“Wha ti Yo Edo Emo”

“Mẹ niyẹrẹ te oware wọhọ ikpe udhosa no, yọ mẹ niyẹrẹ kpahe emo nọ e vrẹ udhuvẹ no evaọ eria sa-sa akpọ na. Mẹ ruẹ ẹbẹbẹ nọ ọ jọ udevie United States avọ Soviet Union, onọ u je dhe eyeyoma kẹsena nọ u te oke jọ no ẹbẹbẹ na o te kuhọ idudhe. Rekọ evaọ ikpe nana kpobi, mẹ sae ta nọ ukpe 2025 mẹ mae jọ awawa. Oware jọ nọ o wha riẹ ze họ, a bi fi ẹmo evaọ eria buobu. Oware ofa họ, ẹmo jọ evaọ usu emo nana o bi kpomahọ ahwo buobu evaọ akpọ na, yọ o re via enẹ ẹdẹvo ho.”—John Simpson, BBC world affairs editor.

Ahwo a be ruawa kpahe emo nọ a bi fi evaọ akpọ na. Ahwo buobu a bi roro sọ ẹmo o ti kuhọ ẹdẹ jọ. Eme Jesu ọ ta kpahe ẹme nana?

Oware nọ Jesu ọ ta

Oke nọ Jesu ọ jọ otọakpọ, ọ ta nọ eware nọ e be via nẹnẹ na e te via. Ọ ta kẹ ilele riẹ nọ: “Wha ti yo edo emo gbe usi emo.”—Matiu 24:6.

Dede nọ o be kẹ omai uye gaga inọ a be jọ akpọ na fi ẹmo je ru ozighi, ma wo ẹruore inọ eware i ti woma. Fikieme? Keme Jesu ọ ta nọ emo nọ a ti fi, gbe eware okpẹtu efa nọ e te via, te ekpehre uruemu nọ ahwo a ti dhesẹ yọ “oka” nọ u ti dhesẹ nọ “oke urere uyero-akpọ na” u te no. (Matiu 24:3; Luk 21:7) Eware nana nọ e be via na e lẹliẹ omai riẹ nọ Jesu o ti ku ẹmo họ evaọ akpọ na soso. Ẹvẹ o ti ro ru ei?

Oware nọ Jesu o ti ru

Kẹle na, Jesu nọ ọ rrọ Ovie Uvie Ọghẹnẹ na o ti “ru emo serihọ evaọ otọakpọ na soso.”—Olezi 46:9.

Re who gbe wuhrẹ kpahe epanọ udhedhẹ o te rọ jọ akpọ na evaọ obaro, gbe epanọ uzuazọ o te were te evaọ oke yena, se uzoẹme na “Oghẹrẹ nọ Ẹmo gbe Ozighi I ti ro Kuhọ.”