Emọ Yọ “Ukuoriọ nọ U No Obọ Jihova Ze”

NỌ WHO te yo ẹme na “ukuoriọ,” eme ọ rẹ ziọ owhẹ iroro? Ẹsejọhọ oware jọ nọ ohwo jọ evaọ uwou ra ọ kẹ owhẹ hayo nọ o whu seba kẹ owhẹ. Eware wọhọ igho, etọ, uwou, hayo oware ofa jọ. Ghelọ oghẹrẹ oware kpobi nọ a kẹ owhẹ, ma riẹ nọ whọ rẹ rehọ iẹe zaharo ho. Whọ rẹ rẹrotei ziezi.

Ebaibol ọ ta nọ emọ yọ “ukuoriọ nọ u no obọ Jihova ze.” (Ol. 127:3) Nwanọ ere esẹgbini nọ e rrọ Ileleikristi a rri emọ rai. A rẹ rehọ ae zaharo ho. A rẹ daoma kpobi re a rẹrote emamọ okẹ yena nọ Jihova ọ kẹ rai na. A rẹ daoma ru eware nọ e rẹ lẹliẹ eva were emọ na, a rẹ kẹ ae emu, je fiobọhọ kẹ ae re a wo emamọ usu kugbe Jihova.

Rekọ o kẹ uye kẹhẹ inọ esẹgbini jọ nẹnẹ a rri emọ rai wọhọ okẹ nọ u no obọ Ọghẹnẹ ze he. (Aiz. 49:15; 2 Tim. 3:1-3) Esẹgbini jọ e riẹ nọ e ginẹ gwọlọ rẹrote emọ rai, rekọ abọgaga a be sai ro ru ei. Kọ eware jọ vẹ i bi ru nọ o be rọ bẹ esẹgbini jọ re a rẹrote emọ rai? Kọ eme Jihova ọ gwọlọ nọ esẹgbini a ru kẹ emọ rai? Ẹvẹ esẹgbini nọ e rrọ Ileleikristi a sae rọ rẹrote emọ rai ziezi?

EBẸBẸ JỌ NỌ ESẸGBINI A WO

Eme nọ ahwo ẹwho rai gbe imoni rai a be ta. Evaọ ewho jọ, esẹgbini nọ i yẹ emọ vọ otọ a rẹ mae kẹ adhẹẹ. Ẹsejọhọ fiki eme nọ imoni hayo ahwo nọ a gbẹ be rria oria a be ta, ezae-avọ-eyae jọ a rẹ gwọlọ yẹ emọ buobu. Nọ a je yẹ otọ vọ no, a gbẹ sae rẹrote ae he.
Awaọruọ. Eria jọ e riẹ nọ emamọ emu ọ rrọ tere he, oghoghẹrẹ eyao e riẹ, yọ eria nọ a re jo siwi ahwo e riẹ tere he. Fikiere emaha na a bi whu gaga. O tẹ whae ze nọ esẹgbini jọ a rẹ rọ gwọlọ yẹ buobu re nọ ejọ e tẹ maki whu no, a rẹ gbẹ jọ ababọ họ. Ahwo jọ a re yẹ emọ buobu re nọ a tẹ who no, o ga kẹhẹ, ejọ evaọ usu rai a vẹ te rẹrote ae. O rẹ mae jọ ere evaọ erẹwho nọ egọmeti o bi jo fiobọhọ kẹ ahwo nọ a kpako no ho.
Eware nọ a re ru re a seba eyẹ bu hrọ. Evaọ eria jọ, o lọhọ tere he re a sae dẹ imu hayo wo eware efa nọ i re ru nọ a gbe ro yẹ bu hrọ họ. Evaọ eria jọ nọ eware itieye na e rrọ, enọ e riẹ e nwani woma tere he. Fikiere ozọ u re mu ezae-avọ-eyae jọ inọ a tẹ dẹ ae, i ti kiehọ ae oma ha. Ezae-avọ-eyae jọ a tube wo ugho nọ a sae rọ dẹ emamọ họ.a

EME JIHOVA Ọ GWỌLỌ NỌ ESẸGBINI A RU?

Ọzae jọ avọ aye riẹ gbe emọ riẹ nọ a kpohọ ogege jọ nọ ire e rrọ nyae zaharo. Ọrọ ọmọtẹ na ọ be ta oware nọ o riẹe eva kẹ ọsẹ riẹ, yọ ọsẹ na ọ be romatotọ gaviezọ kẹe. Oni na o bi lele ọrọ ọmọzae na fa ebọro. — Hai lele emọ ra kpobi ọvuọvo ta ẹme je lele ai ru eware efa

Rẹrote emọ ra. Jihova ọ gwọlọ nọ esẹgbini a rẹrote emọ rai ziezi. Ọ gwọlọ nọ a re kru obọ ga ru iruo re a sae kẹ emọ rai emu, dẹ iwu kẹ ae, je wo uwou nọ emọ na a rẹ rria. Jihova ọ gwọlọ nọ esẹgbini a re je wuhrẹ emọ rai re. Oye u ro fo re esẹgbini nọ e rrọ Ileleikristi a gbẹ nwani fi emọ rai họ isukulu nọ emọ na a rẹ jọ rria obọ isukulu na ha (koyehọ isukulu ebọda). Rekọ emọ na a rẹ hai no uwou kpohọ isukulu je zihe ze, a vẹ hai muẹrohọ ae, re a sai wuhrẹ ae emamọ uruemu. A te ru ere, udu u re te emọ na otọ, o rẹ thọ ae no ebẹbẹ jọ, a vẹ jẹ riẹ nọ esẹgbini rai a you rai. Rekọ orọnọ eware yena nọ Jihova ọ gwọlọ nọ esẹgbini a ru na u dhesẹ nọ ọ gwọlọ nọ a dhogbo epanọ a re ro fe he. Ma riẹ ere keme ọzae-avọ-aye nọ Jihova ọ salọ nọ a yọrọ Ọmọ riẹ nọ o you gaga na a fe he, rekọ a daoma rẹrote ọmọ na.—Mat. 13:55, 56; Luk 2:24.

Ẹme nọ Ebaibol ọ ta kpahe iẹe: “Evaọ uzẹme, otẹrọnọ ohwo jọ ọ be rẹrote ahwo riẹ hẹ, maero kọ enọ e rrọ ahwo uviuwou riẹ, ọ vro ẹrọwọ na no je yoma vi ohwo nọ o wo ẹrọwọ họ.”—1 Tim. 5:8.

Jihova ọ riẹ nọ esẹgbini a tẹ kpako no, a te gwọlọ ohwo nọ ọ rẹ rẹrote ae. Emọ a tẹ be rẹrote esẹgbini rai nọ e kpako no, u re dhesẹ nọ a be rọ ọghọ kẹ ae. (Ọny. 20:12; 1 Tim. 5:4) Rekọ oware nọ u fo nọ o rẹ mae jọ esẹgbini oja họ, epanọ a rẹ rọ rẹrote emọ rai, orọnikọ epanọ emọ na a rẹ rọ rẹrote ae he. Esẹgbini a te rri emọ rai oghẹrẹ utioye na, eva rai e rẹ were Jihova.—2 Kọr. 12:14.

Wuhrẹ emọ ra re a gọ Jihova. Oware ofa nọ Jihova ọ gwọlọ nọ esẹgbini a re ru họ, a re wuhrẹ emọ rai re a you rie a vẹ jẹ gọe. Jihova ọ gwọlọ nọ u te no eware efa nọ esẹgbini a re wuhrẹ emọ rai no, a rẹ rọ eme riẹ wuhrẹ ae keme ewuhrẹ nọ o mae rro oye.—Izie. 6:6, 7.

Ẹme nọ Ebaibol ọ ta kpahe iẹe: “Wha gbẹ hae rehọ ọwhọkuo gbe ehrẹ Jihova rọ yọrọ ae.”—Ẹf. 6:4.

JIHOVA Ọ GWỌLỌ FIOBỌHỌ KẸ OWHẸ

Ọzae-avọ-aye nọ a keria uwou rai be jiroro. A rovie Ebaibol fihọ ehru itebo nọ ọ rrọ aro rai. — Wha kake jiroro unu emọ nọ wha gwọlọ yẹ kpahotọ

Wha jiroro unu emọ nọ wha ti yẹ. Wha tẹ be jiroro unu emọ nọ wha gwọlọ yẹ, wha rri oghẹrẹ nọ eware e rrọ kẹ owhai. Wha tẹ ta nọ wha re yẹ emọ buobu, kọ wha wo ugho nọ wha sae te rọ kuọ ae, dẹ iwu kẹ ae, jẹ hwa osa isukulu rai? Otẹrọnọ wha te sae rẹrote emọ buobu hu, jọ wha riẹ utho nọ wha re yẹ nọ wha sae rẹrote, re wha sae rẹrote ae ziezi oghẹrẹ nọ Jihova ọ gwọlọ. O make rrọ ere na, Jihova ọ riẹ nọ ẹsejọ, epanọ a ta kpohọ evo, a rẹ ta zihe ze he. (Ọtausi. 9:11) Rekọ wha tẹ jiroro oware nọ wha gwọlọ ru jẹ be daoma ru ei, Jihova o ti fiobọhọ kẹ owhai.

Eme nọ Ebaibol ọ ta kpahe iẹe: “Omaa ohwo nọ o re kru obọ ga, o rẹ riẹ nya hrọ, rekọ ahwo nọ a re bru okpakpa kpobi, a ti kie ruọ uvuhu hrọ.”—Itẹ 21:5.

“Ono evaọ usu rai na nọ ọ gwọlọ bọ uwou ukpehru ọ rẹ kake keria tao ho re o roro araha na sọ ugho riẹ u ti tei bọe re?”—Luk 14:28.

Rọ egagọ Jihova karo evaọ uviuwou ra. Ru eware nọ i dhesẹ nọ egagọ Jihova e mae rrọ owhẹ oja evaọ uviuwou ra. Wuhrẹ ọmọ kpobi nọ who yẹ re o you Jihova. Vuẹ emọ ra re a gaviezọ ziezi nọ wha te kpohọ ewuhrẹ, a vẹ sai wuhrẹ oware jọ kpo, whọ kẹ ae uvẹ re a zaro ho. Wha hai ru Egagọ Uviuwou koka koka. Wuhrẹ emọ ra epanọ a rẹ ta usi uwoma. Eware nọ u fo nọ who re ru kẹ emọ ra, who ku ae no uzou no kẹ emọ ra nọ e dina kpako no ho. Re a wuhrẹ ọmọ re ọ sai you Jihova, ọziọ oware he. O rrọ oware ẹdẹvo ho. Rekọ whọ tẹ sai ru ei, whọ rẹ re erere riẹ.

Ẹme nọ Ebaibol ọ ta kpahe iẹe: “Oware ofa nọ o rẹ kẹ omẹ oghọghọ vi onana o rrọ họ: re me yo nọ emọ mẹ a gbẹ be nya evaọ uzẹme na.”—3 Jọn 4.b

Rẹroso Jihova. Te who bi roro epanọ who ti ro yẹ emọ, te who yẹ emọ no, eme nọ Jihova ọ ta e sai fiobọhọ kẹ owhẹ vi eme nọ ahwo ẹwho ra a be ta.

Iwoho na: 1. Ọsẹgboni nọ a rrọ obọ ewuhrẹ, yọ ọmọ rai ọ keria gba ae. Ọmọ na ọ kpare obọ. 2. Ọsẹgboni jọ avọ emọ rai a kpohọ usi uwoma. Ọsẹ na avọ ọrọ ọmọtẹ nọ o te ikpe ikpegbọ no a rrọ usu. Yọ oni na avọ erọ emaha ivẹ nọ i kiọkọ a rrọ usu. — Re a sai fiobọhọ kẹ emọ re a gọ Jihova, o rrọ oware ẹdẹvo ho, yọ whọ rẹ daoma fihọ iẹe

Rẹroso Jihova inọ ọ te rẹrote owhẹ ẹdẹfa nọ whọ tẹ who no, o tẹ make rọnọ who yẹ bu hu. Otẹrọnọ oware nọ o rẹ lẹliẹ ahwo yẹ emọ evaọ oria nọ whọ rrọ họ, re emọ na a sae rẹrote ae ẹdẹfa, daoma re who gbe wo iroro itieye na ha. Who brudu hu inọ, ‘Ẹdẹfa mẹ tẹ who no, ono ọ te rẹrote omẹ?’ Jihova ọ ya eyaa nọ ọ te rẹrote owhẹ, yọ o re ru eyaa riẹ kpobi gba.—Jos. 23:14.

Eme nọ Ebaibol ọ ta kpahe iẹe: “Rehọ udu ra kpobi fievahọ Jihova, whọ rẹroso otoriẹ obọra ha. Kareghẹhọ iẹe evaọ idhere ra kpobi, o ve ti ru idhere ra liọ.”—Itẹ 3:5, 6.

“Mẹ jọ ọmaha oke jọ rekọ obọnana mẹ kpako no, rekọ mẹ re ruẹ ohwo okiẹrẹe ọvuọvo nọ a kiukeku hu, hayo ruẹ emọ riẹ nọ e be gwọlọ emu bẹ hẹ.”—Ol. 37:25.

“Nọ o rrọ ere na, wha gbẹ hae kake gwọlọ Uvie na gbe ẹrẹreokie riẹ ẹsikpobi, a ve ti fi eware efa nana kpobi ba kẹ owhai.”—Mat. 6:33.

Emọ yọ obọdẹ okẹ nọ Jihova ọ kẹ esẹgbini. Eva e rẹ were Jihova gaga nọ ọ tẹ ruẹ nọ esẹgbini nọ e be gọe a be rẹrote emọ rai. A rẹ kuọ emọ na, a re ru eware nọ eva e rẹ rọ were ae, a ve je wuhrẹ ae re a gọ Ọghẹnẹ. Ezae-avọ-eyae a rẹ jiroro unu emọ nọ a ti yẹ. A re lele oware nọ Ebaibol ọ ta orọnikọ eme nọ ahwo a ta hayo eware nọ ahwo a bi ru evaọ ẹwho rai hi. Esẹgbini nọ e be gọ Jihova a te bi ru eware nana, u re dhesẹ nọ a rri emọ rai inọ yọ obọdẹ okẹ nọ Jihova ọ kẹ rai, hayo “ukuoriọ nọ u no obọ Jihova ze.”

Eva E Were Rai inọ A Jiroro Thọ Họ

Kọ ọzae-avọ-aye a tẹ ta nọ a re yẹ bu hu, kọ uye o rẹ bẹ ae ẹdẹfa? Ezae-avọ-eyae jọ nọ e be rria erẹwho nọ akpọ ọ be jọ bẹ ahwo, a re roro kpahe onọ yena. Rri ẹme nọ esẹ jọ nọ e rẹroso Jihova nọ e be rria erẹwho itieye na a ta.

Kọ ahwo a jẹ vuẹ owhai nọ wha yẹ emọ buobu?

“Ee, inievo jọ evaọ ukoko na dede a jẹ vuẹ omai nọ ma yẹ bu. Ọzae jọ avọ aye riẹ a ta kẹ omai nọ, ‘Fikieme o rọ rọnọ ọmọ ọvo wha yẹ? Nọ ohwo o te wo ọmọ ọvo evaọ obọ Africa obonẹ, o wọhọ ẹsenọ o wo ọmọ họ. Nọ o jẹ rọnọ emọ ivẹ, o wọhọ ẹsenọ o wo ọmọ ọvo.’ Nọ ma yẹ ọmọ avọ ivẹ no, a gbẹ jẹ nọ omai ghele inọ, ‘Kọ wha bi yẹ tu ei?’”—Jeremias

Kọ akpọ ọ be bẹ owhai hayo wha be sae gọ Ọghẹnẹ ziezi hi fikinọ wha yẹ emọ bu hu?

“Vievie. Fikinọ ma yẹ bu hu, ugho nọ ma wo u te omai rẹrote omamai gbe emọ mai ziezi. U te je ru nọ ma ro wo uvẹ ziezi nọ ma ro kru egagọ Jihova ga, je wuhrẹ emọ na ziezi, yọ oware nọ o mai wuzou oye. Mai emọ nọ ọsẹgboni mẹ a yẹ, ma jọ buobu. Fikiere uye o bẹ ọsẹgboni mẹ gaga. Re ma ruẹ emu re hayo kpohọ isukulu, ọziọ oware he.”—Jeremias

Kọ o kẹ emọ ra uye inọ wha yẹ emọ efa tu ai hi?

“Kaka. Eva e were emọ mai inọ ma ru ere keme uye o bẹ rai epanọ o jẹ bẹ emọ amọfa nọ a yẹ buobu hu.”—Filipe

“Eva e jẹ were emọ mai okenọ a jẹ rro ze keme a ruẹ nọ ma you rai yọ ma be rẹrote ae. Inievo nọ i kruga evaọ ukoko na, ma jẹ hai no abotọ rai hi. Yọ a jẹ hae ta eme nọ e rẹ lẹliẹ omai gbẹ daoma ru eware efa evaọ ukoko na. Onana u fiobọhọ kẹ emọ mai nọ a ro dikihẹ gidigba evaọ ukoko na.”—Carlos

Kọ irere jọ i te owhai no fikinọ wha yẹ bu hu?

“Fikinọ ma yẹ bu hu, ma jẹ sae rẹrote emọ mai ziezi. Oware wọhọ ikpe esa nọ e vrẹ, a si omẹ no iruo nọ a jẹ jọ hwa omẹ okposa. Rekọ fikinọ ma yẹ emọ bu hu, ma jẹ sae rẹrote emọ na ghele.”—Jeremias

“Ma be sae rẹrote emọ mai ziezi yọ ma be sai wuhrẹ ae re a gọ Jihova keme ma yẹ rai bu hu. Ma tubẹ nyae ta usi uwoma evaọ eria efa nọ a mae jọ gwọlọ ahwo nọ a rẹ ta usi uwoma. Ma jẹ sae kẹ ọmọ mai kpobi oware nọ u fo nọ ma rẹ kẹe. Emọ mai kpobi a be gọ Jihova yọ a kruga ziezi evaọ ukoko na.”—Lenadi

Kọ ẹme jọ ọ riẹ nọ whọ gwọlọ ta kẹ esẹgbini?

“Olezi 34:10, abọ avọ ivẹ riẹ o ta nọ: ‘Oware uwoma ovo o rẹ kare enọ e be gwọlọ Jihova ha.’ Ẹme yena uzẹme keme Jihova ọ kẹ omẹ avọ uviuwou mẹ eware kpobi nọ e roja.”—Rafael

a Ọzae-avọ-aye ọvo a rẹ jiroro unu emọ nọ a gwọlọ yẹ, oke nọ a gwọlọ ro yẹ, gbe oghẹrẹ nọ a te rọ whaha emọ-iyẹ ababọ eva nọ a rẹ kpare. Iroro kpobi nọ ọzae-avọ-aye a jẹ evaọ ẹme nana, jọ ohwo ọvo o gu ae ẹdhọ họ. (Rom 14:4, 10-13) Nọ ọzae-avọ-aye nọ a rrọ Ileleikristi a tẹ be jiroro itieye na, a rẹ kareghẹhọ ẹme nọ ọ rrọ obe 1 Ahwo Kọrint 7:3-5.

b Emọ nọ Jọn ukọ na ọ fodẹ evaọ oria Ebaibol nana orọnikọ yọ emọ nọ o yẹ hẹ. Ileleikristi jọ ọ jẹ ta ẹme kpahe na. Ghele na, esẹgbini a sae ta oghẹrẹ ẹme otiọye na kpahe emọ rai nọ e be gọ Jihova.