Зауэхэм кІэ къахуэкІуэнущ!

АЛЫХЬЫМ ЦІЫХУ ПРАВИТЕЛЬСТВЭХЭР ІУИХЫНУЩ

ЦІыху правительствэхэм псоми Армагеддонa зауэм кІэ къащыхуэкІуэнущ. «ЛъэкІыныгъэшхуэ псори зиІэ Тхьэм и махуэшхуэм щыгъуэ» «дуней псом я пащтыхьхэр» зэхуашэсынущ (Апокалипсис 16:14, 16). Абы щыгъуэ Алыхьым зауэхэм кІэ иритынущ.

ЦІыху правительствэхэм я пІэкІэ Алыхьым и правительствэр щІылъэм щытепщэнущ. Ар уафэм щыІэщ икІи «зэи мыкъутэжыну» Пащтыхьыгъуэу щытщ (Даниил 2:44). А Пащтыхьыгъуэм и Пащтыхьу Алыхьым тригъэувар Хьисэ Мэссихьщ (Исайя 9:6, 7; Маттэ 28:18). Хьисэ и гъэсэнхэр хуригъаджэт а Пащтыхьыгъуэмb теухуауэ Алыхьым елъэІуну (Маттэ 6:9, 10). Алыхьым и Пащтыхьыгъуэм и лъабжьэ щІэтыну цІыхухэр мамыру, зэкъуэту псэунущ.

ЦІыхухэм елъытауэ, Хьисэ зэи и тепщэныгъэр и фейдэ щхьэкІэ къигъэсэбэпынукъым. Абы пэжагъ хэлъщ икІи цІыху зэхэгъэж ищІкъым. Абы къыхэкІкІэ цІыхур сыт хуэдэ лъэпкъым къыхэмыкІами, сыт хуэдэ расэм щымыщми, зыми нэмыплъ иратынукъым икІи и хуитыныгъэр хаутэнукъым (Исайя 11:3, 4). Хьисэ дэтхэнэ зыми и нэІэ тригъэтынущ икІи ифІ къилъыхъуэнущ. Библием Хьисэ теухуауэ итщ: «ДэІэпыкъуэгъу щхьэкІэ лъаІуэ тхьэмыщкІэхэр, дэкъузахэр икІи дэІэпыкъуэгъу зимыІэхэр абы къригъэлынущ. [...] Лей зехьэнымрэ залымыгъэмрэ къыІэщІихынущ ахэр» (Псалом 72:12—14).

Алыхьым и Пащтыхьыгъуэр щытепщэну зэманым Іэщэ лъэпкъ щыІэжынукъым (Михей 4:3). А правительствэм и фІыгъэкІэ «Іей зыщІэхэр», е нэгъуэщІу жыпІэмэ мамыру псэуну хуэмейхэр, кІуэдыжынущ (Псалом 37:9, 10). ЦІыхухъухэми, цІыхубзхэми, сабийхэми щІэшынэн щхьэусыгъуэ яІэжынукъым, мамырыгъэ здэщымыІэ щІыпІэ ди щІылъэм иІэнукъым (Иезекииль 34:28).

Алыхьым и Пащтыхьыгъуэм и фІыгъэкІэ псоми гъащІэ тынш, гъащІэ дахэ яІэнущ. ЦІыхухэм зыкъыщІаІэтын щхьэусыгъуэ щыІэжынукъым. ТхьэмыщкІагъэрэ гъаблэрэ афІэкІа зэи щыІэнукъым. Псоми унэ зэпэщрэ ерыскъы узыншэрэ яІэнущ (Псалом 72:16; Исайя 65:21—23).

Зауэхэм къыпэкІуа зэраныгъэ псори Алыхьым и Пащтыхьыгъуэм Іуихыжынущ. ЦІыхухэм я узыншагъэр, психическэ лъэныкъуэри абы хэту, зэтеувэжынущ. Абы нэмыщІ Алыхьым лІахэр къигъэтэджыжынущ, ахэр щІылъэм щыпсэун щхьэкІэ (Исайя 25:8; 26:19; 35:5, 6). Дэ фІыуэ тлъагъухэм дахуэзэжынущ икІи зауэм епха гукъэкІыж Іейхэм зэи дагъэгузэвэжынукъым (Апокалипсис 21:4).

АЛЫХЬЫМ ГУЭНЫХЬЫР ИГЪЭКІУЭДЫЖЫНУЩ

Алыхьым и Пащтыхьыгъуэм цІыхухэр зэкъуэт ищІыжынущ икІи ахэр Алыхь пэж Иеговэc хуэлэжьэнущ. Библиер абы «фІылъагъуныгъэрэ гузэгъэгъуэрэ зи деж къикІ ТхьэкІэ» йоджэ (2 Коринф 13:11). ЗэгурыІуэу псэууэ цІыхухэм зрагъэсэнущ (Исайя 2:3, 4; 11:9). Алыхьым хуэжыІэдаІуэхэр псори гуэныхьым къыІэщІэкІынущ (Рим 8:20, 21).

АЛЫХЬЫМ ШЕЙТІАНЫМРЭ ЖИН БЗАДЖЭХЭМРЭ ИГЪЭКІУЭДЫЖЫНУЩ

Алыхьым и Пащтыхьыгъуэм кІэ къахуигъэкІуэнущ зауэхэр къызэщІэзыгъэст Иблисымрэ жин бзаджэхэмрэ (Апокалипсис 20:1—3, 10). Ахэр афІэкІа зэран щымыхъужынукІэ «дуней псом мамырыгъэр щыІэнущ» (Псалом 72:7).

Шэч къытумыхьэ: Алыхьым ита псалъэр игъэзэщІэжынущ икІи Іэмал имыІэу зауэхэм кІэ иритынущ. Апхуэдэ гукъыдэж зэриІэм нэмыщІ, абы апхуэдэ зэфІэкІи иІэщ.

• Алыхьым зауэхэм кІэ иритын щхьэкІэ зыхуэныкъуэ Іущагъи къаруи бгъэдэлъщ (Иов 9:4). Абы хузэфІэмыкІын зыри щыІэкъым (Иов 42:2).

• ЦІыхухэм ятелъ гугъуехьхэм Алыхьым и гур хегъэщІ (Исайя 63:9). «Залымыгъэ фІыуэ зылъагъур абы илъагъу хъукъым» (Псалом 11:5).

• Алыхьым ита псалъэр сыт щыгъуи егъэзэщІэж икІи абы зэи пцІы иупскъым (Исайя 55:10, 11; Тит 1:2).