“Mẹ Ruẹ Olori na No!”

MERI Magdalini ọ jọ ohwo nọ uye ọ bẹ gaga. Izi imuomu i je kpokpo iei, i je ru akpọ vẹso iẹe. Rekọ nọ ọ nyaku Jesu, akpọ riẹ o te nwene. Evaọ oghẹrẹ vẹ? Jesu o le “idhivẹri ihrẹ” noi oma. Ere oma o rọ fọ ẹe. Fikinọ oware nọ Jesu o ru kẹe o da riẹ ẹro, o te zihe ruọ olele Jesu. Yọ ọ jẹ daoma ru oware kpobi nọ ọ sai ru ro fiobọhọ kẹe.

Meri Magdalini ọ jẹ hai se Olori oyoyou riẹ na Raboni, nọ otofa riẹ o rrọ “Owuhrẹ.” Yọ ẹme yena o dhesẹ nọ o wo adhẹẹ kẹe gaga. Evaọ oke yena, Jesu avọ ikọ ikpegbivẹ (12) riẹ a jẹ hai no oria ruọ oria evaọ ẹkwotọ na soso re a wuhrẹ ahwo kpahe Uvie Ọghẹnẹ. Meri ọ ruẹ nọ a nyasiọ okọ rai ba re a sae rehọ oke gbe ẹgba rai kpobi ru iruo nana nọ i wuzou gaga na. Nọ o rrọ ere na, eme Meri o ru ro fiobọhọ?

Meri ọ jọ usu eyae sa-sa nọ “e jẹ rehọ eyero obọrai gbodibo kẹ” Jesu avọ ikọ riẹ. A jẹ rehọ igho obọrai dẹ eware nọ Jesu avọ ikọ riẹ a gwọlọ. O sae jọ nọ te ezae te eyae nọ i je lele Jesu “no okpẹwho ruọ okpẹwho je no iwhre ruọ iwhre” a bu te ahwo udhe (20) hayo a vrẹ ere. Evaọ oke yena, eyae e jẹ hae nya lele osu egagọ wọhọ epanọ eyae i je lele Jesu na ha. Fikiere o sae jọ nọ a jẹ ta ikpehre eme kpahe eyae na, hayo a je se ai ẹkoko dede. Rekọ Meri avọ eyae edekọ na a jẹ daezọ oyena ha. Keme a rri rie nọ oware ofa o riẹ hẹ nọ u wuzou vi odibo nọ a rẹ gba kẹ Jesu avọ ikọ riẹ. Fikiere a gbaudu je fiobọhọ kẹ Jesu ghelọ oware nọ amọfa a je roro kpahe ae kẹhẹ.

Oware ofa jọ họ, ma riẹ nọ o te da Meri gaga okenọ a mu Jesu evaọ aso Ehaa Ọnyavrẹ evaọ Jerusalẹm. Nọ a mu ei no, a tẹ bọwo iẹe ota inọ ọ jẹ ta eme-aghọ. Fikiere a te bruoziẹ nọ a re kpei no evaọ ure oja. Rekọ oyena o lẹliẹ ozọ mu Meri hi. Ukpoye, o lele oni Jesu avọ eyae efa nọ e gudu kpohọ oria nọ a te jọ kpe Jesu. Nọ Jesu o rri no ehru ure oja nọ ọ jọ na ze, ọ ruẹ eyae nana nọ e rrọ kugbei. U gine dhesẹ nọ a you rie gaga. Eyae nana a rọ ẹro ruẹ inọ Jesu ọ kru ẹrọwọ riẹ te urere. A tẹ jẹ ruẹ nọ o ru iruo kpobi nọ Ọsẹ riẹ o vi rie ze ti ru. Meri ọ jọ etẹe evaọ okenọ Jesu o ro ku ẹwẹ urere riẹ.

Eyae nana nọ e gudu na a viẹ gaga evaọ iraro isoja ahwo Rom gbe isu ahwo Ju nọ i kpe Jesu na. A daezọ oware nọ a ti roro kpahe ae he. Yọ o make jọ nọ Meri o je weri na, ọ gbẹ gwọlọ ru oware ofa jọ kẹ Olori oyoyou riẹ na. Ọ gwọlọ nọ ọ rẹ rẹrote ori Jesu. Evaọ unuakpọ Judia, ori ọ jẹ hai kri egbo ho fiki ẹrrorro ọgaga. Fikiere re ekpehre ore o gbe gbo suọ ahwo nọ a be nyaze ti weri uweri na ha, a jẹ hae rehọ udẹ gbe eware efa nọ i re gbo ore awere wholo ori na taure a te ti ki ei. Whaọ a ki Jesu no, rekọ Meri ọ gwọlọ nọ ọ rẹ rehọ eware yena wholo ori Jesu ghele. Fikiere nọ Ẹdijala na ọ nwani kuhọ no, tei te eyae edekọ na a tẹ dẹ udẹ gbe eware nọ i re gbo ore awere na. A tẹ riọ kpobọ uki na re a rehọ ae wholo ori Jesu.

Ẹsejọhọ Meri họ ohwo nọ ọ kaki te obọ uki na. Yọ u gbe rie unu nọ ọ ruẹ nọ uki na u rovie fihọ, o tẹ jẹ rrọ ofofe! Meri ọ tẹ nwane dhẹ nyae ta kẹ Pita avọ Jọn. Nọ o zihe ze, ọ gbẹ ruẹ eyae edekọ na ha. Meri o te ruwẹ re o no rri eva uki na. Ọ tẹ “ruẹ ikọ-odhiwu ivẹ nọ i ku iwu efuafo họ nọ e keria oria nọ ori Jesu ọ jọ vẹre.” Nọ o lele ai ta ẹmẹme no, o te kuomarẹriẹ. Ọ tẹ ruẹ ọzae jọ nọ o roro nọ yọ ọruẹrẹ-ọgbọ. Ọzae na ọ tẹ nọe nọ: “Aye, eme whọ jẹ be viẹ?” Meri ọ tẹ nọe oria nọ ori Jesu ọ rrọ. O te fibae nọ: “Ọga, otẹrọnọ whẹ ọ wọ riẹ vrẹ, vuẹ omẹ oria nọ whọ wọ riẹ fihọ, re mẹ wọe vrẹ.” Meri ọ tubẹ ruawa dede he sọ ọ te sae wọ ọsoso ọzae yena. Oware nọ o je roro kpobi họ epanọ o re ro ru oware kpobi nọ ọ sai ru.

Epanọ Meri o ro kuomarẹriẹ avọ uweri na, ọzae na o te sei nọ: “Meri!” O te vuhu uvou na. O te bọ nọ: “Raboni!” Ere ọ rọ gbalọ iẹe. Rekọ Jesu ọ kẹ riẹ uvẹ re ọ talamu ei hi. O te vi ei uwou jọ nọ u wuzou gaga. Ọ vuẹ riẹ nọ: “Nyabru inievo mẹ.” Oware nọ Jesu ọ ta kẹe na họ, ọ nyae vuẹ ae usi nọ o mai wuzou, inọ, a kpare Olori rai no uwhu ze no. Ọ tẹ nyabru ae ovavo. Rekọ ezae na e jẹ kake rọwo ẹme Meri na ha. Ebaibol na ọ ta nọ: “Eme nana e wọhọ eme igheghẹ rọkẹ ae.” O make jọ nọ a se eme na gboware ovo ho na, Meri Magdalini ọ rọ fiki oyena siọ emamọ usi yena ba ẹta kpahe he. Yọ ọ kuvẹ hẹ re oware ofa dede u ru ei fibo. Ma riẹ nọ o whowho emamọ usi yena no ẹdẹ yena vrẹ ududu.

Se iku Ebaibol na:

• Matiu 27:55, 56

• Mak 16:1, 2

• Luk 8:1-3; 24:1-11

• Jọn 19:25; 20:1, 2, 11-18

Onọ nọ a rẹ ta ẹme kpahe:

Eme gbe eme Meri Magdalini o ru ro dhesẹ nọ ọ gudu?

Gbẹ Kiẹ Kodo

1. 1. Eware jọ vẹ o sae jọ nọ Meri Magdalini avọ eyae edekọ na a je ru ro fiobọhọ kẹ Jesu avọ ikọ riẹ? (ijwia uzoẹme avọ 6 ¶5-6) Uwoho 1

   Uyo ra

   

2. 2. Fikieme Meri ọ gbẹ kaki vuhu Jesu hu evaọ okenọ a kpare iẹe ze no? (ijwia uzoẹme avọ 6 ¶16)

   Uyo ra

3. 3. Fikieme Jesu ọ rọ ta kẹ Meri Magdalini nọ ọ se iẹe ba ẹtalamu? (w08 4/15 32 ¶6)

   Uyo ra

4. 4. Okenọ Meri Magdalini ọ jẹ vuẹ ikọ na nọ a kpare Jesu ze no, a rri eme riẹ “wọhọ eme igheghẹ.” Kọ eme o sae jọ nọ o lẹliẹ e rai roro ere? (Luk 24:11; w12 10/1 10 ¶4-5)

   Uyo ra

Roro Kpahe Eware nọ Who Wuhrẹ Noi Ze

• Meri Magdalini o ru eware nọ ahwo a sai rri kpokpotọ ro fiobọhọ kẹ amọfa. Ẹvẹ ma sae rọ rehọ aro kele iei? Uwoho avọ 2

  Uyo ra

  

• Nọ ahwo a gbẹ be rọwo ẹme Ọghẹnẹ nọ ma be ta kẹ ae he, hayo o gbẹ were ae he, ẹvẹ ma sae rọ rehọ aro kele Meri Magdalini? (Luk 24:10, 11)

  Uyo ra

• Ẹvẹ whọ sae rọ rehọ aro kele Meri Magdalini gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• O sae jọ nọ a salọ Meri Magdalini re o lele Kristi su evaọ obọ odhiwu. Kọ emamọ iruemu vẹ o wo nọ o sai ru owhẹ ta nọ u woma nọ a salọ e riẹ?

  Uyo ra

Gbe Wuhrẹ Eware Efa

Rehọ iku-esia jọ nọ a gbe kpahe Meri Magdalini rọ wawo oware nọ Ebaibol na ọ ta kpahe iẹe dẹẹ.

“Ono Meri Magdalini Ọ Jọ?” (ijwbq uzoẹme avọ 172)

Ẹvẹ oghẹrẹ nọ Jesu o ru Meri Magdalini gbe eyae efa u ro dhesẹ oghẹrẹ nọ u fo nọ a re ru eyae je rri rai?

“U Fo nọ A rẹ Kẹ Eyae nọ E be Gọ Ọghẹnẹ Ọghọ gbe Adhẹẹ” (w95 7/15 15-18 ¶3-8)