Алыхьым и мурадыр дапхуэдэу къызэрыджиІэр?

Пасэрей зэманым Алыхьым мелыІычхэмрэ бегъымбархэмрэ къигъэсэбэпт цІыхухэм епсэлъэн щхьэкІэ. Абы нэмыщІ Алыхьым языныкъуэ цІыхухэм къалэн яхуищІащ езым къыбгъэдэкІ хъыбарымрэ дыкъызэригъэгугъэ псалъэхэмрэ ятхыну. А псалъэхэм уи дежкІи мыхьэнэшхуэ яІэщ. Алыхьым дыкъызэригъэгугъэ псалъэхэм теухуауэ дауэ къызэрытщІэфынур?

Алыхьым цІыхухэм яжриІэну зыхуейр Тхыгъэ ЛъапІэм къыщыдощІэ (2 Тимофей 3:16). А Тхыгъэр тха хъун щхьэкІэ Алыхьым бегъымбархэр дауэ къызэригъэсэбэпар? (2 Петр 1:21). Бегъымбархэм ятхыжт Алыхьым абыхэм я акъылым кърилъхьэ гупсысэхэр. Зы щапхъэ къэтхьынщ. Директорым и дэІэпыкъуэгъум письмо итхыну къалэн иритмэ, гурыІуэгъуэщ а письмор дэІэпыкъуэгъум къыбгъэдэмыкІыу, езы директорым къызэрыбгъэдэкІыр. Абы ещхьу, Алыхьым и гупсысэхэр зытхар цІыхухэрами, Тхыгъэ ЛъапІэр къызыбгъэдэкІыр езы Алыхьыращ.

АЛЫХЬЫМ И ПСАЛЪЭР ПСОМИ КЪАІЭРОХЬЭ

Алыхьым дыкъызэригъэгугъэ псалъэхэм мыхьэнэшхуэ яІэщ. Ар хуейщ цІыху псори абыхэм еджэфыну икІи зэджар къагурыІуэну. Абы къыхэкІкІэ нобэ «дунейм тет цІыху псоми, лъэпкъ псоми, унагъуэ лъэпкъ псоми, бзэ псоми, къэрал псоми» ялъоІэс «Тхьэм и хъыбарыфІу мыкІуэдыжынур» (Апокалипсис 14:6). Алыхьым и фІыгъэкІэ абы и Псалъэр зэрыщыту е абы и Іыхьэ гуэрхэр бзэ минищым щІигъукІэ зэрадзэкІащ. Абы хуэбгъэдэн тхылъ мы дунейм теткъым!