45 PITA
“Ọ Bha Gba Nin Imẹn”
ỌGBEHẸN Pita khin. Ọle wo deba azagba-uwa nọnsọle ha wẹnna kaka bhi ehẹn nin ele gbe. Ọria nin ofẹn i mun, nọn wo mhọn izebhudu ọle khin. Ọle wo ha ta ebe ri ọle bhi ọkhọle dagbare, yẹ re ẹjẹje lu emhin. Ẹdọkpa, obhio ọle natiọle Andru da re eghọnghọn taman ọlẹn yọle: “Imhan miẹn Mezaya.” Ẹjẹje, Pita da runẹ dọ miẹn Jesu. Iriọ ọle rẹ kiẹn ọkpa bhi ene rẹkhan Jesu.
Uki eso ki gbera, Jesu da vae bhi Kapaniọn. Ọne agbaẹbho nan Pita da nyẹnlẹn. Ẹghe nin Jesu rẹ miẹn Pita, ọle da kere ghe egbe wo lọ ọle, ranmhude, asọn rebhe ọle rẹ guanọ ehẹn, sokpan, ọle bha miẹn ehẹn gbe. Bhiriọ, Jesu da taman Pita nin ọle gua okọ nọnsọle diọbhi eje dinmhin bhi ọne ẹdẹ, ọle ha yẹ fi ọgan nọnsọle ọbhi ẹkẹ ọle. Sokpan, Pita bha rẹọbhọ ghe ọle dẹ miẹn ehẹn gbe. Bhi ọsi ẹmhọanta, ọsasọn a rẹ miẹn ehẹn gbe, ọ i yi ọsodanmhẹn. Pita da ki yọle: “Asọn rebhe imhan rẹ guanọ ehẹn, imhan bha gbe ehẹn soso.” Ọrẹyiriọ, ọle da sẹyẹ lu ebi Jesu taman ọlẹn. Osukpa, ele da wo muno ehẹn ne bunbun, rẹ sẹbhọ ghe, ene okọ veva nan muno ene ehẹn ọ i, da munhẹn ha ruẹ. Ọnan da re ofẹn ha mun Pita. Bhiriọ, ọle da diguẹ bhi odalo Jesu, yẹ yọle: “Sibhi eji mẹn ye re, Ebeanlẹn imẹn, ranmhude ọ bha gba nin imẹn.” Pita da ha riale ghe ọle bha sẹ ọria nọn ha rẹkhan Jesu, nọn sabọ lu emhin ọhan-ilo nọn sẹriọ. Jesu da ki ko ọle udu re, yẹ taman ọlẹn yọle: “Hẹi yẹ ji ofẹn mun uwẹ. Rẹ na bhi ọne ẹghe nan rẹ ha khian, uwẹ dẹ ha muno eria beji a rẹ muno ehẹn.”
Jesu wo daghe emhin nọn mhẹn bhi egbe Pita. Akizẹbue, Jesu da re ọle kiẹn ọkpa bhi etuegbe 12 nesọle. Pita wo re izebhudu man bhi uwedẹ ne bunbun. Bhi ọsi ijiẹmhin, ẹghe-ẹghe nin Jesu rẹ ta ọta nọn bha mun ele ẹlo kore, Pita hi ọria nọn kẹ wo nọọn Jesu nọn gbotọle fanọn an man ele. Ẹghe nin Jesu rẹ ha khian bhi uke amẹn, Pita hi ọnọn re izebhudu khian bu ọle bhi ọne uke amẹn.
Ọria nọn i ria eria nyan ẹmhọn fo ọkuẹsẹ ọle talọ, ọle Pita khin. Sokpan, ẹghe nan rẹ re adia nanlẹn, ọle da miẹn ọlẹn ọbhi egbe yẹ fidenọ
Pita yẹ re izebhudu man bhi uwedẹ ọbhebhe. Pita bha diabe ẹbho ne bunbun ẹlẹnan. Ẹghe nin Jesu rẹ re adia nanlẹn, ọle da wo miẹn ọlẹn ọbhi egbe, yẹ fidenọ. Ẹghe ọkpa nin Jesu rẹ yọle ghe a dẹ gbe ọle a, Pita da taman ọlẹn yọle: “Tohan egbe ẹ, Ebeanlẹn imẹn.” Pita da ha taman Jesu nin ọle lu emhin nin Jehova bha guanọ nin ọle lu. Sokpan, Jesu da ji Pita lẹn ghe, uwedẹ nin Esu rẹ ria eria, ọle rẹ ria eria. Jesu yẹ re adia nin Pita bhi ẹghe ọbhebhe. Ranmhude ọria nọn mhọn idegbere Pita khin, ọle da ka Jesu ehọ yẹ fidenọ.
Bhi ọne asọn ọkuẹsẹ Jesu yu, ọle da ha guanọ nin ọle man edibo nesọle ghe, ọkhẹke nin ele ha mhọn idegbere. Bhiriọ, ọle da munhẹn ha kpe oẹ nọnsele beji igbọn lu. Pita bha guanọ nin Jesu kpe oẹ nọnsọle. Bhiriọ, ọle da yọle: “Mẹn ida ji uwẹ da kpe oẹ nọnsẹmhẹn.” Jesu da manman re adia nanlẹn. Bhiriọ, Pita da ki taman Jesu nin ọle kpe uhọnmhọn bi obọ nọnsọle ba ọle. Jesu da gbo kie re adia nanlẹn. Akizẹbue, Jesu da taman edibo nesọle ghe, ele rebhe dẹ zẹ ọle obọ. Pita da yọle ghe ọle i da zẹ Jesu obọ aharẹmiẹn edibo nekẹle zẹ ọle obọ. Jesu da ki wanniẹn Pita yọle: “Bhi ọne ukpasọn nan, . . . igba ea uwẹ ha yọle ghe uwẹ bha lẹn imẹn.”
Uriagogo eso ki gbera, egbanegbe eso da vae dọ mun Jesu. Ele da gba ọle obọ yẹ mun ọlẹn kpanọ. Sokpan, Pita da fẹkẹ gban egbe kie, yẹ rẹkhan Jesu bhi ikeke. Ele da mun Jesu ha khian uwa ọsi ojohẹn ọkpa. Ẹbho da wo ha zuọzuọ ọle bhi enin, ele da re oya nanlẹn, yẹ bhuohiẹn eku gbe ọle. Bhi ọne ẹghe nan, Pita da ha ribhi ẹgodo ọsi ọne ojohẹn. Ikpia bi ikhuo eso ne ha ribhi enin ne daghe Pita da yọle ghe, ọkpa bhi etuegbe nesi Jesu Pita khin. Igba ea Pita sin ghe ọle bha lẹn Jesu. Ọnan hi ebi Jesu ka yọle ghe Pita dẹ lu.
Jesu ki dagbare bhi ọne uwa, ọle da fiorọ ghe Pita. Ọnan da wo manman ba Pita bhi egbe. “Bhiriọ, ọle da dagbare dọ ha viẹ.” Uriagogo eso ki gbera, a da gbe Jesu nin ọmọẹ Pita a. Edandan i ribhọ ghe ọ wo manman ba Pita bhi egbe. Ọkpakinọn, Pita bha ji idobọ nọnsọle re egbe lọ ọle. Ọle da sẹyẹ wo deba edibo nekẹle ha ga Jehova. Ẹghe nin Jesu ki rẹ riọ kpanọ, ọle da zegbere man Pita, bhi ẹghe nin ọle ọkpa rẹ ha ribhi ọsọle. Ọkpakinọn, Baibo bha taman mhan ebi Jesu taman Pita. Sokpan, mhan lẹnmhin ghe ebi Jesu taman Pita dẹ wo ko ọle udu re, yẹ re izebhudu nanlẹn, ranmhude, ọle lẹnmhin ghe Jesu rẹhunmhan ọlẹn.
Uzana eso ki gbera, ẹghe nin Jesu rẹ miẹn edibo nesọle bhi Okpẹdẹ ọsi Galili, ọle da re ifuẹkẹ man Pita. Beji Pita rẹ sin igba ea ghe ọle bha lẹn Jesu, iriọ Jesu yẹ rẹ re isẹhoa nanlẹn igba ea, nin ọle rẹ rẹman ghe ọle hoẹmhọn ọlẹn. Jesu da mun udede ẹsọn nin Pita. Ọle da taman ọlẹn yọle: “Re ebale nin ibhi ihuan nesẹmhẹn le.” Bhi uhọnmhọn-ọta nọnzi 49, mhan dẹ luẹ ebi Pita rẹ re obọ rẹkhan ebi Jesu taman ọlẹn yẹ, bi ebi ọle rẹ re izebhudu man yẹ, rẹ dọ sẹbhi ukpẹdẹ nin ọle yu.
Tie ọne okha bhi Baibo:
Inọnta:
Uwedẹ nela Pita rẹ re izebhudu man nan tẹmhọnlẹn bhi ọne okha nan?
Manman Guanọ Otọle
1. Be ọ diayẹ nin ọria rẹ ha yi ọgbehẹn bhi ẹghe ẹdẹlẹ? (it “Ebi A Rẹ Gbe Elanmhẹn Ẹwẹ Yẹ Bi Ebi A Rẹ Gbe Ehẹn Yẹ” ¶6-7) 1
Ifoto 1
2. Bezẹle nin Jesu da tie Saimọn, Sifas (Pita)? (“Uwẹ hi Saimọn” study note nọn ribhi Jọni 1:42, nwtsty)
3. Ẹghe nin Jesu rẹ taman Pita bi Andru yọle, “imẹn dẹ rẹ ibha ha muno eria beji bha rẹ muno ehẹn,” be ọle ha tẹmhọnlẹn? (Mat. 4:18-20; w16.05 9 ¶3-4) 2
Ifoto 2
4. Ọkuẹsẹ Jesu fikie ha khian okhun, ọle da nọọn Pita yọle: “Uwẹ be hoẹmhọn mẹn gbera ene emhin nan?” Be ọne inọnta nin ha sabọ mundia nan? (“uwẹ be hoẹmhọn mẹn gbera ene emhin nan?” study note nọn ribhi Jọni 21:15, nwtsty)
Ria Eria Nyan Emhin Nin Uwẹ Luẹle
Ahamiẹn uwẹ dọnmhegbe rẹ khọn eji uwẹ da wẹghẹ, be ijiẹmhin ọsi Pita ha rẹ sabọ rẹkpa ẹ yẹ rẹ sẹyẹ ha ga Jehova? 3
Ifoto 3
Ahamiẹn uwẹ yere ebi Jehova bi Jesu rẹ re ọkhọle rebhe rẹhumhan Pita, be ọnan ha rẹ sabọ rẹkpa ẹ yẹ?
Be uwẹ ha rẹ sabọ re egbe khọkhọ Pita yẹ bhi uwedẹ nin ọle rẹ re izebhudu man nan tẹmhọnlẹn bhi ọne okha nan?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be uwẹ miẹn luẹ bhi ọne okha nan rẹji Pita, nọn re ọle ti uwẹ bhọ ghe Pita dẹ deba Jesu gbẹloghe bhi okhun?
Sẹyẹ Fẹ Ene Emhin Nan Ghe
Be enebiọmọn ha rẹ sabọ noo ijiẹmhin ọsi Pita yẹ, rẹ man imọn nesele ẹmhọn itohan nin Jehova mhọnlẹn?
Fẹ ebi Pita rẹ sẹyẹ sun rẹkhan Jesu yẹ ẹghe nin ẹbho ne bunbun rẹ fikekegbe Jesu.
“Ọle Da Sẹyẹ Ha Mhọn Asun-rẹkhan Bhi Ẹghe Ọnọghọ” (ia 188-195)