“Ọmọ Omosasọ”

NỌ SỌL ohwo Tasọs na o kurẹriẹ te oware wọhọ ikpe esa no, o te zihe kpobọ Jerusalẹm re ọ nyae ruẹ Ileleikristi nọ e jọ obei. (Gal. 1:15-19) Rọkẹ ọyomariẹ, Ileleikristi yena yọ inievo riẹ enẹna. Rekọ Ileleikristi na a rri rie ere he. A gbẹ jẹ rọ ubiẹro ohwo nọ o je kpokpo Ileleikristi ro rri rie. O wọhọ nọ ibuobu rai a riẹ hẹ inọ o gine nwene no. Rekọ u wo ọzae jọ nọ ọ gudu, nọ ọ re ohrọ Sọl. Ọ tẹ nyai fiobọhọ kẹe. A je se ọzae nana Banabas uwhremu na.

Ebaibol na ọ ta nọ Banabas o wo odẹ ọfa. Odẹ yena họ Josẹf. Rekọ inievo ukoko na a mu Banabas kẹe. Onọ otofa riẹ o rrọ “Ọmọ Omosasọ.” Fikinọ ọ jọ wowou gaga a ro sei odẹ yena. Yọ ọ jẹ hae gwọlọ idhere kpobi nọ ọ rẹ rọ sasa amọfa oma je fiobọhọ kẹ ae. Wọhọ oriruo, omoke jọ nọ Pẹntikọst ọrọ ukpe 33 C.E. ọ vrẹ no, Banabas ọ zẹ otọ riẹ jọ. Ọ tẹ rọ ugho na se ikọ na re a ro fiobọhọ kẹ inievo nọ eware e jọ gaga kẹ. Yọ okenọ Sọl ọ ziọ Jerusalẹm evaọ oware wọhọ ukpe 36 C.E., Banabas ọ gbaudu nyabru Sọl. O te dhesẹ uwowou kẹe. Ebaibol na ọ ta nọ: “Banabas o te fiobọhọ kẹe, o te su ei bru ikọ na.”

No umuo oke yena vrẹ, Banabas avọ Sọl a te zihe ruọ emamọ egbẹnyusu. Sọl ọ rọ ọwhọ ta usi uwoma na evaọ Jerusalẹm, te epanọ ahwo Ju jọ nọ a wọ egagọ rai họ uzou a jẹ rọ gwọlọ kpei no. Inievo na a tẹ gwọlọ oghẹrẹ jọ nọ a ro vi Sọl zihe kpobọ Tasọs, ẹwho nọ a jọ yẹi. Kọ ẹvẹ kpahe Banabas? Nọ oware wọhọ ikpe izii e vrẹ no, a te vi ei kpobọ Antiọk ọrọ Siria re ọ nyae tuduhọ ahwo nọ a jọ obei kurẹriẹ obọ awọ. Ebaibol na ọ ta nọ “Banabas ọ jọ emamọ ohwo yọ ọ vọ avọ ẹzi ọfuafo gbe ẹrọwọ.” Fikiere, ahwo buobu nọ a yo usi uwoma riẹ evaọ Antiọk a kurẹriẹ. O tẹ gwọlọ nọ ohwo jọ ọ rẹ nyai fiobọhọ kẹ Banabas. Ere o ro kpobọ Tasọs nyae gwọlọ Sọl ogbẹnyusu riẹ. Nọ umuo oke yena vrẹ, aimava na a kuomagbe ta usi uwoma na ziezi. A te je fiobọhọ rọ eware nọ inievo ukoko na a zọhọ ze se Ileleikristi nọ ọbẹwẹ ọ jọ oma.

Nọ u te oke jọ no, a te je se Sọl Pọl. Inievo ukoko na a te vi Pọl avọ Banabas nyae ta usi uwoma na evaọ eria efa. Unuẹse buobu, a rẹriẹ ovao dhe edawọ nọ o jọ gwọlọ nọ a rẹ gudu. Wọhọ oriruo, nọ a jọ Aikoniọm, ahwo Ju jọ nọ a jẹ wọso ae a jẹ gwọlọ nọ a rẹ rọ itho fi ai kpe no. Fikiere, a te no etẹe kpobọ Listra. Yọ oware areghẹ a ru na. Nọ a jọ Listra, ahwo na a te je roro nọ eghẹnẹ a rrọ fiki oware igbunu jọ nọ a ru. A tẹ jẹ gwọlọ nọ a rẹ gọ ae! Rekọ ahwo jọ nọ a jẹ wọso ae nọ a no Antiọk gbe Aikoniọm ze, a tẹ raha amọ Pọl kẹ ogbotu na. Ogbotu na a tẹ be rọ itho fi Pọl. A te si rie ototọ ruọ otafe okpẹwho na. A tẹ nyasiọ ẹe ba etẹe bi roro nọ o whu no. Ileleikristi nọ e jọ Listra a tẹ dhẹ ze, a tẹ wariẹ Pọl họ. A tẹ ruẹ nọ o whu hu. Pọl ọ tẹ kpama, ọ tẹ nya lele ae zihe ruọ okpẹwho na. Ma riẹ nọ eva e te were Banabas gaga nọ ọ ruẹ nọ Pọl ọ gbẹ rrọ uzuazọ! Nọ omoke jọ o vrẹ no, aimava a te gbe no okpẹwho na. Rekọ u kri hi, a tẹ wariẹ zihe ziọ Listra re a te sasa Ileleikristi nọ e jọ obei oma. Oware nana nọ a ru na u dhesẹ nọ a ginẹ gudu!

Banabas avọ Pọl a ru eware buobu kugbe evaọ iruo Jihova, makọ evaọ oke nọ a rẹriẹ ovao dhe uwhu. Rekọ oware jọ o tẹ via nọ o lẹliẹ e rai whọ. Eme ọ via? Oke jọ nọ a jẹ gwọlọ kpohọ erẹ usi uwoma ota, Banabas ọ tẹ gwọlọ nọ Mak nọ a gbẹ rrọ emọ-inievo o re lele ai. Rekọ Pọl ọ rọwo ho, keme u wo oke jọ nọ Mak o ro lele ai rekọ ọ tẹ nyasiọ ae ba. Onana o tẹ lẹliẹ ai je si ikẹ. Fikiere, “ẹwhọ ọgaga o te du lahwe” evaọ udevie rai. Ere aimava na a rọ hẹriẹ oma kpohọ ọvuọ oboriẹ.

Whaọ ẹwhọ Banabas avọ Pọl a rọ hẹriẹ na. Kọ Banabas o ti fi Pọl họ eva? O gwọlọ nọ ọ rẹ gudu rẹ ọ sai ru oware nọ u kiehọ. Nọ Ileleikristi ivẹ i te wo ẹme nọ o wha ofu ze, a gbẹ yọroma ha, ọjọ ọ sai fi ọnọ o kiọkọ họ eva. Ọ sae ta ikpehre eme kpahe iẹe kẹ Ileleikristi efa. Hayo tube siomano inievo ukoko na dede. O gwọlọ nọ ma rẹ gudu re ma gbe ru ikpehre eware itieye na ha. Ukpoye, ma ve ru udhedhẹ kugbe oniọvo mai. Ere ma re ro ru Jihova eva were.

O rrọ vevẹ nọ, aimava na a kuvẹ hẹ re ẹwhọ nọ a whọ na o lẹliẹ ai siọ iruo Jihova ba. Banabas ọ rehọ Mak kugbe oma, a te kpobọ Saiprọs. A tẹ jọ obei fiobọhọ kẹ ahwo re a zihe ruọ ilele. Pọl omariẹ ọ rehọ Saelas kugbe oma kpohọ erẹ usi uwoma ota nọ ọ gwọlọ nya na. Yọ Jihova o fiobọhọ kẹ ai ru eware buobu evaọ obei.

Kọ ezae ivẹ nana a fi ohwohwo họ eva? Ijo! Ẹvẹ ma rọ riẹ? Okenọ Pọl o je kere ileta se ikoko na, ọ ta emamọ ẹme kpahe Banabas. Wọhọ oriruo, evaọ ileta nọ o kere se ahwo Kọrint, ọ ta nọ Banabas o je ru iruo gaga re ọ sai wo ugho nọ ọ rẹ rọ rẹrote oma riẹ evaọ iruo usi uwoma ota na wọhọ ọyomariẹ. (1 Kọr. 9:6) Ọ jọ ileta ọfa fodẹ Mak, “ọnọ avọ Banabas a rrọ emọ-inievo,” yọ ọ ta emamọ ẹme kpahe iẹe. Onana u dhesẹ nọ o fi Mak họ eva gbe he. (Kọl. 4:10, 11) O make jọnọ Pọl avọ Banabas a gbe kuomagbe jẹ ta usi uwoma na ha, a gbẹ jọ egbẹnyusu ghele. Yọ u mu omai ẹro nọ Banabas o gbe je ru odẹ riẹ na gba. Ọ jẹ rehọ usi uwoma na sasa amọfa oma te epanọ ọ sai ru te kpobi. Nọ orọnọ Mak o je lele iei ru iruo na, ọ te siọ ẹe eware buobu ba ewuhrẹ hẹ. Ma ti wuhrẹ kpahe epanọ Mak ọ rọ gudu evaọ uzoẹme nọ o lele ọnana.

Se iku Ebaibol na:

• Iruẹru Ikọ 4:34-37; 9:23-31; 11:19-30; 12:25–13:5, 42-52; 14:1-26; 15:35-41

Onọ nọ a rẹ ta ẹme kpahe:

Eme gbe eme Banabas o ru ro dhesẹ nọ ọ gudu?

Gbẹ Kiẹ Kodo

1. 1. Ohwo Livae Banabas ọ jọ. Yọ wọhọ epanọ Jihova o ta, a ghale otọ kẹ ahwo Livae nọ a rọ reuku hu. Kọ ẹvẹ Banabas o ro wo otọ nọ ọ zẹ? (Ik. 18:20; Iruẹru 4:36, 37; w98 4/15 20 ¶4, ẹme-obotọ)

   Uyo ra

2. 2. Fikieme a ro se Banabas ukọ? (Iruẹru 14:14; it “Banabas” ¶3)

   Uyo ra

3. 3. Banabas avọ Pọl a jọ Saiprọs ta usi uwoma kẹ ọzae jọ nọ a re se Sẹjiọs Pọlọs. Yọ okenọ Luk o je kere obe Iruẹru Ikọ, o se Sẹjiọs Pọlọs “ọba ubrotọ na.” Fikieme ma rọ ta nọ ẹme nọ o kere na ọ gba? (Iruẹru 13:7, 12; it “Saiprọs” ¶7) Uwoho 1

   Uyo ra

   

   Bank of Cyprus Cultural Foundation Collection

4. 4. Ahwo Listra a jẹ gwọlọ nọ a re dhe idhe kẹ Banabas avọ Pọl. Kọ fikieme u gbe ro gbe omai unu hu inọ a jẹ gwọlọ ru ere? (bt 97, ẹkpẹti)

   Uyo ra

Roro Kpahe Eware nọ Who Wuhrẹ Noi Ze

• Eme ma rẹ sai ru rọ rehọ aro kele epanọ Banabas o re ru ọghọ?

  Uyo ra

• O wọhọ nọ Banabas ọ jẹ kobaro evaọ erẹ usi uwoma ota ọsosuọ nọ avọ Pọl a nya. Uwhremu na, kọ Pọl a mae riẹ vi ọyomariẹ. Ghele na, Banabas ọ re Pọl ihri hi. Kọ ẹvẹ ma sae rọ rehọ aro kele oriruo riẹ? Uwoho avọ 2

  Uyo ra

  

• Oghẹrẹ sa-sa vẹ whọ sae rọ rehọ aro kele Banabas gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• A salọ Banabas re o lele Kristi su evaọ obọ odhiwu. Kọ emamọ iruemu vẹ o wo nọ o sai ru owhẹ ta nọ u woma nọ a salọ e riẹ?

  Uyo ra

Gbe Wuhrẹ Eware Efa

Usu nọ Banabas avọ Pọl a jọ u wuhrẹ omai nọ ahwo nọ a maki wo ọvuọ oghẹrẹ uruemu riẹ a sai ru iruo kugbe. Ẹvẹ o sae rọ jọ ere?

“Kọ Who ti Ku Ẹwhọ Họ je Lele Amọfa Rria Dhedhẹ?” (w17.06 16-20)

Jọ ividio nana ruẹ epanọ inievo a sai ro ku ẹwhọ họ wọhọ epanọ Banabas avọ Pọl a ru.

“O Gwọlọ nọ Ma rẹ Ruẹrẹhọ” (3:23)