52 MAK
“O Wo Obufihọ kẹ Omẹ”
JỌN MAK yọ olele Jesu nọ o dhesẹ nọ ọ gudu makọ evaọ okenọ ọ gbẹ jọ ọmoha. Fikieme ma rọ ta ere? Evaọ aso nọ a ro mu Jesu Kristi na, otu-ugbarugba a gba Jesu abọ, a tẹ be rehọ iẹe vrẹ. Oke yena yọ ikọ na kpobi e dhesẹ siọ ẹe ba no. Rekọ Ebaibol na ọ ta kpahe “ọmoha jọ” nọ ọ gudu ziezi, nọ ọ jẹ lẹlẹ nya lele Jesu. Nọ otu-ugbarugba na a muẹrohọ iẹe, a tẹ jẹ gwọlọ kru ei. Rekọ ewu ọlọlọhọ riẹ ọvo a sai kru. Ọmoha na ọ vabọ. Ọ tẹ “dhẹ vrẹ ẹbẹba,” hayo avọ oware nọ o kuhọ otọ eku ọvo. Whaọ obe Usi Uwoma Mak ọvo iku nana e rrọ evaọ Ebaibol na. Fikiere ahwo buobu a rehọ e riẹ nọ ọmoha nọ a se odẹ riẹ hẹ na họ Mak omariẹ.
Mak ọ jẹ rria Jerusalẹm. Yọ o sae jọ nọ o je lele oni riẹ rria. O wọhọ nọ oni riẹ o wo ugho. Nọ Jesu o whu no, uwou oni Mak ukoko Ileleikristi na a je kokohọ. Yọ etẹe Pita ukọ na o kpohọ evaọ aso ẹdẹ jọ nọ ukọ-odhiwu o si ei no uwou-odi no. O rrọ vevẹ nọ Mak ọ riẹ ikọ Jesu gbe ilele riẹ buobu. Yọ o wọhọ nọ o wuhrẹ epanọ a rẹ gudu mi ai.
Evaọ oware wọhọ 46 C.E., Pọl ukọ na avọ Banabas nọ avọ Mak a gbẹ rrọ emọ-inievo a tẹ nyaziọ Jerusalẹm. Nọ aimava a ruẹ Mak, a tẹ gwọlọ nọ a re wuhrẹ iẹe re ọ sai fiobọhọ kẹ inievo ukoko na evaọ eria efa. Fikiere a tẹ wha Mak lele oma evaọ okenọ a je zihe kpobọ Antiọk. Oware wọhọ ukpe nọ u lele i rie, Pọl avọ Banabas a tẹ ta kẹ Jọn Mak nọ o kuomagbe ai evaọ erẹ usi uwoma ota rai. Mak ọ rọwo nọ o re lele imishọnare ivẹ nana nọ i wo ọwhọ na re ọ “gbodibo kẹ ae,” hayo fiobọhọ kẹ ae avọ omaurokpotọ. Onana u dhesẹ nọ Mak ọ ginẹ gudu.
Re ohwo o kpohọ erẹ evaọ oke yena, ọmọziọ iruo ho. Yọ ozọ o jẹ hae jariẹ gaga. Pọl o kere uwhremu na kpahe erẹ sa-sa nọ o kpohọ inọ ọ “jọ ọza evaọ ithẹ, ọza evaọ obọ igbulegbu, . . . ọza evaọ okpẹwho, ọza evaọ udhude, ọza evaọ abade.” (2 Kọr. 11:26) Nọ orọnọ Mak o je fiobọhọ kẹ Pọl avọ Banabas nọ a rri ghaghae evaọ ukoko na, o gwọlọ nọ o re ru oware kpobi nọ a ta kẹe. Kọ iruo na e ga vi epanọ o roro? Ebaibol na ọ ta ha. Rekọ Ebaibol o dhesẹ nọ okenọ a te Pamfilia no, Mak ọ nyasiọ Pọl avọ Banabas ba. O te zihe kpobọ uwou riẹ evaọ obọ Jerusalẹm. O wọhọ nọ ẹnya nọ ọ nyase ae ba na o kẹ Pọl avọ Banabas uye gaga, maero kọ Pọl.
Nọ a no erẹ usi uwoma ota yena ze no, Pọl avọ Banabas a tẹ jẹ ma omaa epanọ a re ro kpohọ ere usi uwoma ota ọfa. Banabas ọ gwọlọ nọ ọ rẹ kẹ Mak uvẹ ofa re o lele ai. Rekọ o were Pọl ere he. O wọhọ nọ Pọl o rri rie nọ Mak yọ ohwo nọ a rẹ sai fievahọ họ. Pọl avọ Banabas a tẹ jẹ rọ ẹme na si ikẹ gaga. U te ru nọ “ẹwhọ ọgaga o [ro] du lahwe” evaọ udevie aimava na. Fikiere Banabas ọ tẹ rehọ Mak kugbe oma kpobọ Saiprọs. A tẹ gbẹ jẹ ta usi uwoma na evaọ obei. Pọl ọ tẹ gwọlọ omọfa, a te gbe kpohọ obọfa nyae ta usi uwoma na.
Oware nọ o via na o te da Mak gaga. Keme o ru nọ Pọl nọ o wo adhẹẹ kẹ gaga o gbe fievahọ iẹe he. O te je ru nọ Pọl avọ Banabas nọ a jọ emamọ egbẹnyusu a rọ hẹriẹ. Kọ eva e jẹ dha Mak? Kọ o fi Pọl họ eva? Hayo kọ o je rri omariẹ nọ o gbe fioka ha? Kakaka!
A mi Mak uvẹ iruo ilogbo jọ nọ o wo, rekọ ọ kuvẹ hẹ re oma o lọhọ iẹe siọ Jihova ba ẹgọ
Mak ọ gbẹ jẹ dawo ẹgba riẹ kpobi re o fiobọhọ kẹ ibe Ileleikristi riẹ. Wọhọ oriruo, evaọ oware wọhọ ukpe 60 C.E. rite 61 C.E, a mu Pọl imu inọ o du no uwou riẹ ze he evaọ Rom. Yọ ọ jọ obei kere ileta jọ nọ ọ jọ fodẹ Mak nọ ọ jọ kugbei evaọ oke yena. Pọl o kere nọ Mak ọ kẹ ọyomariẹ “omosasọ ulogbo.” Yọ evaọ oware wọhọ 62 C.E. rite 64 C.E., Pita ukọ na ọ wariẹ fodẹ Mak evaọ ileta riẹ. O wọhọ nọ Mak o kpohọ ugbobọ Babilọn bru Pita ukọ na nọ o muhọ ẹkpako no evaọ oke yena. Pita ọ jọ ileta na se Mak “ọmọzae mẹ.” U mu omai ẹro nọ Mak ọ te sasa Pita oma gaga! Yọ ma riẹ nọ Pita o gbiku eware buobu nọ ọ ruẹ evaọ ikpe nọ ọ rọ jọ kugbe Jesu Kristi na kẹ Mak. Okenọ Mak o ro kere obe Usi Uwoma riẹ na, o kere kpahe eware nọ o sae jọ nọ Pita o gbiku rai kẹe. Yọ ẹsejọhọ obọ Rom o jo kere iei.
Pọl ukọ na họ ohwo urere nọ ọ fodẹ Mak evaọ Ebaibol na. Evaọ oke yena, a wariẹ fi ei họ uwou-odi. Pọl o te kere se Timoti inọ ọ nyabru ei ze, yọ ọ rẹ wha Mak lele oma. Fikieme ọ rọ ta ere? Pọl omariẹ ọ ta nọ: “O wo obufihọ kẹ omẹ evaọ odibọgba na.” U mu omai ẹro nọ oma o jẹ kpakpa ezae ivẹ yena re a nyae sasa Pọl oma evaọ oke yena nọ a bi ti ro kpei no kẹle na. Mak ọ ginẹ gudu, keme o gbe je fiobọhọ kẹ ibe Ileleikristi riẹ ghelọ eware nọ e via nọ e kẹ riẹ uye. Yọ Jihova Ọghẹnẹ o you rie gaga.
Se iku Ebaibol na:
Onọ nọ a rẹ ta ẹme kpahe:
Eme gbe eme Mak o ru ro dhesẹ nọ ọ gudu?
Gbẹ Kiẹ Kodo
1. Fikieme ma sae rọ ta nọ uviuwou nọ u fe Mak o no ze? (w10 3/15 6 ¶6–7 ¶1)
2. Eme o sae jọ nọ Mak o je ru rọ “gbodibo” kẹ Banabas avọ Pọl? (Iruẹru 13:5; w10 3/15 7 ¶5)
3. Eria sa-sa vẹ Mak o ro kpohọ erẹ? (w10 3/15 8 ¶6-8) Uwoho 1
Uwoho 1: Eria jọ nọ o sae jọ nọ Mak ọ nya kpohọ
4. O sae jọ nọ Pita họ ohwo nọ o gbiku eware jọ nọ Mak o kere fihọ obe Usi Uwoma riẹ na kẹe. Kẹ oriruo jọ nọ u dhesẹ ere. (w08 4/1 22 ¶1)
Roro Kpahe Eware nọ Who Wuhrẹ Noi Ze
A jọ oria ọvo dhesẹ Mak nọ ọ jọ ukọ hayo ọruẹaro ho. Rekọ ọ romakpotọ gbodibo kẹ amọfa. Eme ma sai ru rọ gbodibo kẹ amọfa nẹnẹ?
O make jọ nọ Pọl o rri Mak nọ o te ohwo nọ o re lele iei kpohọ erẹ usi uwoma ota riẹ hẹ, Mak ọ siọ Jihova ba ẹgọ họ. Eme ma sai wuhrẹ mi Mak otẹrọnọ a mi omai iruo jọ nọ ma bi ru evaọ ukoko na? Uwoho avọ 2
Uwoho 2
Oghẹrẹ sa-sa vẹ whọ sae rọ rehọ aro kele Mak evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku na i ro dhesẹ oware nọ Jihova ọ gwọlọ ru via?
A salọ Mak re o lele Kristi su evaọ obọ odhiwu. Kọ emamọ iruemu vẹ o wo nọ o sai ru owhẹ ta nọ u woma nọ a salọ e riẹ?
Gbe Wuhrẹ Eware Efa
Eme ma rẹ ruẹ evaọ obe Usi Uwoma Mak nọ ma rẹ jọ oria ofa Ebaibol na ruẹ hẹ?
Rehọ oriruo Mak wuhrẹ emọ ra oware nọ ma gbẹ rọ kuvẹ re oma o lọhọ omai no ho ghelọ oware kpobi nọ o via kẹ omai kẹhẹ.