4 ABRAHAM
Ọzae Ọsosuọ nọ O Fi Ẹmo nọ O Kiẹrẹe
JIHOVA ọ ya obọdẹ eyaa jọ kẹ Abraham nọ ọ jọ ogbẹnyusu riẹ. Eyaa na e te wha eghale se ahwo-akpọ kpobi. Ọ ta kẹe nọ: “Me ti ru owhẹ fihọ orẹwho ulogbo.” Ọghẹnẹ o te je dhesẹ otọ owowoma jọ kẹ Abraham, onọ orẹwho nọ o ti no oma Abraham ze o te rria. (Emu. 12:2; 13:14, 15) Rekọ Setan ọ jẹ daoma kpobi re ọ ruẹ nọ orẹwho yena o rẹ romavia ha. Ẹdhọ ọ riẹ nọ orẹwho yena “ọmọ” nọ a ya eyaa riẹ na o ti no ze. Yọ “ọmọ” yena ọ te raha akpọ omuomu nọ Setan o bi su na jẹ raha Setan omariẹ no.—Emu. 3:15
Setan ọ tẹ jẹ wọso Abraham avọ uviuwou riẹ. Yọ ohwo jọ nọ uye o bẹ gaga họ ọmọ oniọvo Abraham nọ a re se Lọt. Okenọ Abraham avọ Lọt a jẹ gwọlọ salọ abọ nọ a rẹ jọ evaọ Ẹkwotọ Eyaa na, Abraham ọ kẹ Lọt uvẹ re ọ kake salọ. Lọt ọ tẹ salọ abọ nọ ọ mai woma nọ ọ jẹ mai wou eware. Oria na ọ kẹle okpẹwho Sọdọm, yọ ezae nọ e jariẹ “a jọ ahwo omuomu, erahaizi ilogbo evaọ aro Jihova.” (Emu. 13:8-13) U wo oke jọ nọ eva e jẹ dha ovie Sọdọm avọ ivie ahwo Kenan ene efa fikinọ a jẹ hwa osa-uzou kẹ ovie Ilam. Onana u te ru nọ a rọ kpareso ovie na. Fikiere, ovie Ilam avọ ivie esa efa a tẹ wọ no ugbobo nọ a rrọ ze te họre ivie ahwo Kenan. A te fi ai kparobọ. Nọ a je zihe kpo, a kwa eware buobu je mu ahwo rehọ. Lọt avọ uviuwou riẹ a jọ usu ahwo nọ a mu na.
Abraham họ ohwo nọ o su ezae egba esa gbe ikpegberee (318) nọ o ro le jẹ họre ivie egaga ene avọ egbaẹmo rai
Kọ eme Abraham o ti ru na? Ọ hẹ sai roro nọ Lọt ọvo ọ wha uye na se omariẹ. Keme ọye ọvo ọ salọ nọ ọ rẹ kwa kpohọ obei. Hayo ọ hẹ sae ruawa nọ mẹ tẹ dhogbo re me siwi Lọt, u ti ru nọ me ti ro lele ivie yena fi ẹmo. Ovie Shaena ọ jọ usu rai, yọ ẹkwotọ Shaena Abraham o no ze. Oware ofa họ, orọnọ ọgbaẹmo Abraham ọ nwane jọ họ rekọ othuru-igodẹ nọ o je no oria ruọ oria. Kọ ẹvẹ ọ te sai ro fi ivie ene soso nọ e rrọ gaga kparobọ? Ohwo ọ sai je roro nọ, me te kpohọ ẹmo otiọye, kọ ovao vẹ mẹ te sai ro zihe kpobọ Ọr nọ me no ze na ẹdẹ ọfa? Me te lele ai fi ẹmo, kiyọ me ru omamẹ no bẹdẹ bẹdẹ. Rekọ Abraham o roro ere vievie he. Ọ riẹ oware nọ Jihova ọ gwọlọ nọ o ru.
Evaọ oke nana, ahwo nọ a jọ uwou Abraham a bu vi ahwo odu ọvo (1,000) no. O te koko ezae nọ o wuhrẹ no họ. Idibo egba esa gbe ikpegberee (318), a tẹ wọ owọ ẹmo. Tei te ezae efa jọ a te mu ivie na họ ele. A le rai rri ofẹ ẹkpẹlobọ ovatha-ọre. A tẹ ruẹ e rai evaọ ẹkwotọ Dan. Abraham ọ tẹ ghale ahwo riẹ fihọ itu-itu, kẹsena a tẹ vẹruọ ae evaọ aso. Ewegrẹ nọ a je lele họre na i bu vi ahwo Abraham kpekufiẹ, rekọ ahwo Abraham a gobọ vi ai, ewegrẹ na i te muhọ ẹdhẹ. Abraham o te gbe je le ai nọ a be dhẹ rri ofẹ ẹkpẹlobọ ovatha-ọre na. A te fi ai kparobọ totọ kẹle Damaskọs. A te mi ai eware nọ a kwa evaọ Kenan na kpobi zihe. Ere o ro siwi Lọt avọ uviuwou riẹ!
Kọ oghẹrẹ nọ Abraham o ro dhesẹ nọ ọ gudu je wo ẹrọwọ na o were Jihova? Oware nọ o via evaọ okenọ Abraham ọ nya kẹle okpẹwho Salẹm no u dhesẹ nọ o were Jihova. Ovie okpẹwho na nọ a re se Mẹlkizẹdẹk, nọ ọ rrọ ozerẹ Jihova re o ru oware jọ. Mẹlkizẹdẹk o no obọ okpẹwho na ze ti zere Abraham, ọ tẹ lẹ ẹro kẹe re Jihova ọ ghale iẹe. Abraham ọ tẹ rehọ abọvo abakpe eware nọ e mai woma evaọ eware nọ a kwa kpozi na kẹ Mẹlkizẹdẹk.
Fikiere, o rrọ vevẹ nọ, orọnọ ẹmo obọriẹ Abraham ọ nyai fi na ha, rekọ ẹmo Ọghẹnẹ. A jọ Ebaibol na fodẹ “obe Emo Jihova.” (Ik. 21:14) O sae jọ nọ ẹmo nọ Abraham o fi na họ ẹmo ọsosuọ nọ a kere fihọ eva obe yena. Nọ ikpe buobu e vrẹ no, nọ emọ Abraham a je lele ahwo Kenan nọ a jọ muomu fi ẹmo evaọ Ẹkwotọ Eyaa na, Jihova o je fiobọhọ kẹ ahwo riẹ nọ a be gọe ziezi fi kparobọ ẹsikpobi.
Rekọ nọ ahwo Ọghẹnẹ a nyasiọ iẹe ba, ọ gbẹ jẹ thọ ae he. Ukuhọ riẹ, Jihova o le rai no oma riẹriẹriẹ fikinọ a siọ Ọmọ riẹ nọ ọ rrọ Mesaya na. Jihova ọ tẹ rehọ utu Ileleikristi nọ a rọ ẹzi wholo nọ Jesu o bi su nwene orẹwho Izrẹl na, kọ eye ọ be ghale. Jesu o wuhrẹ ahwo nọ o bi su inọ a re fi ẹmo igbabọ họ. (Mat. 26:52) Ukpoye, o wuhrẹ i rai epanọ a rẹ rọ họre Setan, iwuhrẹ erue riẹ, gbe iruemu iyoma riẹ. Jesu ọ rọ uzuazọ riẹ evaọ otọakpọ dhesẹ nọ, o gwọlọ nọ ma rẹ gudu re ma sai fi ẹmo nana kparobọ wọhọ epanọ o rẹ jọ nọ ahwo a te bi fi ẹmo igbabọ na.
Se iku Ebaibol na:
Onọ nọ a rẹ ta ẹme kpahe:
Eme gbe eme Abraham o ru ro dhesẹ nọ ọ gudu evaọ uzuazọ riẹ evaọ oke nana?
Gbẹ Kiẹ Kodo
1. Eme a ruẹ nọ u dhesẹ nọ iku nana yọ iku uzẹme? (w89 7/1 5 ¶4–6 ¶1)
2. Ebaibol na o dhesẹ oghẹrẹ nọ Sọdọm avọ Gomora e jọ. Kọ oria vẹ o kẹ imuẹro nọ Ebaibol na o dhesẹ eria yena gbagba? (it “Abade Uwhei” ¶6) Uwoho 1
BestTravelPhotography/iStock via Getty Images Plus
Uwoho 1: Makọ evaọ oke nana, iriẹ nọ e rẹ mọ ubi-ure ideti gbe oghẹrẹ ire efa e vọ oria nọ o sae jọ nọ Sọdọm ọ jọ evaọ oke anwae
3. Mẹlkizẹdẹk ọ jọ ovie gbe ozerẹ Salẹm. Diẹse Salẹm ọ jọ? (it “Salẹm”)
4. Oghẹrẹ vẹ Mẹlkizẹdẹk ọ rọ jọ wọhọ Jesu? (it “Ozerẹ Okpehru” ¶27-28) Uwoho avọ 2
Uwoho 2
Roro Kpahe Eware nọ Who Wuhrẹ Noi Ze
Abraham ọ kẹ Lọt uvẹ re ọ rehọ abọ nọ ọ mai woma evaọ ẹkwotọ na. Ẹvẹ ma sae rọ rehọ aro kele Abraham nọ ma te bi ru eware kugbe ahwo uviuwou mai, ahwo nọ ma gbẹ be gọ Jihova, gbe amọfa? Uwoho avọ 3
Uwoho 3
Abraham ọ rehọ iroro obọriẹ nyae thothọ ọmọ-oniọvo riẹ. Eme ma wuhrẹ no oyena ze?
Idhere efa vẹ whọ sae rọ rehọ aro kele Abraham gudu wọhọ epanọ ma ruẹ evaọ iku nana?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Abraham hayo Lọt nọ a tẹ kpare ae ze no?
Gbe Wuhrẹ Eware Efa
Wuhrẹ kpahe oware nọ u fiobọhọ kẹ Abraham fievahọ Jihova riẹriẹriẹ.
Ẹvẹ Abraham o ro dhesẹ nọ ọ gudu makọ taure o te ti no Ọr?
“Abraham—Ọzae nọ Ọ Gudu” (w12 1/1 6-7)