Ọne Ọkakulo Bi Ọne Obhokhan Ọmanmhẹn

Obhokhan ọmanmhẹn ọkpa da ha nyẹnlẹn bhi agbaẹbho ọsi Siria. Eyokhọnlẹn ọsi Siria, ele re ọle sibhi uwa nọnsi aba ọle re bhi otọ Izrẹl. Bhi ejayenan nian, igbọn ọsi okhuo Neman, nin ọkakulo ọsi ene eyokhọnlẹn ọle ki khin. Ọne obhokhan da wo ha ga Jehova arẹmiẹn ẹbho ne nẹga ọle i ga Jehova.

Neman da ha khọnmhọn emianmhẹn nọn manman kaka, sẹyẹ ẹghe rebhe ọle rẹ wo ha ribhi ọbalọ. Ọne obhokhan da ha guanọ nin ọle rẹkpa ọle. Bhiriọ, ọle da ki taman okhuo Neman yọle: ‘Mẹn lẹn ọria nọn ha sabọ hinmhin ọdọ ẹ. Akhasẹ ọkpa nọnsi Jehova ribhi otọ Izrẹl. Ẹlaisha a tie ọle. Ọle dẹ sabọ re egbe daan ọdọ ẹ.’

Okhuo Neman da taman ọdọ ọle ebi ọne obhokhan taman ọlẹn. Neman wo muegbe rẹ lu emhin nọn hi ki rẹ khin nọn ha sabọ re egbe daan ọlẹn. Ranmhude ọnin, ọle da ha khian uwa ọsi Ẹlaisha bhi otọ Izrẹl. Neman da rẹ ha guanọ nin Ẹlaisha miẹn ọlẹn ọbhi egbe bii okpọria. Ọkpakinọn, Ẹlaisha bha tobọle ne Neman talọ. Ọle da ji ọguọmhandia nọnsọle nọn dọ tuẹ Neman, yẹ taman ọlẹn ebi ọle ha lu. Ọne ọguọmhandia ki tuẹ Neman fo, ọle da taman ọlẹn yọle: ‘Ha khian Ẹdẹ Jọdan, dọ gbe egbe ruẹ bhọ igba ihinlọn. Uwẹ ha lu iriọ, egbe ki daan ẹn.’

Ọnan bha zẹwẹ yẹẹ Neman hiehie. Ọle da yọle: ‘Mẹn rẹ ha riale ghe ọne akhasẹ nan dẹ sotie Osẹnobulua nọnsọle, yẹ lueghe obọ da mẹn, beji egbe ha da daan mẹn. Sokpan, ọle bha lu iriọ. Ọle dọ ha taman imẹn nin mẹn ha khian ẹdẹ nọn ribhi otọ Izrẹl. Mhan mhọn ẹdẹ ne mhẹn gbera ọnan bhi otọ Siria. Mẹn ha rẹ wo ha khian enin.’ Ẹkẹ da wo ha khọ Neman! Bhiriọ, ọle da sibhi uwa ọsi Ẹlaisha re.

Eguọmhandia nesi Neman da taman ọlẹn nin ọle ria eria nyan ebi a taman ọlẹn nọnsẹn. Ele da taman ọlẹn yọle: ‘Uwẹ i da be lu emhin nọn hi ki rẹ khin nọn ha re egbe daan ẹn? Ebi ọne akhasẹ nan yọle nin uwẹ lu bha nọghọ hiehie. Dọnmhegbe lu ọle.’ Neman da ka ele ehọ. Ọle da ha khian Ẹdẹ Jọdan dọ gbe egbe ruẹ bhi amẹn igba ihinlọn. Ọle ki lu iriọ fo, egbe da daan ọlẹn. Ọ da wo ti ọle bhọ, bhiriọ, ọle da fikie bu Ẹlaisha dọ taman ọlẹn obulu. Bhi ọkike ọle, Neman da yọle: ‘Mẹn ki dọ lẹn nian ghe, Jehova hi Osẹnobulua ọsi ẹmhọanta.’ Be uwẹ riale ọ dia ọne obhokhan ọmanmhẹn bhi egbe yẹ, ẹghe nin Neman rẹ vae bhi uwa, sẹyẹ, egbe daan ọlẹn?