O Yoẹme Dede nọ O Jọ Bẹbẹ

ABRAHAM ọ rrọ edhere be nya ẹmẹrera kpohọ obonọ Jihova ọ ta kẹe nọ ọ nya. Ọ gba riẹ mu nọ o re te obei. Evaọ uzuazọ riẹ, ọ nyonya sa-sa nọ ọ jọ ruẹ uye gaga no, rekọ onya nana nọ ọ te rọ emedẹ jọ ọvo nya na ọ mae ga.

O je roro kpahe oware nọ Jihova ọ ta kẹe nọ o ru na. Ọ ta kẹe nọ: “Ivie, rehọ ọmọzae ra, ọmọzae ọvo ra nọ who you gaga na, Aiziki, re who kpobọ ẹkwotọ Moraya re whọ rehọ iẹe dhe idhe emahọ evaọ ugbehru jọ nọ me ti dhesẹ kẹ owhẹ.” Jihova ọ riẹ nọ Abraham o you Aiziki ọmọzae riẹ na gaga. Kọ fikieme Ọghẹnẹ ọ rọ ta kẹe nọ ọ rọ ọmọ na dhe idhe no? Kọ eme o ti fiobọhọ kẹ Abraham wo ẹrọwọ jẹ gudu re ọ sai yoẹme?

Ebaibol na o se Abraham “ọsẹ ahwo kpobi nọ a wo ẹrọwọ.” (Rom 4:11) Abraham yọ ohwo nọ o wo ẹrọwọ ọgaga taure oke yena o te ti te. Yọ evaọ ikpe na kpobi na, Jihova o je fiobọhọ kẹe ru ẹrọwọ riẹ ga. Wọhọ oriruo, evaọ ikpe buobu nọ e vrẹ, oke jọ o jariẹ nọ Ọghẹnẹ ọ ta kẹ Abraham nọ ọ te raha ikpewho Sọdọm avọ Gomora nọ e jọ muomu no. Fikinọ o kẹ Abraham uye gaga, ọ tẹ nọ Jihova nọ, kọ who ti gine hwere emamọ ahwo kugbe ahwo omuomu na kufiẹ? Jihova ọ rọ odiri gaviezọ kẹ Abraham, ọ tẹ vuẹe nọ, ọ tẹ jọ ikpewho na ruẹ makọ amahwo jọ nọ a kiẹrẹe, ọ te siọ ikpewho na ba. (Emu. 18:16-33) Oware nọ Abraham o wuhrẹ noi ze o thọrọ e riẹ ẹro vievie he. O wuhrẹ nọ, Jihova o re kienyẹ ohwo ọvo ho, yọ ọ rẹ re ohrọ.

Nọ omoke jọ o vrẹ no, Jihova o te ru oware igbunu jọ kẹ Abraham avọ Sera. O make rọnọ Sera ọ kpako te enwenọ ikpe udhone-gbikpe (90) no, yọ Abraham ọ rrọ enwenọ ikpe udhusoi (100), Jihova o ru nọ a ro yẹ ọmọzae nọ a se Aiziki. Abraham o wuhrẹ no oyena ze nọ oware ovo o rẹ bẹ Jihova eru hu. Oware o tẹ make wọhọ ẹsenọ o whu no, ọ rẹ sae wariẹ ru ei jọ uzuazọ. (Rom 4:18, 19) Oware yena nọ o wuhrẹ na o thọrọ e riẹ ẹro vievie gbe he.

Whaọ, oware wọhọ ikpe udhegbisoi (25) e vrẹ no. Abraham ọ rrọ edhere bi kpobọ ugbehru Moraya, yọ u mu omai ẹro nọ o je roro kpahe eware yena nọ o wuhrẹ na gaga. Ọ tẹ ta kẹ omariẹ nọ, Aiziki ọ tẹ maki whu dede, Jihova ọ sae kpare iẹe ziọ uzuazọ. (Hib. 11:19) Ere ọ jẹ rọ nyavrẹ ọvo bi kpohọ obonọ ọ be nya. Ẹruore nọ o wo o kẹ riẹ udu.

Nọ Abraham ọ jọ ugbo kparo ruẹ ugbehru nọ Jihova o dhesẹ kẹe no, ọ tẹ ta kẹ idibo riẹ nọ a jọ etẹe hẹrẹ, re ọyomariẹ avọ Aiziki a nyai dhe idhe. Ọ ta kẹ ae ududu nọ ọyomariẹ avọ Aiziki a ti zihe bru ai ze. Nọ aimava ọvo a te oria jọ no evaọ ehru ugbehru na, Abraham o te je ru epanọ ọ rẹ rọ rehọ ọmọzae riẹ dhe idhe. Aiziki ọ rọwo nọ ọsẹ riẹ nọ ọ kpako no ọ gbae abọ gbe awọ jẹ rehọ iẹe kiẹzẹ ehru agbada-idhe na. Abraham ọ tẹ kpare obọ avọ amagha nọ o kru re o ru oware nọ emamọ ọsẹ ọvuọvo ọ rẹ sai ru hu. Rekọ ọ dobọji nọ ukọ-odhiwu jọ o se odẹ riẹ jẹ ta kẹe nọ: “Whọ nwa ọmọ na oma ha.”

Kẹsena Ọghẹnẹ o te jiri Abraham fikinọ o wo ẹrọwọ je yoẹme. Ọ tẹ wariẹ eyaa nọ ọ ya kẹ Abraham inọ o ti ru emọ riẹ vihọ. O ve ti ru re “erẹwho otọakpọ na kpobi” a wo eghale fikinọ Abraham o yoẹme.

Jihova o gbe bi ru eyaa kpobi nọ ọ ya kẹ Abraham na gba. Eghale nọ i bi no eyaa na ze e te jọ bẹdẹ bẹdẹ. Iku Abraham avọ Aiziki na i te je dhesẹ oware ofa jọ kpahe Jihova. I ru omai riẹ omoware jọ kpahe edada nọ Jihova o ti thihakọ riẹ re ọ sai siwi ahwo kpobi nọ i wo ẹrọwọ. Wọhọ epanọ u no Abraham eva ze re ọ rọ ọmọ oyoyou riẹ dhe idhe na, ere ọvona u ti no Jihova eva ze re, re ọ rọ Jesu, Ọmọ ọvo riẹ dhe idhe fiki ahwo kpobi. (Jọn 3:16) Fikiere, nọ ma te bi se kpahe epanọ Abraham ọ jẹ te rọ rehọ oware nọ o mae ghare kẹe dhe idhe na, u re wuhrẹ omai epanọ Jihova o you omai te.

Ma ti wo ẹrọwọ ziezi wọhọ Abraham otẹrọnọ ma be hai roro kpahe eme nọ Jihova ọ ta evaọ oke nọ u kpemu gbe eware nọ o ru. Nọ ẹrọwọ mai ọ be ga na, ma te gudu re. U du gwọlọ nọ ma ruawa ha sọ Ọghẹnẹ ọ te ta kẹ omai nọ ma ru oghẹrẹ oware nọ ọ ta kẹ Abraham nọ o ru na. Anwọ oke yena ze, ọ re gbẹ vuẹ ohwo ọvo nọ o ru oware utioye he. Rekọ oware nọ ma riẹ họ: Ghelọ oware kpobi nọ Ọghẹnẹ ọ ta kẹ omai nọ ma ru kẹhẹ, ma te wo ẹrọwọ, ma ti wo udu nọ ma ti ro ru ei. Ma te yoẹme, ma ti wo eghale buobu vi epanọ ma rẹro rai dede!

Se iku Ebaibol na:

• Emuhọ 22:1-19

• Ahwo Hibru 11:11, 12, 17-19

Onọ nọ a rẹ ta ẹme kpahe:

Eme gbe eme Abraham o ru ro dhesẹ nọ ọ gudu evaọ uzuazọ riẹ evaọ oke nana?

Gbẹ Kiẹ Kodo

1. 1. Eme o dhesẹ nọ Abraham yọ ohwo nọ ọ rria uzuazọ evaọ oke jọ? (g 5/12 18, ẹkpẹti; it “Abraham” ¶22-23) Uwoho 1

   Uyo ra

   

Roro Kpahe Eware nọ Who Wuhrẹ Noi Ze

• Oghẹrẹ vẹ ẹruore nọ Abraham o wo u ro fiobọhọ kẹe gudu? Nọ ma tẹ be hai roro kpahe ẹruore nọ ma wo, oghẹrẹ vẹ u re ro fiobọhọ kẹ omai gudu? Uwoho avọ 3

  Uyo ra

  

• Ẹvẹ ma sae rọ rehọ aro kele Abraham gudu, ma ve ru oware jọ evaọ okenọ . . .

  • ma tẹ ruẹ uvẹ nọ ma rẹ rọ ta usi uwoma? (Hib. 13:15)

    Uyo ra

  • ma te bi roro kpahe oware nọ ma rẹ rehọ eware nọ ma wo ru? (Itẹ 3:9)

    Uyo ra

  • ma tẹ riẹ nọ ahwo nọ ma gbẹ be gọ Jihova a gwọlọ obufihọ mai? (Fil. 4:18)

    Uyo ra

• Idhere efa vẹ whọ sae rọ rehọ aro kele Abraham gudu wọhọ epanọ ma ruẹ evaọ iku nana?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Abraham hayo Aiziki nọ a tẹ kpare ae ze no?

  Uyo ra

Gbe Wuhrẹ Eware Efa

Rri ividio nọ e te lẹliẹ iku na te owhẹ udu ziezi.

Rọ Aro Kele Ẹrọwọ Rai—Abraham, Abọ avọ 2 (11:10)

Oghẹrẹ vẹ Abraham o ro zihe ruọ ogbẹnyusu ọkpekpe Jihova? Kọ eme who re ru re usu nọ who wo kugbe Jihova o jọ gaga ziezi?

“Jihova O Se Rie ‘Ogbẹnyusu Mẹ’” (w16.02 8-12)