Mono Bikaka nde Yehowa Kutomisa Bikalulu na Mono

Mono monaka bima mingi yina bendaka dikebi na mono kansi bampangi yina vandaka kusala na biro yina bendaka dikebi na mono mingi kuluta. Sambu kuna bampangi ya baleke vandaka kusala kisalu yo yina mosi konso kilumbu. Bampangi vandaka ve kusikisa bo mpi kutudila bo dikebi mbala na mbala. Ata mpidina, bo vandaka na kiese mpi bo vandaka kusepela ti kisalu yina. Mbandu na bo longaka mono na kusadila Nzambi ti kudikulumusa.

Yehowa me sadisaka mono bamvula yai yonso na kutomisa bikalulu na mono. Kansi bika mono tela beno ntete mambu ya mono salaka sambu na kuzaba kieleka ntangu mono vandaka kusambila na dibundu ya Buda.

MONO BANDAKA KUSOSA KUZABA NZAMBI YA KIELEKA NA KILEKE

Mono butukaka mpi yelaka na mbanza Chicago, na provense ya Illinois, na États-Unis. Beto butukaka bana iya mpi mono kele mwana ya ntete. Bibuti na mono katukaka na Japon mpi kwisaka kuzinga na Chicago sambu bo vandaka kuyindula nde bo ta kuma ti luzingu ya mbote kibeni na États-Unis. Bo vandaka kuzola nde beto bana na bo kulonguka na banzo-nkanda ya mbote kibeni sambu na kuvanda ti luzingu ya mbote.

Bibuti na mono vandaka bandimi ya ngolo ya dibundu ya Buda. Mama yelaka na nzo mosi yina vandaka ti tempelo ya nzambi Buda. Papa na yandi ti bampangi na yandi zole ya babakala vandaka mimpe na dibundu ya Buda. Ntangu mono vandaka mwana, dibundu ya Buda vandaka mfunu mingi na dibuta na beto. Kana mono me katuka na nzo-nkanda, kima ya ntete yina mono vandaka kusala vandaka kuyoka ndumbu mpi kupesa loso ti masa na kiteki ya nzambi Buda yina vandaka na nzo na beto. Konso Lumingu, beto vandaka kukwenda na tempelo ya Buda sambu na kuyimbila kiteki ya mutindu mosi ti yina vandaka na nzo na beto kansi kiteki yina kuna vandaka nene mpi bo pakulaka yo wolo.

Mono ke yibuka ntangu mono vandaka ti bamvula kiteso ya 7, mono talaka mingi kiteki yina vandaka na nzo na beto mpi mono kuditubilaka nde: ‘Inki ta kumina mono kana mono me fwa?’ Na dibundu ya Buda, bo me longaka beto nde kana muntu me fwa yandi ke kwendaka kuzinga na insi ya bampeve. Yo yina, mono bakisaka nde kilumbu kele mono ta fwa mpi mono ta kwenda kuzinga na insi ya bampeve mpi nde mono ta zinga diaka ve ti bantu na ntoto. Yo pesaka mono mawa. Na mbala mosi, mono kumaka kudiwa kibeni kukonda lutaninu.

Ntangu mono lungisaka bamvula kiteso ya 15, mono kumaka kumona kukonda mfunu mambu ya dibundu ya Buda. Kima mosi ya mfunu mpenza kondaka na luzingu na mono. (Mat. 5:3) Mono vandaka kuditubila nde mbala ya nkaka kele ti Nzambi nkwa-ngolo yonso. Yo yina, mono vandaka na mfunu ya kuzaba yandi. Mono vandaka kuditubila nde mbala ya nkaka Biblia kele ti bamvutu na bangiufula na mono sambu na Nzambi, luzingu mpi lufwa. Yo yina, mono sumbaka Biblia ya kusadila dezia ya roi Jacques na kisika yina bantu ya dibundu ya Buda vandaka kusala feti ata yo vandaka ve kisika yina mono lendaka kuzwa yo.

Ntangu mono lungisaka bamvula 17, mpangi-bakala Wilson Bashou solulaka ti mono na nzila ntangu mono vandaka kutambula ti mbwa na mono. Yandi yulaka mono nde: “Keti nge ke zaba mambu yina Nzambi ke tuba sambu na bilumbu ke kwisa?” Ngiufula yina salaka nde beto solula mingi mambu ya Biblia. Mpangi Wilson tangilaka mono Kusonga 17:1 mpi yulaka mono nde: “‘Bamasa mingi’ yina nkento ya ndumba me vanda na zulu na yo ke monisa nki?” Mono vandaka ve ti mvutu ya kupesa. Yandi tangilaka mono diaka verse 15 ya ke tuba nde bamasa yina ke monisa bantu. Mono yitukaka mingi na kumona nde Bambangi ya Yehowa ke bikaka nde Biblia yo mosi kusadisa bo na kubakisa baverse ya nkaka ya kele mpasi na kubakisa. Na ntwala ya kukabwana ti mpangi Wilson, yandi pesaka mono mukanda La vérité qui conduit à la vie éternelle. Mukanda yai ya kulere bleue sobaka luzingu na mono.

Bilumbu 10 na nima, mono kwendaka na lukutakanu sambu na mbala ya ntete na Nzo ya Kimfumu. Mono ta vila ve ata fioti mutindu bampangi yambaka mono. Banda pana mono yantikaka kukwenda na balukutakanu yonso. Na nima, beto yantikaka kulonguka Biblia ti mpangi Wilson. Mono vandaka kusepela mingi kulonguka Biblia, yo yina bantangu ya nkaka beto vandaka kulonguka bangunga 8 na mbala mosi. Bibuti na mono kumaka kudiyangisa mingi sambu mono vandaka kulonguka Biblia, yo yina bo teleminaka mono ngolo sambu na yo. Kansi mutindu mono vandaka kulonguka mingi, mono kumaka kundima nde mambu ya mono vandaka kulonguka vandaka kieleka. Yo yina mono bakaka mbotika na 1983.

MONO KATUKAKA NA INIVERSITE SAMBU NA KUKUMA MUPASUDI-NZILA

Na ntangu yina mono bakaka mbotika, mono vandaka kulonguka na iniversite mosi ya mbote kibeni mpi ya lukumu mpi mono vandaka kulonguka mambu ya kimunganga. Bibuti na mono salaka yonso sambu mono longuka na iniversite. Mono vandaka ti nzala ya kumanisa nzo-nkanda kuna kansi mono vandaka mpi ti nzala ya kudipesa kibeni na Yehowa mpi kusala kisalu ya ntangu yonso.

Papa songaka mono nde: “Kana nge yambula iniversite, mono ta kula nge na nzo.” Mono kumaka mawa-mawa mpi kisaka-saka. Mono vandaka kuzola bibuti na mono mpi mono vandaka ve ti mfunu ya kupesa bo mpasi. Yo yina, mbala mingi mono vandaka kukwenda kuvanda na nganda na iniversite na mpimpa kibeni mpi mono vandaka kusamba mingi Yehowa nde: “Pardo Yehowa, sadisa mono na kubaka lukanu ya mbote.” Yo yina, ntangu mono yambulaka iniversite, papa kulaka mono na nzo. Mono bingaka mpangi Wilson mpi songaka yandi mambu yina kuminaka mono. Yandi lombaka mono na kukwenda kuzinga ti yandi. Yo yina, mono bakaka bisi ti bima na mono yonso yina mono tulaka na sakosi mosi mpi mono kwendaka na nzo na yandi. Mono ke yibuka ngemba ya mingi yina mono waka na mbala mosi. Mono zabaka nde yo vandaka lukanu ya mbote yina mono bakaka.

Mono kudiwaka bonso ndeke yina me basika na kanzo yina bantu kangaka yo sambu nsuka-nsuka, mono kumaka ti kimpwanza ya kudipesa mbote-mbote na kisalu ya kulonga nsangu ya mbote. Mono yantikaka kisalu ya kimupasudi-nzila na 1984.

Ntangu mono vandaka kusala kisalu ya kimupasudi-nzila, Yehowa longaka mono bikalulu mingi ya kitoko, mu mbandu kikalulu ya kukonda kuyambula. Kilumbu mosi, mono yindulaka nde mono vandaka na bikuma ya mbote ya kulonga ve nsangu ya mbote. Mono lembaka nitu sambu mono vandaka ve ti muntu ya kulonga ti yandi nsangu ya mbote na nima ya midi yina. Ata mpidina, mono kwendaka kaka kulonga nsangu ya mbote. Na nima ya kulonga nsangu ya mbote bangunga zole, mono tubaka nde nzo ya nsuka ya mono fwete tala kele nzo yina ya étage. Mono lembaka mpi mono kudiwaka mono mosi mpi mono yindulaka nde mvula ta noka ntama ve. Yo yina, mono kuditubilaka nde: ‘Mono vutuka na nzo?’ Ntangu mono vandaka kumata na étage ya tatu ya nzo yina, mono monaka Filipino, leke mosi ya bakala me telema na ntwala na mono. Mono kuditubilaka nde: ‘Mono ke mona nde, yandi ta sepela ve ti nsangu ya mbote.’ Mono kudikusaka kibeni sambu mono kumaka kulonguka Biblia ti leke yango mpi yandi kumaka Mbangi ya Yehowa.

KUSALA NA BETELE YA BROOKLYN TOMISAKA BIKALULU NA MONO

Mono zingaka bamvula zole ti mpangi Wilson mpi na nima bo bingaka mono na Betele ya Brooklyn na 1985. Mutindu mono me tubila yo dezia, mono vandaka kusala kisalu ya kuvukisa mpi kukangisa kisika mosi bapapie ya mikanda. Kilumbu mosi, mono salaka kifu ntangu mono vandaka kusadila masini mosi, mono bebisaka balutiti ya zulu ya mikanda mingi. Bampangi ya beto vandaka kusala ti bo lombaka mono na kusonga nkengi na beto mambu yina salamaka. Mono sosaka kudinungisa kansi kele ti kima mosi ya mfunu ya mono tubaka ve. Na mawete yonso, nkengi na beto songaka mono mambu yai: “Yo ke vandaka ntangu yonso mbote na kundima bifu na beto.” Kaka na ntangu yina, mono longukaka mfunu ya kundima bifu na mono mpi ya kutuba nde: “Pardo.”

Mbandu ya mbote ya bampangi yina sadilaka Yehowa bamvula mingi na Betele sadisaka mono na kukuma diaka nsadi ya mbote ya bampangi. Kilumbu mosi, beto vandaka kudia mesa mosi ti mpangi Milton Henschel yina vandaka mpangi ya Nto-Kimvuka. Kilumbu yina, bampangi vandaka mingi na kisika yina bampangi ya Betele ke diaka mpi bo vandaka kuvingila nde bampangi yina ke salaka kisalu ya kutula bima na mesa, kukwisa kunatila bo bima ya kudia. Mono ti bampangi ya nkaka ya baleke vandaka kubokuta na nsi-nsi mutindu bampangi bakaka ntangu mingi sambu na kunatila beto madia. Kukonda kutuba kima, mpangi Henschel telamaka mpi vukanaka ti bampangi yina vandaka kukabisila bantu madia mpi bo yantikaka kukabudila bo babulware ya masa mpi malonga ya mampa ti manteka. Kudikulumusa ya mpangi Henschel yibusaka mono kisalu ya nsadi yina Yezu sadilaka bantumwa na yandi mpi mono ta vila yo ve ata fioti.—Yoa. 13:3-5.

“NGE FWETE LONGUKA KI-JAPONAIS”

Na 1987, mono kwendaka na Japon mpi mono yitukaka na kumona kikesa mpi kudikulumusa ya bampangi ya kuna. Mono vandaka kuzola kusadisa bo na kulonga nsangu ya mbote kansi kima ya mpasi vandaka nde mono longukaka ve Ki-Japonais. Mpangi-nkento Michiko Oda, talaka mono na meso mpi songaka mono nde: “Nge fwete longuka Ki-Japonais.” Yo yina, mono longukaka yo. Mono bakisaka ve nde mambu yai ya mpangi-nkento yai songaka mono ta soba luzingu na mono.

Bangonda fioti na nima, mono kwendaka na dibundu ya ndinga Japonais na New York. Kulonguka ndinga yai pesaka mono mabaku ya kusadila Yehowa mingi. Na 1989, mono kwendaka na lukutakanu na mono ya ntete ya distrike na ndinga Japonais yina salamaka na mbanza Los Angeles na provense ya Californie. Mpangi-nkento Miwako Onami, yina vandaka mupasudi-nzila mpi yina vandaka na kati ya bampangi yina salaka drame na lukutakanu yango sepedisaka mono mingi.

Mono kwelanaka ti mpangi Miwako na 1992 mpi beto zwaka dibaku ya kusala beto zole na Betele ya Brooklyn. Miwako ke tudilaka bantu dikebi mpi ke zolaka bo mingi mpi yandi ke vandaka ntangu yonso ya kuyilama sambu na kusadisa bampangi. Mbandu na yandi ya mbote sadisaka mono na kukuma kusadila diaka bampangi mambu na mawete. Yandi kele dikabu ya Yehowa me pesaka mono mpi yandi ke pesaka mono kiese ntangu yonso.

BO TINDAKA BETO NA BETELE YA JAPON MPI NA NIMA NA TERITWARE

Na nima ya mwa bantangu, bibuti ya Miwako yina vandaka kuzinga na Japon kumaka kubela ngolo, yo yina beto lombaka nde bo tinda beto na Betele ya Japon. Bo ndimaka kutinda beto na Betele ya Japon sambu na kuzinga pene-pene ti bo mpi kusadisa bo. Yo yina beto kwendaka kuna na 1999.

Dibuta ya Betele ya Japon yambaka beto na kiese kibeni mpi beto yikamaka ti luzingu na beto ya mpa kuna. Bikalulu ya mbote ya bampangi ya Japon, mu mbandu kikalulu na bo ya kukaba mpi ya kuyamba sadisaka mono na kutomisa diaka bikalulu na mono. Bo ke pesaka mbandu ya mbote na yina me tala kusala bisalu sambu bisalu ke vandaka mfunu mingi sambu na bo mpi bo ke kudipesaka mingi sambu na yo. Diaka bo ke salaka mbote na kimvuka. Na nki mutindu? Bantu ya Japon ke sepelaka kusala na bumosi mpi na kimvuka sambu na kusala mbote kima mosi na kisika nde muntu mosi kusala yo. Mbandu na bo ya mbote sadisaka mono na kusala na kudikulumusa ti bampangi mpi kusepela ti mwa bikesa yina mono ke salaka sambu na kupesa maboko na kisalu ya Yehowa.

Sambu mambu ya luzingu na mono vandaka ve mpila mosi ti ya bo, yo vandilaka mono mpasi bantangu ya nkaka na kubakisa mutindu bampangi ya Japon vandaka kusala mambu na mutindu mosi buna. Mono longukaka na kuvanda ntima-nda mpi na kusala ve mambu ti kiseku. Malembe-malembe, mono yidikaka mutindu na mono ya kusala mambu mpi mono bakisaka nde Yehowa ke sakumunaka balukanu na beto kana beto ke landa lutwadisu ya dibundu na yandi. Kima ya kuluta mfunu kele nde, Yehowa muntu ke salaka nde mambu kutambula mbote.

Mbala mingi mono vandaka kufwanisa mutindu Betele tomisaka bikalulu na mono ti mutindu Yehowa tomisaka bikalulu ya profete Moize. Yehowa sadisaka Moize na kukuma ti kudikulumusa ya mingi na bamvula yonso 40 yina yandi vandaka kusala kisalu ya kingungudi. Bonso Moize, mono me longukaka mingi. Mono bikaka nde iniversite yina mono salaka kukumisa mono lulendo mpi kupusa mono na kuditudila ntima. Kansi Betele me longaka mono na kuvanda ya kudikulumusa mpi na kutudila Yehowa ntima. Kaka mutindu Yehowa monisilaka Moize ntima-nda mpi tomisaka bikalulu na yandi, yandi me salaka mpi mutindu mosi sambu na mono bamvula yai yonso.

Beto sadisaka bibuti ya nkento na mono Miwako bamvula kiteso ya 24 tii na lufwa na bo. Bampangi vandaka kubinga beto mingi na telefone, yo vandaka bantangu ya mpasi mpi beto vandaka kukwenda na opitale mbala na mbala. Sante ya Masako, mama ya nkento na mono Miwako bebaka diaka ngolo mpi yandi vandaka kukuka mpenza diaka ve kutelema sambu na kutambula. Yo kuminaka beto mpasi na kukwenda na balukutakanu mpi kulonga nsangu ya mbote. Ntangu fioti na ntwala nde yandi kufwa, yandi kumaka kutambula na velo ya bikata. Ata mpidina, na bantangu yai yonso, zola na yandi sambu na Yehowa vandaka kaka ngolo. Yandi vandaka kaka na kiese konso ntangu yina yandi vandaka kulonga nsangu ya mbote. Mbandu ya mbote ya mama Masako na yina me tala kusadila Nzambi mpi kulanda kuvanda na kiese ata na bantangu ya mpasi sadisaka mono mingi.

Na 2024, diambu mosi salamaka ya sobaka luzingu na beto. Na nima ya kusala na Betele bamvula kuluta 30, bo tindaka beto bapasudi-nzila ya nene na teritware. Tii bubu yai, beto ke salaka kisalu yai na kisanga ya Okinawa mpi beto ke vandaka ti dibaku ya kulonga mabuta yina ke zingaka pene-pene ya camp ya basoda, nsangu ya mbote. Formasio ya mbote yina beto me bakaka na Betele sadisaka beto na kuyikama kukonda mpasi ti mukumba na beto yai ya mpa. Beto ke salaka ngolo sambu na kuvanda ti programe ya mbote mpi kulanda kusadila mbote ntangu na beto sambu na kusala ngolo mpi kudipesa mingi na kisalu ya kulonga nsangu ya mbote. Yehowa me sakumunaka beto mingi sambu bantu yina beto ke longaka Biblia me kumaka bonso bantu ya mabuta na beto. Beto me bakisa diaka mpenza nde kima ya kuluta mfunu kele kuzola bantu. Mono ti nkento na mono Miwako ke tondaka Yehowa konso kilumbu sambu na mukumba yai ya kitoko mingi.

MONO ME BAKAKA LUKANU YA KUBIKA NDE YEHOWA KUTOMISA DIAKA MINGI BIKALULU NA MONO

Bantu ya dibuta na mono vandaka diaka ve kutelemina mono, kansi bo me bakaka ntete ve lukanu ya kusambila Yehowa. Ata mpidina, Yezu silaka nde bantu yina me bikisa mabuta na bo sambu na kukuma balongoki na yandi, ta baka na mutindu ya kimpeve mabuta mbala 100 kuluta. (Mar. 10:29, 30) Yai mambu ya me kuminaka mono mpenza. Mono lenda kuka ve kutanga ntalu ya mabuta yonso na ntoto ya mvimba yina me monisilaka mono zola mpi me sadilaka mono mambu bonso muntu ya dibuta na bo.

Tii bubu yai, mono ke vandaka kaka ti mukanda La vérité qui conduit à la vie éternelle yina mpangi Wilson pesaka mono. Mukanda yai ya kele ti kimpusu ya kulere bleue, ke yibusaka mono mutindu Yehowa me sadisaka mono na kukuma nsadi na yandi. (1 Bans. 28:9) Mono me bakaka lukanu ya kubika nde Yehowa kutomisa diaka mingi bikalulu na mono mpi ya kusadisa bantu ya nkaka na kuzaba kieleka ya ke nataka na luzingu ya mvula na mvula.