6 REBEKA
Ọ Rọwo nọ O re Kpohọ Obonọ Ọ Riẹ Hẹ
REBEKA ọ wọ othẹ ame be nya kpobọ oza. Owọwọ u bi te no, yọ oke yena o re ro vo ame fihọ uwou. O wọhọ nọ kẹdẹ kẹdẹ ọ jẹ hai vo ame. Rekọ ọ ruẹ nọ ezae jọ nọ e rrọ erara avọ ekamẹle rai a rrọ kẹle oza na! Ọ tẹ nya kpobọ oza na ghele, o te vo ame fihọ othẹ riẹ.
Nọ ọ wọ othẹ ame riẹ na re o muhọ ekpo, ọzae jọ nọ ọ dina kpako evaọ usu ahwo na o te siawọ bru ei ze, ọ tẹ ta kẹe nọ: “Ivie jọ omothẹ ra na kẹ omẹ amame jọ da.” Rebeka ọ se he. Ukpoye, o dhesẹ nọ o re dede erara rehọ. Ọ tẹ ta kẹ ọzae na nọ: “Da, olori mẹ.” Ọ tẹ nwani wo othẹ na fihọ obọ, ọ tẹ kẹe ame bẹsenọ ọ rọ da utho nọ ọ gwọlọ.
Rebeka o tube ru viere. Ọ ta nọ o re vo ame no oza na ze kẹ ekamẹle ikpe nọ e wọ erara na ze na. Ere uvovo ọmọtẹ nana nọ o wo erru na o ro muhọ ẹdhẹ kpemu kparo, bi vo ame kẹ erao ilogbo nana bẹsenọ a rọ da eva vọ. Oware nọ Rebeka o je ru na u je gbe ọrara na unu ọvo nọ o bi rri rie na. Ọrara na ọ tẹ nọe nọ, whẹ ọmọ ono? Ọ tẹ jẹ nọe sọ a jọ uwou rai wo oria nọ a sai wohọ asohẹrioke. Rebeka o gu inoma ha. Ọ rọwo nọ aikpobi na a sae wezẹ uwou rai evaọ aso yena. Ọ tẹ jẹ ta nọ a wo emu nọ erao na e rẹ re.
Jihova o ru rie re Rebeka ọ nyaku ọzae na, rekọ Rebeka ọ riẹ hẹ. O sae jọ nọ Ẹlieza họ ọzae nọ ọ kpako no nọ o no ugbothabọ ze na. Yọ odibo Abraham nọ o fievahọ ọ jọ. Evaọ eka jọ nọ e vrẹ, Abraham olori riẹ ọ rọ ta kẹe nọ ọ nya kpohọ ugbothabọ re ọ gwọlọ aye kẹ Aiziki ọmọzae riẹ, ọnọ ọ te reuku eyero riẹ. Abraham ọ vuẹ Ẹlieza nọ evaọ usu ahwo nọ a be gọ Jihova ọ rẹ jọ salọ aye kẹ ọmọzae riẹ na. Fikiere Ẹlieza ọ tẹ lẹ se Jihova re o fiobọhọ kẹe. Ọ lẹ se Ọghẹnẹ re ọ ruẹ ọmọtẹ nọ o ti fo kẹ Aiziki, yọ ọ rẹ jọ ohwo nọ o ti dede ae rehọ. Nwanọ ere Rebeka o ru na dẹẹ!
Rebeka o dede ezae na rehọ dede nọ ọ riẹ rai ẹdẹvo ho. Evaọ oke yena, ozọ o nwane jariẹ tere he re a dede erara rehọ ere. Rekọ nẹnẹ na, ahwo buobu a re “mu ofu-ọkpoo,” yọ a “you oware uwoma ha.” (2 Tim. 3:1, 3) O make rọnọ ere o jọ evaọ oke yena, oware nọ Rebeka o ru na, a rẹ ruẹ obọ riẹ hẹ. Yọ o dhesẹ nọ ọ gudu evaọ idhere efa re.
Nọ a te obọ uwou rai no, Rebeka ọ tẹ te riẹ oware nọ o lẹliẹ ezae na no ugbothabọ ze. Bẹthuẹl ọsẹ Rebeka avọ oniọvo ọmọzae Rebeka nọ a re se Leban a ta kẹ Ẹlieza nọ a keria re a re emu. Rekọ Ẹlieza ọ rọwo nọ ọ rẹ re emu hu bẹsenọ ọ rẹ vuẹ ae oware nọ o wọ riẹ ze no. O te gbiku epanọ Jihova o ro yo olẹ riẹ, o te fiobọhọ kẹe ruẹ Rebeka. Ezae ivẹ na a ruẹ vuhumu nọ Jihova o gine ru oware na, a tẹ ta nọ: “Obọ Jihova onana u no ze.”
Nọ Rebeka ọ riẹ nọ Ọghẹnẹ ọ gwọlọ nọ ọ kwa no uwou riẹ kpohọ ugbothabọ nyae rehọ ọzae nọ ọ riẹ ẹdẹvo ho, eme o ru?
Kọ ẹvẹ Rebeka o ti ru na? Abraham ọ ta no vẹre nọ ẹsejọhọ ọmọtẹ na ọ te rọwo lele Ẹlieza zihe kpobọ Kenan he. Fikiere, Rebeka ẹme na ọ rrọ obọ sọ ọ rẹ nya hayo ọ rẹ nya ha. Okiokiọ riẹ, Ẹlieza ọ tẹ nọ sọ Rebeka ọ sai lele iei kpo ẹdẹdẹ yena. Ahwo uviuwou Rebeka a tẹ nọe sọ ọ rọwo nọ ọ rẹ nya. Rebeka ọ tẹ nwane kuyo ovavo nọ: “O ruọ omẹ nọ mẹ rẹ nya.” Ọ rọwo nọ ọ rẹ nyasiọ uwou gbe ahwo riẹ ba kpohọ ugbothabọ, yọ ẹsejọhọ ọ gbẹ te ruẹ e rai ofa vrẹ ere he. Eme o fiobọhọ kẹe gudu ere? O wọhọ nọ ọyomariẹ o vuhumu re nọ oware nọ Jihova ọ gwọlọ nọ o ru oye.
Nọ a rọ ekamẹle nya eka jọ no, a te ti te evuẹ Abraham evaọ obọ Kenan. Nọ a te obei yọ owọwọ u te no. Rebeka ọ tẹ ruẹ ọzae jọ nọ ọye ọvo ọ be nya evaọ otọ na yọ o bi roro didi. Nọ a vuẹe nọ Aiziki nọ ọ tẹ jọ ọzae riẹ ọ be ruẹ na, ọ tẹ rọ iveli riẹ ruru oma ro dhesẹ nọ ọ rọwo nọ ọ rẹ jọ aye riẹ. Oke nana yọ Aiziki ọ jọ ikpe udhuvẹ (40). Aiziki yọ ohwo nọ ọ jọ yoyou nọ ọ rẹ romatotọ roro oware. O gbe je weri Sera oni riẹ nọ o whu te ikpe esa no. Kọ Rebeka ọ te gudu re ọ sai ru iruo nọ Ọghẹnẹ o wo kẹe? Kọ ọ te jọ emamọ aye nọ ọ te tha Aiziki ọzae riẹ nọ o wuzou uwou na uke? Kọ o ti fiobọhọ kẹe re ọ sae gọ Jihova ziezi? Ebaibol na o dhesẹ nọ ere Rebeka o ru. Nọ Ebaibol o je dhesẹ oghẹrẹ nọ orọo rai u ro muhọ, ọ ta eme nọ i dhesẹ nọ orọo rai na o te were. Ọ ta nọ: “Ọ tẹ dhẹ ruọ ẹe oma, Aiziki o te ti wo omosasọ nọ oni riẹ o whu no.”
Se iku Ebaibol na:
Onọ nọ a rẹ ta ẹme kpahe:
Eme gbe eme Rebeka o ru ro dhesẹ nọ ọ gudu?
Gbẹ Kiẹ Kodo
1. Didi uvẹ Ẹlieza o ti gbe wo ho fikinọ Abraham o yẹ emọ no? Kọ eme o dhesẹ nọ eva e dha riẹ hẹ? (Emu. 15:2-4; 24:12; w97 1/1 30 ¶2)
2. Fikieme Abraham ọ rọ gwọlọ nọ aye Aiziki ọ kwa kpobọ Kenan, orọnikọ Aiziki ọ rẹ kwa kpobọ ẹwho Rebeka aye riẹ hẹ? (w97 1/1 30 ¶3)
3. Eme ekẹ nọ Ẹlieza ọ kẹ Rebeka avọ uviuwou riẹ na i dhesẹ? (it “Rebeka” ¶4)
4. Gbiku oghẹrẹ nọ erẹ nọ Rebeka ọ nya no obọ Heran kpobọ ẹwho Aiziki evaọ obọ Negẹb na ọ jọ. (wp16.3 15 ¶1) Uwoho 1
www.LifeintheHolyLand.com
Uwoho 1: U wo oke jọ nọ ahwo buobu a jẹ rria Negẹb na, yọ uthuru Abraham nọ o jọ buobu a jẹ hae jariẹ re ẹbe
Roro Kpahe Eware nọ Who Wuhrẹ Noi Ze
Eme ma rẹ sai wuhrẹ mi Abraham, Rebeka, gbe Aiziki nọ ma tẹ be salọ ohwo nọ ma rẹ rehọ? (Emu. 24:2, 3; 27:46–28:1)
Rebeka ọ jọ ohwo nọ ọ goma iruo, o re ru ọghọ, o te je wo adhẹẹ kẹ amọfa. Ẹvẹ inievo-emetẹ a sae rọ rehọ aro kele iei nẹnẹ? Uwoho avọ 2
Uwoho 2
Ẹvẹ whọ sae rọ rehọ aro kele Rebeka gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Rebeka nọ a tẹ kpare iẹe ze no?
Gbe Wuhrẹ Eware Efa
Se kpahe eware efa nọ Rebeka o ru ro dhesẹ nọ ọ jọ aye uwou-orọo gbe oni nọ ọ gudu.
“Rebeka—Emamọ Aye nọ O Kru Obọ Ga” (w04 4/15 8-11)
Eme emọ a rẹ sai wuhrẹ mi Rebeka?