Сценэмрэ абы и щхьэм фІэдзауэ фІэлъ щэкІ шыхьамрэ (нэхъ гъунэгъуу)
ИлъэсищэкІэ узэІэбэкІыжмэ: 1922 гъэ
«ТХЬЭМ... Хьисэ Мэссихь текІуэныгъэр къыдитыну ищІащ» (1 Кор. 15:57). Мы едзыгъуэр 1922-нэ гъэм хухахауэ щытат. А псалъэхэм Библием и КъэхутакІуэхэм ягу къагъэкІыжт абыхэм я пэжагъым щхьэкІэ Алыхьым и нэфІ къазэрыщыхуэнур. ИкІи пэжщ, а илъэсым Иеговэ хъыбарыфІыр псэемыблэжу зыгъэІу и лэжьакІуэхэм ехъулІэныгъэшхуэ яритащ. Ар къызыхэщу щытар сыт? А илъэсым щыщІэдзауэ абыхэм езыхэм тхылъхэр традзэт икІи къыдагъэкІт, абы нэмыщІ, Пащтыхьыгъуэм теухуа хъыбарыфІыр ягъэІун щхьэкІэ, радиор къагъэсэбэпу щІадзащ. А илъэс дыдэм, бжьыхьэм Иеговэ и лэжьакІуэхэм иджыри зэ наІуэ ящищІащ абыхэм зэригъусэр. Библием и КъэхутакІуэхэм куэдым ягу къинэжа конгресс Си́дар-Пойнт къалэм (Огайо штатым, США-м) щрагъэкІуэкІыфащ. А конгрессым къыщыхъуа зы Іуэхугъуэм Иеговэ и организацэр зэрылажьэм зэхъуэкІыныгъэшхуэ хилъхьащ.
«АБЫ СЫЗЭРЕГУПСЫС ЗАКЪУЭМ СИ ЩХЬЭФЭЦЫМ ЗРИГЪЭІЭТТ»
ХъыбарыфІ гъэІуным зиубгъути, тхыгъэ нэхъыбэ дыхуейт. Бруклин дэт Вефилым журналхэр щытрадзэт, ауэ, тхылъхэр къыдэдгъэкІын щхьэкІэ, коммерческэ типографиехэм захуэдгъэзэн хуей хъут. Ауэ абыхэм мазэ зыбжанэ хъуауэ дызыхуейм хуэдиз традзэфтэкъым. Тхылъ тхурикъутэкъыми, ар хъыбарыфІ гъэІуным зэран хуэхъут. Абы щыгъуэ ди къуэш Ру́терфорд ди типографием и нэхъыщхьэ Роберт Ма́ртин мыпхуэдэу еупщІащ: «Дауэ уеплърэ, дэ езым тхылъхэр тетдзэн щІэддзэмэ, тхузэфІэкІыну пІэрэ?»
Бруклин щыІэ Конкорд-стрит уэрамым тет типографиер
Ди къуэш Мартин игу къегъэкІыж: «Абы сызэрегупсыс закъуэм си щхьэфэцым зригъэІэтт, сыт щхьэкІэ жыпІэмэ типографиещІэ къызэІухын икІи а лэжьыгъэм епха Іуэху псоми зыхуебгъэсэн хуейт». Къуэшхэм Бруклин щыІэ Конкорд-стрит уэрамым тет 18-нэ унэр пщІэ щІату къащтэри, зыхуэныкъуэ Іэмэпсымэхэр къащэхуащ.
Ауэ а мурадыр зигу иримыхьаи къыхэкІащ. Ди тхылъхэр тезыдзэу щыта компанием и директорыр ди типографием еплъыну къыщыкІуам мыпхуэдэу жиІат: «Типографие бэлыхь зэвгъэпэщащ, ауэ сыт абы и мыхьэнэр, а Іуэхум хэзыщІыкІ цІыху фимыІэмэ. Илъэс ныкъуэ дэкІмэ, ар Іисраф зэрыхъур флъэгъунщ».
Ди къуэш Мартин жеІэж: «Абы и псалъэхэр уи фІэщ пщІыну тыншт. Ауэ Алыхьыр къызэрыддэІэпыкъур абы ищІэтэкъым». Ди къуэш Мартин щыуакъым. Куэд дэмыкІыу ди типографием махуэм тхылъ 2 000 хуэдиз къыдигъэкІыу хъуащ.
ЛинотипкІэ зэджэ машинэхэм ирилажьэ къуэшхэр
РАДИОКІЭ ЦІЫХУ МИН КУЭДЫМ ДЫЛЪОІЭС
Иеговэ и лэжьакІуэхэм тхылъ зэрытрадзэм нэмыщІ нэгъуэщІ щІыкІэкІи хъыбарыфІыр ягъэІуу щІадзащ. 1922-нэ гъэм, мазаем и 26-нэм, тхьэмахуэ махуэм ди къуэш Рутерфорд япэ дыдэу радиокІэ къэпсэлъащ. Абы «Нобэ псэухэм щыщу мелуан бжыгъэ хъу цІыхухэр зэи лІэнукъым» жыхуиІэ псалъэр Лос-Анджелес дэт радиостанцием щыжиІащ.
А псалъэм цІыху 25 000 хуэдиз едэІуащ. Абыхэм щыщу языныкъуэхэм фІыщІэ ящІу письмо къатхащ. Санта-Ана (Калифорние) дэс Уи́ллард А́шфорд ди къуэш Рутерфорд фІыщІэ хуищІащ и псалъэр «удихьэхыу икІи гъэщІэгъуэну» зэрыжиІам щхьэкІэ. Абы мыпхуэдэу итхащ: «Ди унагъуэм щыщу цІыхуищыр сымаджэу хэлъщи, ахэр унэм къыщІэкІыфкъым. Радиор мыхъуамэ, уи псалъэм дедэІуэфынутэкъым, ар тпэгъунэгъуу щыт унэм щыжыпІами».
КъыкІэлъыкІуэ тхьэмахуэхэм нэгъуэщІ псалъэхэри радиокІэ къатащ. А илъэсым и кІэм къыдэкІа «ХъумакІуэ чэщанэм» щыжыІат «радиокІэ цІыху 300 000 хуэдизым хъыбарыфІыр зэрызэхахар».
РадиокІэ къат псалъэхэр цІыхухэм ягу зэрырихьыр щалъагъум, Библием и КъэхутакІуэхэм радиостанцие яухуэну мурад ящІащ. Ар Бруклин дэт Вефилым пэмыжыжьэу щыт Статен хытІыгум щаухуащ. КъыкІэлъыкІуэ илъэсхэм а радиостанциер (иужькІэ абы WBBR еджэ хъуащ) къагъэсэбэпащ щІыпІэ зэмылІэужьыгъуэхэм щыпсэу цІыхухэм Пащтыхьыгъуэм теухуа хъыбарыр зэхрагъэхын щхьэкІэ.
ADV
1922-нэ гъэм, мэкъуауэгъуэм и 15-нэм къыдэкІа «ХъумакІуэ чэщанэм» итауэ щытащ фокІадэм и 5—13 Сидар-Пойнт къалэм конгресс щекІуэкІыну. А конгрессым Библием и КъэхутакІуэхэр гуфІэу, гушхуэу къекІуэлІат.
Конгрессым и япэ псалъэм ди къуэш Рутерфорд мыпхуэдэу псоми захуигъэзащ: «Шэч лъэпкъ хэмылъу, мы конгрессым Зиусхьэным и нэІэ тригъэтынущ икІи хъыбарыфІыр щІылъэм зэи зэрыщамыгъэІуам хуэдэу щигъэІунущ». Псалъэ жызыІа нэгъуэщІ къуэшхэми мызэ-мытІэу къыхагъэщащ хъыбарыфІ гъэІуным мыхьэнэшхуэ зэриІэр.
Сидар-Пойнт къалэм екІуэкІа конгрессым къекІуэлІахэр. 1922 гъэ
ФокІадэм и 8-нэм, мэрем махуэм цІыху 8 000 хуэдиз Рутерфорд и псалъэм едэІуэну зэхуэсащ. Программкэм тет «ADV» хьэрфхэм къикІыр къагуригъэІуэным псори пэплъэт. Я тІысыпІэхэм щекІуалІэм куэдым гу лъатащ сценэм и щхьэм фІэдзауэ фІэлъ щэкІ шыхьам. Оклахомэ штатым щыІэ Та́лсэ къалэм къикІыу а конгрессым къэкІуа А́ртур Кла́ус программэр фІыуэ зэхихын хуэдэу тІысыпІэ иубыдащ. А зэманым микрофонхэр къагъэсэбэптэкъыми, жаІэр фІыуэ зэхэпхын щхьэкІэ, тІысыпІэфІ къэбгъуэтын хуейт.
«Дэ зы псалъи дэдмыгъэхун хуэдэу дедаІуэт»
Председателым жиІащ ди къуэш Рутерфорд псалъэ щыжиІэкІэ, зыри зэран хуэмыхъун щхьэкІэ, ущІыхьэ-ущІэкІ зэрымыхъуныр. СыхьэтипщІым и ныкъуэм Рутерфорд и псалъэр жиІэн щІидзэри, Маттэ 4:17 ит Хьисэ и псалъэхэм гу лъитащ: «Тхьэуэ уафэм щыІэм и Тепщэныгъэшхуэр къэблэгъащ». Алыхьым и Пащтыхьыгъуэм теухуа хъыбарыфІыр цІыхухэм зэрызэхахын хуейм щытепсэлъыхьым, абы мыпхуэдэу жиІащ: «Езы Хьисэ жиІащ ар дунейм къыщыкІуэжыну зэманым „гъавэр къызэрырихьэлІэжынур“ икІи абы хуэпэж цІыхухэр и деж къызэрыришэлІэнур».
Зал нэхъыщхьэм щІэсу а псалъэм едэІуа ди къуэш Клаус игу къегъэкІыж: «Дэ зы псалъи дэдмыгъэхун хуэдэу дедаІуэт». Ауэ ар къызыІыхьэри, щІэкІын хуей хъуащ. КъызэрыщІэмыхьэжыфынур къыгурыІуэу, Артур хуэмей-хуэмейуэрэ бжэмкІэ кІуащ.
Дакъикъэ зыбжанэ дэкІа нэужь ар нэхъыфІ хъуащ. Залым къыщигъэзэжым абы щІэсхэм Іэгуауэ ин къаІэтауэ Артур зэхихащ. Абы и щхьэусыгъуэр апхуэдизу фІэгъэщІэгъуэн хъуати, «блынымкІэ сыдэпщеин хуей хъуа пэтми, Іэмал имыІэу псалъэм и кІэухым седэІуэнущ» жиІэри, Артур унащхьэм дэпщеину мурад ищІащ. Абы щыгъуэ ди къуэш Артур илъэс 23-рэ фІэкІа хъутэкъыми, ар абы къегугъуэкІакъым. Унащхьэм щхьэгъубжэ зыбжанэ Іухауэ хэтти, псалъэр абдеж фІы дыдэу щызэхэпхт.
Ауэ унащхьэм тесыр Артур и закъуэтэкъым. Абы и ныбжьэгъу зыбжани унащхьэм тесу къилъэгъуащ.
Абыхэм я щыщ зыт Фрэнк Джонсон. Ар Артур бгъэдэлъадэри, мыпхуэдэу еупщІащ:
— Сэ жан цІыкІу пІыгъыу пІэрэ?
— Ахьей, сІыгъ! — жиІащ Артур.
— А жыпІэр пэжмэ, уэ Алыхьым укъытхуигъэкІуауэ аращ! — гуфІащ Фрэнк. — Сценэм и щхьэм фІэдзауэ фІэлъ щэкІ шыхьар плъагъурэ? Абы зыгуэр тетхауэ тетщ. ХеящІэмa жиІэм фІыуэ едаІуэ. «ХъыбарыфІыр вгъэІун хуейщ» жиІэу, тІэу щызэхэпхым деж, мы кІапсиплІыр зэпыупщІ.
Арати, Артур сэ цІыкІур иІыгъыу псалъэм едаІуэт. Зэман тІэкІу дэкІри, ди къуэш Рутерфорд и псалъэм и кІэм нэсащ. Гушхуэныгъэшхуэ хэлъу, макъ хэІэтыкІакІэ абы мыпхуэдэу жиІащ: «Зиусхьэным и щыхьэт пэжу фыщыт. Бабилэным кІэ къыхуэкІуэху фи Іэр евмыхьэх. ХъыбарыфІыр дэнэкІи щывгъэІу. Иеговэ Алыхь пэжу икІи Хьисэ Мэссихь пащтыхьхэм я Пащтыхьу, зиусхьэнхэм я Зиусхьэну зэрыщытыр дуней псом къищІэн хуейщ. Мы зэманым хуэдэ зэи къэхъужынукъым. Мис, Пащтыхьым тепщэн щІидзащ! Фэ абы фрилІыкІуэщ. Аращи, Пащтыхьымрэ абы и Пащтыхьыгъуэмрэ теухуа хъыбарыфІыр вгъэІу, вгъэІу, вгъэІу!»
Артуррэ нэгъуэщІ къуэшхэмрэ кІапсэхэр щызэпаупщІам щэкІ шыхьар гъуэзэджэу къеджэрэзыхащ. Конгрессым къекІуэлІахэм «ADV» хьэрфхэм я мыхьэнэр иджы къагурыІуащ. Абы къикІыр мырат: «Пащтыхьымрэ абы и Пащтыхьыгъуэмрэ теухуа хъыбарыфІыр вгъэІу». (ADV — ар «Advertise the King and Kingdom» жыхуиІэ английскэбзэ псалъэухам и япэ псалъэр зэрыщІидзэ хьэрфищыращ.)
МЫХЬЭНЭШХУЭ ЗИІЭ ЛЭЖЬЫГЪЭ
Сидар-Пойнт къалэм щекІуэкІа конгрессым Пащтыхьыгъуэм теухуа хъыбарыфІыр псэемыблэжу ягъэІуну псори хуигъэушащ икІи къуэш, шыпхъухэр а лэжьыгъэм гуфІэжу пэрыхьащ. Оклахо́мэ щыпсэу тхылъ зыгуэшхэм щыщ зы къуэшым (а зэманым пионерхэм апхуэдэу еджэу щытащ) мыпхуэдэу жиІащ: «Дэ шахтерхэр щылажьэ щІыпІэм дыщопсэу. Мыбы дызыхуэзэ цІыхухэр икъукІэ тхьэмыщкІэщ. „Золотой век“ жыхуиІэ журналым ит хъыбарыр щызэхахым куэдым я нэпсхэр яхуэІыгъкъым. Апхуэдэ цІыхухэм гупсэхугъуэ ептыну сыту гуфІэгъуэшхуэ!»
Библием и КъэхутакІуэхэм Лука 10:2 ит Хьисэ жиІа мы псалъэхэм мыхьэнэшхуэ зэриІэр къагурыІуащ: «Гъавэр куэдщ, ауэ лэжьакІуэхэр мащІэщ». 1922-нэ гъэм и кІэм Алыхьым и Пащтыхьыгъуэм теухуа хъыбарыфІыр ягъэІуну абыхэм нэхъ тегушхуэныгъэ яІэ хъуащ.
a Ди къуэш Рутерфорд иныкъуэхэм деж «хеящІэкІэ» еджэт, сыт щхьэкІэ жыпІэмэ ар зэман-зэманкІэрэ Миссу́ри штатым судым хеящІэу щылажьэт.