Disolo yina Salomo tubilaka ke monisa mambu yina lenda kumina konso nsadi ya Yehowa. Yandi lenda sala disumu ya nene mpi na nima yandi yindula nde mambu yonso salamaka na mbala mosi. To yandi lenda tuba nde: “Yo salamaka kaka mpidina, mono zabaka ve.” Kansi kana yandi yindula mambu yina salamaka kibeni, ntembe kele ve nde yandi ta bakisa nde yandi salaka mambu yina pusaka yandi na kusala disumu yina ya nene. Mbala ya nkaka yandi vandaka ti banduku ya mbi, to mbala ya nkaka yandi salaka bansaka ya mbi ya kulutisila ntangu, to yandi kotaka na basite Internet ya mbi to yandi kwendaka na bisika yina kele ve mbote sambu na Mukristu. Diaka, mbala ya nkaka yandi ke sambaka diaka ve, yandi ke tangaka diaka ve Biblia, yandi ke kwendaka diaka ve na balukutakanu to yandi ke longaka diaka ve nsangu ya mbote. Bonso leke ya bakala yina Bingana ke tubila, yo lenda vanda nde yandi salaka ve disumu na mbala mosi kaka mpidina. Inki yo ke longa beto? Beto fwete tina ve kaka disumu, kansi beto fwete tina mpi mambu yina ta pusa beto na kusala disumu. Yo kele kibeni mambu yina Salomo tubaka na nima ya kutubila disolo yina.​—Mat. 5:29, 30. w24.07 16 § 10-11

Kimvwama yango kele nki? Yo kele kisalu ya kulonga nsangu ya mbote ya Kimfumu, yina ke gulusaka luzingu ya bantu. (2 Bak. 4:1) Ebuna, mabungu ya ntoto kele nki? Yo kele bansadi ya Nzambi, yina ke longaka bantu ya nkaka nsangu ya mbote. Na bilumbu ya Polo, bantu ya mumbongo vandaka kusadila mabungu ya ntoto sambu na kunata bima ya valere. Mu mbandu madia, malafu mpi mbongo. Mutindu mosi, Yehowa me pesaka beto nsangu ya mbote yina kele mfunu mingi. Yehowa ke sadisaka beto, yandi ke pesaka beto ngolo yina beto kele ti yo mfunu sambu na kulanda kulonga nsangu ya mbote. Bantangu ya nkaka, beto lenda wa bantu boma to beto lenda wa boma nde bo ndima ve nsangu ya mbote. Inki mutindu beto lenda katula boma yina? Beto tadila kisambu yina bantumwa salaka ntangu bo buyisaka bo na kulonga nsangu ya mbote. Bo waka ve boma, kansi bo lombaka Yehowa na kusadisa bo na ‘kulanda kutuba ti kikesa.’ Na mbala mosi, Yehowa pesaka mvutu na kisambu yina. (Bis. 4:18, 29, 31) Kana nge mpi ke wa bantu boma bantangu ya nkaka, lomba Yehowa na kusadisa nge na kuyedisa zola na nge sambu na bantu, sambu nge wa ve boma ya kulonga bo nsangu ya mbote. w24.04 16 § 8-9

Zola na beto sambu na Yehowa ke pusaka beto na kusantisa zina na yandi. Beto ke songaka bantu nde mambu ya mbi yina Satana tubaka sambu na Yehowa kele luvunu. (Kuy. 3:1-5; Yobi 2:4; Yoa. 8:44) Ntangu beto ke longaka nsangu ya mbote, beto ke vandaka ti mpusa ya ngolo ya kusonga bantu yonso yina ke zola kuwa beto mambu ya kieleka ya me tala Yehowa mpi bikalulu na yandi. Beto ke zolaka nde bantu yonso kuzaba nde kikalulu ya Yehowa ya kuluta nene kele zola, nde luyalu na yandi kele ya mbote mpi ya lunungu, nde ntama mingi ve Kimfumu na yandi ta manisa bampasi yonso, ta tula ngemba mpi bantu ta zinga na kiese. (Nk. 37:10, 11, 29; 1 Yoa. 4:8) Ntangu beto ke songaka bantu mambu yina ya me tala Yehowa, beto ke santisaka zina na yandi. Beto ke vandaka mpi na kiese sambu beto ke salaka mambu yina Bambangi ya Yehowa fwete sala. w24.05 18 § 12