14-20 SEPTEMBRE 2026
NKUNGA 41 Wa Kisambu na Mono
Mutindu Mukanda ya Yezaya Lenda Pesa Nge Kikesa
“Yehowa me tuba nde: . . . ‘Mutindu mama ke lembikaka mwana na yandi, mutindu yo yina mpi mono ta landa kulembika beno.’”—YEZ. 66:12, 13.
NA BUNKUFI
Mutindu kuyindula mambu yina kele na mukanda ya Yezaya lenda sadisa beto ntangu beto kele na mawa to ti basusi.
1-2. Inki Yehowa ke salaka ntangu beto ke kutanaka ti bampasi?
YINDULA mwana mosi ya kele na mpasi mpi ke dila mingi kibeni. Mbala ya nkaka, mwana yango ke dila sambu bo ke kwenda kukota na nzo ya nkaka mpi yandi ke kabwana ti banduku na yandi. To mbala ya nkaka, yandi ke kudiyangisa sambu yandi me sala kifu. Na bantangu ya mutindu yai, inki mama ya zola ta sala? Yandi ta yamba yandi, ta widikila na dikebi basusi na yandi mpi ta songa yandi nde yandi ke zolaka yandi.
2 Na Biblia, Yehowa ke kudifwanisaka ti mama mosi ya zola ya ke lembikaka mwana na yandi. Yandi ke tuba nde: “Mutindu mama ke lembikaka mwana na yandi, mutindu yo yina mpi mono ta landa kulembika beno.” (Yez. 66:13) Yehowa ke zolaka beto mingi kuluta bibuti na beto. (Yez. 49:15) Ntangu beto ke kutanaka ti bampasi to ntangu beto ke lembaka nitu, Yehowa ke sadilaka Ndinga na yandi Biblia sambu na kulembika beto to kupesa beto kikesa.—Bar. 15:4.
3. Inki beto ta longuka na disolo yai?
3 Mukanda ya Yezaya kele ti bangogo mingi ya Yehowa ya ke pesa kikesa. (Yez. 40:1) Tata na beto ya zola sonikisaka mukanda yai sambu na kupesa kikesa na bansadi na yandi ya Yuda yina vandaka kuzinga na bantangu ya mpasi kibeni. Beto kele mpi na mfunu ya kikesa bubu yai sambu beto ke zinga na “bantangu ya mpasi mpi ya nku.” (2 Tim. 3:1) Beto tadila mwa baverse ya mukanda ya Yezaya yina lenda lembika mpi kupesa beto kikesa ntangu (1) mambu ya kukonda kukana me kumina beto, (2) beto ke kudiyangisa mingi sambu na masumu yina beto salaka to (3) muntu ya beto vandaka kuzola mingi me fwa.
NTANGU MAMBU YA KUKONDA KUKANA ME KUMINA BETO
4. Inki mutindu beto ke kudiwaka ntangu mambu ya kukonda kukana me kumina beto?
4 Luzingu na beto lenda soba na kintulumukina. (Lon. 9:11; 1 Bak. 7:31) Beto lenda bela, beto lenda kutana ti mpasi ya mbongo, mavwanga ya politiki to mukumba na beto lenda soba. Mambu ya mutindu yai lenda sala nde beto kuma kudiyangisa mingi to beto kuma kisaka-saka. Yo yina, yo kele ve mbi na kudiyula nde: ‘Inki mono ta sala ntangu yai?’ Mpangi-bakala Joseph, yina bo tindaka na teritware na nima ya kusala bamvula 17 na Betele ke tuba nde: “Mono kumaka kisaka-kisaka sambu yo vandilaka mono mpasi na kuyantika luzingu ya mpa sambu mono wumelaka mingi na Betele. Mono vandaka kumona ve na wapi mono ta bandila.” Inki lusadisu Yehowa ke pesaka beto na mukanda ya Yezaya yina ke sadisaka beto ntangu mambu ya kukonda kukana me kumina beto?
5. Na Yezaya 42:16, Yehowa ke ndimisa beto nde yandi ta sala nki sambu na beto? (Tala mpi kifwanisu.)
5 Tanga Yezaya 42:16. Yehowa ke tuba nde yandi ta twadisa bantu yina kele bifwa-meso na mutindu ya kifwani na banzila yina bo me yikanaka ve ti yo mpi nde yandi ta sala nde mpimpa kukuma nsemo. Bangogo “bifwa-meso,” “banzila yina bo me yikanaka ti yo ve,” “mpimpa” mpi “ntoto ya mabulu-mabulu” lenda tendula mutindu beto ke kudiwaka kana mambu ya kukonda kukana me kumina beto na mbala mosi. Beto lenda kudiwa bonso nde beto kele na mfinda mosi ya nene mpi ke zaba ve nzila ya kubasikila. Kansi, Yehowa ke ndimisa beto nde yandi ta twadisa beto mpi ta yambula beto ve ata fioti na konso diambu yina lenda kumina beto. Yandi ta simba beto na diboko mpi ta twadisa beto na mpimpa, yandi ta pesa nsemo na nzila na beto mpi yandi ta fika banzila ya mabulu-mabulu sambu beto tambula mbote. Inki mutindu Yehowa ke salaka yo? Yandi ke sadilaka Ndinga na yandi Biblia mpi dibundu na yandi sambu na kupesa beto bandongisila ya mbote. (Nk. 119:105; Yez. 30:21) Diaka, yandi ke sadilaka bampangi na beto mpi bantu ya nkaka sambu na kupesa beto lusadisu ya bima yina beto kele na yo mfunu. Ata beto ke zaba ve mambu yina ta kumina beto na bilumbu ke kwisa, beto ke tulaka ntima nde Yehowa ta sadisa beto kaka sambu yandi ke zolaka beto mpi ke kuditulaka na kisika na beto.—Yez. 41:10; 1 Pie. 5:6, 7.
Yehowa ta yambula nge ve ata fioti ata mambu ya luzingu na nge me soba na kintulumukina (Tala paragrafe 5)b
6. Inki beto fwete vila ve kana luzingu na beto me soba na kintulumukina?
6 Mpangi Joseph ya beto me tubila, ke tubila mutindu yandi ti nkento na yandi monaka kibeni diboko ya Yehowa ntangu bo basikaka na Betele. Yandi ke tuba nde: “Beto monaka mutindu Yehowa sadisaka beto na nsoba yina salamaka na luzingu na beto. Yandi sadilaka bampangi na beto na dibundu sambu na kusadisa beto. Yandi pesaka beto bima yina beto vandaka ti yo mfunu na kinsuni, yandi sadisaka beto na kudiyangisa ve mingi mpi yandi ke landa kusala yo tii bubu yai.” Kana mambu ya luzingu na nge me soba na kintulumukina, tula ntima nde Yehowa ta twadisa mpi ta pesa nge ngolo yina nge kele ti yo mfunu yo vanda diambu ya mpasi ya nki mutindu me kumina nge. (Yez. 54:10; 58:11) Mpangi Joseph ke tuba diaka nde: “Bangogo ya nkunga na beto mosi ke tubaka nde: ‘Me zaa ve nki ta salama mbasi, kansi mu ta nwana ve mu mosi.’a Ya kieleka, ata mambu kusalama ve ntangu yonso mutindu beto yindulaka, beto fwete tula ntima nde: Yehowa ta vanda ntangu yonso ti beto sambu na kusadisa beto.”
NTANGU BETO KE KUDIYANGISA MINGI SAMBU NA MASUMU YINA BETO SALAKA
7. Bantangu ya nkaka bampangi yina salaka masumu ke kudiyangisaka sambu na nki?
7 Ntangu beto ke fungunaka disumu yina beto salaka, bankuluntu ke sadisaka beto na zola mpi beto ke salaka bikesa ya kuvutukila yo diaka ve. (Bing. 28:13; Yak. 5:14-16; 1 Yoa. 1:9) Kansi bantangu ya nkaka, beto lenda kudiwa kaka bonso nde beto kele ti mfuka ya disumu yango ata Yehowa me lolulaka beto dezia. Beto lenda kudiyula nde: ‘Keti Yehowa lolulaka mono kibeni sambu na diambu yina mono salaka?’ (2 Bak. 2:7) Kudiwa to kudiyula mutindu yina kele mbi ve sambu yo ke vandaka ve ntangu yonso pete sambu na kuvila mambu ya mbi yina beto salaka na bilumbu ya me luta. Ntotila Davidi sonikaka nde: “Ngemba kele ve na mikwa na mono sambu na disumu na mono mpi mono kele na ngolo diaka ve mpi mono me lemba kibeni.” (Nk. 38:3, 8) Kana nge ke kudiwa mutindu yina sambu na masumu yina nge salaka, mukanda ya Yezaya ta sadisa nge na kubaka kikesa.
8-9. Mutindu Yezaya 1:18 ke monisa yo, inki mutindu Yehowa ke lolulaka beto?
8 Tanga Yezaya 1:18. Yehowa ke sadilaka mbandu mosi ya mbote sambu na kumonisa mutindu yandi ke lolulaka kibeni na ntima ya mvimba masumu na beto. Yandi ke tuba nde ata masumu na beto “kele mbwaki bonso menga yo ta kuma mpembe bonso mvula ya mpembe.” Kulere ya mbwaki ya ngolo ke katukaka ve na pete yonso na lele. Kansi, Yehowa ke ndimisa beto nde kana yandi me lolula beto, yandi ke yibukaka diaka ve disumu yina beto salaka.
9 Beto baka mbandu ya ntotila Davidi. Ata yandi salaka bizumba mpi fwaka muntu, Yehowa lolulaka yandi mpi na nima yandi tubaka nde Davidi vandaka muntu ya kwikama. (2 Sam. 11:3, 4, 14, 15; 12:13; 1 Bant. 9:4, 5) Yehowa tulaka dikebi na kwikama ya Davidi kansi ve na bifu yina yandi salaka. Mutindu mosi, kana beto me balula ntima na masonga yonso, Yehowa ke lolulaka beto mpenza mpi ke sadisaka beto na kulanda kukwenda na ntwala ti kansansa ya bunkete. Inki verse ya nkaka ya mukanda ya Yezaya lenda lembika beto ntangu beto ke kudiyangisa sambu na masumu yina beto me salaka yina Yehowa me lolulaka beto dezia sambu na yo?
10. Inki mambu ya ke pesa kikesa Yehowa ke songa beto na Yezaya 38:17?
10 Tanga Yezaya 38:17 mpi noti na nsi ya lutiti. Bangogo “nge me losa masumu na mono yonso na nima ya mukongo na nge,” bo lenda balula yo mpi nde nge “me katula masumu na mono yonso na meso na nge.” Verse yai ke monisa nde Yehowa ke bakaka masumu ya bantu yina ke balulaka ntima na masonga yonso mpi ke losaka yo na nima ya mukongo na yandi disongidila kisika yina yandi lenda mona yo diaka ve to kuyibuka yo. Mukanda mosi ke balula verse yai nde: “Sambu na nge [masumu na mono] kele bonso kima mosi ya me salamaka ve.” Yo ke tendula nde ntangu Yehowa ke lolulaka masumu na beto, yo ke vandaka bonso nde beto salaka yo ve ata fioti. Kana Yehowa me lolula beto, yandi ke yibusaka beto ve ata fioti masumu yango sambu na kusambisa beto diaka to kupesila beto yo diaka ndola. Yandi ke vwansaka yo yonso kibeni. Yandi ke tuba nde: “Mono ta yibuka ve masumu na nge.” (Yez. 43:25) Yo ke pesa mpenza kikesa. Kana Yehowa, Zuzi ya Kuluta Nene ke yibukaka ve masumu yina beto me balulaka ntima sambu na yo, ebuna sambu na nki beto fwete yibuka yo mpi kudiyangisa sambu na yo?
Kubika ve nde masumu yina nge me balulaka ntima sambu na yo kumanisa kiese na nge bubu yai
11. Ata beto me salaka masumu na bilumbu me luta, Yehowa ke tulaka dikebi ya mingi na nki? (Tala mpi kifwanisu.)
11 Konso mbala yina beto ke kudiyangisa sambu na masumu yina beto salaka, beto fwete yibuka mambu yina Yehowa me songa beto na verse yina. Yandi ke lolulaka kibeni na ntima ya mvimba. Yandi ke waka beto ve nsoni sambu na masumu yina beto salaka mpi yandi ke kangilaka beto ve makasi sambu na yo mutindu bantu ya kukonda kukuka ke salaka. (Yez. 57:16) Yehowa ke tulaka dikebi ya mingi na mutindu beto kele bubu yai mpi na bikesa yina beto ke sala sambu na kukuma diaka mbote mingi, kansi ve na masumu yina beto salaka yina beto me balulaka dezia ntima sambu na yo. (Yez. 55:7) Beto ke sadilaka mpenza Nzambi ya zola mpi ya ke lolulaka. Yo yina, beto fwete bika ve nde masumu yina beto me balulaka ntima sambu na yo kumanisa kiese na beto bubu yai to kuvidisa beto dibaku ya kubaka balusakumunu na bilumbu ke kwisa.
Yehowa ke tulaka dikebi na mutindu beto kele bubu yai kansi ve na masumu yina beto salaka yina beto me balulaka ntima sambu na yo (Tala paragrafe 11)c
NTANGU MUNTU YA BETO VANDAKA KUZOLA MINGI ME FWA
12. Inki mutindu beto lenda wa ntangu muntu ya beto vandaka kuzola mingi me fwa?
12 Ntangu muntu mosi ya beto vandaka kuzola mingi me fwa, beto lenda wa mpasi mpi mawa mingi kibeni mpi yo lenda baka ntangu mingi. Bantangu ya nkaka, beto lenda kudiyula sambu na nki Yehowa bikaka nde muntu yango kufwa. Mpangi-bakala Michael, yina bibuti na yandi fwaka na tiya, ke tuba nde: “Ntima na mono zenganaka bitini-bitini mpi mono wilaka Yehowa makasi mutindu yandi bikaka nde bibuti na mono kufwa. Mono zabaka nde yandi ve muntu salaka nde bo fwa, kansi yandi bikaka kaka nde bo fwa.” Mbala ya nkaka nge ke kudiwa mpi mutindu yina. Na bantangu ya mpasi ya mutindu yai, nki mutindu Yehowa lenda pesa nge kikesa mpi kivuvu?
13. Inki Yehowa ke sila beto na Yezaya 25:8?
13 Tanga Yezaya 25:8. Na verse yai Yehowa ke songa beto nde yandi ta “mina lufwa kimakulu.” Meka kuyindula ntangu lufwa ta vanda diaka ve. Nge ta dilaka diaka ve sambu bantu ta fwaka diaka ve, yo vanda bantu ya nge vandaka kuzola. (Yez. 35:10) Nge ta waka diaka ve mpasi ya kumona kisika yina bo zikaka bantu yina nge vandaka kuzola sambu maziamu ta vanda diaka ve. Nge ta vandaka ntangu yonso na kiese ya kumona mvula na mvula bantu yina nge ke zolaka na sante ya mbote. Lusilu yai kele ve mwanda-mwanda kansi yo ta lungana kibeni sambu Yehowa yandi mosi muntu me sila beto yo.—Kus. 21:4, 5.
14. Nge ke kudiwaka nki mutindu ntangu nge ke yindulaka kivuvu ya lufutumuku? (Yezaya 26:19) (Tala mpi kifwanisu.)
14 Tanga Yezaya 26:19. Yehowa ta suka kaka ve na kukatula lufwa kansi yandi ta vutula mpi bampangi na beto yina beto vandaka kuzola mingi na luzingu. Sambu na bantu yina me fwaka Yehowa ke tuba nde: “Bamvumbi na mono ta telama.” Bangogo yai ke monisa nde ata bo me fwaka, bo kele kaka bantu ya Yehowa. Yandi ke vilaka bo ve ata fioti. Yandi ta futumuna bo na ntangu yina yandi me tulaka. Kaka mutindu masa ke vutulaka nti ya ke na kukawuka na luzingu, Yehowa Nto ya luzingu ta tedimisa bampangi na beto yonso ya me lalaka na lufwa. Yo ta vanda ntangu mosi ya kiese kibeni.—Fwanisa ti Marko 5:42.
Kivuvu ya lufutumuku kele mpenza ya kieleka (Tala paragrafe 14)
15. Inki mutindu kivuvu ya lufutumuku ke sadisaka beto ntangu muntu mosi ya beto vandaka kuzola mingi me fwa?
15 Ata kivuvu ya lufutumuku ke katulaka ve mpasi yina beto ke waka ntangu muntu ya beto vandaka kuzola mingi me fwa, beto lenda baka kikesa sambu beto me zaba nde Yehowa ke vilaka bo ve. Kivuvu yai sadisaka mpangi Michael, ya beto me tubila. Yandi ke tuba nde: “Yezaya 26:19 sadisaka mono na kubakisa nde Yehowa ke bakaka bibuti na mono na valere. Yandi ta vila bo ve ata fioti tii ntangu yandi ta vutula bo na luzingu na ntangu yina yandi me tulaka. Verse yai ke pesaka mono kikesa.” Beto fwete landa ntangu yonso kuyindula ntangu yina beto ta zinga diaka ti bampangi na beto ya me fwaka. Kusala mpidina ta sadisa beto na kudiyangisa ve mingi.
16. Inki verse ke sadisaka nge kibeni ntangu diambu mosi ya mpasi me kumina nge?
16 Na disolo yai, beto me tubila mwa baverse ya mukanda ya Yezaya ya lenda sadisa beto ntangu luzingu na beto me soba na kintulumukina, ntangu beto ke kudiyangisa sambu na masumu yina beto salaka yina Yehowa me lolulaka beto dezia sambu na yo mpi ntangu muntu mosi ya beto vandaka kuzola me fwa. Beto ke pesa Yehowa mersi mingi mutindu yandi ke sadilaka Ndinga na yandi sambu na kulembika mpi kupesa beto kikesa. (Nk. 94:19) Keti nge ke zaba verse ya nkaka yina ke sadisaka nge kibeni kana nge me kutana ti diambu mosi ya mpasi? Sala bikesa ya kukanga yo na ntu to mpi nge lenda sonika yo kisika mosi yina nge lenda mona yo mbala na mbala. Mpidina, nge ta landa kubaka mambote na bangogo ya ke pesa kikesa ya Yehowa, Tata na beto ya zola.
NKUNGA 3 Ngolo na Beto mpi Kivuvu na Beto
a Bangogo ya nkunga yai me katuka na mosi ya bankunga na beto ya nkaka ya kele ti ntu-diambu “Yehowa Ke ti Mono.”
b NTENDULA YA BIFWANISU: Bampangi ya dibundu mosi ke yamba mpangi-bakala mosi ti nkento na yandi yina vandaka ntete na Betele.
c NTENDULA YA KIFWANISU: Mpangi-bakala mosi ke kudiyangisa diaka ve sambu na masumu na yandi ya ntama mpi yandi kele na kiese ya kuvanda na Nzo-Nkanda ya Bapasudi-Nzila ya Ntangu Yonso.