Иеговэрэ Хьисэрэ зэрызэкъуэтым хуэдэу дэри зэкъуэту дыщывгъэт

1, 2. 1) Хьисэ щылІэну махуэм ипэ къихуэ пщыхьэщхьэм и апостолхэм я гъусэу сыткІэ Алыхьым елъэІуа? 2) Сыт Хьисэ зэкъуэтыныгъэм апхуэдиз гулъытэ щІыхуищІар?

ХЬИСЭ и апостолхэм я гъусэу иужь дыдэу пщыхьэщхьэшхэ щадищІам щыгъуэ, абыхэм зэкъуэтыныгъэ зэрахуримыкъум ар иригузавэт. Абыхэм я гъусэу тхьэлъэІукІэ Алыхьым зыщыхуигъэзам абы жиІащ езымрэ и Адэмрэ зэрызэкъуэтым хуэдэу и лъэужь ирикІуэхэми я зэхуаку зэкъуэтыныгъэ дэлъыну зэрыхуейр. (Къеджэ Иуан 17:20, 21, ДЩІa.) Хьисэ и лъэужь ирикІуэхэм зэкъуэтыныгъэ я зэхуаку дэлъу щытмэ, абы нэгъуэщІхэм наІуэ ящищІынут Иеговэ Хьисэ щІылъэм къызэригъэкІуар. ЦІыхухэм Хьисэ и лъэужь ирикІуэхэр къызэрацІыхун хуейр я зэхуаку дэлъ лъагъуныгъэрат икІи а лъагъуныгъэм ахэр нэхъ зэкъуэт ищІынут (Ин. 13:34, 35).

² ГъэщІэгъуэнкъым Хьисэ зэкъуэтыныгъэм апхуэдиз гулъытэ зэрыхуищІар. Абы гу лъитат апостолхэм зэкъуэтыныгъэмрэ зэгурыІуэныгъэмрэ зэрахуримыкъум. Псалъэм папщІэ, ар щылІэну махуэм ипэ къихуэ пщыхьэщхьэми «Хьисэ и гъуэгу ирикІуэхэм ящыщу нэхъ ин дыдэу ялъытэн хуеймкІэ зэдауэу щІадзащ» (Лк. 22:24—27; Мк. 9:33, 34). Абы нэмыщІ Екъубрэ Иуанрэ Хьисэ елъэІуауэ щытат ар и Пащтыхьыгъуэм щытеувэкІэ зыр и ижьырабгъумкІэ, адрейр и сэмэгурабгъумкІэ игъэтІысыну (Мк. 10:35—40).

3. Хьисэ и лъэужь ирикІуэхэм я зэхуаку дэлъ зэкъуэтыныгъэр сытыт зыкъутэнкІэ хъунур? Сыт хуэдэ упщІэхэр зэпкърытхыну?

³ Ауэ Хьисэ и лъэужь ирикІуэхэм я зэхуаку дэлъ зэкъуэтыныгъэр зыкъутэнкІэ хъунур ахэр увыпІэ лъагэм зэрыхущІэкъу закъуэратэкъым. Хьисэ щыпсэуа зэманым лъагъумыхъуныгъэмрэ нэфІ-ней зехьэнымрэ цІыхухэр зэгуригъаІуэтэкъым. Абы и лъэужь ирикІуэхэри апхуэдэ хьэл-щэнхэм ебэнын хуейт. Мы статьям дэ мыпхуэдэ упщІэхэр щызэпкърытхынущ: Хьисэ нэфІ-ней зехьэным щыІущІэм деж, сытыт ищІэр? Хьисэ дауэт и лъэужь ирикІуэхэм зэрыдэІэпыкъур нэфІ-ней яхэлъу нэгъуэщІхэм яхущымытыну икІи я зэхуаку дэлъ зэкъуэтыныгъэр яхъумэжыну? Абы зыхуригъаджэу щытахэр нобэ дэ дауэ къызэрыддэІэпыкъунур ди зэхуаку дэлъ зэкъуэтыныгъэр тхъумэжыну?

НЭФІ-НЕЙ ЗЕХЬЭНЫМ ХЬИСИ И ЛЪЭУЖЬ ИРИКІУЭХЭРИ ІУЩІЭТ

4. НэфІ-ней хэлъу Хьисэ къызэрыхущытам и щапхъэхэр жыфІэж.

⁴ Куэдыр нэфІ-ней хэлъу Хьисэ къыхущытт. Апхуэдэу Филипп Мэссихьыр къигъуэтауэ Нафанаил щыжриІам, ар къеупщІащ: «Назарет фІыгъэ зыхэлъ гуэр къыдэкІын?» (Ин. 1:46). Нафанаил ищІэу къыщІэкІынт Михей 5:2 ит псалъэхэр икІи абы къилъытэ хъунт Назарет къалэр мыхьэнэншэу, Мэссихьыр абы къыдэкІын щхьэкІэ. УвыпІэ лъагэ зиІэ иудейхэм Хьисэ Іумпэм ящІт ар Галилей хэкум зэрыщыщым щхьэкІэ, сыт щхьэкІэ жыпІэмэ Галилейм щыщхэр цІыху икІэу къалъытэт (Ин. 7:52). Языныкъуэхэм Хьисэ ягъэпудын щхьэкІэ ар самарие цІыхухэм щыщу жаІэт (Ин. 8:48). Иудейхэмрэ самаритянхэмрэ лъэпкъ зырызт икІи Алыхьыр зэрагъэлъапІэри зэщхьтэкъым. Иудей хэкумрэ Галилей хэкумрэ щыщхэм самаритянхэм пщІэ лъэпкъ хуащІтэкъым икІи ахэр зэхыхьэтэкъым (Ин. 4:9).

5. ЦІыхухэм нэфІ-ней зэрахэлъыр къэзыгъэлъагъуэ сыт хуэдэ Іуэхугъуэхэм ІущІэрэт Хьисэ и лъэужь ирикІуэхэр?

⁵ УвыпІэ лъагэ зиІэ иудейхэм Хьисэ и лъэужь ирикІуэхэри Іумпэм ящІт. Фарисейхэм абыхэм «Тхьэм и ней къащыхуауэ» ялъытэт (Ин. 7:47—49). Раввинхэр щрагъаджэ школхэм щемыджахэр икІи езыхэм я хабзэхэм темытхэр щІэныгъэ зимыІэ цІыху къызэрыгуэкІыу ябжт абыхэм (Апост. 4:13). А зэманым цІыхухэр я диным, цІыхубэм щаІэ увыпІэм, лъэпкъ къызыхэкІам ирипагэт. Аращ Хьисэрэ абы и лъэужь ирикІуэхэмрэ ахэр нэмыплъ ящІу къащІыхущытар. Апхуэдэ еплъыкІэхэр Хьисэ и лъэужь ирикІуэхэми зэран къахуэхъуфынут. Абы къыхэкІкІэ зэкъуэтыныгъэр яхъумэну яхуеймэ, абыхэм я гупсысэкІэр яхъуэжын хуейт.

6. НэфІ-ней щІыныр зэран къызэрытхуэхъур къэзыгъэлъагъуэ щапхъэхэр къэфхь.

⁶ Дэ нобэ дыщыпсэу дунейми нэфІ-ней щІыныр тез хъуащ. Иныкъуэхэм деж цІыхухэм зэхэгъэж зэращІыр зыхыдощІэ, дэри зыгуэрым нэмыплъ щыхуэтщІ къохъу. Австралием пионеру щылажьэ ди зы шыпхъум жеІэж: «Зи фэ хужь цІыхухэр аборигенхэм Іейуэ хущыту, лей къытрагъэхьэу сыт щыгъуи щытащ — япэми, ноби. Апхуэдэу зэрыщытым сегупсысурэ зи фэ хужь цІыхухэр слъагъу мыхъуу щІэздзащ. Сэри мызэ-мытІэу псалъэ Іейхэр къыщызжаІа къэхъуати, зи фэ хужь цІыхухэм нэхъ Іеижу сахущыт хъуат». Абы нэмыщІ Канадэм щыщ ди зы къуэшым япэм иІа гурыщІэхэр жеІэж: «ФранцузыбзэкІэ псалъэ цІыхухэр адрейхэм нэхърэ нэхъыфІу слъытэт. Абы къыхэкІыу английскэбзэкІэ псалъэхэр фІыуэ слъагъутэкъым».

7. Хьисэ нэфІ-ней зехьэныр къытемыкІуэн щхьэкІэ, сытыт ищІэр?

⁷ Хьисэ и зэманым хуэдэу ноби цІыхухэм я гум нэфІ-нейм лъабжьэ щищІащ. Хьисэ апхуэдэ щытыкІэр къытемыкІуэн щхьэкІэ сытыт ищІэр? Япэрауэ, апхуэдэ гупсысэкІэр Хьисэ зэран зыхуигъэхъутэкъым, атІэ абы захуагъэ хэлъу, цІыху зэхэгъэж имыщІу сыт щыгъуи щытт. Ар хъыбарыфІымкІэ дэгуашэт къулейми, къулейсызми, фарисейхэми, самаритянхэми икІи хьэкътын ахъшэ хэзыххэми, гуэныхьщІакІуэхэми. ЕтІуанэрауэ, Хьисэ и лъэужь ирикІуэхэр игъасэт цІыхухэм гурыщхъуэ хуащІу, гущІэгъуншэу щымытыну икІи езыми абыкІэ щапхъэ игъэлъагъуэт.

ІЭДЭБАГЪЫМРЭ ЛЪАГЪУНЫГЪЭМРЭ НЭФІ-НЕЙ ЩІЫНЫМ ТОКІУЭ

8. Мыхьэнэшхуэ зиІэ сыт хуэдэ принцип ди зэкъуэтыныгъэм лъабжьэ хуэхъур? КъыдгурывгъаІуэ.

⁸ Хьисэ ди зэхуаку дэлъ зэкъуэтыныгъэм сыт хуэдэ принципыр лъабжьэ хуэхъуми къыдгуригъэІуащ. Абы и лъэужь ирикІуэхэм яжриІауэ щытащ: «Фэ псори фызэкъуэшщ». (Къеджэ Маттэ 23:8, 9.) ДауикІ, дэ псори Іэдэм дыкъытехъукІащи, дызэкъуэшу жыпІэ хъунущ (Апост. 17:26). Ауэ Хьисэ жиІауэ щытащ абы и лъэужь ирикІуэхэр зэкъуэшу иджыри жыпІэ щІэхъунур: абыхэм Иеговэ уафэм щыІэ я Адэу зэралъытэращ (Мт. 12:50). Абы нэмыщІ ахэр Алыхьым и унагъуэм щыщ хъуащ икІи Алыхьым хуаІэ фІэщхъуныгъэмрэ лъагъуныгъэмрэ ахэр гъунэгъу зэхуищІащ. Аращ апостолхэм зэхуэсхэм письмо щыхуатхым деж, «къуэшхэ» жаІэурэ зыщІыхуагъазэу щытар (Рим 1:13; 1 Пет. 2:17; 1 Ин. 3:13)b.

9, 10. 1) Журтхэр къызыхэкІа лъэпкъым ирипагэну сытыт щхьэусыгъуэ щІамыІэр? 2) Хьисэ дауэ къызэригъэлъэгъуар нэгъуэщІ лъэпкъым къыхэкІа цІыхухэм нэхърэ нэхъыфІу зыплъытэж зэрымыхъунур? (Статьям ипэм ит сурэтым феплъ.)

⁹ Хьисэ и лъэужь ирикІуэхэм зэкъуэш, зэшыпхъум хуэдэу зэрызэхущытын хуейр къагуригъэІуа иужь, абы Іэдэбагъым мыхьэнэшхуэ зэриІэр къыхигъэщащ. (Къеджэ Маттэ 23:11, 12.) ИпэмкІэ зэрыжытІащи, зэгурыІуэну апостолхэм пагагъэр зэран къахуэхъут. Абы нэмыщІ журтхэм ящыщ куэдыр Ибрэхьим къызэрытехъукІам ирипагэт. Ауэ цІыхухэр псым щІэзыгъауэу щыта Иуан жиІащ: «Тхьэм хузэфІэкІынущ мы мывэхэм Ибрэхьим щхьэкІэ бын къахухигъэхъукІыну» (Лк. 3:8).

¹⁰ Лъэпкъ укъызыхэкІам урипагэ зэрымыхъунур Хьисэ жиІэу щытащ. Ар къыхощ Торэт егъэджакІуэ пашэ гуэр «АтІэ, хэт сэ си гъунэгъур?» жиІэу Хьисэ къыщеупщІам щыгъуэ жэуап иритыжам. Абы самаритяным теухуа ущие хъыбар жиІэжащ. ХъунщІакІуэхэм журт гуэр яубэрэжьщ, ныкъуэлІэу къагъанэри, щІэпхъуэжат. А цІыхухъу тхьэмыщкІэр зылъэгъуа журтхэр абы дэмыІэпыкъуу блэкІащ. Ауэ самаритяным абы гущІэгъу хуищІри дэІэпыкъуащ. Хьисэ и ущие хъыбарым и кІэм Торэт егъэджакІуэ пашэр хуигъэушащ гущІэгъу зыхэлъ самаритяным щапхъэ трихыну (Лк. 10:25—37). Хьисэ абыкІэ къигъэлъэгъуащ уи гъунэгъур нэгъэсауэ фІыуэ зэрыплъагъуным теухуауэ самаритяным журтхэр зэрыхуигъэсэфыныр.

11. Хьисэ и лъэужь ирикІуэхэм цІыху зэхэгъэж ящІын щІыхуэмейр сытыт? Ар къагурыІуэну Хьисэ дауэ абыхэм зэрыдэІэпыкъуар?

¹¹ Хьисэ уафэм дэкІуеижын ипэ и лъэужь ирикІуэхэм къалэн яхуищІащ «Иудей, Самарие хэкухэми» дуней псоми хъыбарыфІыр щагъэІуну (Апост. 1:8). Абыхэм а къалэныр щагъэзэщІэфынур пагагъэмрэ цІыху зэхэгъэж щІынымрэ зыхана иужьт. Хьисэ нэгъуэщІ лъэпкъхэм яхэлъ хьэл-щэныфІхэр щІэх-щІэхыурэ къыхигъэщт икІи абы, дауикІ, и лъэужь ирикІуэхэр хуигъэхьэзырат нэгъуэщІ къэралхэм хъыбарыфІыр щагъэІуну. Апхуэдэу, зэгуэрым Хьисэ Рим дзэ пашэм фІэщхъуныгъэ быдэ зэриІэм щхьэкІэ щытхъуауэ щытащ (Мт. 8:5—10). Езыр щапІа Назарет къалэм щыІэу и лъэужь ирикІуэхэм ягу къигъэкІыжауэ щытащ журтхэм щымыщ цІыхухэми Иеговэ зэрыдэІэпыкъуауэ щытар, псалъэм папщІэ Сарептэ дэс фызабэмрэ Сирие хэкум щыщ Нееманрэ (Лк. 4:25—27). Абы нэмыщІ Хьисэ Самарие щыщ цІыхубзым хъыбарыфІымкІэ зэрыдэгуэшам имызакъуэу, абы щыщ цІыхухэр къызэредаІуэр щилъагъум Самарием махуитІкІэ къыщынауэ щытащ (Ин. 4:21—24, 40).

ЯПЭ ЛІЭЩІЫГЪУЭМ ПСЭУА ХЬИСЭ И ЛЪЭУЖЬ ИРИКІУЭХЭР НЭФІ-НЕЙ ЩІЫНЫМ ДАПХУЭДЭУТ ЗЭРЕБЭНЫР?

12, 13. 1) Хьисэ Самарие щыщ цІыхубзым епсалъэу щалъэгъуам, апостолхэм ар дауэ къащыхъуа? (Статьям ипэм ит сурэтым феплъ.) 2) Сытым къигъэлъагъуэрэ Екъубрэ Иуанрэ Хьисэ щапхъэ яригъэлъэгъуам дерс зэрыхамыхар?

¹² Апостолхэм я деж тынштэкъым цІыху зэхэгъэж щІын хьэлыр зыханэну. Псалъэм папщІэ, абыхэм ягъэщІэгъуат Хьисэ Самарие щыщ цІыхубзым епсалъэу щалъэгъуам (Ин. 4:9, 27). Иудей дин пашэхэр нэгъуэщІ цІыхухэм къалъагъуу цІыхубз зэи епсэлъэнутэкъым икІи, дауикІ, зи цІэр ІейкІэ цІыхухэм хэІуа хъуа Самарием щыщ цІыхубзми зы псалъэкІи зыхуагъэзэнутэкъым. Апостолхэм Хьисэ шхэну жраІат, ауэ ар апхуэдизкІэ цІыхубзым хъыбарыфІымкІэ зэрыдэгуашэм дихьэхати, зы зэман гуэркІэ зэрымэжалІэри щыгъупщэжат. Хьисэ хуейт, и Адэм и мурадыр игъэзащІэу, хъыбарыфІымкІэ псоми дэгуэшэну, уеблэмэ, Самарие щыщ цІыхубзми. Алыхьым и мурад гъэзэщІэныр Хьисэ и шхыныгъуэу къилъытэт (Ин. 4:31—34).

¹³ Хьисэ Самарие щыщ цІыхубзым щепсэлъам щыгъуэ щапхъэ къахуигъэнар Екъубрэ Иуанрэ зыхащІыкІакъым. Самарие хэкум ирикІуэурэ, Хьисэ и лъэужь итхэм зы къуажэ гуэрым здэжеин унэ къыщалъыхъуэт, ауэ самарие цІыхухэм ахэр ирагъэблэгъэн ядакъым. Апхуэдэу щыхъум Екъубрэ Иуанрэ губжьауэ Хьисэ жраІащ уафэм мафІэ къригъэхыу а къуажэр игъэсыну. Ауэ Хьисэ ар яхуидакъым (Лк. 9:51—56). Екъубрэ Иуанрэ апхуэдэ дыдэу къэгубжьыну къыщІэкІынтэкъым, ахэр щапІа Галилей хэкум а Іуэхугъуэр къыщыхъуауэ щытамэ. Абыхэм апхуэдэу зыщІащІар цІыху зэхэгъэж щІыныр иджыри зэрызыхамынарауэ къыщІэкІынущ. Зэман гуэр дэкІа иужь, апостол Иуан Самарие хэкум исхэм хъыбарыфІыр щажриІэм куэдыр абы къедэІуащ, абы щыгъуэ ар япэм жиІауэ щыта псалъэхэм ириукІытэжауэ къыщІэкІынщ (Апост. 8:14, 25).

14. Апостолхэм дауэ зэрызэхагъэкІар зыпэщІэхуа Іуэхугъуэр?

¹⁴ Ди эрэм 33-нэ гъэм Пэнтэкост (Пятидесятницэ) махуэшхуэм иужь куэд дэмыкІыу Хьисэ и лъэужь ирикІуэхэр цІыху зэхэгъэж щІыным ІущІат. Фызабэхэм ерыскъыр щыхуагуэшым деж, алыджыбзыкІэ псалъэ фызабэхэм шхын ирамыту къагъанэт (Апост. 6:1). Абы и щхьэусыгъуэр ахэр нэгъуэщІыбзэкІэ зэрыпсалъэрауэ къыщІэкІынт. Апостолхэм а Іуэхур псынщІэу зэхагъэкІащ. Абыхэм Іущагъ зыхэлъ къуэшибл къыхахащ, шхыныр ирагъэгуэшын щхьэкІэ. А къуэшхэм псоми алыдж цІэт яІэр. Апхуэдэу къыщІыхахар зи жагъуэ зыщІа фызабэхэм ар къыІырахыну нэхъ тынш хъун щхьэкІэт.

15. Петр цІыху зэхэгъэж имыщІыну дауэ зэрызригъэсар? (Статьям ипэм ит сурэтым феплъ.)

¹⁵ Ди эрэм 36 гъэм Хьисэ и лъэужь ирикІуэхэм лъэпкъ куэдым хъыбарыфІыр жраІэу щІадзащ. Петр журтхэрат япэм зэпсалъэу щытар. Ауэ цІыху зэхэгъэж ящІын зэрыхуэмейр Алыхьым щригъэлъэгъуам, Петр КорнелийкІэ зэджэ рим дзэ пашэм деж хъыбарыфІыр жриІэну кІуащ. (Къеджэ Апостолхэм 10:28, 34, 35.) Абы иужькІэ Петр нэгъуэщІ лъэпкъхэм къыхэкІа Хьисэ и лъэужь ирикІуэхэм ядэшхэт икІи гуфІэгъуэ иІэу яхэст. Ауэ илъэс зыбжанэ дэкІауэ Петр Антиохие къалэм щыкІуам щыгъуэ, журт лъэпкъым щымыщхэм ядэшхэн щигъэтащ (Гал. 2:11—14). Паул ар щилъагъум Петр ищІэр зэрымыхъунур жриІащ икІи Петр и щыуагъэр къыгурыІуэжащ. Дэнэ дэ ар щытщІэр? Асие хэкум щыпсэу журтхэмрэ нэгъуэщІ лъэпкъым щыщхэмрэ Петр япэу письмо щахуитхам щыгъуэ, абы къыхигъэщащ къуэшхэр псори фІыуэ лъагъуным мыхьэнэшхуэ зэриІэр (1 Пет. 1:1; 2:17).

16. Япэ лІэщІыгъуэм псэуа Хьисэ и лъэужь ирикІуэхэр дапхуэдэут зэрацІыхур?

¹⁶ Зэрытлъагъущи, Хьисэ и щапхъэм и фІыгъэкІэ апостолхэм «цІыху псори» фІыуэ ялъагъуу зрагъэсащ (Ин. 12:32; 1 Тим. 4:10). Зэман куэд ихьами, абыхэм я еплъыкІэр яхъуэжыфащ. Псоми ялъагъут Хьисэ и лъэужь ирикІуэхэм я зэхуаку лъагъуныгъэ зэрыдэлъыр. Псалъэм папщІэ, етІуанэ лІэщІыгъуэм псэуа Тертуллиан тхакІуэм Хьисэ и лъэужь ирикІуэхэм щхьэкІэ цІыхухэм жаІэу щытам теухуауэ и тхыгъэ гуэрым щыжиІащ: «Ахэр фІыуэ зэролъагъу... ахэр хьэзырщ зыр зым щхьэкІэ я гъащІэр ятыну». Пэжщ, япэ лІэщІыгъуэм псэуа Хьисэ и лъэужь ирикІуэхэм «щэныщІэфІыр фащэ хуэдэу» зрашэкІри, Иеговэ щапхъэ трахыу, цІыху псоми зэхуэдэу хущытыну зрагъэсащ (Кол. 3:10, 11).

17. Дауэ цІыху зэхэгъэж щІыныр зырызыхэднэнур? Щапхъэ къэфхь.

¹⁷ Дэри зэман гуэр дыхуейуэ къыщІэкІынщ цІыху зэхэгъэж щІыныр зыхэднэну. Францием щыщ ди зы шыпхъум жеІэж а хьэлыр зыхинэну абы и дежкІэ гугъуу зэрыщытар. Ар къыддогуашэ: «НэгъуэщІхэр фІыуэ лъагъуным, уиІэмкІэ уадэгуэшэным, гуапэу уахущытыным къикІыр къызгурыІуэну Иеговэ къыздоІэпыкъу. Ауэ сэ цІыху зэхэгъэж сымыщІыну иджыри сызэлэжьыжын хуейщ, ар сыт щыгъуи тыншкъым. Аращ сэ зысхъуэжын щхьэкІэ зэпымыууэ Иеговэ сыщІелъэІур». Испанием щыщ ди зы шыпхъуми мыпхуэдэу жеІэ: «Иныкъуэхэм деж зы лъэпкъ гуэрым щыщ цІыхухэм си гум Іей яхуимылъын щхьэкІэ къару есхьэлІэн хуейщ. И нэхъыбэм апхуэдэ гурыщІэхэм сытокІуэ, ауэ сэ къызгуроІуэ адэкІи ахэр зэрызыхэзнэным сызэрелэжьын хуейр. Сэ Иеговэ хуабжьу фІыщІэ хузощІ и унагъуэ зэкъуэтым сызэрыщыщым щхьэкІэ!» Дэтхэнэ зыми, ди щхьэр къэдмыгъэпцІэжу зыдгъэунэхужын хуейщ, мыпхуэдэ упщІэ зэттыжу: сэри, а шыпхъухэм хуэдэу, цІыху зэхэгъэж щІыныр зыхэзнэн хуейуэ пІэрэ?

ЛЪАГЪУНЫГЪЭ ЗДЭЩЫІЭМ ЦІЫХУ ЗЭХЭГЪЭЖ ЩЫІЭКЪЫМ

18, 19. 1) Сыт псоми гуапэу дахущытын щІыхуейр? 2) Сыт абыкІэ къыддэІэпыкъунур?

¹⁸ Дэ зэи зыщыдгъэгъупщэ хъунукъым япэм Алыхьыр дымыцІыхуу мы дунейм дызэрытетар (Еф. 2:12). Ауэ Иеговэ и лъагъуныгъэм къыхэкІыу дызыбгъэдишащ (Ос. 11:4; Ин. 6:44). Хьиси гуапэу дыкъригъэблэгъащ. Абы и фІыгъэкІэ Алыхьым и унагъуэм щыщ дыхъуну Іэмал диІэщ. (Къеджэ Рим 15:7.) Гуэныхь зэрытхэлъым емылъытауэ, Хьисэ лъагъуныгъэшхуэ къытхуищІащ, аращи дэ зыгуэр Іумпэм тщІыну дегупсысыни хуейкъым.

¹⁹ Мы дуней бзаджэм и кІэм гъунэгъу дыхуохъури, кІуэтэхукІэ зэгурымыІуэныгъэр, нэфІ-ней щІыныр икІи лъагъумыхъуныгъэр нэхъыбэ хъунущ (Гал. 5:19—21; 2 Тим. 3:13). Ауэ дэ, Иеговэ и лэжьакІуэхэм, «уафэм къикІ акъылыфІагъэр» зэдгъэгъуэтыну дыхущІокъу. Ар дэ къыддоІэпыкъу цІыху зэхэгъэж дымыщІу, мамырыгъэм дыхущІэкъуну (Екъуб 3:17, 18). Дэ ди гуапэу нэгъуэщІ лъэпкъхэм щыщ цІыхухэр ныбжьэгъу дощІ, абыхэм я хабзэхэм пщІэ худощІ икІи я бзэри зыдогъащІэ. Абы и фІыгъэкІэ Алыхьым и лъэпкъым илъ «мамырыгъэр — псы ежэхым хуэдэу... пэжыгъэр — хы толъкъунхэм хуэдэу» щытщ (Ис. 48:17, 18).

20. Лъагъуныгъэм ди гупсысэкІэмрэ ди гумрэ дауэ зригъэхъуэжрэ?

²⁰ ИпэкІэ зи гугъу тщІа Австралием щыщ ди шыпхъум Библие джыныр дауэ сэбэп зэрыхуэхъуар? Ар къыддогуашэ: «Иджы си гупсысэкІэмрэ си гумрэ захъуэжащ. Япэм нэфІ-ней схэлъамрэ лъагъумыхъуныгъэмрэ зыхэзнащ». Канадэм щыщ къуэшым жеІэж: «Сэ къызгурыІуащ: лъэпкъ зэхэгъэжыр къызыхэкІыр цІыхухэм нэгъуэщІ лъэпкъхэр зэрамыцІыхуращ. ЦІыхухэм я хьэл-щэнхэри къыщалъхуа щІыпІэм елъытакъым». А къуэшым английскэбзэкІэ псалъэ шыпхъу къишащ. А щапхъэхэм къагъэлъагъуэ цІыху зэхэгъэж щІыным лъагъуныгъэр зэрытекІуэр. Лъагъуныгъэм зэи пхузыпымычын кІапсэм хуэдэу дызэрепх (Кол. 3:14).