“A Kiẹrẹe Evaọ Aro Ọghẹnẹ”

ZẸKARAYA ọ jọ omọvo izerẹ nọ i no unuwou Erọn ze. U wo ẹdẹ jọ nọ o wo obọdẹ iruo nọ o re ru. Iruo vẹ yẹ? Ọye u te nọ ọ rẹ mahe insẹnse evaọ agbada-idhe igoru nọ ọ rrọ etẹmpol na. Iruo nana i wuzou gaga keme o sae jọ nọ ẹsiẹvo ozerẹ o re wo uvẹ nọ ọ rẹ rọ jọ etẹmpol na mahe insẹnse evaọ edẹ uzuazọ riẹ kpobi. Fikiere ẹsejọhọ Zẹkaraya avọ aye riẹ nọ a re se Ẹlizabẹt a je rẹro ẹdẹ nana gaga.

Zẹkaraya avọ Ẹlizabẹt a rrọ orọo te ikpe buobu no. Yọ Jihova ọ ghale rai evaọ idhere buobu no re. Rekọ u wo oware jọ nọ a gwọlọ nọ u ri te ae obọ họ. Oye họ emọ. A ri yẹ ọmọ họ. Evaọ oke yena, ahwo a jẹ hae rọ ọmọ oyẹ zaro ho. Whaọ Zẹkaraya avọ Ẹlizabẹt a “kpako no.” Rekọ Ebaibol na o dhesẹ i rai nọ “a kiẹrẹe evaọ aro Ọghẹnẹ.” Fikiere a gbẹ jẹ lẹ se Ọghẹnẹ rai. Yọ a fievahọ iẹe nọ o ti yo olẹ rai o tẹ make wọhọ nọ a kpako vrẹ ahwo nọ a re yẹ ọmọ no.

Zẹkaraya ọ tẹ ruọ obeva etẹmpol na, yọ ahwo buobu a rrọ obọ otafe be lẹ. Epanọ Zẹkaraya ọvo ọ rọ jọ obeva etẹmpol na, ukọ-odhiwu Jihova ọ tẹ romavia idudhe. O te dikihẹ kẹle agbada-idhe insẹnse na. Ọ tẹ vuẹ Zẹkaraya nọ Ọghẹnẹ o yo elẹ riẹ no. Fikiere, Ẹlizabẹt o ti dihọ o ve ti yẹ ọmọzae kẹe. Nọ a te yẹ ọmọ na no, o re sei Jọn. Ọmọ na ọ tẹ rro no, o ti wo “ẹzi gbe ogaga Elaejah.” Ọmọ na o ti ru iruo ilogbo keme Jihova ọ salọ e riẹ no. O ti wuhrẹ ahwo re a nwene, a ve mu oware nọ o rẹ were Jihova họ eru.

Zẹkaraya ọ vro ẹme nọ ukọ-odhiwu na ọ ta kẹe. Fikiere ọ tẹ ta kẹ ukọ-odhiwu na nọ ọ kẹe oka jọ ro dhesẹ nọ eme nọ ọ ta na uzẹme. Ukọ-odhiwu na ọ tẹ kpahe kẹe nọ: “Mẹ yọ Gebriẹl, ọnọ o re dikihẹ aro Ọghẹnẹ.” U fo nọ Zẹkaraya ọ hae vro ẹme na ha keme ukọ-odhiwu ologbo Jihova ọ ta ẹme kẹe na. Fikiere ukọ-odhiwu na ọ tẹ ta kẹe nọ o ti dienu bẹsenọ oware nọ Ọghẹnẹ ọ ta na u re rugba no. Ere o ro dienu. Nọ o no eva etẹmpol na ze kọ abọ o je ro dhesẹ kẹ ahwo na nọ ọ ruẹ oware igbunu jọ.

Zẹkaraya ọ rọ edhere jọ vuẹ aye riẹ oware nọ ukọ-odhiwu na ọ ta. “Nọ edẹ jọ e vrẹ no,” Ẹlizabẹt o te dihọ. Evaọ emerae isoi o no uwou ze he. Rekọ evaọ amara avọ ezeza, omoni riẹ jọ nọ a re se Meri ọ tẹ kpahe iẹe. Meri yọ ọmọtẹ Hilai, nọ o no Nazarẹt ze. Nọ Meri ọ nwane ruọ eva uwou na, ọmọ nọ ọ rrọ eva Ẹlizabẹt na o te duola avọ oghọghọ. Ẹzi ọfuafo ọ tẹ vọ Ẹlizabẹt oma, o te se Meri nọ “oni Olori mẹ.” Ọ riẹ inọ ọmọ nọ Meri o dieva riẹ họ na, ọ te jọ Mesaya na. Ẹlizabẹt ọ re Meri ihri hi. Ukpoye, ọ tuduhọ uvovo-aye nana awọ inọ Jihova o ti fiobọhọ kẹe evaọ iruo nọ ọ kẹ riẹ na.

Ẹlizabẹt o te yẹ. Imoni gbe ahwo nọ a gbẹ jẹ rria oria a tẹ nyaze. A tẹ be ta kẹe nọ ọ rehọ odẹ ọsẹ ọmọ na se ọmọ na. Rekọ ọ riẹ ẹme nọ Gebriẹl ọ ta kẹ ọzae riẹ inọ: “Who re se odẹ riẹ Jọn.” Fikiere ọ rọwo kẹ ae he. Ọ tẹ ta kẹ ae nọ: “Ijo, Jọn họ odẹ nọ a re sei.” Ẹme nọ ọ ta na ọ vọ rai eva ha. A tẹ be nọ Zẹkaraya odẹ nọ a re se ọmọ na. Fikinọ ọ be sae ta ẹme he, o te kere fihọ ẹwẹ-akpala nọ: “Jọn họ odẹ riẹ.” Ẹsiẹvo na, o te mu ẹme họ ẹta.

Ẹzi ọfuafo ọ tẹ vọ Zẹkaraya oma, o te mu aro họ ẹruẹ. Ọ ta eme nọ i dhesẹ nọ ahwo Ọghẹnẹ a wo ẹruore. O te je whowho nọ Ọghẹnẹ ọ te re ohrọ ahwo riẹ, o ve siwi ae. Ọ tẹ jẹ ta kpahe Jọn ọmọ riẹ na nọ, “whọ te karo kẹ Jihova re whọ ruẹrẹ idhere riẹ họ.” Yọ ere Jọn o gine ru. Jọn ọ karo kẹ Mesaya na. Taure Jesu o te ti mu usi uwoma kpahe Uvie Ọghẹnẹ họ ẹta, Jọn o fiobọhọ kẹ ahwo ruẹrẹ oma kpahe re a jẹ ovuẹ na rehọ.

Nọ Mesaya na ọ nyaze no, o wuhrẹ ahwo Ọghẹnẹ re a nwene oghẹrẹ nọ a re ru ahwo nọ a be gọ Jihova ha gbe ahwo nọ a be wọso ae. Evaọ okenọ u kpemu, idibo Ọghẹnẹ buobu a jẹ hae tọlọ ekwakwa ẹmo a vẹ nyae họre ahwo nọ a rrọ ewegrẹ Jihova. Ere a jẹ hai ro dhesẹ nọ a gudu. Rekọ eware i bi ti nwene. Jihova ọ gbẹ gwọlọ nọ idibo riẹ a re kpohọ ẹmo ho. Rekọ o gwọlọ nọ a rẹ gudu ghele. Evaọ oghẹrẹ vẹ? Ahwo nọ a rọwo Mesaya na a rẹ rọ aro kele Zẹkaraya avọ Ẹlizabẹt. A rẹ rehọ unu rai ta ẹme kpahe Jihova Ọghẹnẹ. A vẹ jẹ ta usi uwoma kpahe Jesu Krist.

Se iku Ebaibol na:

• Luk 1:5-25, 36-45, 57-80

Onọ nọ a rẹ ta ẹme kpahe:

Eme gbe eme Zẹkaraya avọ Ẹlizabẹt a ru ro dhesẹ nọ a gudu?

Gbẹ Kiẹ Kodo

1. 1. Dede nọ Zẹkaraya avọ Ẹlizabẹt a gba ha na, fikieme Ebaibol na o ro dhesẹ ae nọ a “kare afuẹwẹ”? (Luk 1:6; it “Kare Afuẹwẹ” ¶2)

   Uyo ra

1. 3. Gebriẹl ọ vuẹ Zẹkaraya nọ o re se odẹ ọmọzae riẹ Jọn. Eme họ otofa Jọn? (it “Jọn” ¶1)

   Uyo ra

2. 4. Kọ Zẹkaraya o dienu je diezọ? (w08 3/15 30 ¶6)

   Uyo ra

Roro Kpahe Eware nọ Who Wuhrẹ Noi Ze

• Iwuhrẹ ahwo Ju evaọ oke Zẹkaraya a jẹ hae kuvẹ re ọzae ọ se aye riẹ otẹrọnọ ọ be sai yẹ ọmọ họ. Rekọ Zẹkaraya ọ se aye riẹ hẹ, ọ talamu ei. Kọ eme ezae nọ e rọo no a re wuhrẹ mi ei? Uwoho avọ 2

  Uyo ra

  

• Ẹlizabẹt ọ romakpotọ lele ẹme nọ ọzae riẹ ọ ta kẹe dede nọ ahwo okegbe riẹ avọ imoni riẹ a jẹ ta ofa kẹe. (Luk 1:58-61) Eme eyae nọ e rọo no a sai wuhrẹ mi ei?

  Uyo ra

• Oghẹrẹ vẹ whọ sae rọ rehọ aro kele Zẹkaraya avọ Ẹlizabẹt gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku na i ro dhesẹ oware nọ Jihova ọ gwọlọ ru via?

  Uyo ra

• Otẹrọnọ a kpare Zẹkaraya avọ Ẹlizabẹt ziọ otọakpọ na, enọ vẹ mẹ te gwọlọ nọ ae?a

  Uyo ra

Gbe Wuhrẹ Eware Efa

Rri oware nọ o via nọ Zẹkaraya ọ wariẹ mu ẹme họ ẹta, gbe epanọ ọ rọ rehọ unu riẹ jiri Ọghẹnẹ.

“Jọn Họ Odẹ Riẹ” (6:59)

Meri ọ nyae kpahe Ẹlizabẹt. Kọ ẹvẹ u ro fiobọhọ kẹe wo ogaga nọ Jihova ọ rẹ kẹ? Eme ma wuhrẹ no onana ze?

“Ẹvẹ Jihova O ti ro Ru Owhẹ Ga?” (w23.10 14-15 ¶10-14)