Landa Kusala Bikesa ya Kuzaba Yehowa Mbote

1. Inki mutindu beto ke kudiwaka ntangu beto ke yindulaka mingi ya mayele ya Yehowa, ya nzayilu na yandi mpi mambu ya kuyituka yina yandi me salaka?

KETI nge me yindulaka dezia mingi ya mayele ya Yehowa, ya nzayilu na yandi mpi mambu ya kuyituka yina yandi me salaka? Beto ke yitukaka mingi ntangu beto ke yindulaka mambu yina Yehowa me salaka. Nge lenda kudiwa bonso ntumwa Polo yina sonikaka nde: “O mudindu ya kimvwama, ya mayele, mpi ya nzayilu ya Nzambi! Ata muntu mosi ve lenda zaba kibeni balusambisu na yandi mpi kubakisa banzila na yandi!”​—Bar. 11:33, 34.

2. Inki ke monisa nde beto lenda zaba Yehowa mbote?

² Ata beto ta zaba ve mambu yonso ya me tala Yehowa, beto lenda longuka mambu mingi ya me tala yandi. Ntotila Davidi songaka mwana na yandi Salomo nde: “Zaba Nzambi ya tata na nge mpi sadila yandi na ntima ya mvimba . . . Kana nge sosa yandi, yandi ta bika nde nge mona yandi.” (1 Bans. 28:9) Bamvula mingi na nima, ntumwa Yoane songaka bampangi na yandi Bakristu nde Nzambi me “pesaka beto mayele sambu beto baka nzayilu ya muntu yina kele muntu ya kieleka.” (1 Yoa. 5:20) Diaka, Yezu tubaka nde Yehowa ke pesaka nzayilu yina na “konso muntu yina Mwana ke zola kumonisa yandi.”​—Mat. 11:27.

3. Inki beto ta longuka na disolo yai?

³ Bantu yonso yina me kudipesaka na Yehowa me longukaka dezia mambu mingi sambu na yandi. Ata mpidina, beto ke landaka kaka ‘kulonguka na kuzaba’ Yehowa mbote. (Yoa. 17:3; tala noti na nsi ya lutiti.) Mu mbandu, beto lenda landa kulonguka mambu mingi yina ke sadisaka beto na kuvanda na kiese mpi mutindu ya kutudila diaka Yehowa ntima mingi. Beto tula dikebi ntangu yai na bangiufula tatu yina beto yonso fwete tadila, yo vanda beto ke sadilaka Yehowa banda ntama to ve. Bangiufula yango yo yai: Kuzaba Yehowa mbote ke tendula nki? Sambu na nki yo kele mfunu na kuzaba yandi mbote? Mpi nki mambu beto lenda sala sambu na kuzaba yandi mbote?

KUZABA YEHOWA MBOTE KE TENDULA NKI?

4. Tubila mutindu mosi yina beto lenda zaba Yehowa mbote.

⁴ Beto ke longukaka na kuzaba mambu mingi ya me tala Yehowa kana beto ke tadila mambu yina yandi tubaka sambu na Bayuda yina katukaka na kimpika mpi vutukaka na Yeruzalemi. Yehowa silaka nde: “Mono ta pesa bo ntima ya kuzaba mono, nde mono kele Yehowa.” (Yer. 24:7) Ya kieleka, Bayuda yina katukaka na Babilone mpi vutukaka na Yeruzalemi zabaka dezia mambu mingi sambu na Yehowa. Kansi, yo lombaka mpenza nde bo kumisa diaka kinduku na bo ngolo ti Yehowa. Mukanda mosi ke tuba nde: “Luswaswanu kele ya ngolo mpenza na kati ya kuzaba Nzambi mpi kuzaba Nzambi mbote. Beto lenda fwanisa kuzaba Nzambi ti muntu yina ke tanga mambu ya zola mpi beto lenda fwanisa kuzaba Nzambi mbote ti muntu yina me zolana ti muntu mosi.” Yo ke tendula ve nde beto fwete suka kaka na kuzaba nde zina ya Nzambi kele Yehowa mpi nde yandi kele Nzambi. Kansi beto fwete sosa kuzaba mbote bikalulu na yandi.

5. Inki beto lenda longuka na mbandu ya Yoziasi na yina me tala ntendula ya kuzaba Yehowa mbote?

⁵ Beto ke zabaka mpi Yehowa mbote kana beto ke longuka mambu yina ke pesaka yandi kiese mpi yina ke pesaka yandi mpasi. Kusala mpidina ke sadisaka beto na kusala mambu yina yandi ke zolaka. Beto baka mbandu ya ntotila Yoziasi. Biblia ke tuba nde: “Na mvula ya 8 ya luyalu na yandi, ntangu yandi vandaka ntete mwana-fioti, yandi yantikaka kusosa Nzambi ya nkaka na yandi Davidi.” (2 Bans. 34:3) Yoziasi sukaka ve kaka na kulonguka mambu ya Nzambi, kansi yandi vandaka mpi kusadila mambu yango. Yehowa songaka Yeremia nde Yoziasi “sambisaka na lunungu mpi na mutindu ya me fwana” mpi nde yandi vandaka kukotila bantu yina vandaka kumona mpasi mpi bansukami. Na nima, Yehowa tubaka diaka nde: “Keti mambu yai ke tendula ve kuzaba mono?”​—Yer. 22:15, 16.

6. Kuzaba diaka Yehowa mbote kibeni ke nataka nki mambote? (Nkunga 9:10)

⁶ Tanga Nkunga 9:10. Kana beto me zaba diaka Yehowa mbote kibeni, beto ta kuma diaka kutudila yandi ntima. Yai mambu yina ntumwa Polo salaka. Na mbala ya nsuka yina bo tulaka yandi na boloko mpi ntangu fioti na ntwala ya lufwa na yandi, yandi sonikaka nde: “Mono ke wa nsoni ve. Sambu mono me zaba Muntu yina mono me kwikilaka na yandi.” (2 Tim. 1:12) Mambu yina Polo longukaka mpi kutanaka ti yo na luzingu na yandi pusaka yandi na kutudila diaka kibeni Nzambi ntima. Polo vandaka kutula ntima nde Yehowa ta vila yandi ve mpi kisalu yina yandi sadilaka yandi mpi nde yandi ta futumuna yandi.

SAMBU NA NKI YO KELE MFUNU NA KUZABA YEHOWA MBOTE?

7. Inki lenda salama na nima ya kusadila Yehowa bamvula mingi?

⁷ Na nima ya kusadila Yehowa bamvula mingi, mbala ya nkaka beto ke salaka diaka ve bikesa ya mingi sambu na kuzaba Yehowa mutindu beto salaka yo na mbala ya ntete yina beto longukaka na kuzaba yandi. Sambu na nki? Sambu ntangu beto ke tangaka Biblia beto mosi to ti bampangi na balukutakanu, mbala ya nkaka beto ke tulaka dikebi ya mingi na mutindu mambu ya beto ke tangaka lenda sadisa beto to mutindu beto lenda sadila yo sambu na kusadisa bantu ya nkaka. Yai mambu Biblia ke lombaka beto na kusala. (2 Tim. 3:16, 17) Kansi kele ti kima ya mfunu mingi yina beto fwete yindula. (Nk. 25:8-10) Beto fwete yindula ve kaka mutindu malongi ya Biblia lenda natila beto to bantu ya nkaka mambote, kansi beto fwete kudiyula mpi ngiufula yai: ‘Yo ke longa mono nki sambu na Yehowa Nzambi?’a

8. Inki ke salamaka kana beto me zaba diaka Yehowa mbote kibeni? (Nkunga 73:24-28)

⁸ Kinduku na beto ti Yehowa ke kumaka diaka ngolo mingi kana beto me zaba yandi diaka mbote kibeni. Mu mbandu, inki mutindu nge ke kudiwaka sambu na Yehowa na nima ya kutanga Biblia konso kilumbu, na nima ya kulanda JW Télédiffusion, to na nima ya kulanda lukutakanu ya nziunga to ya distrike? Mbala mingi yo ke salaka nde beto kudiwa pene-pene ya Tata na beto ya zulu. Sambu na nki? Sambu beto me longuka mambu mingi ya me tala yandi. Yo yina, yo ke pusaka beto na kukumisa yandi mpi kupesa yandi mersi. Beto ke kudiwaka bonso muyimbi-bankunga yina yindulaka mingi mutindu Yehowa vandaka kuzola yandi. Yandi tubaka nde: “Nzambi kele ditadi ya ntima na mono mpi dikabu na mono kimakulu.” (Tanga Nkunga 73:24-28.) Bikesa yonso yina beto ke salaka sambu na kuzaba Yehowa ke pusaka beto na kumonisa diaka ntonda mingi sambu na kinduku na beto ti yandi.

9. Inki mutindu “kuyindula” Yehowa mbala na mbala ke sadisaka beto? Pesa mbandu.

⁹ Beto ta baka balukanu ya mbote kana beto ke “yindula” Yehowa, disongidila kana beto ke yibuka mambu yina beto me longuka sambu na yandi mpi mutindu yandi ke kudiwaka sambu na mambu ya beto ke salaka. (Bing. 3:5, 6) Beto baka mbandu mosi: Bampangi mingi ke tulaka bafoto ya bankwelani na bo na biro, na ordinatere to na ekran ya telefone. Kusala mpidina ke sadisaka bo na kuyindula bankwelani na bo mbala na mbala, na kubaka balukanu yina ta sepedisa bo mpi kubuya kusala konso kima yina ta pesa bo mpasi. Mutindu mosi, kana beto ke yindula Yehowa mbala na mbala, yo ta sala nde beto baka balukanu ya mbote yina ta pesa yandi kiese.​—Nk. 19:13, 14.

10. Inki ta salama kana beto ke longuka mingi bikalulu ya Yehowa?

¹⁰ Yehowa salaka beto na kifwani na yandi, disongidila ti makuki ya kulanda bikalulu na yandi. (Kuy. 1:26) Yo yina, kana beto ke longuka mingi bikalulu ya Yehowa, yo ta sala nde beto bakisa mbote-mbote mutindu ya kulanda mbandu na yandi. Yezu monisaka na pwelele yonso nde balongi ya nsiku mpi Bafarize vandaka kumonisa ve bikalulu ya Nzambi na luzingu na bo. Ata bo zabaka Nsiku mbote mpi mambu na yo ya fioti-fioti, Yezu tubaka nde bo vandaka ‘kuvweza mambu ya kuluta mfunu ya Nsiku, disongidila lunungu, mawa mpi kwikama.’ (Mat. 23:23) Na kuswaswana ti bamfumu yina ya mabundu, beto fwete sala bikesa ya kubakisa mambu yina bansiku mpi minsiku ya Biblia ke longaka beto sambu na bikalulu ya Yehowa. Kusala mutindu yai ta sadisa beto na kulanda mbandu ya bikalulu na yandi.​—1 Yoa. 4:8, 11.

INKI MAMBU BETO LENDA SALA SAMBU NA KUZABA YEHOWA MBOTE?

11. Inki mutindu nge zabaka Yehowa?

¹¹ Nani sadisaka nge na kuzaba Yehowa? Mbala ya nkaka, bibuti na nge ya kele Bambangi ya Yehowa bantu sadisaka nge na kuzaba yandi. Yo lenda vanda nde bo longaka nge masolo ya Biblia ya ke monisaka bikalulu na yandi mpi mutindu bikalulu yango ke monanaka na bima yina yandi salaka. To mbala ya nkaka, nge longukaka Biblia ti Mbangi ya Yehowa mosi. Yo lenda vanda nde mpangi ya longukaka ti nge Biblia sadilaka mukanda mosi, mu mbandu mukanda Zinga Mvula na Mvula! sambu na kusadisa nge na kutadila masolo ya Biblia mpi na kulonguka mingi bikalulu ya Yehowa ya ke monanaka na bima yina yandi me salaka.b (Neh. 8:8; Bis. 14:17) Beto tadila sesepi mutindu beto lenda landa kulonguka bikalulu ya Yehowa.

12-13. Inki beto lenda longuka sambu na Yehowa ntangu beto ke tanga Biblia? Pesa mbandu. (Yeremia 39:15-18) (Tala mpi kifwanisu.)

¹² Ya ntete, beto lenda longuka mambu mingi sambu na Yehowa kana beto ke tanga mpi ke longuka Ndinga na yandi. Bantangu ya nkaka, Biblia yo mosi ke tubilaka pwelele bikalulu ya Nzambi. (Kub. 34:6, 7) Kansi mbala mingi, Biblia ke tubilaka masolo ya bantu mpi balukanu yina bo bakaka. Ntangu nge ke tanga masolo yango, yindula mambu yina yo lenda longa nge sambu na Yehowa.

¹³ Beto baka mbandu mosi. Kana nge tanga Yeremia 38:6-13, nge ta longuka mbandu ya Ebedi-meleki muntu ya Etiopia yina gulusaka profete Yeremia. Ntembe kele ve nde, nge ta bakisa nswalu mutindu nge lenda landa mpeve na yandi ya kuditambika, kikesa yina yandi monisaka mpi zola yina yandi monisilaka Yeremia. Keti nge me mona mpi bikalulu ya Yehowa yina nge lenda longuka na disolo yai? (Tanga Yeremia 39:15-18.) Mu mbandu, nki ke monisa na baverse yai nde Yehowa ke sepelaka ti mambu yina bansadi na yandi ke salaka sambu na yandi? Inki ke monisa nde yandi kele Nzambi ya lunungu mpi ya ke pona-ponaka ve? Inki bikalulu ya nkaka ya Yehowa nge me mona na disolo yai? Konso mbala yina nge ke tanga Ndinga ya Nzambi, sosa kubakisa bikalulu ya Yehowa yina disolo ya nge ke tanga ke longa nge, pesa Yehowa mersi mpi kumisa yandi sambu na yo.

14. Sambu na nki beto fwete yindula mingi bima yina Yehowa me salaka?

¹⁴ Ya zole, beto lenda longuka mambu mingi sambu na Yehowa kana beto ke baka ntangu ya kutala mpi ya kuyindula mingi bima yina yandi me salaka. (Nk. 145:9, 10) Ya kieleka, beto fwete suka ve kaka na kutala bima yina Yehowa me salaka. Bantu ya nkaka ke lutisaka luzingu na bo ya mvimba na kulonguka bima yina Nzambi me salaka kansi bo ke bakisaka ve nde kele ti Nzambi mosi ya salaka bima yango mpi nkutu bo ke longukaka ve bikalulu na yandi. Ntumwa Polo tubaka nde ‘bikalulu ya Nzambi ya ke monikaka ve ke monanaka pwelele tuka lugangu ya nsi-ntoto, sambu yo ke monanaka na bima yina yandi salaka.’ (Bar. 1:20) Sambu na verse yai, Biblia mosi ke tubaka nde beto lenda mona bikalulu ya Nzambi sambu yo “ke monanaka . . . pwelele na meso kana beto ke yindula yo mbote.” Yo yina, beto fwete yindula mingi bima yina beto ke monaka sambu na kubakisa bikalulu ya Nzambi.

15. Inki mpangi Patrick salaka sambu na kuzaba Yehowa mbote kibeni mpi nki nge lenda sala sambu na kulanda mbandu na yandi? (Tala mpi kifwanisu.)

¹⁵ Bantu mingi ke zingaka na bambanza yina kele ve ti banti mpi bambisi mingi. Kana nge ke zingaka mpi na bisika ya mutindu yai, keti nge lenda baka mpi malongi na bima yina Nzambi me salaka? Beto tadila mbandu ya mpangi Patrick, na Brazzaville, mbanza mosi ya nene ya République du Congo. Yandi ke tuba nde: “Mono ke vandaka na veranda ya nzo na mono mpi ke talaka konso kilumbu bima yina Nzambi me salaka. Mbala mingi, mono ke talaka mutindu baniama to bandeke ya fioti-fioti ke sosaka madia to kisika ya kuzinga. Kilumbu mosi, mono vandaka kutala mutindu bandeke ya nkaka vandaka kutunga babuyambu na yo. Bandeke yango vandaka kusosa na mbanza bima ya kutungila babuyambu ya me fwana sambu na kubumba bana na yo.” Kansi mpangi Patrick sukaka ve pana. Yandi yindulaka mingi Ngangi yina salaka bima yango. Yandi ke tuba nde: “Mono bakisaka nde Yehowa ke lungisaka bampusa ya bima yina yandi me salaka, yo vanda bima ya fioti-fioti. Yo ke ndimisaka mono mpi nde Yehowa ta lungisa bampusa na mono yonso mpi nde yandi ta landa kusadisa mono.”

16. Inki sadisaka Maria, mama ya Yezu, na kuzaba Yehowa mbote mpi nki mutindu beto lenda landa mbandu na yandi? (Tala mpi kifwanisu.)

¹⁶ Ya tatu, beto lenda longuka mambu mingi sambu na Yehowa kana beto ke yindula mutindu yandi me sadisaka beto na bilumbu me luta. Yai mambu yina Maria mama ya Yezu salaka. Yandi zabaka dezia Yehowa mbote mpi nkutu ‘Nzambi ndimaka yandi.’ (Luka 1:30) Na nima, Yehowa pesaka yandi mukumba mosi ya nene ya kuvanda mama ya Mwana na yandi. Yehowa sadilaka wanzio Gabriele ti Elizabeti sambu na kupesa Maria kikesa mpi kundimisa yandi nde yandi ta sadisa yandi. Na nima, Maria yindulaka mingi mambu yina yandi kutanaka ti yo mpi mambu yina yo longaka yandi sambu na bikalulu ya Yehowa. Mu mbandu, ngolo na yandi, kikalulu na yandi ya kuwila bantu mawa, ya kukonda kupona-pona mpi ya kutudila bantu yina bantu ya nkaka ke monaka mfunu ve dikebi. (Luka 1:46-55) Kaka mpila Maria vandaka na kiese mutindu Yehowa sadisaka yandi, beto ke monisaka mpi ntonda ntangu Yehowa ke sadisaka beto “na ntangu ya mbote.” (Baeb. 4:16) Ntangu yandi me sadisa nge, nge lenda kudiyula bangiufula yai: ‘Yo ke longa mono nki sambu na Yehowa? Inki bikalulu ya Yehowa mono me longuka na mambu yai?’

BETO TA LANDA KULONGUKA MAMBU MINGI SAMBU NA YEHOWA

17-18. Inki ke pusa beto na kutuba nde beto ta landa kulonguka mambu mingi sambu na Yehowa?

¹⁷ Yindula mambu mingi yina beto ta longuka sambu na Yehowa na nsi-ntoto ya mpa. Yehowa ta pesa beto barulo ya mpa yina ta sadisa beto na kuzaba mambu yina yo ta lomba kusala sambu na kuzinga na nsi-ntoto ya mpa. (Kus. 20:12) Beto ta vanda ti dibaku ya kumona mbote-mbote bima yonso yina yandi me salaka. (Yez. 11:6-9) Diaka, bima ya mpa yina beto ta longuka na nsi-ntoto ya mpa, mutindu bampangi na beto ya me fwaka ta futumuka mpi mutindu beto ta landa kukuma konso kilumbu ya kukuka, yo ta sadisa beto na kuzaba diaka mbote-mbote Tata na beto Yehowa.

¹⁸ Beto ta landa kulonguka mambu mingi sambu na Yehowa. Yandi me zaba mambu mingi kuluta beto sambu yandi ke zingaka mvula na mvula, yo yina “mpila ya kutesa mayele na yandi ya kubakisa mambu kele ve.” (Nk. 90:2; 147:5) Beto “ta bakisaka ve ata fioti kisalu yina Nzambi ya kieleka me salaka katuka luyantiku tii na nsuka.” (Lon. 3:11) Yo yina, yo vanda beto ke sadilaka Yehowa banda ntama to ve, beto fwete sadila mabaku yonso yina beto kele na yo sambu na kulonguka mambu mingi sambu na Tata na beto ya zola.