Landa Mbandu ya Kudikulumusa ya Yehowa

1. Sambu na nki kudikulumusa ya Yehowa ke yitukisa?

NTANGU nge ke talaka bamfumu bubu yai, keti nge ke monaka nde bo kele ti kikalulu ya kudikulumusa? Ntembe kele ve nde bo ke vandaka ve ti yo. Kansi Yehowa, Nkwa-Ngolo Yonso, kele ya kudikulumusa. (Nk. 113:5-8) Yehowa ke vandaka mpenza ya kudikulumusa mingi mpi yandi ke vandaka ve lulendo ata fioti. Na disolo yai, beto ta longuka mitindu iya yina Yehowa ke sadilaka beto mambu mpi mutindu yo yonso ke monisaka nde yandi kele ya kudikulumusa. Beto ta longuka mpi mutindu Yezu landaka mbandu ya kudikulumusa ya Tata na yandi. Kulonguka mambu yai ta sadisa beto na kukuma banduku ya ngolo ya Yehowa mpi na kulanda diaka mbote-mbote mbandu ya kudikulumusa na yandi.

BETO LENDA SOLULA TI YEHOWA KUKONDA MPASI

2. Nkunga 62:8 ke longa beto nki sambu na Yehowa? (Tala mpi kifwanisu.)

² Mbala mingi, yo ke vandaka mpasi na kusolula ti bantu ya lulendo. Bo ke sadilaka ve bantu mambu na mawete sambu bo ke yindulaka nde bo kele na zulu na bo, yo yina bantu ke buyaka kukangama ti bo. Kansi Yehowa Tata na beto ya zulu kele ve bonso bo sambu yandi kele ya kudikulumusa mpi yandi ke zolaka nde beto kuma banduku na yandi mpi beto songa yandi mambu yina kele na bantima na beto. (Tanga Nkunga 62:8.) Kaka mutindu tata mosi ya zola ke widikilaka na dikebi mpenza mambu yina mwana na yandi ke songa yandi, Yehowa mpi ke widikilaka bisambu ya bansadi na yandi. Nkutu, yandi zolaka nde bo sonika na Biblia bisambu mingi ya bansadi na yandi mpi yo ke monisa nde yandi kele muntu yina beto lenda solula ti yandi kukonda mpasi. (Yoz. 10:12-14; 1 Sam. 1:10-18) Kansi nki beto lenda sala kana kima mosi ke pusa beto na kuyindula nde beto me fwana ve na kusamba Yehowa?

3. Inki ke ndimisa beto nde Yehowa ke zolaka nde beto samba yandi mbala na mbala ata beto ke yindula nde yo me fwana ve nde yandi zola beto?

³ Beto fwete samba Yehowa ata beto ke yindula nde yo me fwana ve nde yandi zola beto. Sambu na nki beto ke tuba mpidina? Sambu na mbandu mosi ya Yezu tubilaka. Mbandu yango kele ya mwana mosi yina vilaka. Mwana yango salaka bifu mingi, kansi na nima yandi balulaka ntima mpi zolaka kuvutuka na nzo na bo ata yandi vandaka kuyindula nde yo fwanaka ve nde tata na yandi kuvutula yandi na nzo bonso mwana na yandi. Inki tata yango salaka ntangu mwana na yandi kwisaka kuvutuka na nzo? Yezu tubaka nde kaka ntangu tata yina monaka mwana yango na kintama, yandi “bakaka ntinu mpi yambaka yandi mpi pesaka yandi beze na mawete yonso.” (Luka 15:17-20) Yehowa kele bonso tata yai. Kaka ntangu yandi ke waka bisambu ya konso muntu yina kele na mawa mpi ke kudiyangisa sambu na kima mosi ya mbi yina yandi salaka to sambu na basusi ya luzingu, kudikulumusa na yandi ke pusaka yandi na kuwidikila muntu yango na dikebi yonso. (Bid. 3:19, 20) Yehowa kele ya kufuluka ti mawa mpi yandi ke kwisaka ntinu na mutindu ya kifwani sambu na kupesa beto kikesa mpi kuyibusa beto nde yandi ke zolaka beto mpi ke wilaka beto mawa. (Yez. 57:15) Inki mutindu Yehowa “ke kwisaka ntinu” na beto bubu yai? Yandi ke sadilaka mbala mingi bankuluntu, bantu ya mabuta na beto yina kele Bambangi ya Yehowa mpi bampangi na dibundu sambu na kusadisa beto. (Yak. 5:14, 15) Yehowa ke sadisaka beto mutindu yai sambu yandi ke zolaka nde beto kuma banduku na yandi ya ngolo.

4. Sambu na nki bantu vandaka kusolula ti Yezu kukonda mpasi?

⁴ Yezu ke landaka mbandu ya Tata na yandi. Yezu ke vandaka muntu ya kudikulumusa bonso Tata na yandi. Yo yina, ntangu yandi vandaka awa na ntoto, bantu vandaka kusolula ti yandi mpi kuyula yandi bangiufula kukonda mpasi. (Mar. 4:10, 11) Ntangu yandi vandaka kuyula bo mambu yina bo ke yindula sambu na diambu mosi, bo vandaka kupesa yandi mvutu kukonda boma. (Mat. 16:13-16) Diaka, kana bo me sala kima ya mbi, bo vandaka kuwa ve boma nde Yezu ta wa makasi sambu bo zabaka nde yandi kele muntu ya mawete, ya mawa mpi ya ntima-nda. (Mat. 17:24-27) Yezu vandaka kulanda mbote-mbote mbandu ya Tata na yandi mpi yo sadisaka balongoki na yandi na kuzaba Yehowa mbote mpenza. (Yoa. 14:9) Bo bakisaka mpi nde Yehowa kele ve muntu ya nku mpi ya lulendo mutindu bamfumu ya mabundu ya bilumbu na bo vandaka. Kansi, yandi kele muntu ya kudikulumusa mpi ke zolaka nde bantu kukuma banduku na yandi.

5. Inki mutindu kudikulumusa lenda sadisa beto na kusolula ti bantu kukonda mpasi?

⁵ Inki mutindu beto lenda landa mbandu ya Yehowa? Kana beto kele ya kudikulumusa, bantu ta solulaka ti beto kukonda mpasi. Diaka, beto ta vanda ve ti kikenene, lulendo to kikalulu ya kubuya kulolula bantu. Kansi beto ta vanda mawete, ntima nda mpi beto ta lolulaka bantu na ntima ya mvimba. Yo ta sala nde bo tina beto ve, kansi bo pusana pene-pene ti beto. (Bakol. 3:12-14) Bankuluntu fwete sala yonso sambu bampangi kuwa ve boma ya kusolula ti bo. Yo yina, bo fwete lutisa ntangu mbala na mbala ti bampangi. Yo ke tendula nde bo fwete sala yonso sambu na kusala balukutakanu kimuntu-kimuntu na kisika ya kusala na nzila ya video. Kana mpila kele, bo lenda longa nsangu ya mbote nzo na nzo ti bampangi ya nkaka. Kana bankuluntu ke sala mutindu yai, bampangi ta zaba bo mbote-mbote mpi ta solulaka ti bo kukonda mpasi kana bo kele ti mfunu ya lusadisu.

YEHOWA KELE VE MAKAMBU NGOLO

6-7. Inki mutindu Yehowa monisaka nde yandi vandaka ve makambu ngolo ti bansadi na yandi? Pesa mbandu.

⁶ Bantu mingi ya lulendo ke vandaka makambu ngolo, kansi yo kele ve mutindu yina sambu na Yehowa. Ata yandi kele muntu ya kuluta ngolo mpi nene, yandi ke vandaka ve makambu ngolo sambu yandi kele ya kudikulumusa. Beto tala mambu yina yandi sadilaka Miriami mpangi ya Moize. Aroni ti Miriami vandaka kutuba mambu ya mbi sambu na Moize yina Yehowa tulaka sambu na kutwadisa bo. Mambu yina bo tubaka pesaka ve Yehowa lukumu. Yo yina, Yehowa wilaka Miriami makasi ya mingi mpi losilaka yandi maladi ya lepre. Ebuna Aroni mpi Moize bondilaka Yehowa sambu yandi belula mpangi na bo ya nkento. Inki Yehowa salaka? Ti kudikulumusa yonso, yandi wilaka bo mpi belulaka Miriami.​—Kut. 12:1-15.

⁷ Yehowa monisaka mpi kudikulumusa ntangu yandi belulaka Ntotila Ezekiasi. Yehowa tubilaka profete na yandi na kusonga Ntotila Ezekiasi nde yandi ta fwa ntama mingi ve. Ntotila Ezekiasi dilaka mpi bondilaka Yehowa na kubelula yandi. Inki Yehowa salaka? Yandi yikaka Ntotila Ezekiasi bamvula 15 ya luzingu. (2 Bant. 20:1, 5, 6) Ya kieleka, kudikulumusa pusaka Yehowa na kuwila yandi mawa mpi na kubelula yandi.

8. Pesa mbandu ya ke monisa nde Yezu ke vandaka ve makambu ngolo. (Marko 3:1-6)

⁸ Yezu ke landaka mbandu ya Tata na yandi. Ntangu Yezu vandaka na ntoto, yandi vandaka kusadila bantu yonso mambu ya mbote. Mu mbandu, yandi belulaka bantu mingi na Kisabatu ata bamfumu ya mabundu vandaka kutelemina yandi. (Tanga Marko 3:1-6.) Mutindu Yezu ke twadisaka dibundu bubu yai ke monisa nde yandi ke vandaka ve makambu ngolo. Mu mbandu, kana mpangi mosi me sala disumu ya nene, yandi ke monisilaka yandi ntima-nda mpi ke pesaka mpangi yango dibaku ya kusala bansoba.​—Kus. 2:2-5.

9. Inki mutindu beto lenda monisa nde beto kele ve makambu ngolo? (Tala mpi bifwanisu)

⁹ Inki mutindu beto lenda landa mbandu ya Yehowa? Bonso Yehowa, beto fwete vanda ve makambu ngolo na mutindu na beto ya kuyindula mpi ya kusala mambu. (Yak. 3:17) Mu mbandu, ata yo ke lombaka nde bibuti kukanga ve meso na mambu ya mbi ya bana na bo, bo fwete vanda ve makambu ngolo mpi kupusa ve bana na bo na kusala mambu yina bo lenda kuka ve kusala. Kuyantika 33:12-14 ke monisa nde Yakobi kele mbandu ya mbote na diambu yai. Diaka, bibuti ya kudikulumusa mpi ya ke vandaka ve makambu ngolo fwete fwanisa ve bana na bo. Bankuluntu mpi fwete vanda ve makambu ngolo. Mu mbandu, nkuluntu mosi lenda ndima lukanu ya bankuluntu ya nkaka me baka kana yo ke fwa ve minsiku ya Biblia. (1 Tim. 3:2, 3) Beto yonso mpi fwete sala yonso sambu na kubakisa bangindu ya bampangi ya nkaka kana yo kele ve mutindu mosi ti ya bo. (Bar. 14:1) Ya kieleka, beto yonso fwete sala nde ‘bantu yonso kuzaba kikalulu na beto ya kuvanda ve makambu ngolo.’​—Bafil. 4:5.

YEHOWA KELE NTIMA-NDA

10. Inki mutindu Yehowa monisaka ntima-nda?

¹⁰ Bantu ya lulendo ke zolaka ve kuvingila sambu lulendo ke salaka nde bo vanda ve ntima-nda. Kansi yo kele ve mutindu yina sambu na Yehowa. Mu mbandu na bilumbu ya Noa, Yehowa tubaka nde yandi ta vingila bamvula 120 na ntwala ya kufwa bantu ya mbi. (Kuy. 6:3) Yo lombaka nde Noa kusansa bana na yandi mpi bo yonso kusadisa yandi na kutunga maswa yina ta gulusa bo. Diaka, Yehowa widikilaka Abrahami na dikebi mpenza mpi ti ntima-nda ntangu Abrahami vandaka kuyula yandi bangiufula sambu na mbanza Sodome ti mbanza Gomore yina yandi zolaka kufwa. Kana Yehowa vandaka lulendo, yandi zolaka kutuba nde: ‘Nge kele nani sambu nge yula mono mpidina?’ Kansi Yehowa kele ya kudikulumusa, yo yina yandi monisilaka Abrahami ntima-nda mpenza.​—Kuy. 18:20-33.

11. Mutindu 2 Piere 3:9 ke monisa yo, sambu na nki Yehowa ke monisaka ntima-nda bubu yai?

¹¹ Kudikulumusa ya Yehowa ke sadisaka yandi na kumonisila beto mpi ntima-nda bubu yai. Yandi ke vingila tii ntangu yina yandi me tulaka sambu na kufwa nsi-ntoto yai ya mbi. Sambu na nki? “Sambu yandi ke zola ve nde ata muntu mosi kufwa, kansi yandi ke zola nde bantu yonso kubalula ntima.” (Tanga 2 Piere 3:9.) Keti yo ke tendula nde ntima-nda ya Yehowa kele mpamba? Ve. Sambu yo me sadisaka bantu mingi na kukuma bansadi na yandi. Beto ke tula ntima nde yo ta sadisa mpi bantu mingi ya nkaka. Kansi ntima-nda ya Yehowa kele ti nsuka. Ata Yehowa ke zolaka bantu, yandi ke kangaka ve meso na mambu ya mbi. Yandi ta bika ve nde mambu ya mbi kulanda kusalama.​—Hab. 2:3.

12. Inki mutindu Yezu ke landaka mbandu ya ntima-nda ya Yehowa?

¹² Yezu ke landaka mbandu ya Tata na yandi. Banda bamvula mingi Yezu ke landaka mbandu ya ntima-nda ya Yehowa. Yezu ke monaka mutindu Satana ke kusilaka Yehowa ti bansadi na yandi makambu. (Kuy. 3:4, 5; Yobi 1:11; Kus. 12:10) Yezu ke monaka mpi bampasi ya ngolo yina bantu ke kutanaka ti yo. Yezu ke vingila ti nzala ya ngolo ntangu yina yandi ta ‘fwa bisalu ya Diabulu.’ (1 Yoa. 3:8) Inki ke sadisaka Yezu na kuvingila ti ntima-nda yonso nde Yehowa kupesa yandi nswa ya kufwa bisalu yonso ya Diabulu? Kudikulumusa. Yo ke sadisaka Yezu na kubika mambu yonso na maboko ya Yehowa.​—Bis. 1:7.

13. Inki mutindu Yezu monisilaka bantumwa na yandi ntima-nda mpi sambu na nki?

¹³ Ntangu Yezu vandaka awa na ntoto, yandi vandaka ntima-nda ti bantumwa na yandi. Mu mbandu, ntangu bantumwa na yandi vandaka kusosa kuzaba mbala na mbala nani kele muntu ya kuluta nene na kati na bo, Yezu wilaka bo ve makasi mpi yandi yambulaka bo ve. Kansi yandi landaka kaka kumonisila bo ntima-nda. (Luka 9:46; 22:24-27) Yandi zabaka nde bo ta sala bansoba ya me fwana na nima. Keti yo me kuminaka nge mpi na kusala kifu mosi mbala na mbala? Kana mpidina, nge fwete vanda na kiese sambu Ntotila na beto kele ya kudikulumusa mpi ntima-nda.

14. Inki lenda sadisa beto na kuvanda ntima-nda?

¹⁴ Inki mutindu beto lenda landa mbandu ya Yehowa? Kana beto kele ti “mabanza ya Kristu,” yo ta sadisa beto na kuyindula mpi na kusala mambu bonso Yehowa. (1 Bak. 2:16) Inki lenda sadisa beto na kubakisa mbote-mbote mabanza ya Kristu? Kutanga Baevanzile kele mutindu ya kuluta mbote ya kubakisa mabanza ya Kristu. Diaka, beto fwete baka ntangu ya kuyindula mambu yina yandi salaka awa na ntoto mpi sambu na nki yandi salaka yo. Beto fwete lomba mpi Yehowa na kusadisa beto na kuvanda ya kudikulumusa mpi ntima-nda bonso Yezu. Kana beto ke landa kaka kuvanda ti mabanza ya Kristu, yo ta sadisa beto na kulanda kibeni mbandu ya Nzambi ya kuvanda ntima-nda ti beto mosi mpi ti bampangi na beto.​—Mat. 18:26-30, 35.

YEHOWA KE TUDILAKA BANTU YA KUDIKULUMUSA DIKEBI

15. Inki mutindu Yehowa ke sadilaka mambu yina kele na Nkunga 138:6?

¹⁵ Tanga Nkunga 138:6. Beto kele na kiese mingi ya kuzaba nde Yehowa yina kele Mfumu ya Kuluta Nene, ke tudilaka bantu ya kudikulumusa dikebi ya mingi. Beto baka mbandu ya bantu ya kudikulumusa ya ntangu ya ntama yina Yehowa tudilaka dikebi. Beto lenda yibuka ve mingi na kati na bo, kansi masolo na bo kele na Biblia. Mu mbandu, Yehowa sadilaka Moize sambu na kusonika disolo ya Debora. Yandi vandaka nsadi ya Izaki mpi ya Yakobi bamvula kiteso ya 125. Ata Biblia ke tubilaka ve mambu mingi sambu na nkento yai ya kwikama, Yehowa salaka nde Moize kusonika disolo ya nkento yai na Biblia. Ntangu yandi fwaka, bo pesaka kisika yina bo zikaka yandi zina ya Aloni-bakuti, disongidila nde nti ya shene ya kudila. Yo ke monisa nde bo vandaka kuzola yandi mingi sambu bo dilaka yandi mingi. (Kuy. 24:59; 35:8, noti na nsi ya lutiti.) Bamvula mingi na nima, Yehowa ponaka Davidi, yina vandaka leke mpi ngungudi sambu na kukuma ntotila ya dikanda ya Izraele. (2 Sam. 22:1, 36) Ntangu fioti na nima ya kubutuka ya Yezu, Nzambi tindaka wanzio na kusonga bangungudi nde Mesia me butuka na Betelemi. Bangungudi yina vandaka bantu ya ntete na kuzaba nsangu yai mpi yo vandaka lukumu ya nene sambu na bo. (Luka 2:8-11) Ntangu Yozefi mpi Maria nataka Yezu na tempelo, Yehowa pesaka minunu Simeoni mpi Ana dibaku ya kumona Yezu. (Luka 2:25-30, 36-38) Ya kieleka, “ata Yehowa kele na zulu kibeni, yandi ke talaka muntu ya kudikulumusa.”

16. Na nki mutindu Yezu ke sadilaka bantu mambu bonso Tata na yandi?

¹⁶ Yezu ke landaka mbandu ya Tata na yandi. Bonso Yehowa, Yezu vandaka kubaka na valere bantu yina bo vandaka kutadila bonso bantu ya kukonda mfunu. Yandi longaka “bantu yina me longukaka ve mpi ya mpamba-mpamba” mambu ya me tala Kimfumu ya Nzambi. (Bis. 4:13; Mat. 11:25) Yandi belulaka bambefo mpi sadilaka bo mambu na zola mpi luzitu. (Luka 5:13) Na mpimpa ya nsuka na ntwala nde bo fwa Yezu, yandi yobisaka makulu ya balongoki na yandi. Na kutuba masonga, yo vandaka kisalu yina bampika vandaka kusala. (Yoa. 13:5) Diaka, na ntwala nde yandi mata na zulu, yandi pesaka balongoki na yandi yonso, ti beto mpi, kisalu ya kuluta mfunu ya kusadisa bantu na kubaka luzingu ya mvula na mvula. Yo kele kibeni lukumu ya nene sambu na balongoki na yandi.​—Mat. 28:19, 20.

17. Inki mutindu beto lenda monisa zola mpi luzitu? (Tala mpi kifwanisu.)

¹⁷ Inki mutindu beto lenda landa mbandu ya Yehowa? Beto ke monisaka nde beto ke zolaka bantu mpi ke zitisaka bo ntangu beto ke longaka bo nsangu ya mbote kukonda kutala kisika yina bo me katuka, mpusu na bo ya nitu to kana bo me tangaka to ve. Beto ke monisaka mpi nde beto ke zolaka bampangi na beto mpi ke zitisaka bo kana beto ke mona nde bo me luta beto ata beto kele ti mikumba mingi na dibundu kuluta bo to beto kele mayele mingi kuluta bo. (Bafil. 2:3) Yehowa ke sepelaka mingi ntangu beto ke salaka yonso sambu na kuvanda ya kudikulumusa mpi kusadila bantu mambu ti zola mpi luzitu.​—Bar. 12:10; Sef. 3:12.

18. Sambu na nki nge fwete landa mbandu ya kudikulumusa ya Yehowa?

¹⁸ Kana beto ke sala yonso sambu na kulanda mbandu ya kudikulumusa ya Yehowa, yo ta sala nde bantu kukuma kusolula ti beto kukonda mpasi, beto vanda ve makambu ngolo mpi beto kuma ntima-nda mingi. Bonso Yehowa, beto ta zola bantu mpi ta zitisa bo mingi. Diaka, kana beto ke sala yonso sambu na kulanda mbandu ya Nzambi na beto ya kudikulumusa, yandi ta kuma kuzola beto diaka mingi kibeni.​—Yez. 43:4.