АЛАСАПЫРАН ЗАМАН

4 | Үмітіңізді үзбеңіз

БҰЛ НЕГЕ МАҢЫЗДЫ?

Дүниедегі дүрбелең адамның тән саулығын да, жан саулығын да аяп жатқан жоқ. Өмірден түңіліп, ертеңнен үміт үзгендер аз емес. Мысалы:

Кейбірі болашаққа қолды бір-ақ сілтеп қоя салады.
Басқалары уайымдарын спиртті ішімдікпен не есірткімен басуға тырысады.
Біреулері: “Бұлай өмір сүргенше, өлгенім артық”,— деп, өздеріне қол жұмсауды ойлай бастайды.

Нені ескерген жөн?

Қиыншылықтардың кейбірі уақытша, тіпті сіз ойламаған жерден жағдайыңыз оңалып кетуі мүмкін.
Оңалмаған күнде де, оған төтеп берудің амалдары бар екенін ұмытпаңыз.
Киелі жазбалар адамзаттың барлық қиындықтары келмеске кететінін уәде етіп, берік үміт береді.

Сақтанғанды Құдай сақтайды

Киелі жазбаларда: “Ешқашан ертеңгі күнді ойлап уайымдамаңдар, өйткені ертеңгі күннің өз уайымы бар. Әр күннің қиыншылығы өзіне жеткілікті”,— делінген (Матай 6:34).

Мәселені туған бойда шешіп отырыңыз. Алдағы күнді уайымдап сарғая бермеңіз, әйтпесе бүгінгі күннің әуресі шешілмей қалып қояды.

Қара аспанды төндіріп, әлі болмаған нәрсені уайымдап кетсек, жүгімізге жүк қосып аламыз, үмітіміз де үзіле бастайды.

ҚАЙТІП ӨТПЕКПІЗ? Ақыл қалта

ҮНЕМІ ЖАҚСЫ ОЙЛАР ОЙЛАҢЫЗ

Киелі жазбаларда: “Мұңшыл адамның барлық күні қайғылы, Көңілді жанның әр күні той-думан”,— делінген (Нақыл сөздер 15:15). Жағдайдың жаман жағын ойлай берсеңіз, көзіңіз тұмшаланып, шығар жолды көрмей қаласыз. Ал оң көзбен қарасаңыз, шешімін тауып, шара қолдана бастайсыз.

Жаңалықтар көретін уақытыңызды шектеңіз.
Күнде кешке қандай 2-3 жайтқа риза болғаныңызды жазып отырыңыз.
Атқарылу керек істердің тізімін жасаңыз, бірақ тек сол күні істей алатыныңызды жазыңыз. Үлкен істерді бөліп-бөліп жасаңыз, сонда күннің аяғына қарай біраз нәрсе тындырып тастағаныңызды көресіз.

ЖЫЛАМАҒАН БАЛАҒА СҮТ ЖОҚ

Киелі жазбаларда: “Оқшауланған жан қара басын ойлар, Даналық атаулыдан бас тартар”,— делінген (Нақыл сөздер 18:1). Терең ордан досымыздың қолынан ұстап шықпасақ, жалғыз өзіміз шыға алмаймыз.

Жақындарыңыз бен достарыңыздан көмек сұраңыз.
Өзіңіз де оларға көмек қолын созуға асық болыңыз. Сонда өз проблемаларыңыздан бас көтере алмайтын жағдайға жетпейсіз.
Үмітіңіз сөгіліп, өмірден түңіліп кетсеңіз, дәрігерге қаралғаныңыз дұрыс болар. Өйткені мұндай күй кейде депрессия сияқты аурулардың себебінен болады. Ем алғанның арқасында көп адам өздерін әлдеқайда жақсы сезінгенa.

a “Ояныңдар!” журналы қандай да бір ем-шара түрін ұсынбайды.

Киелі жазбалардағы үміт өрге тартады

Ежелде бір пайғамбар Құдайға: “Сенің сөзің — шырағдан, аяғыма жарығын, жүрер жолыма нұрын шашады”,— деп жырлаған (Зәбүр 119:105). Құдайдың сөзі — Киелі жазбалардың шырағданға теңелуі бекер емес.

Қараңғы түнде қолымызда шырағдан болса, аяғымызды қайда басып, қайда жүру керектігін көре аламыз. Даналыққа тұнған Киелі жазбалар да өмірде дұрыс жолды таңдап, дұрыс шешім қабылдауға көмектеседі.

Шырағданның, мысалы қолшамның, жарығы алысты көрсете алады. Киелі жазбалар да алда бізді жарқын күндер күтіп тұрғанын айтады.

Киелі жазбалар — қасиетті кітап. Ол адамзаттың о бастан бергі тарихын баяндап қана қоймай, кемел келешекке деген мызғымас үміт сыйлайды. Онда мына сұрақтардың жауабы бар:

Қалай?

Адамдардың бүкіл қиыншылығы қалай басталды? “Бір адам арқылы дүниеге күнә, ал күнә арқылы өлім келді, осылайша адамдардың бәрі өлетін болды, себебі бәрі күнә жасады” (Римдіктерге 5:12).

Неге?

Үкіметтер қиыншылықтарды неге шеше алмай отыр? “Пенденің өмір жолы өз билігінде емес екенін білемін. Адам тіпті өз қадамына бағыт бере алмайды” (Еремия 10:23). Әлемнің бүгінгі ахуалы осыны көрсетіп отыр, солай емес пе?!

Құдай не істейді?

Әлемдегі жағдайды реттеу үшін Құдай не істейді? “Құдай олардың көзіндегі әрбір жасты сүртіп тастайды, енді қайтып өлім, жоқтау, зар еңіреу мен ауру болмайды” (Аян 21:4).