Beno Yidika Mavwanga Nswalu
KETI mpangi mosi me tuba to me sala kima mosi ya me pesa nge mpasi mpi ya bebisa kinduku na beno? Yo ta lomba nde beno sala nswalu kibeni sambu na kuyidika mavwanga mpi kuvutula kinduku na beno sambu na kutanina bumosi ya dibundu.a
Beto baka mbandu mosi. Kana mukwa ya muntu me bukana, munganga fwete sansa yo sambu yo beluka mpi yo kuma kusala diaka mbote kukonda kupesa yandi mpasi. Kansi mpasi yango ta mana ve kana bo me sansa yo ve nswalu. Diaka, mukwa ya muntu yango lenda kwenda na lweka luzingu na yandi ya mvimba mpi kusala diaka ve mbote.
Mutindu mosi mpi, kana kinduku na nge ti mpangi mosi me beba, beno fwete vutula yo nswalu. Kana ve, kinduku yango ta landa kubeba. Kimbeni lenda kuma ngolo mpi kinduku yango lenda fwa kibeni. Yezu tubaka nde: “Yidika nswalu makambu.” (Mat. 5:25) Yo yina, nge fwete kwenda kumona nduku na nge mpi kutubila pwelele mambu ya me basisa mavwanga. Beto tadila bikuma zole yina lenda sala nde yo vanda mpasi na kuyidika mavwanga.
Ya ntete, mbala ya nkaka nge lenda mona nde yo kele ve mfunu na kuyidika mavwanga sambu nge ke sepela diaka ve kutubila mambu ya me basisa mavwanga yango.b Beto tadila mbandu ya Evodia ti Sentishe, yina kukaka ve mbala ya nkaka kuyidika mavwanga na kati na bo. Yo ke monana nde mavwanga na bo bakaka ntangu mingi sambu ntumwa Polo yina vandaka ntama na Roma waka mpila bantu vandaka kutubila yo. Yo yina, yandi lombaka bo na kusala yonso sambu na kuvutula ngemba na kati na bo. (Bafil. 4:2) Bo lendaka kuvutula dezia kinduku na bo kana bo monisaka kudikulumusa, kana bo tubilaka pwelele mambu yina basisaka mavwanga mpi kana bo lolulanaka na ntima ya mvimba.
Ya zole, nge lenda zola nde muntu ya nkaka yina nge kele ti yandi na mavwanga kundima nde yandi muntu me sala kifu mpi nde yandi kwisa muntu ya ntete kulomba pardo. Kuvila ve nde kima ya kuluta mfunu kele kuvutula kinduku na beno kansi ve kusosa nde nani salaka kifu. Munganga yina ke sansa mukwa yina me bukana ke sosaka ntete-ntete kubelula yo, kansi ve kusosa kuzaba mambu yonso ya fioti-fioti yina salaka nde mukwa yango kubukana. Yo yina, ntangu nge ke solula ti nduku na nge, kusosa ve kutubila nani salaka kifu sambu na mavwanga yina me basika. Kansi tula dikebi na valere yina kinduku na beno kele ti yo mpi na mambu yina beno lenda sala sambu na kuvutula kinduku yango.
Kana nge kele na mavwanga ti mpangi na nge, nge fwete solula ti yandi bubu yai sambu na kuyidika mavwanga yango mpi kuvutula kinduku na beno. Nkutu Biblia ke tuba nde: “Beno bika ve nde ntangu kudinda mpi beno kele kaka na makasi.” (Baef. 4:26) Kana nge ke sala yonso sambu na kuyidika nswalu mavwanga, nge ta tanina “ngemba yina ke vukisaka beto.”—Baef. 4:1-3.
a Kana beno kele ti mwa mavwanga ti mpangi mosi, beno yidika yo kaka beno zole mpi beno lolulana na ntima ya mvimba. (Mat. 5:23, 24) Kansi kele ti makambu ya nkaka ya nene yina beno fwete lomba lusadisu na bankuluntu. (Mat. 18:17) Nge ta sosa lusadisu yai na bankuluntu kaka kana nge me sadila dezia bandongisila yina kele na Matayo 18:15, 16 kansi yo ke simba ve.
b Kana mpangi mosi me tuba to me sala kima mosi ya me pesa nge mpasi kansi yo me bebisa ve kinduku na beno, nge lenda lutisa yo kukonda kukutana ti yandi.—Bing. 26:20.