Odja bus prubléma sima Jeová ta odja-s

1-2. Kuzê ki nu meste faze pa nu lida dretu ku nos prubléma? (Odja imajen.)

BU STA ta pasa pa injustisa, opozison na família ô pirsigison pamodi bu fé? Bu sta ku prublémas di saúdi ô algun di kes prubléma ki ta ben pamodi bedjisa? Ô bu sta ta lida ku algun situason difísil, talvês mórti di un algen ki bu ta ama? Sima txeu di kes otu ovelha di Jeová ki ten txeu valor, talvês bu vida “sta xeiu di difikuldadi i tristéza.” — Sal. 90:10.

² Pa nu lida dretu ku nos prubléma, nu meste odja-s sima Jeová ta odja-s. Pamodi ki kel-li é inportanti? Odja un izénplu. Kes prubléma ki nu ta pasa pa el é sima kes prigu ki bu pode atxa na strada óras ki bu sta ta konduzi. Ta dipende di prigu ki bu atxa, talvês bu ta meste disvia, konduzi más divagar ô ti mésmu para pa un ténpu. Pa bu sabe kuzê ki bu meste faze, bu meste odja klaru kal ki é prubléma. Má bu ka ta konsigi faze kel-li si parabriza di karu sta suju. Di mésmu manera, pa nu lida dretu ku prublémas ki nu ta pasa pa el, nu meste odja-s sima Jeová ta odja-s. Na kel studu li, nu sta ben odja (1) kuzê ki nu debe lenbra di el óras ki nu sta sufri, (2) modi ki pensa di manera negativu sobri nos prubléma pode prujudika-nu, i (3) kuzê ki nu pode faze óras ki nu sta pasa pa prubléma.

KUZÊ KI NU DEBE LENBRA DI EL ÓRAS KI NU STA SUFRI?

3. Pamodi ki nu ka ta pode ivita prublémas gósi?

³ Nu ka ta pode ivita prublémas na kel mundu li. Nos tudu nu ta sufri pamodi nu ta vive na un mundu governadu pa Satanás i pamodi tudu algen é inperfeitu. Alén di kel-li, sima nu sta ta fika kada bês más pértu di fin, nu ta ben pasa pa más prubléma inda. Pur izénplu, nu ta sufri pamodi dizastri na naturéza ô pamodi kuzas ki pesoas mau ta faze. (Mat. 24:8; 2 Tim. 3:13) Si Jeová ben konpo tudu kes prubléma li gósi, ta parse sima si el sta ta djuda Satanás governa kel mundu li. Timenti Satanás sta governa kel mundu li, nu ta ben kontinua ta sufri. — Ekl. 9:12.

4. Pamodi ki sérvus di Jeová ta pasa pa más prubléma?

⁴ Sérvus di Jeová ta pasa pa más prubléma inda. Txeu bês, Jizus fla ses disiplu ma es ta sérba pirsigidu pamodi ses fé. (Mat. 24:9; Juan 16:2) Sabe di kel-li ta djuda-nu ka perde nos fé óras ki nu ta pasa pa pirsigison. (1 Tes. 3:3, 4) Alén di kel-li, óras ki nu ta aguenta prublémas pamodi nu ten un fé fórti, kel-li ta da-nu serteza ma nu sta na kel kaminhu ki ta leba pa vida pa tudu ténpu. Tanbê, nu ta mostra si nu sta di ladu di Jeová ô di Satanás. Un di kes mintira ki Satanás konta é ma umanus ka ta ama Deus di verdadi i sô es ta sirbi-l pamodi interesi. Pa tenta prova ma kel-li é verdadi, el ta faze txeu kuza pa ataka povu di Jeová. (Jó 1:9-11) Óras ki nu ta aguenta firmi pamodi nu ta ama Jeová, nu ta dexa Jeová kontenti. — Pro. 27:11.

5. Kuzê ki nu pode prende ku Ekleziastis 7:13, 14? (Odja imajen.)

⁵ Jeová ta dexa kuzas mariadu kontise. Jeová nunka é ka kruel i nen el ka ta prova-nu. (Tia. 1:13) Rei Salumon skrebe ma ‘Deus ta permiti un dia xeiu di difikuldadi’. (Lé Ekleziastis 7:13, 14.) Pur isu, envês di faze kuzas mariadu, Jeová ta permiti pa kes kuza kontise. Nton, kuzê ki nu ta prende ku kes palavra di Salumon ki sta na Ekleziastis 7:13, 14? Primeru, nu pode spera ma na kel mundu li nu ta ben ten dias bon i dias mariadu. Óras ki nu ten un dia bon, nu pode mostra nos gratidon pa bondadi di Deus i odja kel dia sima un prezenti di Deus. Sugundu, Salumon lenbra-nu ma nu ‘ka ta pode ten serteza di kuzê ki ta ben kontise ku nos na futuru.’ Prublémas ki algen ka sta ta spera pode kontise ku algen justu i ku algen injustu.

6. Pamodi ki Jeová ta dexa-nu pasa pa sufrimentu? (Ebreus 12:7, 11)

⁶ Jeová sta ta inxina-nu kunfia na el, ka na nos kabésa. Jeová sénpri ta presta atenson na kuzas ki nu ta pasa pa el i el ta kuida di nos óras ki nu ta sufri. Sikrê óras ki el ta dexa-nu pasa “na meiu di un rubera sukuru dimás,” el ta kontinua ta orienta-nu, ta mostra-nu se amor i ta da-nu kel forsa ki nu meste pa nu aguenta firmi. (Sal. 23:4) Tanbê, prublémas pode djuda-nu odja kal ki é nos frakéza i ku ajuda di Deus nu pode midjora nos manera di ser. (Lé Ebreus 12:7, 11.) Pur izénplu, Jó meste biraba un algen más umildi. Jeová ka poi Jó ta sufri, má el dexa kes kuza kontise ku el i el uza-s pa djuda Jó prende alguns lison inportanti. (Jó 42:1-6) Ka ta inporta prublémas ki nu pasa pa el, nu sabe ma kes kuza ki Jeová ta dexa kontise ka ta ben prujudika-nu pa tudu ténpu. El ta ben djuda-nu kontinua lial pa el i di serteza el ta rekonpensa-nu. — Rom. 8:35-39.

7. Pamodi ki bu pode ser filís sikrê óras ki bu ta pirsigidu pamodi bu fé?

⁷ Nu pode ser filís óras ki nu pirsigidu. Si bu sta ta pirsigidu pamodi bu fé, ka bu atxa ma bu perde aprovason di Jeová. Na verdadi, kes pirsigison ta mostra ma bu tene aprovason di Jeová. (Mat. 5:10-12) Si bu odja kuzas di kel manera li, bu ta pode xinti filís óras ki bu ta pirsigidu pamodi abo é un sérvu di Jeová, sima kes apóstlu xinti. (Atus 5:40-42) Tanbê bu ta pode djuda kes algen ki é ka Tistimunha di Jeová prende verdadi i “da Deus glória”. (1 Ped. 2:12) Odja izénplu di Juzé. Jeová djuda Juzé i el abensua-l duránti kel ténpu ki el staba na kadia, ka sô dipôs ki el sai di kadia. Jeová pode faze mésmu kuza pa nos óras ki nu sta sufri. — Jén. 39:3, 23.

8. Ki otu insentivu nu ten pa nu kontinua ta aguenta firmi?

⁸ Nos prubléma ta ben kaba. Kuzê ki kontise ku Jó ta lenbra-nu ma nos prubléma ta ben kaba. Na verdadi, “Jeová abênsua kel últimu párti di vida di Jó más di ki kel primeru párti di se vida.” (Jó 42:12) Di mésmu manera, Jeová promete abênsua “kel últimu” párti di bu vida, ki é kel párti ki ta ba dura pa tudu ténpu, más di ki kel primeru párti ki é kurtu i talvês xeiu di prubléma. Kel-li é un bon insentivu pa nu kontinua ta aguenta firmi ti fin! — Mat. 24:13.

PENSA DI MANERA NEGATIVU SOBRI NOS PRUBLÉMA PODE PRUJUDIKA-NU

9. Modi ki pensa di manera negativu sobri nos prubléma pode prujudika-nu?

⁹ Si nu pensa di manera negativu óras ki nu ta pasa pa un prubléma, nos situason pode fika inda más piór. Pur izénplu, nu pode atxa ma é Jeová ki sta ta pô-nu ta pasa pa kel prubléma. Duránti un ténpu, Jó atxa ma éra Jeová ki staba ta pô-l ta pasa pa kes prubléma. I kel manera di pensa li pô-l ta “tenta prova ma éra el ki tinha razon, envês di Deus.” (Jó 32:2) Tanbê, na komésu Nuemi fla ma éra Jeová ki staba ta pô-l ta sufri. (Rute 1:13, 20, 21) Si Jó ku Nuemi kontinuaba ta pensa di kel manera li, es pode prujudikaba ses amizadi ku Jeová. (Pro. 19:3) Má, Jeová djuda-s pensa dretu sobri ses prubléma i el abensua-s pamodi es kontinua lial.

10. Kuzê ki nu pode pergunta óras ki nu sta ta pasa pa prubléma?

¹⁰ Sikrê nu ten serteza ma é ka Jeová ki ta pô-nu ta sufri, simé nu pode pergunta si inda el ta preokupa ku nos. Kel manera di pensa li pode dizanima-nu i pode bira más difísil nu kontinua ta sirbi Jeová. (Pro. 24:10) Rei Davidi i proféta Abakuki pasa pa prublémas difísil i na kes momentu es pergunta si Jeová staba ta obi ses pididu di ajuda. (Sal. 10:1; Hab. 1:2) Má simé es ka para di faze orason. Jeová da kes ómi fiel li serteza ma el ta djudaba es i el ta faze mésmu kuza ku nos. — Sal. 10:17.

11. Kuzê ki pode kontise ku nos si nu ka ta pensa di mésmu manera ki Jeová sobri nos prubléma?

¹¹ Si nu ka ta pensa di nos prublémas di mésmu manera ki Jeová ta pensa, nu pode atxa ma Jeová ka debe dexaba nos sufri. Pur isu, nu pode fika dimiradu óras ki algun kuza mariadu ta kontise ku nos. (1 Ped. 4:12) Foi difísil pa disiplus di Jizus intende ma Jizus tinha ki pasaba pa txeu pirsigison. (Luk. 18:33, 34) Pedru atxa ma Deus ka ta dexaba Jizus sufri di kel manera la, sikrê Jizus dja flaba ses disiplu klaru modi ki el ta ba sofreba. Jizus sabia ma kel manera di pensa la ta inpidiba el di faze vontadi di Jeová, pur isu el koriji Pedru. (Mar. 8:31-33) I mésmu dipôs ki Jizus móre, ses disiplu ka intende lógu pamodi ki el matadu. Simé Jizus ka dizisti di es. Kantu el pâpia ku es dipôs ki el resusitadu, el splika-s pamodi ki el tinha ki sofreba. El faze kel-li kantu “el splika-s tudu kuza ki Skrituras dja flaba sobri el”. (Luk. 24:25-27, 32, 44-48) Óras ki es miditaba na kuzê ki Jizus inxina-s es ta pode priparaba pa opozison ki es ta ben pasaba dja ki es ta sigiba Jizus. Studa kes verdadi ki sta na Bíblia tanbê pode djuda-nu pripara pa prublémas.

12. Modi ki pensa di manera mariadu sobri nos situason pode pô-nu ta xinti?

¹² Si nu ka ta pensa di manera dretu sobri nos prubléma, nos situason pode fika inda más piór. Jizus mostra un manera ki kel-li pode kontise na kel ilustrason ki el konta di kes trabadjador na un plantason di uva. Alguns di kes trabadjador fika xatiadu pamodi es atxa ma es ka pagadu dretu, má kel dónu di plantason fla un di es: “Nha amigu, N ka faze-u nada mariadu.” (Mat. 20:10-13) Kes trabadjador staba ta reklama ka pamodi kel dónu staba ta ser injustu ku es, má pamodi es staba ta spera un kuza ki es ka debe speraba. Oji, alguns irmon ku irmans pode xinti di kel manera li. Pur izénplu, es pode atxa ma é injustu es ka resebe un priviléjiu na organizason di Jeová ô pamodi es ten ki dexa algun priviléjiu. Kuzê ki pode djuda-nu pensa di manera ki Jeová krê pa nu pensa sobri nos situason difísil?

KUZÊ KI NU PODE FAZE ÓRAS KI NU STA PASA PA PRUBLÉMA?

13. Kuzê ki pode kontise óras ki nu ta pasa pa prubléma?

¹³ Talvês bu konxe alguns versiklu di Bíblia ki ta pâpia sobri sufrimentu. Talvês ti dja bu mostra kes versiklu li pa djuda otus algen ki staba ta pasa pa prubléma. Má, óras ki kuzas mariadu ta kontise ku bo, pode ser difísil pa bu pensa sima Jeová krê pa bu pensa. Pur izénplu, bu pode atxa ma Jeová sta ta kastiga-u ô ma el ka sta ta obi bus orason. Kuzê ki bu pode faze si bu kumesa ta pensa di kel manera li?

14. Sobri kuzê ki nu pode ora óras ki nu sta ta sufri? (Filipensis 4:13)

¹⁴ Pidi Jeová pa djuda-u. Fla Jeová kuzê ki bu sta ta pasa pa el i modi ki kel-li sta ta pô-u ta xinti. Fla Jeová klaru modi ki bu ta gostaba pa el djuda-u. Bu pode pidi pa el da-u se spritu santu asi pa bu pode ten forsa i sabedoria ki bu meste pa bu aguenta firmi. Má lenbra ma Jeová pode responde bus orason di manera ki bu ka sta ta spera. (Éfe. 3:20) Tanbê el pode uza anjus ô irmons ku irmans pa djuda-u. (Sal. 34:7) Pur isu, seta kalker ajuda di Jeová ka ta inporta modi ki el da-u el. Bu pode ten serteza ma Jeová krê da-u kel spritu santu ki bu meste na kalker situason. — Lé Filipensis 4:13.

15. Kuzê ki nu meste faze óras ki nu ta pasa pa prubléma? (Odja imajen.)

¹⁵ Kontinua ta faze kuzas ki ta bira bu amizadi ku Jeová más fórti. Faze kuzê ki bu ta pode sikrê bu ka ta konsigi faze sima antis. Óras ki bu ta pasa pa “frónta ku difikuldadi” bu meste intxi bu menti ku pensamentus di Deus. (Sal. 119:143) Kontinua ta lé Bíblia tudu dia, ta studa-l, ta pensa na kuzê ki bu lé i ta faze piskiza. Bai pa pregason sénpri ki bu ta pode, sisti i partisipa na runion. Pasa ténpu ku bus irmon ku irmans. Ka bu pasa txeu ténpu bo sô sikrê bu ta xinti vontadi di faze kel-li. — Pro. 18:1.

16. Ki dúvidas nu pode ten óras ki nu ta pasa pa prublémas i kuzê ki nu debe faze pa nu kaba ku es? (2 Koríntius 10:4, 5)

¹⁶ Kaba ku bus dúvida. Óras ki nu sta ta pasa pa prubléma nu pode ten ideias mariadu ki pode pô-nu ku dúvida sobri nos ô sobri Jeová. Kes ideia li talvês é sima un “fortaléza” ki é difísil di ronba. (Lé 2 Koríntius 10:4, 5.) Bu pode kaba ku kes dúvida li si bu uza “konhisimentu di Deus” ki bu ta atxa na Bíblia i na kes publikason di nos organizason. Pur izénplu, bu tene dúvida si Jeová sta kontenti ku bo? Studa izénplu di apóstlu Paulu. Duránti se trabadju di pregason, el pasa pa prublémas difísil dimás. Má dja ki Paulu tinha forsa pa el kontinuaba ta prega, kel-li da-l más serteza inda ma el tinha aprovason di Jeová i di Jizus. (2 Kor. 11:23-27) Dja bu pergunta si Jeová púrdua mê kes pekadu ki bu faze na pasadu? Si sin, faze un lista di testus di Bíblia ki ta mostra ma Jeová ta púrdua pekadu. (Iza. 43:25) Dipôs lé kes testu i midita na es. (Sal. 119:97) Dja kontise algun kuza mariadu ku bo ô ku un algen ki bu ta ama i bu fika ku dúvida si Deus ta proteje mê ses sérvu fiel? Piskiza na nos publikason pamodi ki Deus ta dexa sufrimentu kontise i modi ki el ta proteje nos amizadi ku el, ka ta inporta kuzê ki kontise ku nos. (Sal. 91:9-12) Tanbê, lé stória di irmons ku irmans ki kontinua ta sirbi Jeová ku alegria sikrê es pasa pa prublémas difísil.a

17. Kuzê ki nu pode faze óras ki nu ta pasa pa prublémas?

¹⁷ Gósi li bu sta ta ten un dia bon i bu ka sta ta pasa pa ninhun prubléma difísil? Nton, pruveta kel momentu li pa bu agradese Jeová pa tudu kes kuza sábi ki el ta da-u. (Ekl. 7:14) Má óras ki bu ta pasa pa prublémas, odja kes prubléma sima Jeová ta odja-s i kontinua ta bira bu kunfiansa na Jeová más fórti. Si bu faze kel-li, Jeová ‘ta da-u un saída pa bu pode aguenta kel tentason.’ (1 Kor. 10:13) Má, i nos irmons ku irmans ki nu krê txeu? Modi ki nu pode djuda-s óras ki es ta pasa pa prubléma? Na kel otu studu nu ta ben pâpia sobri kel-li.