2-НЭ ІЫХЬЭР
Уи щхьэгъусэмрэ уэрэ пэжагъкІэ фызэбгъэдэт
«Тхьэм гъусэ зэхуищІа цІыхуитІыр цІыхум зэбгъэдигъэкІыж хъунукъым» (Марк 10:9).
Иеговэ хуейщ дэ сыт щыгъуи пэжагъ тхэлъыну (Псалом 18:25). Зэщхьэгъусэхэм а хьэл-щэныр ягъэлъэгъуэным мыхьэнэшхуэ иІэщ, сыт щхьэкІэ жыпІэмэ пэжагъ зи зэхуаку дэмылъым дзыхь зэхуащІкъым. Дзыхь здэщымыІэми, лъагъуныгъэр щоужьыхыж.
Ди зэманым цІыху куэдым къалъытэкъым я нэчыхьыр къабзэу яхъумэн хуейуэ. Абы къыхэкІкІэ уи нэчыхьыр пхъумэну ухуеймэ, къыкІэлъыкІуэ чэнджэщитІым утетын хуейщ.
1 УИ НЭЧЫХЬЫР ЯПЭ ИГЪЭЩ
БИБЛИЕМ ЖИІЭР: Библием «псом нэхърэ нэхъапэр сытми» зэхэдгъэкІыну дыкъыхуреджэ (Филиппи 1:10, ДЩІ). Нэчыхьыр гъащІэм мыхьэнэшхуэ щызиІэ Іуэхухэм ящыщ зыщ. Аращи, абы гулъытэшхуэ хуэщІын хуейщ.
Иеговэ хуейщ зэщхьэгъусэхэм зым Іэпыхур зым къищтэжу, зэгурыІуэу зэдэпсэуну икІи я гъащІэм гуфІэгъуэ хахыну (Экклезиаст 9:9). Алыхьым къыдгурегъаІуэ зэщхьэгъусэхэм зым адрейм зэман тригъэкІуэдэн икІи зым адрейм и гуапэ зэрищІыным хущІэкъун зэрыхуейр (1 Коринф 10:24). Уи щхьэгъусэр лъапІэу зэрыплъытэр, абы узэрыхуэныкъуэр зыхищІэн щхьэкІэ къарууэ уиІэр ехьэлІэ.
ЧЭНДЖЭЩЫФІХЭР:
Фи Іуэхухэр псори евгъэтІылъэкІыурэ, уи щхьэгъусэмрэ уэрэ зэман зэхухэфх, гулъытэншэу къэбгъэнауэ уи щхьэгъусэм къыщымыхъун щхьэкІэ.
«Сэ» жывмыІэу, «дэ» жыфІэу зевгъасэ
2 УИ ГУР ХЪУМЭ
БИБЛИЕМ ЖИІЭР: «ЦІыхубз гуэрым хъуэпсэнэгуу еплъ дэтхэнэми игукІэ зинэ ищІакІэщ» (Маттэ 5:28). Гупсысэ мыхъумыщІэхэр зи гум щызыгъафІэ цІыхур и щхьэгъусэм епцІыжауэ жыпІэ хъунущ.
Иеговэ дыкъыхуреджэ: «Псом япэ уигу щыхъу-щыщІэхэм хуэсакъ» (Притчи 4:23, Гъэсэпэтхыдэхэр; Иеремия 17:9). Абы щхьэкІэ дызэплъым теухуауэ дызыкІэлъыплъыжын хуейщ (Маттэ 5:29, 30). Бегъымбар Іэиуб абыкІэ щапхъэфІ къытхуигъэнащ — абы и щхьэгъусэм нэмыщІ нэгъуэщІ зыгуэрым хъуэпсэнэгуу емыплъын щхьэкІэ, «и нэхэм зэгурыІуэныгъэ» ирищІылІат (Иов 31:1). Порнографие уемыплъыну мурад быдэ щІы. Уи гур уи щхьэгъусэу щымытым кІэрыпщІэну хуит умыщІ.
ЧЭНДЖЭЩЫФІХЭР:
Уигу псомкІи уи щхьэгъусэм узэрыхуэпэжыр адрейхэм наІуэ ящыщІ
Уи щхьэгъусэм и гурыщІэхэм егупсыс. НэгъуэщІ гуэрым гулъытэ къемызэгъ хуэпщІу уи щхьэгъусэм илъытэмэ, апхуэдэ зэхущытыкІэр занщІэу къэгъанэ