“Mẹn Miẹn Ebeanlẹn Mhan!”

MERI MADALIN wo manman loya. Ẹlinmhin ne i mhẹn da ha noo ọle, yẹ riia ọle iẹnlẹn an. Ọkpakinọn, beji ọle miẹn Jesu, iẹnlẹn nọnsọle da fidenọ sẹsẹsẹ. Baibo da yọle ghe, Jesu da khu “ẹlinmhin-ebe ihinlọn si ọle bhi egbe re.” Ebi Jesu lu nanlẹn da wo ti ọle bhọ rẹ sẹbhọ ghe, ọle da kiẹn ọkpa bhi ene rẹkhan Jesu. Sẹyẹ, ọle da muegbe nin ọle rẹ lu eka nin ọle ha sabọ lu rẹ ha re iyobọ nin Jesu.

Meri Madalin wo manman hoẹmhọn Jesu rẹ sẹbhọ ghe, ọle da ha tiọle Raboni. Ebi ọne elin nan mundia nan hi “Ọman-emhin.” Ọne elin nan nin ọle ha tie Jesu le rẹman ghe ọle mun ekpẹn nọn dinmhin nanlẹn. Jesu bi etuegbe 12 nesọle da ha tẹmhọn Agbejele na bhi agbaẹbho rebhe khian. Meri lẹnmhin ghe, ene ikpia nan zẹ iwẹnna nọnsele obọ beji ele ha da sabọ ha noo ahu bi ẹghe nọnsele rẹ lu ọne iwẹnna kpataki nan. Be Meri ha lu rẹ sabọ re iyobọ nin ele?

Ọkpa bhi ene ikhuo ne “ha noo emhin nin ele mhọn rẹ rẹkpa ele,” ọle Meri Madalin ha khin. Ene ikhuo nan wo noo igho nọnsele rẹ re iyobọ nin Jesu bi etuegbe nesọle. A ha ka ene ikhuo bi ikpia rebhe kugbe ne rẹkhan Jesu ha tẹmhọn Osẹnobulua, ele dẹ bun sẹbhi itue 20 la ebe gbera iriọ. Bhi ọne ẹghe nin, ọ i yi emhin nọn kẹ sunu, nin ikhuo rẹ ha rẹkhan ọria nọn man ẹbho ẹmhọn Osẹnobulua. Ranmhude ọnan, asabọmiẹn ẹbho dẹ wo manman ha re unun riia ele a, yẹ jiẹ ele. Ọkpakinọn, rẹji Meri bi ene ikhuo nekẹle, udede isẹhoa ọnan wo ha khin. Ele da wo re izebhudu ha rẹkhan Jesu, ele bha zẹwẹ fi ehọ ọbhi ebi ẹbho ha ta ele bhi egbe.

Bhi ukpasọn ọkpa, ẹbho da mun Jesu. Ele da bha ọle ohoghe ghe, ọle re unun ji Osẹnobulua. Sẹyẹ, ele da gbe ọle a bhi okhun oran. Edandan i ribhọ ghe, ọne emhin nan nọn sunu wo ba Meri bhi egbe. Ọnan rẹ sunu, ofẹn bha mun Meri. Ọle da sẹyẹ wo ha re izebhudu man. Ọle da rẹkhan inẹn Jesu bi ikhuo ebhebhe ha khian eji a ha da khan Jesu ọbhi oran. Ẹghe nin Jesu rẹ ha ribhi ọbalọ bhi ọne okhun oran nan khan ọlẹn ọ i, ọle da daghe ọle ghe, ene ikhuo nan sẹyẹ wo sun rẹkhan ọlẹn, ghe, ele gene hoẹmhọn ọlẹn. Ele wo daghe ebi Jesu rẹ sun rẹkhan Aba ọle yẹ, rẹ dọ sẹbhi ẹghe nin ọle rẹ yu, bi ebi ọle rẹ lu iho nọnsi Aba ọle sotọ yẹ. Sẹyẹ, isira ele Jesu rẹ gbẹtin sotọ.

Ofẹn bha mun ene ikhuo nan rẹ viẹ dagbare bhi odalo ene gbẹloghe ibhokhan Ju ne wo la bhu Jesu ohiẹn fo, bi eyokhọnlẹn ọsi Rom ne gbe ọle a. Arẹmiẹn Meri Madalin wo manman ha lu akhiẹ bhi ọne ẹghe nan, ọle da sẹyẹ muegbe rẹ lu emhin ọbhebhe rẹ rẹman ghe ọle hoẹmhọn Jesu. Ranmhude ebi otọ ọsi Judia diayẹ, olinmhin kẹ wo wea, yẹ ya. Bhiriọ, ọkuẹsẹ ele re olinmhin tọ, ele ki re abhii nọn viohin bi emhin kẹkẹ ne viohin rẹ gbo ọle, beji a ha da miẹn ọ bha ha ya sade ẹbho ọsi ọnọn ọria nọn yu vae bhi eji a da re ọne ọria tọ. Meri Madalin lẹnmhin ghe, ẹjẹje, ọle a rẹ re ene emhin ne viohin gbo Jesu egbe ọkuẹsẹ a re ọle tọ. Bhiriọ, ọle da muegbe nin ọle rẹ kie dọ re ene emhin gbo Jesu egbe. Beji a ki wo lu iluemhin ọsi Sabati fo, ọle bi ikhuo ebhebhe da dọ dẹ abhii bi ene emhin kẹkẹ ne viohin. Bhi ọsewewiẹ bhibhibhi, ele da diọbhi eji a da re Jesu tọ nin ele dọ re ene emhin gbo ọle egbe.

Asabọmiẹn Meri ọnọn ka sẹbhi eji ọne idin ye. Ọ da wo han ọlẹn ilo beji ọle kere ghe a wẹnẹ udo nan rẹ gue ọne idin kie, sẹyẹ, ọria i yẹ ribhi ẹkẹ ọle. Ọle da runẹ dọ taman Pita bi Jọni ebi ọle kere. Beji ọle ki fikiere, ọle bha yẹ ke ene ikhuo nekẹle re. Meri da ki khian sikẹ ọne idin, beji ọle ha da sabọ daghe ẹkẹ ọle nọnsẹn. Ọle da “daghe ẹhi eva ne yọ ukpọn nọn fua. Ele dotua bhi eji ekuegbe nọnsi Jesu rẹ ha ye.” Ọle da taman ele ghe ekuegbe nọnsi Jesu ọle guanọ. Ọle ki fiorọ, ọle da daghe okpia ọkpa nin ọle rẹ ha riale ghe, ọle hi ọnọn gbẹloghe ọne ogba. Ọne okpia da nọọn ọlẹn yọle: “Okhuo, bezẹle nin uwẹ da viẹ?” Ọle da nọọn ọne okpia eji ekuegbe nọnsi Jesu ye. Ọle da yẹ yọle: “Ọwanlẹn, ahamiẹn uwẹ mun ekuegbe nọnsọle kpanọ, taman imẹn eji uwẹ mun ọlẹn fi ọi, beji mẹn ha da dọ mun.” Meri Madalin bhọ bha zẹwẹ riale si ọle bhọ dẹ sabọ mun ekuegbe ọsi okpia-ọba. Ọle da wo muegbe nin ọle rẹ lu ebi ọle ha sabọ lu rẹ re oyẹẹ nin ọle mhọn da Jesu man.

Meri bha zẹwẹ ha ghọnghọn. Ọle ki ha ho nin ọle kpanọ, ọne okpia da yọle: “Meri!” Meri wo lẹn ọne urulu nọn sotie ọle. Bhiriọ, ọle da reso yọle, “Raboni!” yẹ dede ọle. Ọkpakinọn, Jesu bha ji ọle da sikan rẹkhan ọlẹn. Jesu da mun ẹsọn kpataki nanlẹn. Ọle da yọle: “Ha bu ibhio mẹn.” Jesu da je ọle nin ọle dọ taman etuegbe nesọle ghe, a riọ ọle kpanọ bhi uu. Ẹmhọn kpataki wo khọnan! Meri Madalin da wo re ẹjẹje ha khian. Bhi ọsi ọhẹnhẹn, etuegbe nesi Jesu bha rẹọbhi ebi ọle taman ele. Baibo da yọle ghe, ọ “da diabe ọta uuki bhi ehọ nọnsele.” Ọkpakinọn, ọnin bha re Meri zobọ bhọ rẹ ha wewe ọle ghe a riọ Jesu kpanọ bhi uu. Ọle bha ji emhin soso da re ọle zobọ bhọ. Rẹ na bhi ọne ukpẹdẹ nin ha khian, ọle da wo re izebhudu ha wewe ọne ọta nọn mhẹn man ẹbho ghe, a riọ Jesu kpanọ.

Tie ọne okha bhi Baibo:

• Matiu 27:​55, 56

• Mak 16:​1, 2

• Luk 8:​1-3; 24:​1-11

• Jọni 19:25; 20:​1, 2, 11-18

Inọnta:

Uwedẹ nela Meri Madalin rẹ re izebhudu man?

Manman Guanọ Otọle

1. 1. Uwedẹ ebhebhe nela a sabọ miẹn Meri Madalin bi ikhuo ebhebhe rẹ re iyobọ nin Jesu bi etuegbe nesọle? (ijwia uhọnmhọn-ọta 6 ¶5-6) 1

   Ewanniẹn nọnsẹ

   

2. 2. Bezẹle nin Meri bha da wo re osukpa lẹn Jesu beji ọle riọ kpanọ fo? (ijwia uhọnmhọn-ọta 6 ¶16)

   Ewanniẹn nọnsẹ

3. 3. Bezẹle nin Jesu da taman Meri Madalin ghe nin ọle hẹi yẹ sikan rẹkhan ọlẹn? (w08 4/15 32 ¶6)

   Ewanniẹn nọnsẹ

4. 4. Ẹghe nin Meri Madalin rẹ taman etuegbe nesi Jesu ghe a riọ Jesu kpanọ, ọ da diabe “ọta uuki” rẹji ele. Bezẹle nin ele da re inian ha ria eria? (Luk 24:11; w12 9/1 10 ¶4-5)

   Ewanniẹn nọnsẹ

Ria Eria Nyan Emhin Nin Uwẹ Luẹle

• Meri Madalin da ha miẹn ikuẹkuẹ ẹsọn rẹ rẹkpa ẹbho. Be mhan ha rẹ sabọ re egbe khọkhọ ọle yẹ? 2

  Ewanniẹn nọnsẹ

  

• Be mhan ha rẹ sabọ re egbe khọkhọ Meri Madalin yẹ sade ẹbho bha ka rẹọbhi ẹmhọanta nin mhan wewe man ele, la ọ bha ti ele bhọ? (Luk 24:​10, 11)

  Ewanniẹn nọnsẹ

• Be uwẹ ha rẹ sabọ re egbe khọkhọ Meri Madalin yẹ bhi uwedẹ nin ọle rẹ re izebhudu man?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Asabọmiẹn a zẹ Meri Madalin nin ọle deba Jesu gbẹloghe bhi okhun. Bezẹle nin ọnan da ti uwẹ bhọ?

  Ewanniẹn nọnsẹ

Sẹyẹ Fẹ Ene Emhin Nan Ghe

Re ebi Baibo tale rẹ fẹ emhin eso ghe nin ẹbho tale rẹji Meri Madalin.

“Họbhọ Hi Meri Madalin?” (ijwbq uhọnmhọn-ọta 172)

Be uwedẹ nin Jesu rẹ ne Meri Madalin bi ikhuo ebhebhe lu emhin man mhan le rẹji ẹlo nọn khẹke nin mhan rẹ ha ghe ikhuo? Be ọ man mhan le rẹji uwedẹ nọn khẹke nin mhan rẹ ha ne ele lu emhin?

“Ọkhẹke Nan Ha Mun Ẹkpẹn Nin Ikhuo Ne Ribhi Agbotu” (w95 7/15 15-18 ¶3-8)