Comstock Images/Stockbyte via Getty Images
BHA HA BABEGBE!
Họla Uwẹ Ha Zẹ Nọn Ha Sun Uwẹ?—Be Baibo Ta Yẹ?
Bhi ẹkẹ uzana eso ne vade nian, a dẹ ha lu ilọnmhọn ahinmhin-ibo bhi agbaẹbho kẹkẹ bhi otọ agbọn rebhe. Ẹbho ne bunbun wo ria ẹmhọn ọria nin ele ha zẹ nọn ha sun ele.
Be Baibo ta yẹ?
Ahu ọsi eria ne gbẹloghe mhọn eji ọ sẹle
Baibo tẹmhọn eji ahu ọsi eria ne gbẹloghe sẹle.
“Bha hẹi mun udu nyan obhi ojie soso la ọria soso nọn ida sabọ miẹn ibha fan. Ẹlinmhin nọnsọle ha kpanọ, ọle ki fikie diọbhi otọ; ọne ukpẹdẹ nin, iria-eria nọnsọle yu.”—Psalm 146:3, 4.
Ene gbẹloghe nan riale ghe ele bhọ mhẹn nẹ, dẹ sẹyẹ yu. Rẹ deba ọnin, ele ida sabọ yọle ghe, ene ha gbẹloghe sade ele sibhọre dẹ sẹyẹ ha lu iwẹnna esili nin ele ka ha lu.—Ecclesiastes 2:18, 19.
Ẹmhọanta nọn ribhọ hi, Baibo rẹman ghe Osẹnobulua bha man eria nin ele tobele ha gbẹloghe egbe ele.
“Ọ iribhi obọ ọria nọn khian, nin ọle rẹ ha dia ukpoẹ nin ọle zẹ.”—Jeremiah 10:23.
Ọria be ribhọ ẹlẹnan nọn ha sabọ gbẹloghe nọnsẹn?
Ọria nin Osẹnobulua zẹle nọn ha gbẹloghe
Baibo rẹman ghe ọria nọn sẹ ọnọn ha gbẹloghe nan yẹ gbaẹkẹ ọle, ọle Osẹnobulua zẹ nọn ha gbẹloghe. Ọne ọria hi, Jesu Kristi. (Psalm 2:6) Jesu hi Ojie ọsi Agbejele nọnsi Osẹnobulua. Okhun ọle ha na ha gbẹloghe ọne otọ nan.—Matthew 6:10.
Uwe dẹ be re obọ ọbhi ugbẹloghe ọsi Jesu? Baibo tẹmhọn ebezẹle nọn da khẹke nin mhan lu iriọ:
“Mun ekpẹn nin ọne ọmọn [Jesu Kristi], nin ẹkẹ hẹi dọ ha khọ Osẹnobulua, nin bha hẹi dọ fuẹn an, ranmhude ohu dẹ kẹ re ọle. Eghọnghọn hi ọsi ọrebhe ne nẹko bhi odotọ Ọle.”—Psalm 2:12.
Ọne ẹghe nan ọ rẹ khẹke nin mhan zẹ ọnọn ha gbẹloghe mhan. Ọta akhasẹ bhi Baibo rẹman ghe, ukpe 1914, ọle Jesu rẹ munhẹn ha gbẹloghe. Sẹyẹ, ghe, bhi ẹghe nọn bha ree gbe nian, Agbejele nọnsi Osẹnobulua dẹ re ọkpẹnlẹn ọbhi ugbẹloghe ọsi eria rebhe.—Daniel 2:44.
Nin uwẹ rẹ luẹ ba ebi uwẹ ha rẹ re obọ ọbhi ugbẹloghe nọnsi Jesu yẹ, tie ọne uhọnmhọn-ọta nọn yọle, “Choose to Support God’s Kingdom Now!” (Re Obọ Ọbhi Agbejele Nọnsi Osẹnobulua Nian!)