Kunfia na Jeová, kel Deus Más Grandi ki ten

1. Ki prublémas Jó pasa pa el?

NA PASADU tinha un ómi fiel ki txomaba Jó. El perde kuazi tudu kuza ki el tinha, sima ses fidju, se saúdi i se rikéza. Alén di kel-li, pesoas perde ruspetu pa el. Tanbê três di ses “amigu” fla-l txeu kuza ki dizanima-l. Ti mésmu se mudjer ki el kreba txeu fla-l: “Maldísua Deus i móre.” (Jó 2:9; 15:4, 5; 19:1-3) Kes kuza li pode poba Jó ta para di kunfia na kel Deus verdaderu i poba el ta ten dúvida si Jeová ta proteje kes algen ki ta ama-l i ki ta sirbi-l.

2-3. (a) Kuzê ki nu pode kumesa ta pensa óras ki nu ta sufri? (b) Kuzê ki nu ta ben prende na livru di Jó?

² Alvês, nos tanbê nu ta pasa pa prublémas ki pode poi nos kunfiansa na Jeová na próva. Nu sta ta vive na un ténpu “konplikadu i difísil di aguenta.” (2 Tim. 3:1) Óras ki nu ta pasa pa txeu prubléma omésmu ténpu, nu pode fika tristi, preokupadu i nu pode xinti ma nos vida nunka ka ta ben midjora. Alguns pode ti kumesa ta pergunta si Jeová inda ta ama-s di verdadi i si el krê djuda-s.

³ Si dja bu xinti si, ka bu fika dizanimadu. Jó prende ma Jeová nunka ka ta bandona kes algen ki é lial pa el. Nos tanbê, nu pode prende kunfia na Jeová i ten serteza ma nos Pai ta ben djuda-nu i el ta ben rekonpensa-nu. Pa djuda-nu faze kel-li, nu ta ben prende modi ki livru di Jó ta inxina-nu ma sénpri nu pode kunfia na Jeová pamodi el é kel Deus más grandi ki ten. Tanbê, nu sta ben odja ma Jeová ten puder pa kunpri kuzê ki el fla, ma el ta proteje-nu i ma el ta da-nu kuzê ki nu meste pa nu kontinua ta ten un bon amizadi ku el.

SATANÁS PARSE NA FRENTI DI JEOVÁ I DI KES ANJU FIEL

4. Ken ki staba na kel runion na séu ki livru di Jó ta pâpia di el?

⁴ Un dia, “kes fidju di Deus verdaderu” djunta na frenti di Jeová na séu. Kel stória ta fla: “Satanás tanbê entra djuntu ku es.” (Jó 1:6) Kel-li é primeru bês na Bíblia ki nu ta atxa nómi “Satanás”. El ta txomadu di kel manera li pamodi el fika kóntra Jeová. Na kel ténpu la, Satanás dja ka éra un fidju fiel di Deus. El bira un inimigu di Jeová, di kes anju i di umanus fiel. Jeová mostra ma Satanás ka ta fazeba párti más di se família na séu kantu el fla kes palavra ki sta na Jénezis 3:15. Pur isu, Satanás ka ta faze párti di kel “mudjer”, ki é família di Jeová na séu i ki ta ben tinha un “disendenti”.

5. Kuzê ki nu ta prende ku kuzê ki Satanás fla i ku modi ki Jeová responde-l?

⁵ Jeová kreba pa nu sabe kuzê ki kontise na kel runion na séu i é pur isu ki el dexa-l skrebedu na Bíblia. Kuzê ki Satanás fla ta mostra klaru ma el é mau i el ta konta mintira sobri sérvus di Jeová. (Jó 1:9; konpara ku Apokalipse 12:10.) Tanbê, kel runion li ta inxina-nu ma óras ki Jeová ta uza se puder, ki ka ten limiti, sénpri el ta uza-l di manera perfeitu i justu. Inda nu ta prende ma Jeová, ki é kel Deus Más Grandi ki ten, ta poi limiti na kuzê ki otus algen pode faze.

JEOVÁ TA POI LIMITI NA KUZÊ KI OTUS ALGEN PODE FAZE

6. Modi ki Jeová mostra ma el tinha tudu kontrolu na kel runion na séu? (Jó 1:7, 8)

⁶ Lé Jó 1:7, 8. Jeová mostra ma el tinha tudu kontrolu na kel runion. El sabia ma Satanás krê atakaba Jó. El pergunta Satanás: “Bu sta ku odju na nha sérvu Jó?” Nu ben odja modi ki Jeová uza se puder pa djuda Jó.

7. Di akordu ku Jó 1:10, 11, kuzê ki Satanás fla sobri kes algen ki ta sirbi Jeová?

⁷ Lé Jó 1:10, 11. Jeová é kel Deus Más Grandi ki ten i el ta uza se autoridadi i se puder di manera ki el ta atxa más midjór. (Jer. 32:17; Dan. 4:35) Má simé, Satanás fla ma Jeová ka ta uza se puder di manera dretu. Satanás fla ma Deus ta da umanus, sima el da Jó, txeu kuza bon asi pa es pode adora-l. Satanás tanbê fla ma pesoas ta adora Jeová sô pamodi el ta da-s txeu kuza bon. Kuzê ki Jeová disidi faze?

8-9. Ki limiti klaru Jeová poi Satanás i pamodi? (Jó 1:12) (Odja imajen.)

⁸ Lé Jó 1:12. Jeová dexa Satanás tenta prova si kuzê ki el fla éra verdadi. Má Jeová da Satanás un órdi: ‘Sô ka bu stika bu mô kóntra Jó!’ Tudu kes anju ki staba na kel runion, obi Jeová ta da Satanás kel órdi li. I Satanás tinha ki obiba ku kel órdi. El ka tinha puder pa faze ku Jó más di ki kel ki Jeová dexa-l faze. I mésmu gósi, Satanás sô ta pode faze kuzê ki Jeová ta dexa-l faze. Pur isu, Jeová uza se puder pa proteje Jó i pa mostra ma el é un Deus di amor i ki é justu.

⁹ Kes kuza ki Satanás faze kóntra Jó fadja. Jó kontinua fiel pa se Pai na séu. (Jó 1:22) Má Satanás krê fazeba más algun kuza pa poi Jó ta para di sirbi Jeová.

10. Pamodi ki Jeová dexa Satanás ataka Jó otu bês? (Jó 2:2-6)

¹⁰ Lé Jó 2:2-6. Dipôs, Satanás krê fazeba un kuza más kruel pa poi Jó ta para di sirbi Jeová. Satanás krê provaba ma si Jó pensa ma el sta ba moreba, el ta odiaba Jeová i el ta paraba di sirbi-l. Pa mostra ma Satanás staba mariadu, Jeová dexa-l ataka Jó ku un duénsa gravi. Más un bês, Jeová poi limiti kantu el fla: “Sô ka bu tra-l se vida!” Satanás ka tinha puder pa mataba Jó pamodi Deus ka dexa-l. Nton más un bês, Jeová mostra ma el é kel Deus Más Grandi ki ten pamodi el poi Satanás limiti na kel ki el pode fazeba ku Jó.

JEOVÁ KABA KU SUFRIMENTU DI JÓ

11. Dipôs ki Jeová kaba ku sufrimentu di Jó, modi ki el rekonpensa-l? (Jó 42:10-13)

¹¹ Lé Jó 42:10-13. Kantu Jó prova ma sénpri el ta ba kontinuaba fiel, Jeová ka dexa Satanás ataka-l más. Jeová kaba ku sufrimentu di Jó. Más un bês, Satanás ka tinha puder pa faze nada kóntra kel disizon di Jeová. El ka tinha puder pa inpidi Jeová di proteje i abênsua Jó.

12. Da un izénplu di kuzê ki Jeová dja faze pa alguns di ses sérvu ki kunfia na se puder di salva-s.

¹² Jeová dja uza se puder pa djuda txeu sérvu di sel duránti es ténpu di fin. Pur izénplu, na anu di 1945, trópas obriga 230 Tistimunhas di Jeová pa faze un viajen grandi i prigozu, di un kanpu di konsentrason na Alimanha ti mar pa ba mata-s. Má tudu kes Tistimunha di Jeová salva. Dipôs ki es pasa pa kel situason terível li, es skrebe kel-li: “Nu pasa pa un ténpu di próva difísil i kes algen ki skapa foi sima si es tradu di fornadja ku lumi. Es ka tene nen txeru di fumu. ... Má es sta xeiu di forsa i di puder di Jeová.” Dipôs es fla: “Nu ten sô un dizeju... [dipôs] di sai di kóba di lion, ki é pa nu dexadu kontinua ta sirbi Jeová... pa tudu ténpu. Kel-li ta sérba nos midjór rekonpensa.” Konpara ku Daniel 3:27; 6:22.

13. Ki serteza bu pode ten óras ki bu ta pasa pa prublémas? (Odja imajens.)

¹³ Nos tanbê nu pode pasa pa alguns momentu na nos vida ki é sima si nu botadu déntu di kóba di lion. (1 Ped. 5:8-10) Alvês nu pode xinti dizanimadu i nu pode pergunta si nos prubléma un dia ta kaba. Na kes momentu la, lenbra di kuzê ki Jó pasa pa el pode djuda-nu. Nu pode ten tudu serteza ma Jeová ten puder pa kaba ku nos sufrimentu, ka ta inporta si é gósi ô si é na mundu novu. Jeová dja skodje un dia pa kaba ku kel mundu mau li. I el ka ta dexa pasa nen un dia más dipôs di kel dia ki el tene markadu!

JEOVÁ TA AMA SES SÉRVU LIAL

14-15. Kuzê ki Jeová krê faze pa kes algen ki é lial pa el i pamodi? (Jó 14:15) (Odja imajen.)

¹⁴ Lé Jó 14:15. Nos Pai na séu é lial pa kes algen ki é lial pa el. El ta da-s tantu valor ki mésmu si es móre el ta ben da-s vida otu bês. Envês di xinti dór pamodi kes algen ki nu ta ama móre, nu ta ben xinti txeu alegria óras ki es resusitadu. — Iza. 65:17.

¹⁵ Mésmu dipôs ki sufrimentu di Jó kaba, inda el kontinua ta vive na es mundu mau di Satanás. Má Bíblia ta fla-nu ma Jeová rekonpensa Jó di manera spetakular. El kura Jó i el da-l más kuza bon di ki kel ki el tinha. Má Jeová ta ben da Jó mutu más benson na futuru. Jeová mostra ma el krê pa ses sérvu lial ten txeu filisidadi na vida. Na verdadi, Jeová ta ben da tudu kes algen ki prova ma es é lial pa el oportunidadi di vive pa tudu ténpu na un paraízu na téra. (Apo. 21:3, 4) Dja ki el é kel Deus Más Grandi ki ten, el tene vontadi di faze kel-li. Pensa na modi ki Jeová ta ben rekonpensa-nu pode konsola-nu mésmu gósi óras ki nu ta pasa pa prublémas.

16. Ki otu razon nu ten pa kunfia ma Jeová é kel Deus Más Grandi ki ten?

¹⁶ Enbóra Jeová rekonpensa Jó ku un vida kunpridu, ku ténpu el móre. Má Jeová, ki é kel Deus Más Grandi ki ten i ki ten tudu puder ta ben resusita Jó. (Deut. 32:39) Jeová dja skodje un ténpu pa ben resusita kes algen ki el ta ama i ningen ka ta pode inpidi-l di faze kel-li. — Rom. 8:38, 39.

POI TUDU BU KUNFIANSA NA JEOVÁ

17. Kuzê ki ta mostra ma Satanás ka ta pode kaba ku povu di Jeová?

¹⁷ Kel stória di Bíblia sobri Jó ta da-nu txeu razon pa nu kunfia na Jeová. Nu ten txeu gratidon pa Jeová pamodi el ka ta dexa Satanás kaba ku se povu. Nu sabe ma Jeová é kel Deus Más Grandi ki ten pamodi uns 9 milhon di algen oji ta sirbi-l di manera fiel. Txeu bês, dja nu odja ma ka ten ninhun arma ki fazedu kóntra sérvus di Jeová ki ta ten bons rezultadu. (Iza. 54:17) Enbóra pode parse ma ka ten ningen pa proteje povu di Jeová, kes governanti i kes xéfi di relijion ki ten txeu puder ka ta konsigi kaba ku es. I ka ten nada ki ta pode para-nu di pâpia kes verdadi sobri Jeová i mostra ma Satanás é un mintirozu i un asasinu. Nen mórti ka ta pode para-nu pamodi Jeová ta ben resusita tudu kes algen ki móre lial pa el. — Ose. 13:14.

18. Pamodi ki nu ka meste xinti medu di kuzê ki ta ben kontise na futuru?

¹⁸ Óras ki nu ta midita na kel stória di Jó, nos fé ma Jeová ta sta di nos ladu ka ta inporta kuzê ki kontise ta fika más fórti. Duránti grandi tribulason, Satanás i kes algen ki ta apoia-l ta ben pensa ma povu di Deus é fraku i es ta ben ataka-s. Má Jeová ta ben uza se puder ki ka ten limiti sima el uza na situason di Jó. El ka ta ben dexa Satanás prujudika se povu pa tudu ténpu. Ka ta dura, Jeová ta ben kaba ku tudu sufrimentu ki Satanás pô-nu ta pasa pa el. Jizus ta ben bota Satanás ku ses dimóni na abismu i es ta fika la duránti mil anu. (Luk. 8:31; Apo. 20:1-3) Ku ténpu, Satanás i tudu kes ki ta apoia-l ta ben ser distruídu pa tudu ténpu, sima Jeová promete. — Jén. 3:15; Rom. 16:20; Apo. 20:10.

19. Modi ki Jeová ta ben rekonpensa kes algen ki kunfia na el? (Odja imajen.)

¹⁹ Nu tene txeu vontadi pa mundu novu ben, undi ki nu ta ben ser perfeitu i nu ta ben ten alegria di verdadi. Vida ta ben ser más midjór di ki kel ki nu ta imajina. Jeová promete: “Odja! N sta faze tudu kuza novu.” (Apo. 21:5) Kuzê ki kel-li krê fla? Pa primeru bês, dipôs di milharis di anu, Satanás ku ses dimóni ka ta ben prujudika-nu más i nen es ka ta ben poi pesoas ta faze kuzas mariadu. Fórti nu ta ben xinti aliviadu! Nunka más nu ka ta ben perde un noti di sónu pamodi ansiadadis di kel mundu li. Kes algen ki salva na Armajedon ta ben odja txeu milagri. Kes algen ki sta duenti ta ben kuradu i kes algen ki nu ta ama ki dja móre ta ben resusitadu. Nu ta ben ten kel vida ki nos Pai na séu sénpri krê pa nu tinha!

20. Kuzê ki nu debe sta disididu na faze?

²⁰ Na es ténpu di fin, nu sta ben pasa pa más prubléma i nu meste koraji pa nu kontinua fiel. Pur isu, nu krê kontinua ta kunfia na Jeová i ta obi ku el. Pa nos tudu nu kontinua ta mostra nos amor pa nos Pai na séu i prova ma Satanás é mintirozu! Nu pode ten serteza ma si nu kontinua fiel pa Jeová, ki é kel Deus Más Grandi ki ten, el ta ben da-nu un futuru sábi, pamodi Jeová krê i el ta ben rekonpensa ses sérvu fiel.