ИлъэсищэкІэ узэІэбэкІыжмэ: 1921-нэ гъэ
1921-НЭ ГЪЭМ, щІышылэм и 1-м къыдэкІа «ХъумакІуэ чэщанэм» Библием и КъэхутакІуэхэм хуэгъэзауэ мыпхуэдэ упщІэ итащ: «Мэгъэм дэ сыт хуэдэ лэжьыгъэ дгъэзэщІэн хуейуэ къытпэщылъыр?» А упщІэм и жэуапу Исаия 61:1, 2 ит псалъэхэр къыщыхьат: «Иеговэ дагъэ лъапІэр... къыщІысщихуар Іэдэбхэм хъыбарыфІыр яхуэсІуэтэн папщІэкІэщ... Иеговэ и нэфІ цІыхухэм къащыщыхуэну илъэсымрэ хьэкум щищІыну махуэмрэ къызэрысам и хъыбарыр згъэІуну». А псалъэхэм Библием и КъэхутакІуэхэм ягу къагъэкІыжт хъыбарыфІыр адэкІи ягъэІун зэрыхуейр.
ЛІЫГЪЭ ЯХЭЛЪУ АЛЫХЬЫМ КЪЫБГЪЭДЭКІ ХЪЫБАРЫР ЗЫГЪЭІУХЭР
Библием и КъэхутакІуэхэм къыхуагъэфэща къалэныр ягъэзэщІэн щхьэкІэ лІыгъэм хуэныкъуэт. Сыт щхьэкІэ жыпІэмэ абыхэм цІыху Іэдэбхэм «хъыбарыфІыр хуаІуэтэным» нэмыщІ Иеговэ бзаджащІэхэм хьэкум щатрищІыхьыну махуэр къызэрысам и хъыбарри ягъэІун хуейт.
Канадэм щыщ ди къуэш Джон Хо́скин лІыгъэ хэлъу хъыбарыфІыр игъэІут. 1921-нэ гъэм ар «методистская церковь» жыхуаІэм и лэжьакІуэм хуэзащ. Джон абы жриІащ: «Дыкъэмыгубжьу Библием теухуауэ дызэгъэпсалъэ. ЗыгуэркІэ ди еплъыкІэхэр зэтемыхуэу щытмэ, щхьэж и еплъыкІэм къытенауэ ныбжьэгъухэм хуэдэу дызэбгъэдэкІыжынщ». Ауэ псори нэгъуэщІущ къызэрыхъуар. Ди къуэш Хоскин жеІэж: «ДакъикъитІ дэмыкІыу ар апхуэдизкІэ губжьауэ бжэр иридзылІати, абы хэлъ абджыр цІыкІу-цІыкІуу хэщэщын си гугъащ».
«Мажусий диныр зыІыгъхэм я деж укІуэрэ, ахэр яжепІам нэхъыфІт!» — жиІэри, а цІыхухъур кІиящ. Джон зыри жиІакъым, ауэ игукІэ егупсысащ: «НтІэ, иджыпсту сэ абыхэм ящыщ зым сепсэлъауэ аракъэ?»
Ауэ а псалъэ жагъуэхэмкІэ а Іуэхур зэфІэкІакъым. Ди къуэш Хоскин зэрыжиІэжымкІэ, етІуанэ махуэм а дин лэжьакІуэм и члисэм щекІуэкІ зэІущІэм щыжиІащ абы нэхърэ нэхъ пцІыупс а къалэм къыдэмыхьауэ икІи ар укІын хуейуэ. А псалъэхэм ди къуэшыр ягъэшына? Хьэуэ. Абы адэкІи ехъулІэныгъэ иІэу хъыбарыфІыр игъэІут. Джон жеІэж: «А зэманым хъыбарыфІ гъэІуным сызэрыхэтым гуфІэгъуэшхуэ къысхуихьт. ХъыбарыфІыр щызгъэІукІэ языныкъуэхэм мыпхуэдэ псалъэхэр къызжаІэт: „Уэ езы Алыхьым укъигъэкуащ!“ Абы нэмыщІ зыми сыщымыщІэн щхьэкІэ ахэр дэІэпыкъуэгъу къысхуэхъуну хущІэкъут».
ЩХЬЭЖ ЕЗЫМ ИКІИ И УНАГЪУЭМ И ГЪУСЭУ БИБЛИЕ ДЖЫНЫР
Пэжыр къэзыщІэну хуей цІыхухэм ядэІэпыкъун щхьэкІэ Библием и КъэхутакІуэхэм «Золотой век» жыхуаІэ журналымa Библиер куууэ бджыну къыбдэІэпыкъу программэхэр къытрадзэт. Псалъэм папщІэ, адэ-анэхэм дэІэпыкъуэгъу хуэхъу «Юные исследователи Библии» жыхуаІэ рубрикэр а журналым къыщыбгъуэтыфынут. Адэ-анэхэм абы ит упщІэхэр сабийхэм иратти, иужькІэ абыхэм я жэуапхэр Библием къыщагъуэтыну ядэІэпыкъут. Языныкъуэ упщІэхэр тыншт, псалъэм папщІэ: «Библиер тхылъ дапщэ зэрыхъур?» Адрей упщІэхэм ныбжьыщІэхэр хуагъэхьэзырт лІыгъэ хэлъу хъыбарыфІыр ягъэІуну, псалъэм папщІэ: «Хьисэ и лъэужь ирикІуэ дэтхэнэ зыри гугъуехьхэм пэщІэхуэн хуейуэ пІэрэ?»
Абы нэмыщІ «Углублённый курс изучения Божьего плана веков» жыхуиІэ рубрикэр а журналым къытрадзэт. А рубрикэм «Исследования Писания» жыхуаІэ тхылъым и япэ Іыхьэм зи гугъу ищІ темэ куухэм теухуа упщІэхэр къыщыхьат. НыбжьыщІэхэми балигъхэми яхуэгъэза а рубрикэхэр цІыху мин бжыгъэм сэбэп яхуэхъуащ. Ауэ 1921-нэ гъэм, дыгъэгъазэм и 21-м къыдэкІа «Золотой век» журналым щыжыІат а рубрикэхэр афІэкІа къытрамыдзэжыну. Сыт щхьэкІэ?
ТХЫЛЪЫЩІЭ!
«Арфа Божия» тхылъыр
ЦІыхур зэджэн хуей напэкІуэцІхэр зэрыт карточкэ
УпщІэхэр зэрыт карточкэ
Унафэ зыщІ къуэшхэм къагурыІуащ хъыбарыфІыр зыфІэгъэщІэгъуэн цІыхухэм Библиер яджын щхьэкІэ ар темэ-темэкІэ зэпкърыхын зэрыхуейр. Абы къыхэкІкІэ 1921-нэ гъэм, щэкІуэгъуэм «Арфа Божия» жыхуиІэ тхылъыр къыдагъэкІащ. А тхылъыр къэзыщтэхэр Библиер езыр-езыру куууэ яджын щхьэкІэ курсым хатхэт. А курсыр абыхэм къадэІэпыкъут Алыхьым цІыхухэм гъащІэ мыухыж яритыну иІэ мурадым теухуауэ нэхъыбэ къащІэну. Дауэ ар зэрекІуэкІыу щытар?
А тхылъым и гъусэу тхьэмахуэм и кІуэцІым зэджэн хуей напэкІуэцІхэр зэрыт карточкэ цІыхум иратт. Тхьэмахуэ дэкІа иужь а цІыхум почтэкІэ нэгъуэщІ карточкэ хурагъэхьт зэджа напэкІуэцІхэм тегъэщІа упщІэхэр иту. А карточкэм и кІэм къыкІэлъыкІуэ тхьэмахуэм иджын хуей напэкІуэцІхэр итт.
Мазищым къриубыдэу тхьэмахуэ къэс а щІыпІэм щыІэ зэхуэсым цІыхур зэджэну напэкІуэцІхэр зэрыт карточкэхэр хуригъэхьт. И нэхъыбэм зи ныбжь хэкІуэтахэмрэ узыншагъэ зэрамыІэм къыхэкІкІэ хъыбарыфІыр унэ-унэкІэ зыхуэмыгъэІухэмрэ а къалэныр иратт. Псалъэм папщІэ, Ми́лвейл (штат Пенсильвания) щыщ ди шыпхъу Аннэ Га́рднер и псалъэхэм гу лъыттэнщ: «Си шыпхъу Тейл и лъакъуэхэр къыщІэувэтэкъым. Ауэ «Арфа Божия» жыхуиІэ тхылъым и фІыгъэкІэ хъыбарыфІ гъэІун лэжьыгъэм нэхъыбэу хэтыну абы Іэмал иІэ хъуащ. Тейл упщІэхэр зэрыт карточкэхэр Библиер зыджхэм яхуригъэхьт». ЦІыхум а курсыр къиуха иужь зэхуэсым щыщ гуэр абы и деж кІуэт Библиер нэхъ куууэ къыгуригъэІуэн щхьэкІэ.
Тейл Гарднер инвалиднэ креслэм ису
ИДЖЫРИ ЛЭЖЬЫГЪЭШХУЭ КЪЫТПЭЩЫЛЪЩ
1921-нэ гъэм и кІэм ди къуэш Джо́зеф Ру́терфорд Библием и КъэхутакІуэхэм я зэхуэс псоми письмо хуригъэхьащ. Абы мыпхуэдэ псалъэхэр итащ: «Мэгъэм гъавэ Іухыжыгъуэр зэрыщІидзэрэ Пащтыхьыгъуэм и хъыбарыр псом хуэмыдэу ину Іуащ икІи цІыху куэдым ядэІэпыкъуащ». Абы нэмыщІ къуэш, шыпхъухэм мыпхуэдэ псалъэхэр яхуитхащ: «Дэ иджыри лэжьыгъэшхуэ къытпэщылъщ. Адрейхэри ди гъусэу а лэжьыгъэ лъапІэм хэтыну хуэвгъэуш». Зэманым къызэригъэлъэгъуамкІэ, Библием и КъэхутакІуэхэм а псалъэхэр ягъэзэщІащ. Абыхэм 1922-нэ гъэм Пащтыхьыгъуэм теухуа хъыбарыфІыр нэхъ жыджэру икІи лІыгъэ яхэлъу ягъэІуащ.
a 1937-нэ гъэм «Золотой век» жыхуаІэ журналыр «Утешение» цІэкІэ яхъуэжащ. ИужькІэ 1946-нэ гъэм а журналым «Фыкъызэщыу!» жаІэу еджэ хъуащ.