Minunu Kele Mfunu Mingi na Dibundu

Mbala ya nkaka nge ke kuka mpi ve kusala mambu mingi sambu nge me kuma mununu. Ata nge ke sadilaka Yehowa banda bamvula mingi, nge lenda lemba nitu kana nge fwanisa mambu yina nge vandaka kusala na kileke ti yina nge ke sala bubu yai. Kana mpidina, nki lenda sadisa nge na kulanda kuvanda na kiese?

INKI YEHOWA KE ZOLA NDE NGE SALA?

Kudiyula nde: ‘Inki Yehowa ke zola nde mono sala?’ Mambu yai ya kele na Kulonga 6:5 lenda sadisa nge. Yo ke tuba nde: “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, mpi na ngolo na nge yonso.”

Mutindu verse yai ke monisa yo, Yehowa ke zola nde nge sadila yandi na ntima na nge ya mvimba, na moyo na nge ya mvimba mpi na ngolo na nge yonso. Yo ta sadisa nge na kudifwanisa ve ti bantu ya nkaka to nkutu kufwanisa ve mambu ya nge ke sala bubu yai ti yina nge vandaka kusala na kileke na nge.

Yindula fioti: Inki nge vandaka kusala sambu na Yehowa na kileke na nge? Bampangi mingi lenda tuba nde bo vandaka kusala yonso yina yo lombaka kusala sambu na Yehowa. Yo ke monana nde nge mpi vandaka kusala yonso yina yo lombaka kusala na kisalu ya Yehowa na kuwakana ti mambu ya luzingu na nge na ntangu yina. Ata mpidina, nge ke landa kaka kusala yonso ya nge lenda sala na kisalu ya Yehowa na kuwakana ti mambu ya luzingu na nge bubu yai. Kana nge ke tadila mambu mutindu yai, yo ta sadisa nge na kubakisa nde nge ke landa kusala kaka mingi na kisalu ya Yehowa, disongidila nde nge ke sala yonso ya nge lenda sala na kuwakana ti mambu ya luzingu na nge bubu yai kaka bonso na kileke na nge.

NGE LENDA SADISA MINGI BANTU YA NKAKA

Tadila mpi diambu yai: Na kisika ya kutula dikebi na mambu yina nge ke kuka diaka ve kusala sambu nge me kuma mununu, tula dikebi na mabaku ya mbote yina kimununu ke pesa nge. Ya kieleka, kele ti mambu yina nge lenda sala bubu yai kansi yina nge lendaka ve kusala na kileke. Mu mbandu diambu yai ya ke landa:

Kukabisa eksperianse na nge ti bantu ya nkaka. Tala mambu yai ya bansadi ya Yehowa tubaka na Biblia:

Ntotila Davidi: “Mono vandaka leke mpi ntangu yai mono me nuna, kansi mono me monaka ntete ve bo me yambula muntu ya lunungu, to bana na yandi ke sosa mampa.”​—Nk. 37:25.

Yozue: “Tala! Mono ke zola kufwa, mpi beno me zaba mbote na ntima na beno ya mvimba mpi na moyo na beno ya mvimba nde ata diambu mosi ve na kati ya balusilu ya mbote yina Yehowa Nzambi na beno pesaka beno kondaka kulungana. Yonso lunganaka sambu na beno. Ata diambu mosi ve na kati na yo kondaka kulungana.”​—Yoz. 23:14.

Mambu yai ya Davidi ti Yozue tubaka kele mfunu mingi sambu yo kele mambu yina bo monaka mpi waka mbala mingi na nsungi ya bamvula mingi. Mbala ya nkaka nge me tubaka mpi dezia mambu ya mutindu mosi ntangu nge vandaka leke sambu na kupesa bantu ya nkaka kikesa. Kansi ntangu yai ya nge me kuma mununu, mambu ya nge ke tuba kele mfunu mingi sambu nge kele mpi ti eksperiansi mingi.

Mu mbandu nge lenda tubila mambote yina kusadila Yehowa ke nataka. Keti nge ke yibuka ntangu mosi yina nge monaka diboko ya Yehowa na luzingu na nge to na luzingu ya bantu ya nkaka? Kana mpidina, nge lenda tela yo bampangi. Mbala ya nkaka nge me monaka dezia mutindu bantu ya nkaka ke bakaka kikesa kana bo me wa masolo ya mutindu yai. Yo yina vanda ti kikalulu ya kutela bampangi masolo ya mutindu yai sambu yo ta kumisa lukwikilu na bo ngolo mpi yo ta sadisa bo na kulanda kusadila Yehowa na kikesa yonso.​—Bar. 1:11, 12.

Nge lenda pesa mpi bantu ya nkaka kikesa kana nge ke kwenda na balukutakanu kimuntu-kimuntu na kutadila mambu ya luzingu na nge. Yo ta sala nde bo pesa nge mpi kikesa. Mpangi-nkento Connie yina beto me tubila dezia ke tuba nde: “Kukwenda na balukutakanu ke sadisaka mono na kulemba ve nitu. Bampangi ke monisilaka mono zola mingi na Nzo ya Kimfumu mpi yo ke salaka nde mono vanda ve mawa-mawa. Mono ke pesaka mpi bampangi bakado ya fioti-fioti sambu na kumonisa bo nde mono ke sepelaka ti mambu ya bo ke salaka sambu na mono. Diaka, mono ke landaka kudipesa na mambu ya kimpeve ti bampangi.”

YEHOWA KE BAKAKA NA VALERE MAMBU YA NGE KE SALAKA SAMBU NA YANDI

Biblia ke tubilaka bantu mingi yina vandaka kuzola Yehowa ata mambu ya luzingu na bo vandaka kukanga bo nzila ya kusala mambu ya nkaka. Beto tadila mbandu ya Simeoni, mununu mosi na Izraele yina vandaka na luzingu ntangu Yezu butukaka. Ntembe kele ve nde ntangu Simeoni vandaka kukwenda na tempelo, yandi vandaka kumona mutindu baleke vandaka kusala bisalu ya mfunu na tempelo. Mbala ya nkaka Simeoni vandaka kuyindula nde yandi kele diaka ve na mfunu na meso ya Yehowa sambu yandi vandaka kukuka diaka ve kusala bisalu yina baleke vandaka kusala. Kansi Yehowa vandaka kutadila mambu mutindu ya nkaka. Sambu na yandi, Simeoni vandaka “muntu ya lunungu mpi ya ke waka Nzambi boma.” Yo yina, Yehowa pesaka yandi dibaku ya nene ya kumona Yezu na kibebe na yandi. Nkutu, Yehowa sadilaka Simeoni sambu na kutubila na ntwala mambu yina zolaka kukumina Mesia. (Luka 2:25-35) Ya kieleka, Yehowa vandaka ve kutula dikebi na kimununu ya Simeoni kansi na lukwikilu na yandi ya ngolo. Diaka, “mpeve santu vandaka na zulu na yandi.”

Nge fwete ndima mpi nde Yehowa ke bakaka na valere mambu yina nge ke sadilaka yandi ata mambu ya nkaka ya luzingu na nge ke kanga nge nzila ya kusala mingi na kisalu na yandi. Yehowa ‘ke ndimaka mambu yina beto ke sadilaka yandi mingi-mingi na kutadila yina beto kele na yo, kansi ve na kutadila yina beto kele na yo ve.’​—2 Bak. 8:12.

Kana nge ke yibuka mambu yai, yo ta sadisa nge na kutula dikebi na mambu yina nge lenda kuka kusala. Mu mbandu, nge lenda longa nsangu ya mbote ata mwa ntangu fioti na mitindu yina nge ta kuka. Nge lenda sonikila mpi bampangi mikanda mpi kubinga bo na telefone sambu na kupesa bo kikesa. Mutindu nge ke sadilaka Yehowa banda bamvula mingi mpenza, mambu ya fioti-fioti yina nge lenda sadila bampangi sambu na kumonisa bo nde nge ke zolaka bo ta simba kibeni bantima na bo.

Ata nge lenda sala ve mambu mingi na kisalu ya Yehowa, nge lenda sala kaka yonso yina nge lenda sala mpi kuvanda ti luzingu ya kiese na kisalu na yandi. Nge lenda tanga lupangu “Yo Gulusaka Luzingu na Yandi” sambu na kuzaba mambu yina mpangi-nkento mosi kutanaka ti yo na insi mosi na Afrika ya Esti.

Kuvila ve nde mbandu ya mbote ya lukwikilu na nge lenda pesa bantu ya nkaka kikesa. Diaka, nge kele mbandu ya mbote na yina me tala kukanga ntima. Yo yina tula ntima nde ‘Nzambi me konda ve lunungu sambu yandi vila kisalu na nge mpi zola yina nge monisaka sambu na zina na yandi, mutindu nge me sadilaka basantu mpi nge ke landa kusadila bo.’​—Baeb. 6:10.

LANDA KUSALA YONSO YA NGE LENDA SALA SAMBU NA KUSADISA BANTU YA NKAKA

Bantu ya mayele me bakisaka nde minunu yina ke sadisaka bantu ya nkaka ke vandaka na sante ya mbote, ke yindulaka mbote mpi ke zingaka mingi.

Ya kieleka, kusala mambu ya mbote ta manisa ve bampasi yonso yina kimununu ke nataka. Kimfumu ya Nzambi mpamba ta katula disumu yina ke salaka nde beto nuna mpi beto fwa.​—Bar. 5:12.

Diaka, mambu yina nge ke salaka sambu na Yehowa, mu mbandu kusadisa bantu na kuzaba yandi, ke sadisaka nge mpi na kuvanda ti kivuvu ya ngolo mpi nkutu ti sante ya mbote. Bampangi minunu, beno zaba kibeni nde Yehowa ke bakaka na valere mingi mambu yonso yina beno ke salaka sambu na yandi. Diaka, bampangi na dibundu ke sepelaka mpi mingi ti mbandu na beno ya lukwikilu.