Исадан тәлім аламыз

Құдай Патшалығы

Құдай Патшалығы деген не?

Құдай Патшалығы — бүкіл жер бетіне билік ететін үкімет. Иса пайғамбар: ‘Сонымен Құдайға мына іспетті мінажат етіп сиыныңдар: Патшалығың осында орнасын! Сенің еркің көкте орындалғандай, Жер бетінде де орындала берсін!’— деген (Матай 6:9, 10; Даниял 2:44).

Құдай Патшалығында кімдер билік етеді?

Иса Құдай Патшалығының Билеушісі болу үшін туылған. Жәбірейіл періште Исаның анасына: “Құдай Ие Оған арғы атасы Дәуіттің тағын сыйлайды”,— деген (Лұқа 1:30—33). Бұған қоса, Иса шәкірттерінің кейбірін өзімен билік ету үшін таңдап алған. Ол елшілеріне былай деген: “Қиындыққа ұшыраған кездерімде Менімен бірге болған сендерсіңдер. Сондықтан Әкемнің Мені Патша болуға тағайындағаны сияқты, Мен де сендерді билік жүргізуге тағайындаймын” (Лұқа 22:28, 29; Даниял 7:27). Исамен бірге бас-аяғы 144 000 шәкірті билік етеді (Аян 5:9, 10; 14:1).

Патшалық қайдан билік жүргізеді?

Құдай Патшалығы көктен билік ететін болады. Иса шәкірттеріне былай деген: “Барып, [көктен орын] дайындап болғаннан кейін қайтып келіп, Өзім болатын жерде сендерді де болсын деп қасыма алып кетемін. ...Себебі Мен Әкеме барамын” (Жохан 14:2, 3, 12; Даниял 7:13, 14).

Құдай Патшалығы зұлымдармен не істейді?

Иса жер бетін зұлым адамдардан тазартады. Ол былай деген: ‘Құдай тағайындаған Билеуші [Иса] қасиетті періштелерін ертіп ғаламат ұлылықпен көктен келген кезде Өзінің салтанатты тағына отыратын болады. Барлық халықтар Оның алдына жинап әкелінеді. Ол адамдарды екі топқа бөледі. Сонымен бұлар [зұлымдар] мәңгілік азап шегуге кетіп, ал әділдер мәңгілік өмірді иемденетін болады’ (Матай 25:31—34, 46).

Кімдер Патшалықтың жер бетіндегі азаматтары болады?

Иса: “Кіші пейілділер бақытты: Олар жерді иемденетін болады!”— деген (Матай 5:5; Забур 36:29; 71:8). Жер бетінде тек бір-бірін сүюді үйренген адамдар тұрады. Шәкірттеріне Иса былай деген: “Сендерге бір жаңа өсиет айтамын: біріңді бірің жақсы көріңдер! Мен өздеріңді сүйгендей, сендер де бір-біріңді сүйіңдер! Менің шәкірттерім екендіктеріңді елдің бәрі өзара сүйіспеншіліктеріңнен білетін болады” (Жохан 13:34, 35).

Жер бетіндегі адамдар үшін Құдай Патшалығы не істейді?

Иса бүкіл адамзатты ауру-сырқаудан айықтырады. Жерде болған кезінде ол жиналған халыққа “Құдай Патшалығы туралы уағыз айтып, ауруынан айығуға мұқтаждарды сауықтырды” (Лұқа 9:11). Елші Жохан аянда қайта тірілген Исаны көргеннен кейін: “[Мен] жаңа көк пен жаңа жерді көрдім... Көктегі тақтан былай деген зор дауысты естідім: — Қараңдар, Құдайдың адамдар арасындағы мекені! Ол барлық көздің жастарын сүртіп тастап жұбатады. Енді қайтып өлім... болмайды”,— деген (Аян 21:1—4).

Құдай Патшалығы жер бетін Жұмаққа айналдырады. Исамен бірге өлімге кесілген бір зұлым кісі оған: “Патшалығыңызға кіргенде мені есіңізге ала көріңіз”,— деп өтінген. Сонда Иса әлгі кісінің өзімен бірге Жұмақта болатынын айтқан (Лұқа 23:42, 43; Ишая 11:4—9).

“Киелі кітап шын мәнінде неге үйретеді?”a кітабының 8-тарауынан көбірек мәлімет алуға болады.

[Сілтеме]