Eware nọ I re Fiobọhọ kẹ Ahwo nọ A Tuaro
Evaọ akpọ na soso, ahwo nọ a tuaro a bu te oware wọhọ ima udhuvẹ-gbesa (43 million), yọ enọ e be ruẹ ude tere he a bu te oware wọhọ ima egba ivẹ gbe udhone gbe ikpegbisoi (295 million).a Rekọ evaọ akpọ oyoma nana nọ ma rrọ na, a re mu ahwo otiọnana ru hayo tube kienyẹ ae dede.
Ẹvẹ Ọghẹnẹ o rri ahwo nọ a tuaro? Eme Ebaibol ọ ta kpahe ahwo nọ a tuaro? Ẹvẹ Isẹri Jihova a bi ro fiobọhọ kẹ ae evaọ oke mai na?
Oghẹrẹ nọ Ọghẹnẹ o rri ahwo nọ a tuaro
Ebaibol na o fiobọhọ kẹ omai riẹ nọ ahwo nọ a tuaro a rrọ ghaghae gaga kẹ Jihova.b Ọ gwọlọ nọ a re kienyẹ ae he, ọ tẹ jẹ gwọlọ nọ a rẹ rọ ẹme riẹ wuhrẹ ai. U te no ere no, Jihova o ti ru obọdẹ eware jọ kẹ ae evaọ obaro.
Oria Ebaibol: “Uye u te ohwo nọ o ru ohwo otuaro vru no edhere nọ ọ be nya.”—Iziewariẹ 27:18.
Otofa riẹ: Evaọ oke anwae, Ọghẹnẹ o juzi kẹ idibo riẹ inọ a re mu ahwo nọ a tuaro ru hu.
Oria Ebaibol: “Ọghẹnẹ o wo ọriẹwẹ hẹ.”—Iruẹru Ikọ 10:34.
Otofa riẹ: Oghẹrẹ ovona nọ ahwo nọ a be ruẹ ude a rrọ ghaghae kẹ Ọghẹnẹ na, ere ahwo nọ a tuaro a rrọ ghaghae kẹe re.
Oria Ebaibol: Jesu “o ru ahwo buobu nọ a tuaro ruẹ ude.”—Luk 7:21.
Otofa riẹ: Oke nọ Jesu ọ jọ otọakpọ, o rovie ibiaro ahwo jọ nọ a tuaro. Ọ rọ onana dhesẹ eware igbunu nọ Uvie Ọghẹnẹ u ti ru evaọ obaro.
Oria Ebaibol: “Ibiaro enọ i tuaro i ti rovie.”—Aizaya 35:5.
Otofa riẹ: Jihova ọ ya eyaa nọ kẹle na nọ Uvie Ọghẹnẹ u ti su otọakpọ na, ahwo nọ a tuaro a te ruẹ ude.
Oghẹrẹ nọ Isẹri Jihova a bi ro fiobọhọ
Mai Isẹri Jihova ma bi whowho emamọ usi nọ u no obọ Ọghẹnẹ ze kẹ ahwo nọ a tuaro evaọ eria sa-sa akpọ na. Ẹvẹ ma bi ro ru onana?
Ma be fa Ebaibol, ividio gbe ebe mai fihọ oghẹrẹ nọ ahwo nọ a tuaro gbe enọ e be ruẹ ude tere he a re ro se ai jẹ gaviezọ kẹ ae. Ejọ rai họ enọ a rẹ rọ obọ rara se (braille), erọ ibiẹme ikpokpoko, gbe enọ a rẹ gaviezọ kẹ.
Ma re ru iwuhrẹ koka koka nọ ohwo kpobi ọ rẹ sae nyaze, te ahwo nọ a tuaro.
Ma re wuhrẹ Ebaibol kugbe ohwo kpobi nọ ọ gwọlọ nọ Isẹri Jihova a nyabru ei re a wuhrẹ Ebaibol kugbei.c
Ma re ru enana kpobi ababọ ugho nọ ma re mi ahwo. Fikieme ma bi ro ru ei ọvọvẹ? Keme Jesu ọ ta nọ: “Ọvọvẹ a kẹ owhai, wha kẹ ọvọvẹ.”—Matiu 10:8.
Isẹri Jihova a gwọlọ nọ a re fiobọhọ kẹ ahwo nọ a tuaro. Ohwo kpobi nọ ọ gwọlọ kuomagbe omai gọ Ọghẹnẹ, ma re sei gboma ziezi. Joma ta kpahe Isẹri Jihova jọ nọ i tuaro.
Talita Alnashi, nọ ọ rrọ obọ Sweden ọ rẹ ruẹ ude tere he anwọ oke nọ a ro yẹi ze. Rri ividio na re whọ ruẹ oghẹrẹ nọ ọsẹgboni riẹ a ro wuhrẹ iẹe Ebaibol gbe epanọ Isẹri Jihova efa a ro dhesẹ uyoyou kẹe avọ ahwo uviuwou riẹ.
James Ryan, nọ ọ rrọ obọ United States, o diezọ anwọ oke nọ a ro yẹi, kẹsena nọ u te oke jọ no o te je tuaro. Rri ividio na re whọ ruẹ epanọ ọ be sai ro wo evawere evaọ uzuazọ.
Cynthia Pablo, nọ ọ rrọ obọ Philippines o diezọ je tuaro. Ẹvẹ Isẹri Jihova a ro fiobọhọ kẹe evaọ oke ẹyao COVID-19 nọ eware e jọ gaga na? Se iku riẹ evaọ uzoẹme na “Congregation Supports Deaf and Blind Sister During Pandemic.”
Eware vẹ ma wo nọ ahwo nọ a tuaro a sai ro wuhrẹ Ebaibol?
Ebe nọ a rẹ rọ obọ rara se (Braille). Ma wo Ebaibol braille, te Ebaibol na soso hayo abọjọ riẹ evaọ evẹrẹ sa-sa. (Ruẹ evẹrẹ nọ ma jo wo Ebaibol braille evaọ ẹkpẹti na “Ebaibol Efafa Akpọ Ọkpokpọ evaọ Braille.”) U te no ere no, ma ru ebe mai buobu fihọ braille. Ma ru ibroshọ jọ kẹ ahwo nọ a gwọlọ wuhrẹ epanọ a re se ebe braille, odẹ ibroshọ na họ Learn to Read Braille. A ru ibroshọ na evaọ oghẹrẹ nọ ohwo nọ ọ be ruẹ ude ọ rẹ rọ rehọ iẹe wuhrẹ ohwo nọ o tuaro epanọ a re se ebe braille.
Ta kẹ Osẹri Jihova jọ inọ whọ gwọlọ ebe braille hayo inọ a nyaze ti wuhrẹ Ebaibol kugbe owhẹ.
Jọ jw.org danlodu eware nọ a rẹ sai fihọ notetaker.d
Ebe nọ a printi gbe enọ a fihọ itanẹte nọ ibiẹme rai e rrọ kpokpoko. Ebe mai buobu nọ ma printi, ma wo erọ ibiẹme ikpokpoko nọ ahwo nọ a be ruẹ ude tere he a re se. U te no ere no, ma ru oria itanẹte mai na jw.org fihọ oghẹrẹ nọ whọ sai ro ru ibiẹme na kpoko re whọ sae ruẹ e rai ziezi. Whọ tẹ jọ JW Library rovie obe, whọ sai ru ibiẹme na kpoko whọ tẹ gwọlọ ere.
Ta kẹ Osẹri Jihova jọ inọ whọ gwọlọ ebe nọ i wo ibiẹme ikpokpoko hayo inọ a nyaze ti wuhrẹ Ebaibol kugbe owhẹ.
Kpohọ jw.org re whọ danlodu ebe nọ i wo ibiẹme ikpokpoko.
Ebe nọ a rẹ gaviezọ kẹ. Ma wo Ebaibol Efafa Akpọ Ọkpokpọ nọ a rọ unu se nọ a rẹ sae gaviezọ kẹ evaọ evẹrẹ nọ i bu vi egba ivẹ (200). U te no ere no, ma ru ebe mai buobu fihọ enọ a rẹ gaviezọ kẹ. Ẹsibuobu a rẹ rọ unu dhesẹ iwoho nọ e rrọ ebe na.
Kporo enọ a rẹ gaviezọ kẹ evaọ jw.org gbe JW Library hayo danlodu rai.
Kpohọ jw.org re whọ danlodu eware nọ ekọmputa hayo ekwakwa ikporakporo efa e rẹ sai se do via.e
Ividio nọ a rẹ jọ ta oware nọ o be via.f Isẹri Jihova a wo ividio itienana evaọ evẹrẹ nọ i bu vi udhusoi (100). Ividio nana i re fiobọhọ kẹ ahwo lele ehrẹ nọ Ọghẹnẹ ọ kẹ omai evaọ Ebaibol na re uzuazọ mai u kokohọ ziezi.
Whọ te ruẹ ividio nana jọ evaọ eria nana:
Iwuhrẹ gbe ikokohọ. Ikoko Isẹri Jihova e rrọ akpọ na soso. Ma re kokohọ koka koka re ma gọ Ọghẹnẹ je wuhrẹ Ebaibol na. Ma te je wo ikokohọ nọ ma re ru kukpe kukpe nọ ahwo buobu a re jo kokohọ oria ovo re ma wuhrẹ Ebaibol na. Ma rẹ jọ ikokohọ mai dhesẹ ividio kẹ ogbotu na. Yọ ma rẹ daoma kpobi re ahwo nọ a tuaro gbe enọ e be ruẹ ude tere he a rri eghẹrẹ ividio nana nọ a ru kẹ ae, enọ a jọ ta oware nọ o be via evaọ ividio na lahwe. Ahwo nọ a tuaro je diezọ a tẹ ziọ ewuhrẹ hayo okokohọ mai, obọ a rẹ rọ ta ẹme kẹ ae, yọ enọ i tuaro je diezọ na a be rọ obọ rara obọ ohwo na re a riẹ oware nọ ọ be rọ obọ ta na. Ma re dede ohwo kpobi rehọ, ma re rri ohwo ọvo vo ho.
Gwọlọ oria ewuhrẹ.
Riẹ oware nọ ma rẹ jọ ikokohọ mai ru.
Kpohọ Ekareghẹhọ uwhu Jesu, oware nọ o mai wuzou nọ ma re ru evaọ ẹgbukpe na.
José Luis Ayala ọ be rria obọ Mexico. O diezọ, ere a ro yẹi. Kẹsena nọ ọ kpako te ikpe udhegbizii no o te tuaro. Jọ ividio na ruẹ epanọ iwuhrẹ nọ ọ rẹ nya i wuzou kẹe te, gbe epanọ a ro fiobọhọ kẹe riẹ oghẹrẹ nọ ọ rẹ rọ rehọ Ebaibol wuhrẹ ahwo ziezi.
a “Ohwo nọ ọ rẹ ruẹ ude te re he” yọ ohwo nọ o wo ẹbẹbẹ ibiaro nọ a rẹ sai siwi kpo ho, yọ onana o rẹ whaha iẹe eware buobu nọ ọ hai ru kẹdẹ kẹdẹ. Evaọ uzoẹme nana, nọ ma tẹ fodẹ “ahwo nọ a tuaro” yọ ma be ta kpahe ahwo nọ a rẹ ruẹ ude tere he re.
b Jihova họ odẹ Ọghẹnẹ. (Olezi 83:18) Se uzoẹme na “Ono Họ Jihova?”
c Whọ sae ta kẹ Isẹri Jihova re a dhesẹ epanọ a re ru uwuhrẹ Ebaibol ọvọvẹ nọ a re ru na kẹ owhẹ.
d Notetaker yọ oghẹrẹ ekọmputa jọ nọ a rẹ sae danlodu eware fihọ, kẹsena eware na e vẹ romavia evaọ braille nọ ohwo nọ o tuaro ọ rẹ sae rọ obọ rara se. Nọ ohwo na o te se enọ ekọmputa na o bi dhesẹ no, ọ sai voro eyena no re ekọmputa na ọ sae dhesẹ efa. Eghẹrẹ notetaker jọ e riẹ nọ i re se eme na do via hayo dhesẹ braille je se eme na do via re. Nọ ohwo nọ o tuaro o te wo oghẹrẹ ekọmputa nana, u gbe du gwọlọ nọ o re wo ebe braille nọ a printi hi.
e Enana yọ ekwakwa wọhọ ekọmputa nọ e rẹ sai se obe do via hayo kporo enọ a rekọdo, nọ ohwo nọ o tuaro ọ rẹ gaviezọ kẹ. Ohwo nọ ọ be gaviezọ kẹ eware nọ i bi do via na ọ sai kpohọ uzoẹme hayo abọ kpobi nọ ọ gwọlọ gaviezọ kẹ evaọ obe na.
f Enana yọ ividio nọ a fi eme ba, re a ta oware nọ o be jọ ividio na via kẹ ahwo nọ a be ruẹ ude he.