Inki Beno Lenda Sala Sambu Kilumbu ya Makwela na Beno Kupesa Yehowa Lukumu?

1-2. Yehowa ke zola nde beno vanda nki mutindu na kilumbu ya makwela na beno?

KETI nge kele ti fianse mpi beno ke zola kukwelana? Kana mpidina, beto ke sikisa beno. Mbala ya nkaka beno ke kudipesa mingi na kuyidika makwela na beno. Yehowa ke tudila mpi makwela na beno dikebi. Yandi ke zola nde beno vanda na kiese na kilumbu ya makwelaa na beno mpi na bilumbu ke kwisa.​—Bing. 5:18; Salomo 3:11.

² Yo me fwana kibeni na kupesa Yehowa lukumu na kilumbu ya makwela na beno. Sambu na nki mpi nki mutindu beno lenda sala yo? Na ntwala nde beto pesa mvutu, beto ke yibusa beno nde disolo yai ke tadila ntete-ntete bantu yina ke yidika kilumbu ya makwela na bo. Ata mpidina, mambu yina yo ke tubila lenda sadisa beto yonso na kupesa Yehowa lukumu kana bo me bingisa beto na makwela mosi to kana bantu yina ke yidika makwela yango me lomba beto bandongisila.

SAMBU NA NKI BENO FWETE PESA YEHOWA LUKUMU?

3. Kana bampangi ke yidika makwela, nki bo fwete tadila mpi sambu na nki?

³ Bampangi yina ke yidika makwela na bo fwete sala mambu na kuwakana ti Biblia. Sambu na nki? Sambu Yehowa muntu me salaka nde bantu kukwelana. Yandi mpi muntu sadisaka makwela ya ntete, disongidila ya Adami ti Eva. (Kuy. 1:28; 2:24) Yo yina, yo kele mfunu mingi nde bampangi yina ke yidika makwela kutadila mbote-mbote bangindu ya Yehowa sambu kilumbu ya makwela na bo kupesa Yehowa lukumu.

4. Sambu na nki beno fwete pesa Yehowa lukumu na kilumbu ya makwela na beno?

⁴ Beno fwete tadila mpi bangindu ya Yehowa ntangu beno ke yidika makwela na beno sambu yandi kele Tata na beno mpi Nduku na beno ya kuluta mbote. (Baeb. 12:9) Ntembe kele ve nde beno ke zola ve kufwa kinduku ti yandi. Yo yina beno ta zola ve nde ata kima mosi na kilumbu ya makwela na beno to na kilumbu ya nkaka kupesa Nduku na beno Yehowa mpasi. (Nk. 25:14) Kana beno yindula mambu yina Yehowa me sadilaka beno mpi yina yandi ta sadila beno na bilumbu ke kwisa, beno ta bakisa nde yo me fwana kibeni na kupesa yandi lukumu na kilumbu ya makwela na beno.​—Nk. 116:12.

INKI MUTINDU BENO LENDA PESA YEHOWA LUKUMU?

5. Inki mutindu Biblia lenda sadisa bantu yina ke yidika makwela na bo?

⁵ Biblia ke pesaka ve Bakristu liste ya mambu yina bo fwete sala na diskure to na feti ya makwela. Yo yina bampangi yina ke yidika makwela lenda sala mambu na kuwakana ti mambu ya luzingu na bo, mutindu mambu ke salamaka na kisika yina bo ke zingaka to mambu yina bo ke sepela ti yo. Bakristu ya kieleka ke zitisaka mpi bansiku ya Leta. (Mat. 22:21) Diaka, Bakristu fwete sadila mambu yina Biblia ke tubaka sambu na kuyidika makwela yina ta pesa Yehowa lukumu mpi kiese. Ebuna, nki minsiku ya Biblia lenda sadisa beno?

6. Sambu na nki yo kele mfunu nde bampangi yina ke zola kukwelana kuzitisa bansiku ya Leta me tulaka sambu na makwela?

⁶ Beno zitisa bansiku ya Leta. (Bar. 13:1, 2) Na bansi mingi na ntwala nde bakala ti nkento kukwelana, yo ke lombaka nde bo zitisa bansiku yina Leta me tulaka sambu na makwela. Yo yina bampangi yina ke zola kukwelana fwete sosa kuzaba bansiku ya bwala na bo. Kana beno ke zaba ve mutindu ya kuzwa yo, beno lenda lomba bankuluntu na kusadisa beno.b

7. Inki mutindu makwela fwete vanda?

⁷ Beno sala yonso sambu kilumbu ya makwela na beno kupesa Yehowa lukumu. (1 Bak. 10:31, 32) Beno sala yonso sambu makwela na beno kumonisa bikalulu ya mbuma ya mpeve ya Nzambi kansi ve mpeve ya nsi-ntoto. (Bag. 5:19-26) Bakala muntu ta kuma mfumu ya dibuta, yo yina yandi kele ti mukumba ya kusala nde kilumbu ya makwela na bo kuvanda ntangu mosi ya kiese mpi yo pesa Yehowa lukumu. Inki bo lenda sala sambu kilumbu ya makwela na bo kuvanda mpidina? Bo lenda sadila bo diskure ya makwela. Kana mpangi yina ke sala diskure yango ke sala yo mbote, ti zola mpi luzitu, yo ta sadisa bantu yina ke landa yandi na kubakisa nde makwela kele kado ya Yehowa mpi nde yo kele ve kima ya kubaka na nsaka. Yo yina kana mpila kele, bampangi mingi ke zolaka nde diskure na bo ya makwela kusalama na Nzo ya Kimfumu. Kana beno ke zola mpi nde diskure ya makwela na beno kusalama na Nzo ya Kimfumu, beno fwete sonikila kimvuka ya bankuluntu ya dibundu mosi ya ke salaka balukutakanu na Nzo ya Kimfumu yango. Beno fwete sala yo mwa ntangu na ntwala.

8. Inki beno fwete sala sambu feti ya makwela na beno kupesa Yehowa lukumu? (Baroma 13:13)

⁸ Tanga Baroma 13:13. Kana beno ke zola kusadisa feti ya makwela na nima ya diskure, nki beno lenda sala sambu feti yango kumonisa ve mpeve ya nsi-ntoto? Ngogo ya Kigreki ya bo me balula nde “bankinsi yina bantu ke salaka mambu ya kisaka-saka” na verse yai, vandaka kutubila bafeti yina bantu vandaka kunwa malafu mingi mpi kubudisa miziki tii na mpimpa mingi mpenza. Yo yina kana beno ta pesa bantu malafu na feti na beno ya makwela, beno fwete tadila na ntwala mambu yina beno fwete sala sambu ata muntu mosi ve kunwa malafu mingi.c Kana beno ta tula mpi miziki, beno fwete tula yo na volime ya nsi sambu bantu ya beno me bingisa kusolula mbote kukonda mpasi. Beno fwete tadila mpi mbote-mbote na ntwala miziki yina beno ta tula mpi mambu yina bo ke tuba na bankunga sambu ata muntu mosi ve kubula sakuba.

9. Inki bankwelani fwete sala sambu mambu yina bantu ta tuba to ta sala na feti na bo kupesa Yehowa lukumu?

⁹ Mbala ya nkaka yo ta lomba nde banduku na beno to bantu ya mabuta na beno kutuba na bunkufi mwa kima mosi. To mbala ya nkaka yo ta lomba nde bo tula mpi video mosi to bafoto na beno na feti yango. To mpi mbala ya nkaka beno me yidika mambu ya nkaka yina ta kumisa feti yango kitoko mingi. Yo kele ve mbi na kusala mpidina. Kansi, beno fwete sala yonso sambu mambu yina ta salama kupesa Yehowa lukumu. (Bafil. 4:8) Yo yina, beno lenda kudiyula nde: ‘Keti mambu yango ta monisa nde beto ke zitisa bantu ya nkaka? Keti yo ta monisa nde beto ke zitisa makwela?’ Diaka, ngiufula ya kuluta mfunu yo yai: ‘Keti yo ta pesa Yehowa lukumu?’ Ata yo kele ve mbi nde muntu mosi kutuba kima yina lenda sekisa bantu, yandi fwete tuba ve ata fioti kima ya mbi to kima yina lenda pusa bantu na kuyindula mambu ya me tala kuvukisa nitu. (Baef. 5:3) Kana bantu ya mabuta na beno to banduku na beno ta tuba kima mosi, beno fwete songa bo na kutuba mpi na kusala kaka mambu yina beno ke zola.

10. Sambu na nki bakala ti nkento fwete monisa kudikulumusa ntangu bo ke yidika feti ya makwela na bo? (1 Yoane 2:15-17)

¹⁰ Beno vanda ya kudikulumusa. (Tanga 1 Yoane 2:15-17.) Yehowa ke vandaka na kiese kana bansadi na yandi ke sosa ve nde bantu kupesa bo lukumu kansi kana bo ke sosa ntete kupesa yandi lukumu. Yo yina bantu ya kudikulumusa ta basisa ve mbongo mingi sambu na ‘kudisonga na lulendo yonso’ na meso ya bantu. Inki mambote kusala feti ya fioti ya makwela ta natila beno? Mpangi Mike na Norvège ke tuba nde: “Beto kotaka ve bamfuka mpi yo salaka nde beto landa kuvanda bapasudi-nzila. Nkutu, feti ya makwela na beto vandaka kitoko mpi bantu ke yibukaka yo kaka ata yo vandaka ve feti ya nene.” Mpangi-nkento Tabitha na Inde ke tuba nde: “Mono ti fianse na mono, beto salaka ve feti ya nene. Yo yina beto vandaka ve ti mambu mingi ya kuyidika mpi beto vandaka ve kubendana-bendana mingi sambu na yo. Yo salaka nde beto vanda ve ti basusi mingi.” Mbala ya nkaka, yo lenda vanda mpi mutindu mosi sambu na beno.

11. Inki mutindu bakala ti nkento yina ke yidika makwela ta monisa kudikulumusa na mutindu na bo ya kulwata mpi ya kuyidika nitu? (Tala mpi bifwanisu.)

¹¹ Keti beno me tubila dezia bilele yina beno ta lwata? Ntembe kele ve nde beno ke zola kubasika mbote kibeni. Nkutu ata na ntangu ya ntama, bakala ti nkento yina ke kwelana vandaka kutula dikebi ya mingi na mutindu bo ta basika. (Yez. 61:10) Ya kieleka, mutindu beno ta lwata na kilumbu ya makwela na beno ta vanda ve mpila mosi ti mutindu beno ke lwataka konso kilumbu. Kansi beno fwete lwata ve na mutindu yina ta budisa bantu ya nkaka dibaku. (1 Tim. 2:9) Beno bika ve nde mutindu na beno ya kulwata, ya kuyidika nitu to konso kima ya nkaka kukuma kima ya kuluta mfunu na kilumbu ya makwela na beno. Beno sala yonso sambu bantu kupesa Yehowa lukumu.​—1 Pie. 3:3, 4.

12. Sambu na nki bantu yina ke yidika makwela fwete buya bakutime ya ke wakana ve ti Biblia ata bantu ke sadilaka yo mingi na kisika ya bo ke zingaka?

¹² Beno buya bakutime yina ke wakana ve ti Biblia. (Kus. 18:4) Na nsi-ntoto yai, bafeti ya makwela mingi ke vandaka ti bakutime yina ke wakana ti mabundu ya luvunu, bisalu ya bampeve ya mbi mpi boma ya mambu ya luvunu. Yehowa ke zolaka nde beto kudikotisa ve ata fioti na mambu yai ya mbi. (2 Bak. 6:14-17) Kana beno kele ti badute sambu na kutime mosi yina bantu ke sadilaka mingi na bafeti ya makwela na kisika yina beno ke zingaka, beno lenda sala bansosa sambu na kuzaba kisina na yo mpi kutadila minsiku ya Biblia yina lenda sadisa beno na kuzaba kana beno ta kotisa yo mpi na makwela na beno to ve.

13. Inki mutindu bantu yina ke kwelana lenda tadila bakado bonso Yehowa?

¹³ Keti bantu ke vandaka ti kikalulu ya kupesa bakado na bafeti ya makwela na kisika yina beno ke zingaka? Muntu yina kele ti mbongo mingi lenda pesa ve kado ya mutindu mosi ti muntu yina kele nsukami. Ya kieleka, Biblia ke lombaka beto na kuvanda ti kikalulu ya kukaba mpi yo ke pesaka kiese. (Bing. 11:25; Bis. 20:35) Kansi bakala ti nkento yina ke kwela fwete sosa ve kaka nde bantu yina bo me bingisa na feti ya makwela kupesa bo bakado, to kusala nde bantu yina me pesa bo ve bakado ya ntalu kudimona kukonda mfunu. Beto fwete landa mbandu ya Yehowa mpi kutadila bakado mutindu yandi ke tadilaka yo, disongidila kubika nde konso muntu kupesa kado na luzolo na yandi mpi na kutadila mingi ya mbongo na yandi.​—2 Bak. 9:7.

INKI MUTINDU BENO LENDA BUYA MAMBU YA MPASI MPI KUNUNGA YO?

14. Inki mambu ya mpasi bampangi ya nkaka ke kutanaka ti yo ntangu bo ke yidika feti ya makwela?

¹⁴ Beno lenda kutana ti mambu ya mpasi ntangu beno ke yidika feti ya makwela yina ta pesa Yehowa lukumu. Mu mbandu, yo lenda vandila beno mpasi na kuyidika feti ya fioti ya makwela. Mpangi-bakala Charlie na îles Salomon ke tuba nde: “Yo vandilaka beto mpasi mingi na kupona bantu yina beto zolaka kubingisa. Beto kele ti banduku mingi mpi na kisika yina beto ke zingaka, konso muntu ke zolaka nde bo bingisa yandi.” Mpangi Tabitha, yina beto me tubila dezia, ke tuba nde: “Na kisika ya mono ke zingaka, bantu ke salaka bafeti ya nene ya makwela. Yo yina yo vandilaka bibuti na beto mpasi na kundima lukanu yina mono ti fianse na mono bakaka ya kubingisa kaka bantu 100.” Mpangi Sarah na Inde ke tuba nde: “Bantu ya nkaka ke tulaka dikebi mingi na mingi ya mbongo yina bo kele ti yo mpi na mutindu bantu ya nkaka ke tadilaka bo. Bisoni na mono sadisaka feti ya nene ya makwela, yo yina bantu ya nkaka vandaka kupusa mono na kusala feti ya kafu-kafu kuluta ya bo.” Inki lenda sadisa beno na kununga mambu yai ya mpasi ya beto me tubila awa mpi mambu mingi ya nkaka?

15. Sambu na nki yo kele mfunu mingi na kusamba ntangu beno ke yidika feti ya makwela?

¹⁵ Beno samba mbala na mbala sambu na feti ya makwela yina beno ke yidika. Beno lenda songa Yehowa mambu ya mpasi yina beno ke kutana ti yo sambu na kuyidika feti yango mpi basusi na beno. (Bafil. 4:6, 7) Beno lenda lomba yandi na kusadisa beno na kubaka balukanu ya mbote, na kuvanda na ngemba ntangu beno me lemba nitu mpi na kuvanda ti kikesa ya kubaka balukanu yina lenda sepedisa ve bantu ya nkaka. (1 Pie. 5:7) Beno ta kuma kutudila Yehowa ntima mingi kana beno ke mona mutindu yandi ke pesa mvutu na bisambu na beno. Mpangi Tabitha, yina beto me tubila dezia, ke tuba nde: “Mono ti fianse na mono vandaka ve kuzola kubendana-bendana beto zole to ti mabuta na beto. Yo yina konso ntangu yina beto vandaka kuyidika feti na beto ya makwela, beto vandaka kuyantika ntete ti kisambu. Beto vandaka mpenza kumona diboko ya Yehowa mpi beto vandaka kuwakana mbote beto yonso.”

16-17. Inki mutindu kusolula mbote ta sadisa beno ntangu beno ke yidika feti ya makwela?

¹⁶ Beno solula pwelele mpi na luzitu yonso. (Bing. 15:22) Bakala ti nkento yina ke kwelana fwete baka balukanu mingi sambu na kilumbu na bo ya makwela. Mu mbandu kilumbu yina bo ta kwelana, mingi ya mbongo yina bo ta sadila, bantu yina bo ta bingisa mpi mambu mingi ya nkaka. Yo yina na ntwala ya kubaka konso lukanu yina, beno tadila ntete beno zole mambu yonso mpi beno tubila minsiku ya Biblia yina lenda sadisa beno mpi bandongisila yina bampangi ya kuyela na kimpeve me pesa beno. Ntangu beno ke tubila ti mabuta na beno mambu yina beno ke sepela ti yo, beno sala yo na mawete, beno vanda ve makambu ngolo mpi beno lenda ndima bangindu ya bantu ya nkaka. Kana bantu ya mabuta na beno, mu mbandu bibuti na beno, me pesa beno ngindu mosi mpi ngindu yango kele mbi ve, beno lenda sadila yo sambu na kupesa bo kiese. Kilumbu na beno ya makwela kele mpi mfunu mingi sambu na bo. Kansi kana beno me mona nde beno ta sadila ve ngindu na bo, beno lenda songa bo na luzitu yonso sambu na nki beno ta sadila yo ve. (Bakol. 4:6) Beno songa bantu ya mabuta na beno pwelele nde lukanu na beno ya ntete kele ya kusala feti ya makwela ya kiese yina ta pesa Yehowa lukumu.

¹⁷ Yo lenda vandila beno mpasi na kutendudila bibuti na beno balukanu na beno, mingi-mingi kana bo kele ve Bambangi ya Yehowa. Ata mpidina, beno lenda sadisa bo na mawete yonso na kubakisa bangindu na beno. Mpangi-bakala Santhosh na Inde ke tuba nde: “Mabuta na beto vandaka kuzola nde beto landa bakutime ya dibundu ya Hindu na feti na beto ya makwela. Yo bakaka mono ti fianse na mono ntangu mingi sambu na kutendudila bo balukanu na beto. Beto ndimaka mwa mambu ya nkaka ya ke fwa ve bansiku ya Yehowa yina bo lombaka beto na kusala. Mu mbandu, beto sobaka madia yina beto ponaka ntete mpi beto lambisaka madia ya nkaka yina bo vandaka kusepela ti yo. Diaka, beto buyisaka miziki mpi makinu na feti na beto sambu mabuta na beto vandaka ve ti kikalulu ya kulanda miziki mpi ya kukina.”

18. Inki beno lenda sala sambu na kuzikisa nde mambu yonso ta luta mbote na kilumbu ya makwela na beno? (1 Bakorinto 14:40) (Tala mpi kifwanisu.)

¹⁸ Beno yidika mambu mbote-mbote. Kana beno me yidika mambu mbote-mbote, beno ta kudiyangisa ve mingi mpi beno ta vanda ve zulu-zulu na kilumbu ya makwela na beno. (Tanga 1 Bakorinto 14:40.) Mpangi-bakala Wayne na Taïwan ke tuba nde: “Mwa bilumbu na ntwala ya makwela na beto, beto salaka lukutakanu mosi ya fioti ti bantu yina zolaka kusadisa beto na kilumbu ya makwela yango. Beto tubilaka mambu yina beto yidikaka sambu na kilumbu yango mpi beto salaka barepetisio ya mambu ya nkaka yina beto zolaka kusala na kilumbu yango sambu na kuzikisa nde mambu yonso ta luta mbote.” Beno fwete sala yonso sambu mambu yonso kusalama na ntangu ya mbote, mpidina yo ta monisa nde beno ke zitisa bantu yina beno me bingisa.

19. Inki beno lenda sala sambu feti na beno ya makwela kupesa Yehowa lukumu mpi yo luta mbote?

¹⁹ Beno lenda yindula na ntwala mambu ya mpasi yina lenda basika na feti na beno mpi mambu yina beno ta sala kana yo me basika. (Bing. 22:3) Mu mbandu, kana beno ke zingaka na kisika yina bantu ya nkaka ke kwisaka na feti ya makwela ata bo me bingisa bo ve, beno lenda tubila mambu yina beno lenda sala sambu na kukanga nzila nde yo salama. Diaka, beno songa bantu ya mabuta na beno yina kele ve Bambangi ya Yehowa mambu yina ta salama na feti yango mpi beno songa bo sambu na nki beno ke landaka ve bakutime ya nkaka. Beno lenda songa bo disolo “Inki Mutindu Mambu Ke Salamaka na Feti ya Makwela ya Bambangi ya Yehowa?” na jw.org. Beno lenda pona mpangi mosi ya kuyela na kimpeve na kuvanda “ntwadisi ya nkinsi” sambu mambu yonso kutambula mbote. (Yoa. 2:8) Kana beno songa yandi pwelele mambu yonso yina beno me yidika sambu na feti na beno ya makwela, yandi lenda sadisa beno na kusala feti yina ta pesa Yehowa lukumu mpi yandi ta sala nde mambu yonso kuluta mutindu beno ke zola.

20. Inki mambu bantu yina ke zola kukwelana fwete vila ve?

²⁰ Beno lenda kudiyangisa mwa fioti ntangu beno ke tadila mambu yonso yina yo ke lomba kusala sambu na kuyidika kilumbu ya makwela na beno. Kansi beno vila ve nde feti ya makwela kele kaka sambu na kilumbu mosi. Yo kele luyantiku ya voyage ya kitoko ya beno zole na kisalu ya Yehowa. Yo yina beno sala yonso sambu na kusala makwela ya kukonda mindondo yina ta pesa Yehowa lukumu. Beno tudila Yehowa ntima mpi beno landa lutwadisu na yandi. Ebuna, yandi ta sadisa beno na kuyidika mbote kilumbu ya makwela na beno sambu yo vanda kitoko mpi yo bikila beno basuvenir ya mbote.​—Nk. 37:3, 4.