7 JEKỌP
Ọ Thọ Uviuwou Riẹ Ududu
NỌ JEKỌP ọ kẹle uwhu no, ọ ta eme ivẹ jọ ro dhesẹ uzuazọ riẹ. Ọ ta nọ: “Ikpe nọ mẹ rria uzuazọ no i bu hu yọ e vọ avọ uye.” (Emu. 47:9) Uye o ginẹ bẹ Jekọp evaọ uzuazọ! Oke jọ evaọ uzuazọ riẹ, ọ dhẹ kpohọ ugbobọ Heran fikinọ oniọvo obọriẹ ọ jẹ gwọlọ kpei no. Nọ Jekọp ọ jọ obọ Heran, Reshẹl ọ tẹ dhẹ ruọ ẹe oma, ọ tẹ gwọlọ nọ ọ rẹ rehọ iẹe. Rekọ ọsẹ Reshẹl nọ a re se Leban ọ tẹ viẹ Jekọp họ. O tẹ whae ze nọ Jekọp ọ rọ kake rehọ oniọvo ọmọtẹ ọkpako Reshẹl. Ere Jekọp o ro wo eyae ivẹ, yọ eyae ivẹ na e jẹ rọ gba ha. Jekọp o ru iruo kẹ Leban evaọ ikpe buobu, rekọ ẹsibuobu Leban ọ jẹ daoma whae re. Ghele na, Jekọp o dhesẹ nọ ọ gudu gaga, o wo ẹrọwọ, je wo ithihakọ.
Ẹdẹ jọ, Jihova ọ tẹ vuẹ Jekọp nọ oke u te no nọ o re ro no Heran, o ve zihe kpobọ Kenan nọ o no ze. Rekọ oyena o sai si uye se Jekọp. Keme Leban yọ ohwo oriobọ nọ o wo uvou uthethei, yọ o je roro nọ eware kpobi nọ Jekọp o wo na eriẹ. Nọ Jekọp ọ vuẹ Reshẹl avọ Lia oware nọ ọsẹ rai o bi ru no, gbe oware nọ Jihova ọ ta, o te koko uviuwou riẹ họ, a tẹ lẹlẹ ruọ edhere. Ọ vuẹ Leban he. Nọ Leban o yo, o te koko ahwo riẹ họ, o te mu ai họ ele. Nọ o le uviuwou na mu no, o te mu Jekọp họ edoku inọ ọ vuẹ riẹ re ọ tẹ te ruọ edhere he. Leban o tube seha kẹe dede nọ: “Me wo ogaga nọ mẹ sai ro ru owhẹ oware uyoma.” Rekọ Jekọp ọ ta ẹme kẹe ududu rọ kpọe họ. Ọ ta kẹ Leban nọ anwọ ikpe buobu ze na, ọ be rọ viẹe họ jẹ whae re. Nọ Jekọp ọ make ta ere na, ọ daoma ru udhedhẹ ghele. Keme ezae ivẹ na a nyasiọ ohwohwo ba dhedhẹ.
Eme o fiobọhọ kẹ Jekọp ru udhedhẹ kugbe ahwo uviuwou riẹ nọ a jẹ dheva, o te je tube lele ukọ-odhiwu muabọ dede?
Rekọ etẹe uye Jekọp o jọ kuhọ họ, keme Esọ ejime riẹ ọ rrọ edhere be nya bru ei ze. Evaọ ikpe buobu nọ e vrẹ, Rebeka oni rai ọ lẹlẹ ta kẹ Jekọp nọ Esọ ọ gwọlọ kpei no. Esọ o roro nọ Jekọp ọ nya ọrọ emu nyai mi ọsẹ rai eghale nọ u fo nọ ọ rẹ kẹ ọyomariẹ. Whaọ Jekọp ọ gwọlọ ru udhedhẹ kugbe Esọ. O yo nọ Esọ ọ wha ezae egba ene (400) lele oma be nyabru ei avọ uviuwou riẹ ze. Jekọp o te vi idibo riẹ re a rehọ ekẹ eghaghae se Esọ karo kẹ ae. Kọ oyena ọvo o te sai furie ofu nọ ọ rrọ Esọ eva? Ebaibol na ọ ta nọ: “Ozọ u te mu Jekọp gaga ọ tẹ be ruawa.” Rekọ oware igbunu jọ o tẹ via.
Evaọ aso ẹdẹ yena nọ Jekọp ọvo ọ jọ oria, ọ tẹ ruẹ ọzae jọ nọ ọ riẹ hẹ. Ọzae na yọ ukọ-odhiwu Jihova. Ukọ-odhiwu na o te bi lele Jekọp muabọ. Nọ Jekọp o viẹro nọ ukọ-odhiwu na ọ gwọlọ ghale iẹe, ọ tẹ dadabọ mu ei, o te lele iei muabọ evaọ euwa buobu. Dede nọ Jekọp ọ kpako te ikpe udhone gbe ikpegbihrẹ (97) no, yọ ukọ-odhiwu na ọ goma vi ei thethabọ, ọ rọwo nọ ọ rẹ nyasiọ iẹe ba ha. O tilẹmu ukọ-odhiwu na. Ọ tubẹ viẹ dede. (Hos. 12:4) Jekọp ọ riẹ nọ oghale Jihova u te oware nọ a rẹ thuẹ họ. Fikiere, ọ gba riẹ mu nọ o re ru oware kpobi nọ o gwọlọ re ọ sai woi. Nọ oke o ke no, ukọ-odhiwu na o te dhobọte ọthọ Jekọp, ọthọ riẹ o te no ẹta. O make jọ ere na, ukọ-odhiwu na ọ ta ẹme jọ nọ o gbunu gaga kẹ Jekọp. Ọ ta kẹe nọ a nwene odẹ riẹ kpohọ Izrẹl no. Otofa odẹ na họ: Ọnọ o lele Ọghẹnẹ muabọ. Odẹ na o gine fo Jekọp keme ọ rọ ẹgba riẹ kpobi muabọ re ọ sai wo oghale Jihova.
Jekọp ọ tẹ nya segbe segbe zihe bru uviuwou riẹ. Ọ tẹ jọ ugbo kparo ruẹ Esọ nọ ọ be nya bru ai ze, yọ ezae egba ene (400) e rrọ kugbei. Jekọp ọ tẹ karo, ọye ọvo ọ tẹ nyabru ai. Nọ ọ be nya kẹle Esọ no, o te kigwẹ rọ uzou te otọ isiahrẹ soso. Esọ ọ tẹ dhẹ bru ei. O kru oware ovo nọ a re ro fi ẹmo ho. Ukpoye, ọ bẹre abọ riẹ ọ tẹ gbalọ Jekọp! Ezae ivẹ na a te muhọ ẹviẹ. Ekẹ nọ Jekọp o vi se Esọ na gbe uruemu omaurokpotọ riẹ u kpe ofu Esọ totọ. O sae jọ nọ oghẹrẹ nọ Jekọp ọ rọ gudu o were e riẹ re. Uvẹ na u rovie no nọ Jekọp ọ sae rọ ruẹrẹhọ kugbe oniọvo riẹ.
No umuo oke yena vrẹ, Jekọp ọ jẹ nya segbe segbe fiki ọthọ riẹ nọ o no ẹta na. Yọ ebẹbẹ efa buobu i te rie re. Rekọ ọ vioja ha inọ o yoẹme kẹ Jihova hayo lele ukọ-odhiwu na muabọ. Ikpe buobu nọ lele i rie, obọdẹ eyaa nọ Jihova ọ ya kẹe na i rugba. Izrẹl o zihe ruọ orẹwho ologbo. (Emu. 28:14) U te no ere no, a tubẹ jọ Ebaibol na se Jihova “Ọghẹnẹ Jekọp.” (Ọny. 3:6) Makọ Jesu Kristi omariẹ dede o se Jihova ere re. Ọ tẹ jẹ ta nọ Jihova yọ “Ọghẹnẹ enọ i whu no ho, rekọ ọrọ enọ e rrọ uzuazọ, keme evaọ aro riẹ aikpobi a rrọ uzuazọ.” (Luk 20:37, 38) Fikiere, Jekọp ọ te wariẹ ziọ uzuazọ evaọ akpọ ọkpokpọ na. Evaọ oke yena, a te sai kele ikpe riẹ mu hu. Yọ eva ọvo e te hae were iẹe!
Se iku Ebaibol na:
Onọ nọ a rẹ ta ẹme kpahe:
Eme gbe eme Jekọp o ru ro dhesẹ nọ ọ gudu?
Gbẹ Kiẹ Kodo
1. Fikieme Jihova o ro ru re Jekọp o wo ọkwa ọmọ-ọkpako na viukpọ Esọ? (w03 10/15 29 ¶2)
2. Ewezẹ vẹ Jihova o ru Jekọp wezẹ, kọ eme oyena u fiobọhọ kẹe riẹ vevẹ? (w03 10/15 28 ¶3–29 ¶1) Uwoho 1
Uwoho 1
3. Fikieme u ro mu Jekọp ẹro nọ ukọ-odhiwu na ọ te ghale iẹe? (w03 10/15 31 ¶1) Uwoho avọ 2
Uwoho 2
4. Eme gbe eme Jekọp o ru re ahwo uviuwou riẹ a gbe mu iruemu ahwo Kenan họ eru hu? (w95 9/15 21 ¶4, ẹme-obotọ)
Roro Kpahe Eware nọ Who Wuhrẹ Noi Ze
Jekọp ọ rehọ e riẹ nọ iruo riẹ o jọ re ọ rẹrote igodẹ Leban ọvuọvo. (Emu. 31:38-40) Kọ ẹvẹ ekpako ukoko nẹnẹ a sai ro dhesẹ nọ igodẹ Jihova, koyehọ inievo ukoko na a tubẹ ghare vi igodẹ gheghe? Uwoho avọ 3
Uwoho 3
Okenọ ozọ u je mu Jekọp, ọ lẹ se Jihova. (Emu. 32:6-12) Eme who wuhrẹ mi ei kpahe epanọ a rẹ lẹ?
Ẹvẹ whọ sae rọ rehọ aro kele Jekọp gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Jekọp nọ a tẹ kpare iẹe ze no?
Gbe Wuhrẹ Eware Efa
Ẹvẹ ma sae rọ rehọ aro kele Jekọp nọ ma tẹ ruẹ nọ ma ru oniọvo jọ eva dha?
Rọ ifoto iku Ebaibol nana wuhrẹ uviuwou ra kpahe Jekọp.
“Jekọp avọ Esọ” (ijwis uzoẹme avọ 3)