Enọ Ahwo nọ A Se Ebe

Oke vẹ ahwo a ti ro bo ubo “udhedhẹ gbe omofọwẹ” na?

Wọhọ epanọ ma ta evaọ “Enọ Ahwo nọ A Se Ebe” evaọ Uwou-Eroro Naa kẹle na, Jihova o ti fi “iroro” riẹ họ udu “izei ikpe” na, koyehọ egọmeti kpobi nọ i bi su akpọ na. Yọ iroro riẹ nọ o ti fihọ ae udu na họ, udu hayo ogaga nọ a bi ro su nọ a te kẹ “arao ojihẹ ọwawae” na koyehọ United Nations (Okugbe Erẹwho). A re je sei “ẹmema arao ojihẹ” na. (Evia. 13:14, 15; 17:3, 16, 17) A te ru ere no, “izei ikpe” na avọ arao ojihẹ nọ a kẹ ogaga na a vẹ te raha egagọ erue nọ e rrọ akpọ na kpobi no. Kọ onọ na họ, kọ ahwo erẹwho na a ti bo ubo “udhedhẹ gbe omofọwẹ”b na no taure Jihova o te ti fi “iroro” riẹ họ udu isu na, binikọ o ti fi iroro riẹ họ udu rai no re a te ti bo ubo udhedhẹ na?—1 Tẹs. 5:3.

Uyo na họ, ma riẹ uzedhe oke nọ a ti ro bo ubo “udhedhẹ gbe omofọwẹ” na ha. Ma tẹ riẹ eware na kpobi no, ma te gbẹ daoma re ma jaja aro vi je muẹrohotọ họ. Ẹtẹta Jesu ọ jẹ ta kẹ ilele riẹ nọ: “Wha ruabọhọ erou.” (Mat. 24:42; 25:13; 26:41) Obọnana ma te romatotọ rri eruẹaruẹ nọ Ọghẹnẹ ọ rọ ẹzi riẹ kẹ Pọl kere kpahe na ziezi.

Pọl o kere nọ: “Oke kpobi nọ a te ta nọ, ‘Udhedhẹ gbe omofọwẹ!’ ọraha idudhe ọ vẹ te nwani te ai.” (1 Tẹs. 5:2, 3) Oghẹrẹ nọ ma be hae fa otọ ẹme Pọl na họ: A ti bo ubo “udhedhẹ gbe omofọwẹ” omoke jọ taure uye ulogbo na u te ti muhọ. Yọ a te mu Babilọn Ologbo na họ ẹraha no yọ uye ulogbo na u muhọ no. Babilọn Ologbo na họ egagọ erue akpọ na soso. Ma ta nọ ubo udhedhẹ gbe omofọwẹ na họ oware urere nọ u ti dhesẹ nọ uye ulogbo na u bi ti muhọ.

Rekọ nọ ma te wariẹ romatotọ rri ẹme na ziezi, ma tẹ ruẹ nọ o wọhọ nọ u wo oghẹrẹ ofa nọ oware nọ Pọl ọ ta na o sae rọ via. Ẹsejọhọ a ti bo ubo “udhedhẹ gbe omofọwẹ” na nọ a tẹ raha egagọ erue no. Fikieme ma rọ ta ere? Joma ta ẹme kpahe enọ jọ nọ u fo nọ ma re roro kpahe.

Nọ a te bi fi ẹmo, eme egagọ erue a be hai ru? Ebaibol ọ ta kpahe egagọ erue nọ: “Eva riẹ a jọ ruẹ azẹ . . . ahwo kpobi nọ a kpe evaọ otọakpọ na.” (Evia. 17:1, 5; 18:24) Emo buobu nọ a fi no evaọ akpọ na, ogberẹ ologbo na koyehọ egagọ erue a wọ rai họ uzou. Yọ ẹsibuobu a re ru eware nọ e rẹ lẹliẹ ahwo ru ozighi. Onana u dhesẹ nọ ẹmo gbe ozighi ọvo a rrọ kẹ orọnikọ udhedhẹ gbe omofọwẹ hẹ. Onana o tẹ wha onọ jọ ze. Kọ oke nọ a tẹ raha Babilọn Ologbo na no erẹwho na a ti ro bo ubo “udhedhẹ gbe omofọwẹ” na? O sae jọ ere. Ma nwane riẹ hẹ.

Nọ a te bo ubo “udhedhẹ gbe omofọwẹ” na no, eme ọ te via? Pọl ọ ta nọ: “Ọraha idudhe ọ vẹ te nwani te ai.” (1 Tẹs. 5:3) Ẹme Pọl na o dhesẹ nọ, nọ a te bo ubo na no, o te raha oke he re a tẹ te raha ahwo nọ a bo ubo na. Ọraha rai ọ te nwane nyaze idudhe, yọ a te sae vabọ họ. Otẹrọnọ oke nọ isu egọmeti a tẹ raha egagọ erue no a ti ro bo ubo “udhedhẹ gbe omofọwẹ” na, koyehọ a tẹ nwani bo ubo na no, a vẹ te raha ae no. Yọ ẹsiẹvo idudhe o te rọ via.

Ẹvẹ idibo Jihova a ti rri eware nọ Ebaibol ọ ta nọ e te via na? Pọl ọ ta nọ: “Whai inievo, wha rrọ ebi hi, nọ ẹdẹ na ọ rẹ rọ ruọ owhai ọza wọhọ epanọ elo irioke ọ rẹ ruọ iji ọza na.” (1 Tẹs. 5:4) Otẹrọnọ a raha egagọ erue no taure a te ti bo ubo “udhedhẹ gbe omofọwẹ” na, idibo Jihova a te riẹ nọ oke nọ a te rọ raha akpọ na o te no. Rekọ ọraha na ọ te ruọ ahwo buobu ọza wọhọ oji, keme a riẹ nọ oware utioye o be te via ha.

Kọ eme ma riẹ nọ o te via? Ma riẹ nọ kẹle na “izei ikpe” na avọ arao ojihẹ nọ a kẹ ogaga na a te raha egagọ erue no. Ere uye ulogbo na u ti ro muhọ. Ma tẹ jẹ riẹ nọ oke o be tha nọ a ti bo ubo “udhedhẹ gbe omofọwẹ.” Kọ oke vẹ a ti ro boi? A sai boi omoke jọ taure Jihova o te ti fi iroro na họ erẹwho na eva inọ jọ a rehọ ogaga rai kẹ arao ojihẹ na, hayo nọ ọ tẹ nwani fi iroro na họ udu rai no. O sae jẹ jọ nọ a ti bo ubo udhedhẹ gbe omofọwẹ na nọ a tẹ raha Babilọn Ologbo na no, koyehọ nọ a tẹ raha egagọ erue no. Ma nwane riẹ oke nọ a ti ro boi dẹẹ hẹ. Joma gbe rri oghẹrẹ nọ eware na e te jọ. Oke nọ ma rẹ mae rọ riẹ otọ eruẹaruẹ Ebaibol ziezi họ nọ eruẹaruẹ na i te muhọ erugba no hayo nọ i te rugba kpobi no.—Je rri Jọn 12:16.

Oware nọ o rẹ jọ omai oja obọnana họ epanọ ma re ro ru eva were Ọghẹnẹ, orọnikọ oke nọ a ti ro bo ubo “udhedhẹ gbe omofọwẹ” na ha. Fikiere “joma jaja aro vi jẹ sẹro iroro mai” re ma sae jọ ahwo nọ a rẹ zọ oke kpobi nọ Ọghẹnẹ ọ te raha akpọ na.—1 Tẹs. 5:6.