“Onọ Ọ rẹ Sai Ru O Ru Na”

MERI ọ riẹ nọ Jesu o you rie avọ inievo riẹ nọ a re se Mata gbe Lazarọs gaga. Keme o ru emamọ eware buobu kẹ ae no. Wọhọ oriruo, Jesu ọ jẹ hae nyaziọ uwou rai evaọ Bẹtani gaga. Yọ oke kpobi nọ ọ tẹ nyaze, o re wuhrẹ ae kpahe Jihova avọ ọyomariẹ. U te no ere no, evaọ okenọ Lazarọs o whu, Jesu ọ kpare riẹ no uwhu ze! Eware nana kpobi e da Meri ẹro fia.

Fikinọ eware nọ Jesu o ru kẹ Meri no e da riẹ ẹro, ọ tẹ gwọlọ nọ o re ru obọdẹ oware jọ kẹ Jesu Olori riẹ na. Fikiere ọ tẹ ta nọ ọ rẹ kẹe emamọ okẹ jọ. Oye họ udẹ nọ u re gbo ore awere. Ebaibol ọ ta nọ udẹ na yọ “uvi nad, nọ o ghare gaga, nọ u te oware wọhọ ubro ilita.” O jọ eva ololo alabasta. Evaọ oke yena, re ohwo ọ sai wo ugho nọ ọ rẹ rọ dẹ udẹ utioye, o gwọlọ nọ o re ru iruo evaọ ẹgbukpe soso. Ebaibol na ọ ta oghẹrẹ nọ Meri o ro wo udẹ na hayo okenọ o ro woi hi. Rekọ o sae jọ nọ oware nọ o mae ghare nọ o wo oye.

Ẹdẹ jọ nọ Jesu ọ jẹ re emu evaọ uwou jọ evaọ Bẹtani, Meri ọ tẹ ruẹ nọ uvẹ u rovie fihọ kẹe no. Nọ ọ nyabru Jesu, o te rovie ololo alabasta riẹ na. Ọ tẹ be rọ ẹmẹrera ku udẹ nọ u re gbo ore awere na fihọ uzou Jesu gbe awọ riẹ. Nọ o ku udẹ na fihọ iẹe no, o te si ohọ nọ o ro ruru uzou riẹ no. Ọ tẹ be rehọ eto riẹ ririe awọ Jesu. Ẹsejọhọ ahwo Ju jọ evaọ oke yena a je rri nọ oware nọ Meri o bi ru na o thọ. Inọ fikieme o re ro kpe eto riẹ fihọ kpakiyọ u re si ọghọ no aye oma? Rekọ Meri ọ daezọ oyena ha, keme oware nọ o mae jariẹ oja oke yena họ epanọ o re ro bru ọghọ họ Jesu oma. Ọ ginẹ romakpotọ, o te bru ọghọ nọ ọ mae rro họ Jesu oma.

Omamọ ore udẹ na u te gbo vọ uwou na soso. Rekọ orọnọ ahwo na kpobi eva e were he. Eva e jẹ dha Judas Iskariọt gaga. Yọ o wọhọ nọ o ru ikọ nọ i kiọkọ ru epọvo na re. Judas Iskariọt ọ nọ inọ: “Fikieme a gbẹ rọ zẹ udẹ nana dinariọs egba esa (300) ha re a rehọ igho na kẹ iyogbe?” Oware na o te siọ Meri uye ba ẹkẹ hẹ! Keme udu riẹ kpobi o ro ru oware nọ o ru kẹ Jesu na. U te no ere no, ezae na yọ ahwo nọ o wo adhẹẹ kẹ. A tẹ jẹ rrọ ikọ Jesu. Ukpenọ a re jiri ei, kọ eva e be dha ae, a tẹ be fo ẹe! Ẹsejọhọ oware nọ a je ru na o lẹliẹ oma vo Meri gaga. Kẹsena Jesu o te mu othọ riẹ họ ẹthọ.

Jesu ọ tẹ ta kẹ ezae na nọ: “Wha vu ei wa.” Ere ikọ na i ro fibo. Ọ tẹ ta nọ: “Oware uwoma o ru kẹ omẹ na.” Jesu ọ ta ẹme yena ro dhesẹ nọ uyoyou Meri o dhesẹ kẹe na. Oware nọ Meri o ru na o were Jesu gaga fiki oware nọ o be te via kẹe kẹle na. Dede nọ Meri ọ riẹ nọ Jesu o ti whu kẹle he, Jesu ọ ta nọ Meri ọ rehọ udẹ na ruẹrẹ ugboma riẹ họ kẹ ukio. Yọ fikinọ Jesu ọ riẹ otọ oware nọ Meri o ru na, ọ tẹ ta nọ: “Onọ ọ rẹ sai ru o ru na.” Ukuhọ riẹ, o te fibae nọ: “Uzẹme mẹ be ta kẹ owhai, oria kpobi nọ a te jọ ta usi uwoma na evaọ akpọ na soso, a te ta kpahe oware nọ aye nana o ru na re rọ kareghẹhọ iẹe.” Jesu ọ ruẹ nọ Meri o you rie, ọ tẹ jẹ gudu. Fikiere, u fo nọ a re jiri Meri kẹ ọghọ nọ o ru na, orọnikọ ẹfo a rẹ fo ẹe he.

Nọ Jesu ọ ta eme yena no, ohwo ọvo ọ gbẹ ta ekpehre ẹme kẹ Meri hi. Kẹsena Judas ọ tẹ nyavrẹ, ọ tẹ nyai ru epanọ o re ro vivie olori riẹ. Rekọ ma riẹ nọ eva e were Meri gaga fiki eme nọ Jesu ọ ta kpahe iẹe na. Yọ o sae jọ nọ o roro kpahe ae gaga re! Nọ emedẹ jọ e vrẹ no, a te mu Jesu, a tẹ rehọ oware nọ o ru hu bruoziẹ kpei, kẹsena a te kpei no. Ukuhọ riẹ, a te ki ei. Ere eme nọ Jesu ọ ta kpahe ukio riẹ na e rọ via. Oke yena Meri ọ rọ riẹ otọ eme na ziezi. Ma riẹ nọ oware nana nọ o via na o te kẹ aye oyoyou nana nọ o wo ohrọ-oriọ na uweri gaga. Rekọ evaọ oke yena, ọ te siọ eme Jesu na ba ẹkareghẹhọ họ, yọ e te sasa iẹe oma gaga!

Nọ Jesu o whu te edẹ esa no, oware igbunu jọ o tẹ via. A kpare Jesu no uwhu ze! U kri hi, ọ tẹ romavia kẹ ilele riẹ nọ i bu vi egba isoi (500). O wọhọ nọ oke yena ọ rọ kẹ ae iruo inọ, a ta usi uwoma na kẹ “ahwo erẹwho na kpobi.” (Mat. 28:19, 20) Yọ ọ ta no vẹre inọ okenọ a te ta “usi uwoma na” a te ta kpahe uruemu omaurokpotọ nọ Meri o dhesẹ na gbe emamọ okẹ nọ ọ kẹ riẹ na. U mu omai ẹro nọ Meri ọ vioja ha inọ ọ gudu nọ ọ rọ daoma ru oware nọ ọ rẹ sai ru kẹ Olori riẹ. Yọ ọ kareghẹhọ ujiro nọ Jesu o jiri rie fiki ẹrọwọ riẹ gbe udu nọ o wo. Ọ ta kpahe iẹe nọ: “Onọ ọ rẹ sai ru o ru na.”

Se iku Ebaibol na:

• Matiu 26:6-13

• Mak 14:3-9

• Luk 10:38-42

• Jọn 11:5, 6, 31-35, 41-45; 12:1-8

Onọ nọ a rẹ ta ẹme kpahe:

Eme gbe eme Meri oniọvo-ọmọtẹ Lazarọs o ru ro dhesẹ nọ ọ gudu?

Gbẹ Kiẹ Kodo

1. 1. Wọhọ epanọ Ebaibol na o dhesẹ, oghẹrẹ ohwo vẹ Meri avọ Mata a jọ? (Luk 10:39, 40; Jọn 11:20; ia 173 ¶5-6; 176 ¶17) Uwoho 1

   Uyo ra

   

2. 2. Ẹvẹ Jesu o ro wo ohẹriẹ no amọfa nọ a je wuhrẹ ahwo evaọ oke riẹ? (w99 9/1 30 ¶1-4)

   Uyo ra

3. 3. Fikieme udẹ nọ Meri o ku fihọ Jesu na o rọ jọ obọdẹ okẹ? (“udẹ nọ u re gbo ore awere nọ o rrọ ghaghae” eme Ebaibol uwuhrẹ Mat. 26:7, nwtsty) Uwoho avọ 2

   Uyo ra

   

   Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source

4. 4. Evaọ oke Ebaibol, nọ ohwo o te ku udẹ họ uzou gbe awọ ohwo, eme u dhesẹ? (w11 1/1 6 ¶4, ẹme-obotọ)

   Uyo ra

Roro Kpahe Eware nọ Who Wuhrẹ Noi Ze

• Jesu ọ ta nọ “Meri ọ salọ abọ owoma,” koyehọ ọ rọ Jihova karo. (Luk 10:42) Ẹvẹ ma sae rọ rehọ aro kele iei nẹnẹ? Uwoho avọ 3

  Uyo ra

  

• Jesu o jiri Meri keme “onọ ọ rẹ sai ru o ru na.” Eme onana u wuhrẹ omai kpahe oware nọ Jihova ọ be ruẹ evaọ oma mai? (Mak 12:29, 30; 14:8)

  Uyo ra

• Oghẹrẹ sa-sa vẹ whọ sae rọ rehọ aro kele Meri gudu evaọ uzuazọ ra?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• O sae jọ nọ a salọ Meri oniọvo Lazarọs re o lele Kristi su evaọ obọ odhiwu. Kọ emamọ iruemu vẹ o wo nọ o sai ru owhẹ ta nọ u woma nọ a salọ e riẹ?

  Uyo ra

Gbe Wuhrẹ Eware Efa

Eme emaha a rẹ sai wuhrẹ mi Meri, Mata, gbe Jesu kpahe oghẹrẹ ahwo nọ a re mu usu kugbe?

Ono Ọ rẹ Jọ Ogbẹnyusu Mẹ? (13:14)

Udẹ oghaghae nọ Meri o ku fihọ oma Jesu o da Jesu ẹro, yọ epọvo na ibiugho esese ivẹ nọ aye-uku na ọ rọ kẹ okẹ e dariẹ ẹro re. Eme onana u wuhrẹ omai kpahe Jesu?

“Kọ Oware O be Hae Da Owhẹ Ẹro?” (w99 4/15 16 ¶3-7)