол дұғасына жауап деп есептеді. Бауырлас екеуі сол маңайдағы кофеханаға барып, “Ехобаға қайта орал” деген кітапшаны қарастырады. Сол күні кешке бұл жігіт Францияға қайтпақ болғандықтан, олар хабарласып тұруға келіседі. Біраз уақыт өте әлгі жігіт Бретке: “Бауырласым, Ехоба менің дұғаларымды естіді. Мен осы жексенбіде Патшалық сарайына барамын”,— деп жазды. Ол Францияда Ехоба куәгерлерін тауып, зерттеу сабағын бастады, қауым кездесулеріне де баратын болды.