Ọle Da Re Izebhudu Man Bhi Ẹghe Ọnọghọ

OKHUO ọkpa ribhọ nọn ha nyẹnlẹn bhi Zarẹfat. Ọle i yẹ mhọn ọdọ. Ọmokpia ọkpa ọle ha mhọnlẹn. Ọ ki bue nin amẹn rọ bhi ọne agbaẹbho. Bhiriọ, ebi a kọle bha yẹ ha jẹre. Ọnan da re ọle ha nọghọ ẹbho rẹ miẹn ebale ha le. Osẹnobulua re uhi ọbhi otọ nin ibhokhan Izrẹl ghe, nin ele ha gbẹloghe ikhuo ne i yẹ mhọn ọdọ bi imọn ne i yẹ mhọn aba. Ọkpakinọn, ọne okhuo nan bha ha nyẹnlẹn bhi otọ Izrẹl. Zarẹfat ọle da nyẹnlẹn, bhi agbaẹbho ọsi Saidọn. Ẹtbe a tie Ojie nọn gbẹloghe Saidọn. Ẹbọ natiọle Ashtorẹt ọle ga. Ohẹn ọsi ọne ẹbọ ọle khin. Ẹbho ne ga ọne ẹbọ nan manman wo lu emhin ebe rẹ ga ọle. Bhi ọne ẹghe ọkakale nan, ọ i da zẹwẹ lẹkhẹ nin ọne okhuo nan rẹ ha nyẹnlẹn bhi ẹwẹ ene ẹbho nin. Ọle sabọ rẹ ha riale; ‘Be ha sunu ji mẹn bi ọmọn nọnsẹmhẹn? Ọria soso be lẹn sẹbhọ ghe mẹn guanọ urẹkpa? Ẹmhọn mẹn bhọ be rẹtẹ ọria soso?’

Ọle da ha wẹnna kaka nin ọle rẹ miẹn ebale nin ọle bi ọmọn nọnsọle ha le. Ọrẹyiriọ, emhin da wo kie ha khọ ọbhọ. Ahamiẹn ele bha yẹ miẹn ebale ha le, ohanmhẹn ki gbe ele a.

Ọkpakinọn, Jehova wo hoẹmhọn ọne okhuo nan. Ọle yẹ daghe ọle ghe, ọne okhuo wo dikẹ bhi ẹwẹ ẹbho nekẹle ne nyẹnlẹn bhi Saidọn. Arẹmiẹn agbaẹbho nan da ga ẹbọ ọle da ha nyẹnlẹn, ọle sẹyẹ ha mhọn urẹọbhọ da Osẹnobulua. Asabọmiẹn ọle luẹ ẹmhọn Osẹnobulua, yẹ daghe ebi Ọle rẹ ha rẹkpa ẹbho nesọle yẹ. Edandan i ribhọ ghe ọle wo rẹọbhọ ghe Jehova hi Osẹnobulua ọsi ẹmhọanta. Ikpe 1,000 ki gbera, Jesu da re ọne okhuo nan rẹ lu ijiẹmhin. Ọle da yẹ yọle ghe Osẹnobulua je ọria nọn dọ rẹkpa ọle. Urẹkpa nela Jehova re nanlẹn?

Jehova da je Ẹlaija ha khian Zarẹfat. Ọle da yẹ taman ọlẹn ghe okhuo ọkpa nọn ribhi enin nọn i yẹ mhọn ọdọ dẹ re ebale nanlẹn le. Ẹghe nin Ẹlaija ki rẹ sẹbhi Zarẹfat, ọle da daghe okhuo ọkpa nọn ha ko eran nin ọle ha rẹ fie eranlẹn. Ọle da re ekpẹn ne ọne okhuo talọ. Ọle da bhii ọle yọle: “Huẹan, re ukpu sa obhi amẹn khere ji mẹn wọn.” Ọne okhuo nan bha sẹ ka miẹn Ẹlaija khẹ. Ọrẹyiriọ, Baibo da yọle ghe, ọle da “dọ sa ọne amẹn re.” Asabọmiẹn uwedẹ ekpẹn nin Ẹlaija rẹ nanlẹn talọ bi uwedẹ nin ọle rẹ muegbe, re ọne okhuo lẹn ghe akhasẹ nọnsi Jehova ọle khin. Ẹlaija sabọ rẹ ha riale; ‘Ọnan be ọne okhuo nin Jehova yọle nin mẹn bu?’ Nin Ẹlaija rẹ gene lẹn si ọne okhuo nan Jehova je ọle bu, ọle da gbo bhii ọne okhuo ibrẹd.

Ọne okhuo da ta ọta man Ẹlaija nọn rẹman ghe ọle mhọn urẹọbhọ da Osẹnobulua, nin “Osẹ nọn nyẹnlẹn.” (Jer. 10:10) Ọle da yọle: “Emhọanta Osẹnobulua, nin Jehova nọnsẹ, mẹn i mhọn ibrẹd.” Ọle da yẹ yọle ghe, obhi ẹlubọ khere bi obhi abhii nin ọle ha rẹ lu ibrẹd ọkpa ọle mhọnlẹn, ghe, ọle bhọ khian dọ fi eranlẹn nin ọle ha rẹ lu ibrẹd nin ọle bi ọmọn nọnsọle ha le. Ọle da yọle: “Mhan ha ki le ọle fo, mhan ki yu.”

Ebi Ẹlaija kie taman ọlẹn sabọ rẹ han ọlẹn ilo. Ẹlaija da yọle: “Hẹi ji ofẹn mun uwẹ.” Ọne okhuo nan lẹnmhin ghe ohanmhẹn dẹ kẹ gbe ọle bi ọmọn nọnsọle a, bhiriọ, bezẹle nin ofẹn i da ha mun ọlẹn? Ọrẹyiriọ, ọle da ka Ẹlaija ehọ. Ẹlaija da taman ọne okhuo ebi Jehova vele ghe Ọle dẹ lu nanlẹn. Ọne okhuo ha gene lu ibrẹd nin Ẹlaija le, Jehova ki nan erọnmhọn nanlẹn. Jehova ki lu ọle nin ebale hẹi fo bhi uwa ọsi ọne okhuo, rẹ dọ sẹbhi ẹghe nin amẹn ha rẹ kie munhẹn ha rọlọ!

Urẹọbhọ nin ọne okhuo nan mhọn be ziẹn sẹbhọ nin ọle rẹ lu ebi Ẹlaija taman ọlẹn? Ọle dẹ be re ebale nọnsọle nọn kike nin akhasẹ nọnsi Jehova le? Ọne okhuo nan lẹnmhin ghe Jehova sẹ wo lu emhin ọhan-ilo ne bunbun nin ẹbho nesọle, sẹyẹ, Ọle dẹ yẹ sabọ gbẹloghe ọle bi ọmọn nọnsọle. Ọrẹyiriọ, ọle dẹ be ha mhọn ọne izebhudu rẹ lu ebi Ẹlaija taman ọlẹn? Baibo da yọle: “Bhiriọ, ọne okhuo da kpanọ dọ lu ebi Ẹlaija taman ọlẹn.”

Jehova da mun ive nin ọle ve nin ọne okhuo sẹ. Ọle da lu ọle nin akhe ọsi ẹlubọ bi abhii nọnsọle hẹi ka. Bhiriọ, Ẹlaija bi azagba-uwa ọsi ọne okhuo da wo miẹn ebale ha le, rẹ dọ sẹbhi ẹghe nin amẹn rẹ rọ. Jehova da yẹ lu emhin kpataki ọbhebhe nanlẹn. Ẹghe nin ọmọn ọsi ọne okhuo ki rẹ yu ranmhude emianmhẹn nin ọle ha khọnmhọn, Jehova da noo Ẹlaija rẹ riọ ọle kpanọ bhi uu. Ọnan hi ariọkpanọ ọhẹnhẹn nan tẹmhọnlẹn bhi Baibo. Edandan i ribhọ ghe, ọne emhin ọhan-ilo nan nọn sunu wo kie manman ziẹn urẹọbhọ ọsi ọne okhuo nan. Rẹ dọ sẹbhi ẹlẹnan, ijiẹmhin ọsi ọne okhuo nan yẹ wo re izebhudu nin ẹbho ne bunbun.

Tie ọne okha bhi Baibo:

• 1 Kings 17:​8-24

• Luk 4:​25, 26

Inọnta:

Uwedẹ nela ọne okhuo nin ọdọ ọle yu nọn nyẹnlẹn bhi Zarẹfat rẹ re izebhudu man?

Manman Guanọ Otọle

1. 1. Be ibhokhan Saidọn ga, sẹyẹ, be ele lu bhi oga nọnsele? Be ọne oga nan rẹ rẹso ibhokhan Izrẹl yẹ? (it “Saidọn” ¶6) 1

   Ewanniẹn nọnsẹ

   

   Penta Springs Limited/Alamy Stock Photo

2. 2. Ikolu nela Ẹtbe nin Ojie ọsi Saidọn bi Ehab nin Ojie ọsi Izrẹl ha mhọnlẹn? (it “Ẹtbe”)

   Ewanniẹn nọnsẹ

3. 3. Osẹ natiọle Ashtorẹt (la Astarte), ọle ibhokhan Finishia ha ga. Iluemhin nela ẹbho ha lu bhi ọne oga ẹghenin nin ẹbho sẹyẹ lu ẹlẹnan? (g93 11/22 13 ¶1-4)

   Ewanniẹn nọnsẹ

4. 4. Ẹghe nin ọmọn ọsi ọne okhuo nọn i yẹ mhọn ọdọ rẹ yu, bezẹle nin ọle da nọọn Ẹlaija yọle: “Uwẹ be vae dọ ye mẹn emhin ebe nesẹmhẹn re, yẹ gbe ọmọn nọnsẹmhẹn an?” (1 Ki. 17:18; w14 2/15 15 ¶4-5) 2

   Ewanniẹn nọnsẹ

   

Ria Eria Nyan Emhin Nin Uwẹ Luẹle

• Arẹmiẹn ọne okhuo nọn i yẹ mhọn ọdọ nyẹnlẹn bhi agbaẹbho nin ẹbho da ga Beel, Jehova da sẹyẹ daghe ọle. Be ọnan man uwẹ le rẹji Jehova, bi uwedẹ nọn khẹke nin mhan rẹ ha ghe ẹbho ne ribhi eji mhan da tẹmhọn Osẹnobulua? (Iwẹnna 10:35)

  Ewanniẹn nọnsẹ

• Be Kristiẹn nin ẹmhọn igho nyọn ele bhi egbe ha sabọ miẹn luẹ bhi urẹọbhọ bi izebhudu nin ọne okhuo nọn i yẹ mhọn ọdọ rẹman? 3

  Ewanniẹn nọnsẹ

  

• Uwedẹ ebhebhe nela uwẹ ha rẹ sabọ re egbe khọkhọ ọne okhuo nọn i yẹ mhọn ọdọ bhi izebhudu nin ọle rẹman?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Be mẹn ha nọọn ọne okhuo nan le sade a riọ ọle kpanọ bhi uu?

  Ewanniẹn nọnsẹ

Sẹyẹ Fẹ Ene Emhin Nan Ghe

Be imhan ha rẹ rẹman yẹ ghe ikolu nin mhan bi Jehova ko mhọnlẹn lu uhọnmhọn-emhin gbera afe bi ua beji ọne okhuo nọn i yẹ mhọn ọdọ lu?

“Uwẹ Dẹ Miẹn Iẹnlẹn Ọsi Ighegheghe Sade Ebi Uwẹ Lu Ti Jehova Bhọ” (w11 2/15 13-17)

Bezẹle nin uwẹ da rẹọbhọ ghe Jehova daghe emhin rebhe nin uwẹ lu, nin uwẹ rẹ rẹman ọlẹn ghe uwẹ mhọn urẹọbhọ da ọle?

“Jehova Be Daghe Emhin Nin Uwẹ Lu?” (w03 5/1 28-31)