Ahmad Gharabli/AFP via Getty Images
BHA HA BABEGBE!
Agbaẹbho Kẹkẹ Dẹ Be Sabọ Kugbe Khọn Orọ bi Okale Ne Ki Ha Riia Emhin An?—Be Baibo Ta Yẹ?
Bhi ẹdẹ Sọnde, Novẹmba 20, 2022, ikolo nin COP27 United Nations do nin ele rẹ talọ ọbhi ebi emhin ki rẹ fidenọ da sotọ. Arẹmiẹn ghe ele re obọ ọbhọ ghe a dẹ ha re iyobọ nin agbaẹbho ne imanman mhọn emhin, nin emhin idunmhuri sunu je, ene bunbun bhi ẹwẹ ele lẹnmhin ghe, ọ iyi ọnin ha re ọkpẹnlẹn ọbhi ebe sunu.
Bhi Novẹmba 19, 2022, António Guterres nin ọdiọn akọwe ọsi United Nations da yọle: “Ọ wo ti mẹn bhọ rẹ lẹn ghe a mhanmhan igho nan ha rẹ re iyobọ nin ene emhin idunmhuri sunu je. Sokpan, ọne iyobọ nan ida sẹ . . . Ọne otọ nọnsẹmhan nan ribhi okhẹnan.”
Bhi Novẹmba 20, 2022, Mary Robinson nọn ka ha yi prẹsidẹnti ọsi Ireland bi High Commissioner for Human Rights ọsi UN da yọle: “Orọ bi okale nan ki miẹn nian, dẹ kẹ riia emhin an.”
Elasẹre hi ene manman wo mun ofẹn ebi ọne otọ nan ha dia yẹ bhi ẹghe odalo. Ọkpakinọn, ene agbaẹbho kẹkẹ dẹ be sabọ wẹnna kugbe rẹ mun ive nin ele vele sẹ ghe, ele dẹ lu ọle nin orọ bi okale hẹi yẹ riia emhin an? Be Baibo ta yẹ?
Agbaẹbho kẹkẹ dẹ be sabọ kuobọgbe re ọne ẹmhọn nan ọi?
Baibo rẹman ghe, aharẹmiẹn eria dọnmhegbe rẹ wẹnna kaka nin ele rẹ re emhin ọi, beji a ha da miẹn orọ bi okale bha yẹ ha riia emhin an, ọ ida fo ele. Fẹ emhin eva ne zẹle ghe:
“A ida sabọ dia emhin nọn khin an.”—Ecclesiastes 1:15.
Ebi a re ọle ta: Ugbẹloghe ọsi eria ida sabọ re emhin ọi ranmhude a bha man eria nin ele ha gbẹloghe egbe ele. (Jeremiah 10:23) Ebi agbaẹbho kẹkẹ ki rẹ kugbe sẹ yẹ, la dọnmhegbe sẹ yẹ, ele ida sabọ re emhin ọi ne riia bhi ọne otọ nan.
“Eria ki ha hoẹmhọn egbe ele ọkpa. Ele ki ha hoẹmhọn igho, . . . [ele] ida yẹ ko ta ọta re obọ rẹkhan ọlẹn.”—2 Timothy 3:2, 3.
Ebi a re ọle ta: Baibo ka tale ọbhi otọ khẹ ghe, bhi ẹghe nọnsẹmhan nan, eria ne bunbun dẹ ha siakhan, bhiriọ ele ida ka wẹnna kugbe rẹ lu emhin nin eria nekẹle ha da miẹn elele.
Ebezẹle nin mhan ha da ha mhọn ikhuaẹloghe
Ọ iyi ive nin eria ne ribhi ugbẹloghe vele ha sabọ hẹnhẹn ọne otọ ọi bhi ẹghe odalo. Jehova zẹ ọria nọn ha sabọ gbẹloghe ọne agbọn nan, ọne ọria hi Jesu Kristi. Ghe ebi Baibo tale rẹji ọle:
“Ọne ugbẹloghe ki ha ribhi ijian-abọ nọnsọle. A ki ha tiọle, Ọnọn Bhude nọn Gbale, Osẹnobulua nọn Mhọn Ahu, Aba ọsi Itẹbitẹ, Ọnọn Gbẹloghe bhi Ọfure.”—Isaiah 9:6.
Jesu his Ojie ọsi Agbejele nọnsi Osẹnobulua, la ugbẹloghe nọn ribhi okhun. (Matthew 6:10) Ọle mhọn ọne ahu, ẹwanlẹn, bi ọne ọkhọle rẹ hẹnhẹn ọne otọ nan ọi bi emhin ne riia bhọ. (Psalm 72:12, 16) Ẹghe nin ọle ha rẹ ha gbẹloghe, ọne ejele nọn ribhi okhun nin ọle ha na ha gbẹloghe dẹ fuẹn eria ne riia ọne otọ nan an, sẹyẹ, ọle ki hẹnhẹn emhin nan riia bhi ọne otọ nan.—Revelation 11:18; Isaiah 35:1, 7.
Nin uwẹ luẹ ba ebi a ha rẹ re ọkpẹnlẹn ọbhi orọ bi okale ne riia emhin an bhi ọne otọ nan sẹsẹsẹ, tie ọne uhọnmhọn-ọta nọn yọle, “Climate Change and Our Future—What the Bible Says.” (Ebi Baibo Tale Rẹji Ebi Emhin Ne Fidenọ bhi ọne Otọ Nan Ha Rẹ Rẹso Ẹghe Odalo Nọnsẹmhan Yẹ)