31 OBHOKHAN ỌMANMHẸN ỌKPA NIN OBHI IZRẸL
Ọle Da Tẹmhọn Osẹnobulua Bhi Agbaẹbho Nọn I Yi Ọsọle
OBHOKHAN ọmanmhẹn ọkpa ribhọ nọn ha nyẹnlẹn bhi otọ Izrẹl bhi ẹghe nin Jehoram rẹ ha gbẹloghe. Baibo bha taman mhan elin ọsi ọne obhokhan nan. Ọkpakinọn, ọ tẹmhọn emhin kpataki nin ọne obhokhan lu. Jehoram bi ibhokhan Izrẹl da fikekegbe Jehova. Bhiriọ, Jehova da re otọ nin ibhokhan Siria rẹ ha mun okhọn bu ele re, do ele emhin ne, yẹ re eso bhi ẹwẹ ele kiẹn igbọn. Ẹdọkpa, ibhokhan Siria da mun ọne obhokhan ọmanmhẹn nan ha khian Siria.
Ofẹn dẹ wo ha mun ọne obhokhan nan ẹghe nan rẹ mun ọlẹn. Ọnan da wo re ene biẹ ọle ha lu akhiẹ yẹ kpokpo egbe. Ọne obhokhan da ha wẹnna bhi uwa ọsi Neman nin ọkakulo. Ọ da ha yi ọguọmhandia ọsi okhuo Neman. Ọne obhokhan wo dọnmhegbe nin ọle rẹ ha ghọnghọn arẹmiẹn idia nin ọle ye bha lẹkhẹ. Asabọmiẹn ọle da kere ghe Neman bi ọrebhe ne ribhi azagba-uwa nọnsọle i ghọnghọn. Neman tobọle bhọ da ha khọnmhọn emianmhẹn egbekẹn. Emianmhẹn nọn manman kaka wo khọnan. Ọne emianmhẹn re itẹ vuọn ọria bhi egbe, ẹgheso, ẹbho bhọ i miuhọnmhọn bhọ.
Ọle da ha nyẹnlẹn bhi ẹwẹ ẹbho ne ga ẹbọ, ọrẹyiriọ, ọle da sẹyẹ re ẹkẹ-ẹjẹjẹ bi izebhudu man
Ọne obhokhan nan wo ha mhọn ọkhọle esili. Arẹmiẹn ọle lẹnmhin ghe oghian ọsi ibhokhan Izrẹl Neman khin, ọle da yẹ tohan ọlẹn bi okhuo ọle. Ọle lẹn sẹbhọ ghe ọria ribhọ nọn ha sabọ re egbe daan ọlẹn. Asabọmiẹn ene biẹ ọle wo ha taman ọlẹn emhin ọhan-ilo kẹkẹ nin Jehova noo Ẹlaisha nin akhasẹ rẹ lu. Ọkpakinọn, ọle bha lẹn si Ẹlaisha sẹ ka re egbe daan ọria nọn khọnmhọn emianmhẹn egbekẹn khẹ. Ọrẹyiriọ, ọne obhokhan ọmanmhẹn da wo rẹọbhọ ghe, Osẹnobulua nọnsọle nin Jehova dẹ sabọ noo Ẹlaisha nin akhasẹ rẹ re egbe daan Neman.
Asabọmiẹn ọne ọmanmhẹn da ha riale si ọle tẹmhọn Osẹnobulua man Neman. Asabọmiẹn ọle lẹnmhin ghe ọnan dẹ si okhẹnan ji ọle, ranmhude ẹbọ natiọle Rimọn, ọle Neman ga, sẹyẹ, ẹghe-ẹghe ọle rẹ re ojie ọsi Siria yo aluẹbọ ọsi Rimọn dọ ha ga bhi enin. Ibhokhan Siria wo rẹọbhọ ghe ọne osẹ natiọle Rimọn manman wo mhọn ahu. Ọne obhokhan ọmanmhẹn nan bha lẹn ebi Neman ha rẹ lu emhin yẹ sade ọle taman ọlẹn ẹmhọn Jehova. Ahamiẹn ọle taman Neman ghe Jehova dẹ sabọ re egbe daan ọlẹn, ọnan dẹ sabọ re ẹkẹ khọ ọle. Sẹyẹ, Neman sabọ ha riale, ‘Ebi osẹ nọnsẹmhẹn bha sabọ lu, Jehova ha ki dọ lu ọle?’ Edandan i ribhọ ghe ọne obhokhan nan wo ha nan erọnmhọn ji Jehova nọn re izebhudu nanlẹn. Bhiriọ, ọle ki da bu okhuo Neman yẹ taman ọlẹn yọle: “Ahamiẹn ebeanlẹn mẹn bu akhasẹ nọn ribhi Samaria, ọle ki re egbe daan ọlẹn bhi emianmhẹn egbekẹn nin ọle khọnmhọn.”
Ọnan ọkpa ọta nin ọne obhokhan tale nan gbẹn ọbhi Baibo, ọle bha ta ọta ne bunbun. Ọkpakinọn, ebi ọle ta da wo wẹnna. Ọle ki ta ọnan man okhuo Neman fo, Neman da bu ojie ọsi Siria natiọle Bẹnhedad dọ taman ọlẹn ebi ọne obhokhan Izrẹl tale. Bẹnhedad da je Neman ha khian otọ Izrẹl. Ọle da yẹ gbẹn ilẹta nin Neman, nin ọle re ji ojie ọsi Izrẹl natiọle Jehoram. Bhi ọne ilẹta, ọle da taman Jehoram nin ọle re egbe daan Neman.
Ẹghe nin Neman ki rẹ kpanọ ha khian otọ Izrẹl, azagba-uwa nọnsọle da ha khẹ si egbe dẹ gene daan ọlẹn. Edandan i ribhọ ghe, ọne obhokhan ọmanmhẹn wo ha bhii Jehova nọn re egbe daan Neman, beji ọ ha da khia bhi ẹlo a ghe, Jehova ọkpa hi Osẹ ọsi ẹmhọanta. Asabọmiẹn Neman gbe uzana ne bunbun bhi otọ Izrẹl. Ẹdọkpa, ọle da fikiere. Ria ebi ọ ha rẹ manman re azagba-uwa nọnsọle ha ghọnghọn yẹ beji ele daghe ọle ghe Neman fikiere bhi uwa, sẹyẹ, egbe daan ọlẹn. Egbe nọnsọle da riẹ-riẹ a, ọ da diabe ọsi obhokhan!
Ria ebi ọ ha dia ọne obhokhan ọmanmhẹn bhi egbe yẹ ẹghe nin ọle rẹ họn ebe sunu ji Neman. Ẹghe nin Neman rẹ diọbhi otọ Izrẹl, Ẹlaisha da miẹn ọlẹn ọbhi egbe. Ọkpakinọn, ebi Ẹlaisha taman ọlẹn nin ọle lu, da re ohu re ọle. Eguọmhandia ọsi Neman da ha bhii ọle nin ọle lu ebi Ẹlaisha taman ọlẹn nin ọle lu. Ọle da kere ghe ọkhẹke nin ọle ha mhọn idegbere. Bhiriọ, ọle da dọ gbegberuẹ bhi Ẹdẹ Jọdan igba ihinlọn. Ọle ki lu iriọ fo, egbe da daan ọlẹn. Ebe re ọne obhokhan nan ha ghọnghọn nẹ hi, ebe sunu beji egbe daan Neman fo. Neman da wo deba ọle ha ga Jehova nin Osẹnobulua nọnsọle!
Ene emhin kpataki nan sunu ranmhude, obhokhan ọmanmhẹn ọkpa re izebhudu tẹmhọn Osẹnobulua bi ẹmhọn akhasẹ nọnsọle man Neman. Bhi ọsi ẹmhọanta, mhan bha lẹn elin ọsi ọne obhokhan ọmanmhẹn nan, ọkpakinọn Jehova lẹn elin ọlẹn. Ahamiẹn mhan re egbe khọkhọ ọne obhokhan ọmanmhẹn nan bhi izebhudu nin ọle rẹman, ẹlo mhan dẹ sẹbhi ẹghe nin Jehova ha rẹ riọ ọle kpanọ bhi uu. Ria ẹmhọn ebi ọ ha rẹ manman re mhan ha ghọnghọn yẹ sade mhan miẹn ọne obhokhan ọmanmhẹn nan bhi Otọ Ọfubhegbe, dọ lẹn elin ọlẹn, bi emhin ebhebhe ne sunu bhi iẹnlẹn nọnsọle!
Tie ọne okha bhi Baibo:
2 Kings 5:1-19
Inọnta:
Uwedẹ nela ọne obhokhan ọmanmhẹn nin obhi Izrẹl rẹ re izebhudu man?
Manman Guanọ Otọle
1. Bezẹle nin ofẹn ibhokhan Siria da ha mun ọne obhokhan ọmanmhẹn? Bezẹle nin emhin nin ele lu da han ọle ilo? (w96 5/15 8 ¶3) 1
Courtesy of Musée du Louvre, Paris
Ifoto 1: Asabọmiẹn ẹbọ natiọle Rimọn nin ibhokhan Siria ha ga bhi ẹghe ẹdẹlẹ khọnan
2. Be sunu ji ẹbho ne khọnmhọn emianmhẹn egbekẹn? (it “Emianmhẹn egbekẹn” ¶3-5)
3. Bezẹle nin Ẹlaisha bha da miẹn Neman ene emhin nin ọle rẹ lu ẹsele nanlẹn? (w05 8/1 9 ¶2)
4. Bezẹle nin Ẹlaisha da rẹọbhọ ghe Jehova dẹ rẹhunmhan Neman arẹmiẹn ẹbọ natiọle Rimọn ọle ga? (2 Ki. 5:18, 19; w05 8/1 9 ¶3) 2
Ifoto 2
Ria Eria Nyan Emhin Nin Uwẹ Luẹle
Ọkakulo ọsi eyokhọnlẹn ọsi Siria Neman khin. Ọle hi ọnọn wo ha mun okhọn bu ibhokhan Izrẹl. Ọrẹyiriọ, Jehova da re egbe daan ọlẹn. Itohan Jehova re inian rẹman ọlẹn arẹmiẹn ọle i ga Ọle, sẹyẹ, ọle i yi obhokhan Izrẹl. Be ọnan man mhan le rẹji Jehova? 3
Ifoto 3
Be ijiẹmhin ọsi ọne obhokhan ọmanmhẹn nan ha rẹ sabọ re izebhudu nin uwẹ yẹ rẹ tẹmhọn Osẹnobulua aharẹmiẹn ofẹn mun uwẹ?
Uwedẹ ebhebhe nela uwẹ ha rẹ sabọ re egbe khọkhọ ọne obhokhan ọmanmhẹn bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn ọne obhokhan ọmanmhẹn nan le sade a riọ ọle kpanọ bhi uu?a
Sẹyẹ Fẹ Ene Emhin Nan Ghe
A bha tẹmhọn elin ọsi ọne obhokhan ọmanmhẹn nan bhi Baibo, ọnan be rẹman ghe ọle bha ghan bhi ẹlo nọnsi Jehova?
“Bezẹle Nin A Bha Da So Elin Ọsi Ẹbho Eso Bhi Baibo?” (w13 8/1 10)
Fẹ ebi ibhokhan ẹlẹnan ha rẹ sabọ re izebhudu man yẹ beji ọne obhokhan ọmanmhẹn nin obhi Izrẹl lu.
a Ahamiẹn ọne obhokhan ọmanmhẹn nan wanre ọkuẹsẹ ọle yu, ọnin rẹman ghe a ha riọ ọle kpanọ bhi uu ọle i yẹ da ha yi obhokhan.