BHA HA BABEGBE!

A Riia Otọ A—Be Baibo Ta Yẹ?

“Ebi eria lu dẹ kẹ re emhin ha fidenọ bhi ọne otọ nan. Amẹn dẹ kẹ muno agbaẹbho ne khua. Ọkhualulu nan bha sẹ ka miẹn khẹ ki ha ribhọ. Efi ki ha riia emhin an. Amẹn iyẹ da ha sẹ nan noo. Eran bi irhi bi elanmhẹn eso iyẹ da ha ribhọ. Ene emhin nan igheghe yi okha. Ekhẹn azemhinre yọle ghe, ene emhin nan dẹ kẹ sunu ranmhude uwedẹ nan rẹ noo emhin Osẹnobulua manlẹn.”—Ọta nin António Guterres nin ọdiọn akọwe ọsi United Nations tale, nan gbẹn bhi Epre 4, 2022, rẹji ebi Gọvamẹnt Kẹkẹ Rẹ Noo Emhin Yẹ Ne Ha Sabọ Re Emhin Fidenọ bhi ọne Otọ Nan.

“Ekhẹn azemhinre re ọle sekha nin ẹbho ghe, bhi ẹghe nọn bha yẹ ree gbe nian, ogba ne mhọn-ose ne bun sẹbhi 423 ne ribhi United States dẹ kẹ riia ranmhude emhin ne fidenọ, manman nọn beji a miẹn ghe, ọkhualulu nọn ki ha khọ ọbhọ dẹ sabọ riia emhin ne ribhi ene ogba a. Asabọmiẹn ikpeta bhi ene ogba nan, ọle ene emhin nan ida re egbe so. Ọne ọkakale nan nọn ha kẹ sunu wo khọ emhin eso nan gbẹn ọbhi Baibo: eranlẹn bi okpamẹn, esha nọn damẹn an, ẹdẹ nọn kpa kua bi ọkhualulu.”—“Flooding Chaos in Yellowstone, a Sign of Crises to Come,” (Okpamẹn Nọn Riia Emhin An bhi Yellowstone Rẹman Ghe Ọkakale Nọn Khua Vade) The New York Times, Jun 15, 2022.

A dẹ be sabọ hẹnhẹn emhin ne riia bhi ọne otọ nan? Ahamiẹn iriọ, họla ha sabọ hẹnhẹn ele ọi? Fẹ ebi Baibo ta yẹ.

A ka tale ghe emhin dẹ ha riia bhi ọne otọ nan

Baibo yọle ghe Osẹnobulua dẹ “fuẹn ene riia ọne otọ nan an.” (Revelation 11:18) Ọne ulọnlẹn nan bhi Baibo man mhan ene emhin ea nan:

1. Emhin nin eria lu dẹ manman riia ọne otọ nan an.
2. Ẹghe vade nan iyẹ da ha riia ọne otọ nan.
3. Osẹnobulua ha sabọ hẹnhẹn emhin nan riia bhi ọne otọ nan, ọ iyi eria.

Emhin dẹ ha mhẹn bhi ọne otọ bhi ẹghe odalo

Baibo yọle ghe, “ọne otọ nan dẹ ha ribhọ bhi ighegheghe.” (Ecclesiastes 1:4) Eria dẹ ha nyẹnlẹn bhọ.

“Ene khiale dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.”—Psalm 37:29.

A dẹ hẹnhẹn emhin rebhe ne riia bhi ọne otọ nan.

“Ọne ojẹgbo bi ọne otọ nọn ka amẹn an dẹ ha ghọnghọn, sẹyẹ ọne ugbẹbubu ki mhọn-ose a bọsi eji aroro natiọle saffron da jẹre.”—Isaiah 35:1.

Nin uwẹ rẹ lẹn ebezẹle nin mhan ha da sabọ rẹọbhọ ghe Osẹnobulua dẹ hinmhin ọne otọ nan, tie ọne uhọnmhọn-ọta nọn yọle, “Who Will Save the Earth?” (Họla Ha Hinmhin ọne Otọ Nan?)

Nin uwẹ rẹ lẹn ebezẹle nin mhan ha da sabọ rẹọbhọ ghe ẹghe odalo nọnsẹmhan dẹ ha mhẹn arẹmiẹn emhin riia bhi ọne otọ nan, tie ọne uhọnmhọn-ọta nọn yọle, “Climate Change and Our Future—What the Bible Says.” (Ebi Baibo Tale Rẹji Ebi Emhin Ne Fidenọ bhi ọne Otọ Nan Ha Rẹ Rẹso Ẹghe Odalo Nọnsẹmhan Yẹ)

Nin uwẹ rẹ lẹn ebi Baibo ha rẹ sabọ rẹkpa uwẹ yẹ rẹ ziẹngbe ọkakale ranmhude emhin ne riia bhi ọne otọ nan, tie ọne uhọnmhọn-ọta nọn yọle, “Extreme Weather—Can the Bible Help You to Cope?” (Baibo Dẹ Be Sabọ Rẹkpa Uwẹ ziẹngbe Ẹghe Orọ bi Okale Nọn Ki Ha Fidenọ?)