“Kel Deus di verdadi” sénpri ta kunpri ses promésa

1. Di akordu ku Salmu 31:2-5, pamodi ki nu pode kunfia na Jeová?

NU STA ta vive na un mundu governadu pa Satanás. Txeu algen oji ta konta mintira, es é dizonéstu i es ta trai kunpanheru. Pode ser difísil sabe na kenha ki nu ta kunfia. Txeu algen di nogósiu é dizonéstu. Pesoas ki ta faze publisidadi ta konta mintira, asi pa pesoas pode kunpra ses produtu. Alguns da kónta ma ka ta da pa es kunfia ti mésmu na ses amigu más prósimu pamodi es ka ta kunpri ses promésa. Má nu ta fika kontenti di sabe ma sénpri nu pode kunfia na Jeová, ki é “kel Deus di verdadi”! (Lé Salmu 31:2-5.) Jeová nunka ka ta konta mintira. Tudu kel ki el ta fla é verdadi. Jeová é di kunfiansa i sénpri nu pode kunfia na kuzê ki el ta fla i na kuzê ki el ta faze.

2. Kuzê ki nu ta ben odja na kel studu li?

² Na kel studu li, primeru nu ta ben odja alguns razon ki nu ten pa nu kunfia na Jeová di tudu nos korason. Dipôs, nu ta ben odja kuzê ki kel Deus di verdadi sta ta faze gósi pa kunpri tudu ses promésa i modi ki Deus ta ben kaba ku Satanás i ku kel mundu mau li. Kel studu li ta ben djuda-nu sta más disididu na pâpia ku otus algen di kes verdadi sobri Jeová.

PAMODI KI NU PODE KUNFIA NA KEL DEUS DI VERDADI?

3. Pamodi ki nu pode poi tudu nos kunfiansa na Jeová?

³ Nu pode kunfia na Jeová pamodi é el ki kria tudu kuza. El kria séu, téra i tudu kuza ki ten vida. (Jén. 1:1; Sal. 36:9; Apo. 4:11) El faze téra di manera ki nu ta ten tudu kuza ki nu ta meste pa nu vive, sima ar pa nu respira i agu pa nu bebe. El ta kontrola tudu universu i sénpri el ta kontinua ta kontrola-l. Nton, ku kunfiansa nu pode poi nos vida i nos futuru na mô di Jeová ki ten tudu sabedoria i puder.

4. Modi ki nu sabe ma Jeová ta ama-nu?

⁴ Nu pode kunfia na Jeová pamodi el ta ama-nu. Jeová kria-nu pamodi el kreba pa nu vive i xinti sábi sima el. Jeová pâpia di se vontadi kantu el fla kes palavra li: “Nu faze ómi pa ser sima nos”. (Jén. 1:26) El da-nu liberdadi di skodje. El faze un kaza bunitu pa nos, ki é téra. (Sal. 115:16) I el abênsua nos primeru pai ku mai ku un diziginason sábi, ki éra bira téra un paraízu. (Jén. 1:28; 2:15) El da-s txeu kumida sábi, un monti tipu di planta i animal, i txeu otus kuza. El faze kel-li, asi pa es pode sérba filís i ten un vida sábi. Kel-li ta mostra klaru ma “amor lial di Jeová... ta dura pa tudu ténpu”. — Sal. 103:17.

5. (a) Modi ki Jeová kunpri se palavra, sikrê Satanás tenta kaba ku umanus? (b) Kal ki é alguns di kes promésa di Deus ki dja kunpri? (Odja kuadru “Deus sénpri ta pâpia verdadi”.)

⁵ Nu pode kunfia na Jeová pamodi sénpri el ta kunpri se palavra. Jeová ‘ka kria téra pa nada, má el faze-l pa moradu na el’. (Iza. 45:18, 19) Kantu Adon ku Eva rabela, es kondenadu pa móre. Pamodi kel-li, pode parseba ma Satanás inpidi Jeová di faze kuzê ki el kreba pa téra i pa umanus. Má nada ka ta pode para Jeová. Sénpri el ta faze kuzê ki el disidi faze. (Iza. 46:10, 11) Inda el krê pa umanus vive pa tudu ténpu na téra. É pur isu ki el dexa Adon ku Eva ten fidju. I el manda Se úniku Fidju pa móre pa nos, asi pa nu pode ten speransa di vive pa tudu ténpu. — Juan 3:16.

KEL DEUS DI VERDADI TA KUNPRI SES PROMÉSA

6. Dipôs ki Adon ku Eva rabela, kuzê ki Jeová fla ma ta ben kontiseba?

⁶ Ken ki poi Adon ku Eva ta rabela kóntra Deus foi “kel primeru kóbra, kel ki ta txomadu Diabu i Satanás”.a (Apo. 12:9; Jén. 3:4, 5; Juan 8:44) Pur isu, Jeová fla ma el ta ben distrui Satanás. (Jén. 3:15) Antis di kel-li kontise, txeu algen ta sigiba Satanás i ta fazeba kuzas mariadu sima el. Má alguns algen ta ben kontinuaba lial pa Jeová.

7. Ken ki disidi sigi Satanás i kuzê ki ta ben kontise ku es?

⁷ Txeu anju ku pesoas disidi sigi Satanás. Dja ki es peka kóntra Jeová, es pasa ta faze párti di disendenti di Satanás. Má Jeová dja disidi ki ténpu ki el ta ben distrui Satanás i tudu kes ki fika di se ladu. — Dan. 2:44; Rom. 16:20.

8. Kuzê ki Jizus faze na anu di 1914? (Odja imajens.)

⁸ Kuzê ki ta da-nu serteza ma promésa di Jeová di kaba ku Satanás i ku tudu kes ki ta apoia-l ta ben kunpri? Na anu di 1914, Jizus kumesa un géra kóntra Satanás ku kes dimóni i el manda-s pa téra. (Apo. 12:7-9) Enbóra kel géra kontise na séu, kes algen na téra xinti rezultadu di kel géra. Bíblia ta fla: “Ai di téra i di mar, pamodi Diabu dja dixi pa nhos ku txeu raiba, dja ki el sabe ma falta-l poku ténpu.” (Apo. 12:12) Désdi 1914, prinsipal obijetivu di Satanás é poi más algen ki el ta pode ta sigi-l i pamodi kel-li, nu sta odja kada bês más prubléma na mundu. Ka ta dura Jizus ta ben “konpleta se vitória.” El ta ben prende Satanás pa mil anu i el ta distrui tudu kes algen ki ta apoia Satanás. (Apo. 6:2) Jizus ta ben dexa klaru pa tudu algen ma Satanás é mau i ma el konta mintira sobri Jeová. (Sal. 45:4-6) Tudu algen ta ben sabe ma Jeová é kel Deus di verdadi! — Eze. 38:23.

Primeru géra mundial: U.S. National Archives photo; bonba: USAF photo; duénsa ki ta spadja: blvdone/stock.adobe.com; konfuzon: inhauscreative/E+ via Getty Images

KEL DEUS DI VERDADI STA TA DJUNTA TUDU KES KI TA AMA VERDADI

9. Ken ki Jeová sta ta djunta oji?

⁹ Jeová sta ta “djunta tudu kes kuza na Kristu, kes kuza na séu i kes kuza na téra.” (Efé. 1:10) “Kes kuza na séu” é kes kriston skodjedu ku spritu santu ki Jeová skodje pa ba governa ku Jizus na séu. “Kes kuza na téra” é kes algen ki ta ben vive pa tudu ténpu na Paraízu na téra. Tudu kes algen ki ta adora Jeová sta okupadu ta djuda otus algen prende verdadi sobri Jeová i mostra-s ma Satanás é un mintirozu.

10. Modi ki Jeová sta ta djuda pesoas prende verdadi sobri el? (Apokalipse 14:6, 7)

¹⁰ Pa atxa kes algen ki krê konxe verdadi sobri Deus, Jeová sta ta uza se povu pa prega kes verdadi sobri el na mundu interu. Kel-li é kel trabadju di pregason más grandi ki dja fazedu. (Lé Apokalipse 14:6, 7.) Enbóra Jeová ta uza umanus pa pâpia ku otus algen sobri notísias sábi, tanbê anjus ta djuda-nu atxa pesoas sinseru pa djunta-s na kongregason. Óras ki povu di Deus ta prega kes verdadi sobri el, tanbê es sta ta djuda pesoas intende ma Satanás ta uza relijion falsu pa spadja mintiras sobri Jeová. (Apo. 18:2, 4) Ka ta dura, tudu relijion falsu ta ben distruídu pa tudu ténpu i tudu kes algen ki ta ama kel Deus di verdadi ta ben da-l kel glória ki el merese. — Apo. 17:16.

11. Modi ki nu ta sabe kenha ki sta ta adora kel Deus di verdadi?

¹¹ Jeová sta ta traze tudu tipu di algen di mundu interu pa se família. (Apo. 7:9, 10) Óras ki es ta obi “kes notísia sábi”, es ta odja klaru ma kuzê ki es prende é verdadi i es ta krê faze párti di povu di Jeová. (Mar. 13:10) Kada bês ta fika más klaru ken ki ta sirbi Jeová di manera ki el ta krê. Proféta Malakias fla: ‘Nhos ta torna ben odja diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ (Mal. 3:18) Através di ses konportamentu i di ses trabadju di pregason, Tistimunhas di Jeová sta ta mostra ma es ta adora kel Deus di verdadi.

12. Modi ki trabadju di pregason sta ta djuda Jeová kunpri se vontadi?

¹² Óras ki nu ta prega “kes notísia sábi di Reinu”, nu sta ta obi ku órdi di Jizus i tanbê nu sta ta kunpri profesia. (Mat. 24:14; 28:18-20) I pamodi kel trabadju li, pesoas na mundu interu sta ta bira disiplu di Jizus i es ten xansi di adora kel Deus di verdadi pa tudu ténpu. É un grandi priviléjiu Jeová uza-nu pa djuda-l kunpri se vontadi!

ODJA PA FUTURU KU KUNFIANSA

13. Prinsipalmenti kenha ki Satanás sta ta pirsigi i pamodi?

¹³ Satanás sta ku txeu raiba pamodi el sabe ma sta “falta-l poku ténpu” antis di es mundu distruídu. (Apo. 12:12, 13) El ta pirsigi prinsipalmenti kes algen ki Jeová skodje pa bai governa na Reinu di Deus. Es é kes “ki ta obi ku mandamentus di Deus i ki ten kel trabadju di da tistimunhu di Jizus.” (Apo. 12:17; 14:12) Satanás tanbê ta pirsigi tudu kes algen ki ta apoia kes ki ta ba governa djuntu ku Jizus i ki ta djuda-s na kel trabadju ki es sta ta faze.

14. Kuzê ki ta ben kontise óras ki kes algen ki ta apoia Satanás ataka povu di Jeová? (Odja imajen.)

¹⁴ Dipôs di distruison di Babilónia Grandi, tudu kes algen ki ta apoia Satanás ta ben ataka povu di Jeová. Pamodi kel ataki li, ta kumesa géra di Armajedon. (Apo. 16:13, 14, 16) Jizus ku se izérsitu na séu ta ben proteje povu di Jeová i es ta ben distrui tudu kuza di mundu di Satanás. (Apo. 19:19-21) Ka ta ben ten más ningen mau na mundu i ninhun mintira. (Apo. 21:8) Tudu algen ta ben sabe ma Jeová sénpri faze kuzê ki é dretu i ma sénpri el pâpia verdadi.

15. Pamodi ki nu pode odja pa futuru ku kunfiansa? (Izaías 65:16, 17) (Odja imajen.)

¹⁵ Oji mundu sta más divididu di ki nunka. Má ku ajuda di Jeová, ses sérvu ta kontinua unidu. Jeová sta ta djunta tudu kes algen ki ta ama verdadi na se família. Nada ka ta pode inpidi Jeová di abênsua se povu i kel trabadju ki es sta ta faze. (Lé Izaías 65:16, 17.) Nu ta odja pa futuru ku kunfiansa. Pamodi? Pamodi na Romanus 8:38, 39 apóstlu Paulu ta da-nu kel serteza li: “Nen mórti, nen vida, nen anjus, nen govérnus, nen kuzas di gósi, nen kuzas ki sta pa ben, nen puder, nen altura, nen fundura, nen kalker otu kriason ka ta konsigi sipara-nu di amor di Deus, ki mostradu através di Kristu Jizus, nos Sinhor.”

16. Pamodi ki bu ta kunfia na Jeová di tudu bu korason?

¹⁶ Nu ten tudu razon pa nu kunfia na Jeová, ki é kel Deus di verdadi. El é nos Kriador. El ta ama-nu txeu. Jeová sta ta djunta kada bês más algen di mundu interu pa sirbi-l di manera ki el ta krê. (Iza. 60:22; Zak. 8:23) Nu sabe ma Jeová sénpri ta kunpri ses promésa i ka ta dura el ta ben kaba ku Satanás i ses mintira. Nu ta ora sima Davidi ki fla: “Pa Jeová Deus... lovadu, pamodi é sô el ki ta faze kes kuza grandi i bunitu. Pa se nómi gloriozu lovadu pa tudu ténpu, i pa se glória intxi téra interu.” — Sal. 72:18, 19.