A Go Obọ Ughọjọ Ẹdẹ Ọraha Kẹle Udevie Aso

Evaọ Ọvo 27, 2026, egba-eriariẹ a go obọ ughọjọ ẹdẹ ọraha nọ a re se Doomsday Clocka kẹle udevie aso vi epaọ anwẹdẹ kpobi. Udevie aso u dikihẹ kẹ oke nọ ahwo-akpọ ọvo a te rọ rehọ eware nọ a bi ru rọ raha akpọ na gbe ahwo nọ e riẹe eva muotọ.

• “A jọ obe na Bulletin of the Atomic Scientists Science and Security Board ta nẹnẹ na inọ emaharo udhone-gbisoi i kiọkọ re ughọjọ ẹdẹ ọraha na u te ti kele te udevie aso. Ọraha akpọ na o re kẹle te enẹ ẹdẹvo ho.”—Bulletin of the Atomic Scientists.

• “Egba-eriariẹ a be rọ ughọjọ ẹdẹ ọraha na vuẹ omai oware jọ vevẹ. Oye họ, eware nọ e rẹ wha ọraha ze i bi bu kẹdẹ kẹdẹ, ahwo a be rọwo rọ uzou te uzou re a ku ẹbẹbẹ na họ họ, yọ eware i bi yoma ga. U fo nọ ahwo-akpọ a re nwene, yọ a sai gine nwene nọ a tẹ gwọlọ. Rekọ re o sae lọhọ, o gwọlọ nọ ahwo kpobi a rẹ ta kẹ isu rai re a ru oware jọ kpata kpata.”—Alexandra Bell, president and CEO, Bulletin of the Atomic Scientists.

Kọ ahwo-akpọ a ti kpe omarai no jẹ raha otọakpọ na no kẹle? Kọ u fo re ozọ u mu omai inọ okpẹtu ọ be tha? Eme Ebaibol na ọ ta?

Oware nọ o te via evaọ obaro

Ebaibol na ọ ta nọ, “otọakpọ na o rẹ jọ bẹdẹ bẹdẹ” yọ ahwo “a te rriae bẹdẹ bẹdẹ.” (Ọtausiuwoma Na 1:4; Olezi 37:29) Fikiere, ahwo-akpọ a sae raha otọakpọ na no riẹriẹriẹ hẹ, yọ a sai ru ei fihọ epanọ ohwo-akpọ ọ gbẹ sae rọ rriae he he.

O make rrọ ere na, Ebaibol na ọ ta nọ akpọ na o ti gine kuhọ ẹdẹ jọ. Wọhọ oriruo, ọ ta nọ “akpọ na ọ be vrẹ.”—1 Jọn 2:17.

• Re whọ riẹ otọ ẹme nọ Ebaibol na ọ ta kpahe ekuhọ akpọ na, se uzoẹme na “Kọ Akpọ na O Muhọ Ekuhọ No? Eme Họ Apocalypse?”

• Re whọ riẹ oware nọ Ebaibol na ọ ta kpahe oke nọ eware ilogbo jọ e te rọ via evaọ akpọ na, se uzoẹme na “Oke Vẹ Akpọ na O ti ro Kuhọ?”

Rẹro nọ eware i ti woma

Ebaibol na ọ sai fiobọhọ kẹ omai rẹro nọ eware i ti woma dede nọ eware okpẹtu e be via nẹnẹ. Evaọ oghẹrẹ vẹ?

• Emamọ ehrẹ e rrọ Ebaibol na nọ e rẹ sai fiobọhọ kẹ omai evaọ uzuazọ kẹdẹ kẹdẹ. (2 Timoti 3:16, 17) Wọhọ oriruo, se uzoẹme na “Eware nọ Who re Ru re Who gbe Roro Iroro Ga Hrọ Họ” re whọ ruẹ epanọ Ebaibol na ọ sai ro fiobọhọ kẹ owhẹ wereva dede nọ ebẹbẹ i bi te owhẹ.

• Ebaibol na ọ kẹ omai ẹruore inọ eware i ti woma evaọ obaro. (Ahwo Rom 15:4) Ọ ta kpahe eware nọ ma rẹ sai rẹro nọ e te via enẹna gbe evaọ obaro. Ma tẹ riẹ eware nana, u re fiobọhọ kẹ omai kru udu ga ghelọ eware nọ e be via evaọ akpọ na kẹhẹ.

Re whọ sai wuhrẹ eware buobu evaọ Ebaibol na, iviena jọ itanẹte vuẹ omai nọ whọ gwọlọ uwuhrẹ Ebaibol nọ ohwo jọ o re wuhrẹ kugbe owhẹ ọvọvẹ.