Ныбжь зиІэ къуэш, шыпхъухэ, зэхуэсым и дежкІэ фэ фылъапІэщ

Уэри уи ныбжьыр зэрыхэкІуэтам къыхэкІкІэ, уи зэфІэкІыр нэхъ мащІэ зэрыхъуам гу лъыптэу къыщІэкІынщ. Илъэс куэд хъуауэ Иеговэ пэжу ухуэлажьэми, япэм пхуэщІэу щытамрэ иджыпсту пхуэщІэмрэ щызэбгъапщэм деж, абы хуабжьу уи гур хигъэщІу къыщІэкІынщ. Апхуэдэ гурыщІэ хьэлъэхэм дапхуэдэу упэлъэща хъуну?

ИЕГОВЭ СЫТКІЭ КЪЫФЩЫГУГЪРЭ?

Мыпхуэдэу зэупщІыж: «Иеговэ сыткІэ къысщыгугърэ?» 2 Коринф 8:12 ит псалъэхэм гушхуэныгъэ къыуатыфынущ. А едзыгъуэм мыпхуэдэу щыжыІащ: «ЦІыхур тэным хуэхьэзырмэ, итынур иІэм елъытащ, имыІэм елъытакъым Тхьэм а тыгъэр къабыл зэрищІыр».

Мы едзыгъуэм къызэригъэлъагъуэмкІэ уэ пхузэфІэкІымкІэщ Иеговэ къызэрыпщыгугъыр. А гупсысэр къыбдэІэпыкъунущ нэгъуэщІхэм зомыгъэпщэну, абы нэмыщІ япэм Алыхьым хуэпщІу щытамрэ иджыпсту хуэпщІэфымрэ зомыгъэпщэну.

Егупсысыт: уэ нэхъ щІалэу ущыщытам нэхъыфІу уиІэр Иеговэ ептауэ къыщІэкІынщ. Ауэ иджыпсту уи Іуэхум зихъуэжами, нэхъыфІу уиІэр Иеговэ ептын щыбгъэтакъым. Аращи, а лъэныкъуэмкІэ мы Іуэхум уеплъу щытмэ, гурыІуэгъуэщ зыми зэрызимыхъуэжар. Япэм хуэдэу иджыпстуи уиІэм и нэхъыфІыр Иеговэ ибот.

УЭ НЭГЪУЭЩІХЭМ СЭБЭПЫНАГЪ КЪАХУЭПХЬЫФЫНУЩ

Ныбжь узэриІэм нэгъуэщІ лъэныкъуэкІэ уеплъыну хущІэкъу. Уи ныбжьыр зэрыхэкІуэтар зэран къызэрыпхуэхъум уемыгупсысу, абы сэбэпынагъ къызэрыхэпхыфынум егупсыс. Сыт щхьэкІэ жыпІэмэ уи щІалэгъуэм пхузэфІэмыкІыу щыта гуэрхэр иджыпсту пхузэфІэкІынущ. Апхуэдэ зы Іэмалым дыхэплъэнщ.

Уи гъащІэм къриубыдэу зызыхуебгъэсахэмкІэ нэгъуэщІхэм дэгуашэ. Библием щыщ къыкІэлъыкІуэ едзыгъуэхэм егупсыс.

Пащтыхь Даут: «Сэ ныбжьыщІэу сыщытащ икІи жьы сыхъуащ, ауэ Иеговэ и лэжьакІуэ пэжхэр къигъэнауэ икІи абы и щІэблэр щІакхъуэ щхьэкІэ лъаІуэу слъэгъуакъым» (Пс. 37:25).

Нун и къуэ Ехьошуа: «Куэд мыщІэу сэ дунейм сехыжынущ. Фи Алыхь Иеговэ фыкъызэригъэгугъа псалъэхэм щыщу гъэзэщІа мыхъуауэ зыри къызэрымынар фэ фІы дыдэу фощІэ. Ахэр псори гъэзэщІа хъуащ. Абыхэм щыщу гъэзэщІа мыхъуауэ зыри къэнакъым» (Иис. Н. 23:14).

Даутрэ Нун и къуэ Ехьошуарэ илъэс куэдкІэ Иеговэ хуэлэжьащ. Абыхэм я гъащІэм къриубыдэу куэд ялъэгъуащ икІи куэдым зыхурагъэсащ. Абы и фІыгъэкІэ абыхэм я псалъэхэм нэхъ къару щІэлът.

Уэри илъэс куэд щІауэ Иеговэ ухуэлажьэмэ, ар къызэрыбдэІэпыкъуамрэ нэгъуэщІ къуэш, шыпхъухэм зэрадэІэпыкъуамрэ теухуауэ куэд жыпІэжыфыну къыщІэкІынщ. Иеговэ и лъэпкъым и нэфІ зэрыщыхуам теухуауэ псом хуэмыдэу зыгуэр уигу къинэжамэ, ар нэгъуэщІхэм зэражепІэжыным хущІэкъу. Апхуэдэу уэ къуэш, шыпхъухэри уи щхьэри бгъэгушхуэфынущ (Рим 1:11, 12).

Иджыри нэгъуэщІхэр зэрыбгъэгушхуэ хъуну Іэмалыр — ар уи узыншагъэм къыпхуидэмэ, дыщызэхуэс Унэм щекІуэкІ зэІущІэхэм укІуэныращ. Абы уэ къару къыпхилъхьэнущ икІи нэгъуэщІ къуэш, шыпхъухэри игъэгушхуэнущ. ИпэкІэ зи гугъу тщІа ди шыпхъу Конни жеІэ: «Сэ нэщхъейуэ сыщымытыну зэІущІэхэр къыздоІэпыкъу. Дауи сынэщхъеин дыщызэхуэс Унэм апхуэдиз лъагъуныгъэ къыщысхуагъэлъагъуэу? Сэ дэлъху, шыпхъухэм фІыщІэшхуэ яхузощІ икІи абыхэм тыгъэ цІыкІухэр изот. Сэ сыхуейщ адэкІи нэгъуэщІхэм я гъусэу зэхуэсым и Іуэхухэм сыхэтыну!»

ИЕГОВЭ УЭ ПЭЖУ УЗЭРЫХУЭЛАЖЬЭР ЛЪАПІЭУ ЕЛЪЫТЭ

Библием пасэм псэуа, зи ныбжь хэкІуэта цІыху пэжхэм и гугъу ещІ. Абыхэм щыщІалэм яхузэфІэкІам хуэдиз ямыщІэжыфу хъуами, Иеговэ ахэр фІыуэ илъагъун къигъэнакъым. Псалъэм папщІэ, Симеон и щапхъэр дигу къэдгъэкІыжынщ. Хьисэ къыщалъхуам щыгъуэ ар жьы дыдэ хъуат. Иеговэ и Унэшхуэм щыкІуэм деж абы, дауикІ, илъагъу къыщІэкІынт зи щІалэгъуэхэм мыхьэнэшхуэ зиІэ лэжьыгъэхэр зэрырахьэкІыр. Абыхэм ящІэм хуэдиз Симеон зэрылъэмыкІыжым щхьэкІэ, сэбэпынагъ куэд къимыхьыжыфу егупсыс къыщІэкІынт. Ауэ Иеговэ Симеон нэгъуэщІут зэреплъыр. Абы ар «щыпкъагъэри Тхьэм и фІэлІыкІри зигу илъ цІыхуу» къилъытэт. Иеговэ абы щІыхьышхуэ хуищІри, къалъхуагъащІэу щыт Хьисэ илъэгъуну Іэмал иритащ. Уеблэмэ, Алыхьым Симеон къигъэсэбэпри, Хьисэ къэкІуэн хуей Мэссихьу зэрыщытыр жригъэІащ! (Лк. 2:25—35). ГурыІуэгъуэт а зи ныбжь хэкІуэта цІыхухъум Алыхьым и къару лъапІэр зэригъусэр. Иеговэ дежкІэ мыхьэнэ зиІэр Симеон и ныбжьыратэкъым, атІэ фІэщхъуныгъэ быдэ зэриІэрат.

Уи зэфІэкІым емылъытауэ, Иеговэ узэрыхуэлажьэр лъапІэу зэрилъытэм шэч къытомыхьэ. Иеговэ дызэрыхуэлажьэм щигъэгуфІэр — тхузэфІэкІыр щеттым дежщ. (2 Кор. 8:12).

Аращи, пхузэфІэкІыным уи акъылыр теухуэ. Псалъэм папщІэ, зэман кІэщІкІэ фІэкІа мыхъуми, хъыбарыфІыр дапхуэдэу бгъэІу хъунуми егупсыс. Абы нэмыщІ къуэш е шыпхъу гуэрым звонить хуэпщІу е открыткэ хуэптхыу ар бгъэгушхуэ хъунущ. Къапщтэмэ, а Іуэхум мыхьэнэшхуэ имыІэу къыпщыхъункІэ хъунущ, ауэ уи нэгу къыщІэгъэхьэт, абы и гуапэ зэрыхъунур апхуэдиз илъэс хъуауэ Иеговэ хуэлажьэ цІыхум гулъытэ къызэрыхуищІар!

Узыншагъэм пыщІа гугъуехьхэр дызэриІэм емылъытауэ, дэ гуфІэгъуэ диІэу, Иеговэ дыхуэлэжьэфынущ. Ар къыхощ Африкэм и КъуэкІыпІэмкІэ къыщыхъуа Іуэхугъуэм. «ХъыбарыфІым абы и гъащІэр къригъэлащ» жыхуиІэ рамкэр а Іуэхугъуэм топсэлъыхь.

Зыщывмыгъэгъупщэ: фэ Алыхьым фызэрыхуэпэжымрэ фи фІэщхъуныгъэмрэ къуэш, шыпхъухэр игъэгушхуэфынущ. Теубыдагъэ вгъэлъагъуэмкІэ фэ абыхэм щапхъэ фахуохъу. Аращи, шэч къытевмыхьэ: ди Алыхь пэжым «фэ влэжьа Іуэхур щыгъупщэнукъым. Тхьэм и цІыху лъапІэхэм дэІэпыкъуэгъу фазэрыхуэхъуамкІи иджыри дэІэпыкъуэгъу фазэрыхуэхъумкІи Тхьэм хуэвгъэлъэгъуа фІылъагъуныгъэр щыгъупщэнукъым» (Евр. 6:10).

АДЭКІИ ФХУЗЭФІЭКІЫУ ХЪУАР ФЩІЭ

ЩІэныгъэлІхэм къызэрахутамкІэ зи ныбжь хэкІуэтахэр нэгъуэщІхэм щадэІэпыкъум деж, абыхэм я узыншагъэр нэхъ быдэщ, я акъылыр нэхъ жанщ икІи ахэр нэхъыбэрэ мэпсэу.

ДауикІ, дэ тщІэ ІуэхуфІхэм жьыгъэр къигъэувыІэнукъым. Іэдэм и гуэныхьым къыпэкІуэ жьыгъэмрэ лІэныгъэмрэ Іузыхыфынур Алыхьым и Пащтыхьыгъуэ закъуэращ (Рим 5:12).

Дапхуэдэу мыхъуами, хъыбарыфІ гъэІуным фызэрыхэтым фи гугъэр ффІэмыкІуэду къихъумэнущ, уеблэмэ, фи узыншагъэми сэбэп хуэхъуфынущ. Зи ныбжь хэкІуэта ди къуэш, ди шыпхъу лъапІэхэ, Иеговэ хуэфщІэу хъуар лъапІэу зэрилъытэр зыщывмыгъэгъупщэну дыныволъэІу. Фэ вгъэлъагъуэ фІэщхъуныгъэ быдэр — зэхуэсым и дежкІэ тыгъэшхуэщ.