Ẹghe Okale Nọn Manman Kaka—Be Baibo Ta Yẹ?

“A yọle ghe, ọne ukpe nan, ọle hi ukpe nọn sẹ to nẹ bhi otọ China, sẹyẹ, ọle hi ukpe nọnzi ea nin ije rebhe sẹ ka nẹ bhi ẹghe okale.”—The Guardian, Sẹtẹmba 7, 2022.
“Okale dẹ ha ribhi ijeso bhi otọ Africa bhi ẹkẹ ikpe isẹn ne ke egbe.”—UN News, Ọgọst 26, 2022.
“A ha wa otọ Europe ọbhi ijan ea, obọ eva bhọ dẹ miẹn ẹghe okale nọn bha sẹ ka sunu khẹ bhi ẹkẹ ikpe 500.”—BBC News, Ọgọst 23, 2022.

Ẹbho ne bunbun ne lẹn ẹlo ebi ẹghe okale bi orọ dia yẹ yọle ghe, ọne okale dẹ ha khọ ọbhọ. A dẹ be miẹn ẹghe nin emhin ha rẹ ha mhẹn? Be Baibo Ta Yẹ?

Ebi Baibo tale rẹji okale nọn sunu

Baibo yọle ghe bhi ẹghe nọnsẹmhan nan:

“Ukhunmhun . . . ki ha sunu bhi ije kẹkẹ”—Luke 21:11.

Okale kẹ si ukhunmhun re. Ene ukhunmhun, iloya, bi uu nin okale si re mun ọta akhasẹ ne ribhi Baibo sẹ.—Revelation 6:6, 8.

Ebezẹle nin okale da ha khọ ọbhọ

Baibo taman mhan ebe manman zẹ nin okale da ha khọ ọbhọ. Ọ yọle:

“Ọ iribhi obọ ọria nọn khian, nin ọle rẹ ha dia ukpoẹ nin ọle zẹ.”—Jeremiah 10:23.

Ọnan rẹman ghe eria ida sabọ “dia” egbe ele la ha gbẹloghe egbe ele. Uwedẹ nin ele rẹ fuẹn ebi Osẹnobulua manlẹn zẹle nin okale nọn riia emhin an da ribhọ. Sẹyẹ, ọle zẹle nin amẹn bha da yẹ bun sẹ nan noo.

Ekhẹn azemhinre ne bunbun yọle ghe, uwedẹ nin eria rẹ lu emhin, ọle si ọkhualulu re, nọn zẹle nin okale nọn khua da riia emhin an bhi otọ agbọn rebhe.
Ẹlobhọ bi uwedẹ nin ẹbho ne ribhi ihe irẹ ria ẹmhọn ebi ẹghe odalo ha dia yẹ ọkuẹsẹ ele gbe uhi, ọle zẹle nin ẹbho da gia eran an bhi ẹgbo rebhe, riia ahoho a bi emhin nekẹle nin Osẹnobulua manlẹn. Ene emhin nan nin ẹbho lu, dẹ sabọ re ọle miẹn ghe a bha yẹ ha miẹn amẹn noo.

Ọkpakinọn, Baibo re ikhuaẹloghe nin mhan.

A dẹ be miẹn ẹghe nin emhin ha rẹ ha mhẹn?

Baibo yọle ghe Osẹnobulua dẹ re ọkpẹnlẹn ọbhi ẹmhọn amẹn nan iyẹ miẹn noo. Be ọle ha rẹ lu ọle yẹ?

1. Osẹnobulua dẹ “fuẹn ene riia ọne otọ nan an.” (Revelation 11:18) Ọle dẹ fuẹn elu-emhin-ebe ne mhọn ẹlobhọ sibhi ọne otọ nan re, ranmhude emhin nin ele lu riia ọne otọ nan an.—2 Timothy 3:1, 2.
2. “Ọghọdọ dẹ dọ ha ribhi otọ nọn ka amẹn an.” (Isaiah 35:1, 6, 7) Ọne otọ nan nin okale riia, Osẹnobulua ki re ọle kiẹn otọ ọfubhegbe nin amẹn ye.
3. “Uwẹ gbẹloghe ọne otọ nan, uwẹ re ọle kiẹn ọnọn manman mọn ikpẹ bi ọnọn manman biẹ ebale.” (Psalm 65:9) Osẹnobulua dẹ nan erọnmhọn ọbhi ọne otọ nan, bhiriọ, ebale ne mhẹn bhi unun bi amẹn nọn khiale ki vuọn ije rebhe.

Nin uwẹ rẹ luẹ ba ebi emhin ne fidenọ bhi ọne otọ nan rẹ mun ọta akhasẹ ne ribhi Baibo sẹ yẹ, tie ọne uhọnmhọn-ọta nọn yọle, “Climate Change and Our Future—What the Bible Says” (Ebi Baibo Tale Rẹji Ebi Emhin Ne Fidenọ bhi ọne Otọ Nan Ha Rẹ Rẹso Ẹghe Odalo Nọnsẹmhan Yẹ).

Nin uwẹ rẹ luẹ ba ive ne ribhi Baibo rẹji ebi a ha rẹ hẹnhẹn ọne otọ nan ọi yẹ, tie ọne uhọnmhọn-ọta nọn yọle, “Who Will Save the Earth?” (Họla Ha Hinmhin ọne Otọ Nan?)

Nin uwẹ rẹ lẹn ebi Baibo ha rẹ sabọ rẹkpa uwẹ yẹ rẹ ziẹngbe ọkakale ranmhude okale bi orọ ne ki riia emhin an ẹlẹnan, tie ọne uhọnmhọn-ọta nọn yọle, “Extreme Weather—Can the Bible Help You to Cope?” (Baibo Dẹ Be Sabọ Rẹkpa Uwẹ ziẹngbe Ẹghe Orọ bi Okale Nọn Ki Ha Fidenọ?)