“Eo Jehova, Huẹan Tan Ọlẹn Ẹlo A”

AGBAẸBHO ọkpa ribhọ natiọle Dotan. A gbe ogbe nẹga ọne agbaẹbho, sẹyẹ, uke oke ọ ha ye bhi otọ Izrẹl. Enin Ẹlaisha nin akhasẹ da ha nyẹnlẹn. Ọsewewiẹ ọkpa, ọguọmhandia ọsi Ẹlaisha da dagbare bhi ole. Ebi ọle daghe da re udu wa ọle. Ọle da daghe eyokhọnlẹn ọsi Siria ne manman mhọn ahu, ne hẹn akasi bi awẹnẹwẹnẹ nabhi ọne agbaẹbho bhi ọsasọn. Ele da vẹ nẹga ọne agbaẹbho. Ẹlaisha nin akhasẹ ele vae dọ mun. Ranmhude ofẹn nọn ha mun ọguọmhandia ọsi Ẹlaisha, ọle da runẹ bu ebeanlẹn ọlẹn dọ taman ọlẹn ebi ọle daghe.

Ọnan i yi ẹghe ọhẹnhẹn nin Ẹlaisha rẹ ha ribhi okhẹnan. Ikpe ne bunbun ọkuẹsẹ ọne ẹghe nan, Jehova da je Ẹlaija nin akhasẹ nin ọle dọ zẹ Ẹlaisha, yẹ man ọlẹn emhin beji ọle ha da sabọ ha lu iwẹnna nin ọle lu. Bhiriọ, Ẹlaisha da kiẹn ọguọmhandia ọsi Ẹlaija bhi ene ẹghe nin Ehab, Jezibẹl nin esọn, bi Ahazaya nin ọmọn nọnsele rẹ ha gbẹloghe. Ene ẹbho nan wo he akhasẹ nesi Jehova. Ele da wo ha guanọ nin ele gbono ele a. Ẹdọkpa, beji Ẹlaija bi Ẹlaisha ko rẹ ha khian, awẹnẹwẹnẹ bi akasi ne bhala bii eranlẹn da wo re osukpa zegbere bhi okhun. Bhi ọne ẹghe nin, ukpahoho da mun Ẹlaija ha khian okhun. Asabọmiẹn Ẹlaisha bha yẹ kie miẹn ọmọẹ ọle. Ọrẹyiriọ, ọle da sẹyẹ ha lu iwẹnna nin Ẹlaija man ọlẹn le. Ọle hi ọnọn ki ha mun ọkalo bhi ẹwẹ akhasẹ nesi Jehova ne ha rẹkpa ibhokhan Izrẹl rẹ ne obọ sibhi ilọnmhọn ẹbọ re.—2 Ki. 2:15.

Jehova da re ahu nin Ẹlaisha rẹ ha lu emhin ọhan-ilo kẹkẹ. Ọkpa bhi emhin ọhan-ilo nin ọle lu hi, ọle da re egbe daan Neman nin ọkakulo ọsi Bẹnhedad nin ojie ọsi Siria. Arẹmiẹn akhasẹ nọn ribhi otọ Izrẹl re egbe daan ọkakulo ọsi Bẹnhedad, ọle da sẹyẹ ha mun okhọn bu ibhokhan Izrẹl re. Ọkpakinọn, Jehova da wo ha taman Ẹlaisha agbaẹbho nin Bẹnhedad ha ki gbo mun okhọn bu. Bhiriọ, Ẹlaisha da ha taman ojie ọsi Izrẹl nin ọle hẹi sẹbhi ene agbaẹbho. Ẹkẹ da wo manman ha khọ Bẹnhedad. Ọle da nọọn eguọmhandia nesọle yọle, ‘ọria nela dọ ha taman ibhokhan Izrẹl emhanmhan nesẹmhẹn?’ Ọkpa bhi eguọmhandia nesi Bẹnhedad da taman ọlẹn ghe, Ẹlaisha nin akhasẹ nọnsi Jehova nọn. Ọle hi ọnọn dọ ha “taman ọnojie ọsi Izrẹl emhin rebhe nin uwẹ ta bhi ẹkẹ ugha nọnsẹ.” Ẹghe nin Bẹnhedad ki rẹ lẹn ghe Ẹlaisha ribhi Dotan, ọle da je ikpia nesọle nin ele dọ mun ọlẹn re.

Ọguọmhandia ọsi Ẹlaisha hi ọnọn ka daghe eyokhọnlẹn ọsi Siria ne dọ mun Ẹlaisha. Ọle da runẹ bu Ẹlaisha yẹ taman ọlẹn yọle: “Eo, ebeanlẹn mẹn! Be imhan ha ki khian yẹ nian?” Ẹlaisha da wo daghe ọle ghe ofẹn mun ọguọmhandia nọnsọle. Bhiriọ, ọle da ta ene ọta nan man ọlẹn nọn ziẹn ọle udu. Ọle da yọle: “Hẹi ji ofẹn mun uwẹ! Ranmhude, ene deba mhan bun nẹ ene deba ele.” Ene ọta nan sẹyẹ wo ziẹn mhan udu ẹlẹnan. Asabọmiẹn ọta nin Ẹlaisha ta dẹ wo han ọne ọguọmhandia nan ilo. Ọle sabọ ha riale, ‘Be itue eva ha rẹ sabọ ne eyokhọnlẹn ne bunbun khọnlẹn yẹ?’ Bhiriọ, Ẹlaisha da nan erọnmhọn yọle: “Eo Jehova, huẹan tan ẹlo nọnsọle a, beji ọle ha da daghe.”

Jehova da re ẹjẹje wanniẹn erọnmhọn ọsi Ẹlaisha. Jehova da rẹkpa ọne ọguọmhandia rẹ daghe ẹhi nesọle ne bunbun ne nẹga ele. Ene ẹhi bun nẹ eyokhọnlẹn ọsi Siria, yẹ mhọn ahu nẹ ele. Baibo da yọle: “Akasi bi awẹnẹwẹnẹ ne mhọn eranlẹn [da] vuọn ene oke rebhe ne nẹga Ẹlaisha”!

Eyokhọnlẹn ọsi Siria bha daghe ẹhi nesi Jehova. Ele da ha khian bu Ẹlaisha beji ele ha da mun ọlẹn. Ẹlaisha ki da bhii Jehova nọn ru ele ẹlo. Ọnan bha rẹman ghe Jehova wo gene ru ele ẹlo bhi uhọnmhọn. Sokpan, Jehova da lu ọle nin ele hẹi lẹn ebe sunu arẹmiẹn ele daghe. Ẹlaisha da taman ene eyokhọnlẹn nin ele rẹkhan ọlẹn beji ọle ha da dọ man ele ọne okpia nin ele guanọ. Ẹlaisha da sun ele ha khian Sameria. Ọne okhian nan dẹ ree sẹbhi imaili 10. Ọle ki sẹbhi enin, ọle da taman Jehova nin ọle tan ele ẹlo a. Jehova ki lu iriọ, ẹlo ele da gbanọn an bhi uhọnmhọn. Ẹghenin ele ki rẹ lẹn eji ele ye. Ele da ke egbe ele re bhi idunmhun nin ojie dia bhi otọ Izrẹl. Ojie ọsi Izrẹl da ha guanọ nin ọle gbono ele a. Ọkpakinọn, Ẹlaisha da mhọn itohan da ele yẹ taman ọne ojie nọn re ebale nin ele, ọle ha yẹ je ele ha khian uwa. Baibo da ji mhan lẹn ghe eyokhọnlẹn ọsi Siria bha yẹ kie mun okhọn bu ibhokhan Izrẹl re.

Ẹlaisha lẹnmhin ghe ẹhi nesi Jehova wo ha ribhi eji ele ye ẹghe nin eyokhọnlẹn ọsi Siria rẹ nẹga ele. Ikpe nin Ẹlaisha gbe bhi oga nọnsi Jehova rẹkpa ọle rẹ lẹn ghe, Jehova bi ẹhi nesọle i da fikekegbe eguọmhandia nesọle, sẹyẹ, ọ hu ele bhi udu rẹ rẹkpa ele. Ọnan hi ebe rẹkpa Ẹlaisha rẹ ha mhọn izebhudu. Ọ dẹ yẹ rẹkpa mhan rẹ ha mhọn izebhudu ẹlẹnan.

Tie ọne okha bhi Baibo:

• 2 Kings 6:​8-23

Inọnta:

Uwedẹ nela Ẹlaisha rẹ re izebhudu man?

1. 2. Be Ẹlaisha bhii Ẹlaija le nọn re nanlẹn? Bezẹle? (2 Ki. 2:9; w03 11/1 31)

   Ewanniẹn nọnsẹ

2. 3. Bezẹle nin ọ da yi emhin ẹwanlẹn nin mhan rẹ rẹọbhọ ghe Jehova bha gene ru ẹlo ọsi eyokhọnlẹn ọsi Siria? (it “Ọruẹlo” ¶6)

   Ewanniẹn nọnsẹ

3. 4. Iwẹnna kẹkẹ nela Ẹlaisha lu beji ọle ha yi akhasẹ? (it “Ẹlaisha” ¶27-28)

   Ewanniẹn nọnsẹ

Ria Eria Nyan Emhin Nin Uwẹ Luẹle

• Beji a miẹn mhan lẹn ghe ẹhi nesi Jehova i da fikekegbe mhan, be ọ rẹ re izebhudu nin mhan yẹ? 2

  Ewanniẹn nọnsẹ

  

• Be ene ewanlẹn bhi agbotu bi ẹbho ebhebhe ha rẹ sabọ re egbe khọkhọ Ẹlaisha yẹ bhi uwedẹ nin ọle rẹ re izebhudu nin ọguọmhandia nọnsọle?

  Ewanniẹn nọnsẹ

• Uwedẹ ebhebhe nela uwẹ ha rẹ sabọ re egbe khọkhọ Ẹlaisha bhi izebhudu nin ọle rẹman?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Be mẹn ha nọọn Ẹlaisha le sade a riọ ọle kpanọ bhi uu?

  Ewanniẹn nọnsẹ

Sẹyẹ Fẹ Ene Emhin Nan Ghe

Be ibhio mhan nin ikpia bhi agbotu ne mhọn ẹsọn ọsọgbọn ha sabọ miẹn luẹ bhi obọ Ẹlaisha?

Mun Ekpẹn Nin Ikpea Ne Wanre (4:48)

Fẹ emhin ọbhebhe nin uwẹ ha sabọ miẹn luẹ bhi okha ọsi Ẹlaisha.

“Ẹliasha Da Daghe Awẹnẹwẹnẹ Ne Bhala Bii Eranlẹn—Uwẹ Be Daghe Ọle?” (w13 8/15 28-30)