Ẹlaija Da Riọ Ọmọn Ọsi Okhuo Ọkpa Nọn I Yẹ Mhọn Ọdọ Kpanọ Bhi Uu

Bhi ẹghe nin amẹn bha rẹ rọ bhi otọ Izrẹl, Jehova da taman Ẹlaija yọle: ‘Ha khian Zarẹfat. Okhuo ọkpa nọn i yẹ mhọn ọdọ dẹ re ebale nin uwẹ le bhi enin.’ Ẹlaija ki sẹbhi geti ọsi ọne agbaẹbho, ọle da daghe okhuo ọkpa nin obhioguele, nọn i yẹ mhọn ọdọ koko eran. Ọle da taman ọne okhuo nọn sa amẹn nanlẹn wọn. Beji ọne okhuo ki rẹ khian dọ sa ọne amẹn re, Ẹlaija da taman ọlẹn yọle: ‘Huẹan, re obhi ibrẹd khere ji mẹn nin mẹn le.’ Ọkpakinọn, ọne okhuo da yọle: ‘Mẹn i mhọn ibrẹd soso nin mẹn ha re nin uwẹ. Obhi ẹlubọ khere bi obhi abhii nin mẹn ha rẹ lu ibrẹd ọkpa mẹn mhọnlẹn. Ọle mẹn bi ọmọn nọnsẹmhẹn ha le.’ Ẹlaija da taman ọne okhuo yọle: ‘Jehova ve ghe uwẹ ha re ibrẹd nin mẹn le, ẹlubọ bi abhii nọnsẹ i da fo ọkuẹsẹ ẹghe nin amẹn ha rẹ rọ.’

Bhiriọ, ọne okhuo da ha khian uwa dọ lu ibrẹd nin akhasẹ nọnsi Jehova. Beji Jehova vele, ọne okhuo bi ọmokpea nọnsọle da wo miẹn ebale le bhi ọne ẹghe nin amẹn bha rẹ rọlọ. Ẹghe bha ha ribhọ nin akhe nin ọne okhuo sa abhii ọi bi akhe ọsi ẹlubọ nọnsọle rẹ ka.

Ọkpakinọn, ebe i mhẹn da sunu. Ọmọn ọsi ọne okhuo da ha khọnmhọn, sẹyẹ, ọle da yu. Ọne okhuo da bhii Ẹlaija nọn rẹkpa ọle. Ẹlaija da miẹn ọne okhuo ọne ọmọn, yẹ mun ọlẹn ha khian ugha nọn ribhi okhun uwa ọsi ọne okhuo. Ọle da mun ọlẹn ọbhi uke ibẹd yẹ ha nan erọnmhọn. Ọle da yọle: ‘Jehova, huẹan ji ọne ọmọn nan kie ha nyẹnlẹn.’ Uwẹ be lẹn ebezẹle nin ọnan da ha yi udede emhin ọhan-ilo nin Jehova ha lu? Ranmhude, rẹ na bhi ẹghe ẹdẹlẹ rẹ dọ sẹbhi ọne ẹghe nan, a bha sẹ ka riọ ọria soso kpanọ bhi uu khẹ. Sẹyẹ, ọne okhuo nan bi ọmọn nọnsọle i yi ibhokhan Izrẹl.

Ọkpakinọn, ọne obhokhan da kie ha nyẹnlẹn. Ẹlaija da taman ọne okhuo yọle: ‘Ghọle! Ọmọn nọnsẹ nyẹnlẹn.’ Ọne okhuo da wo manman ha ghọnghọn, ọ da taman Ẹlaija yọle: ‘Ọguọmhandia nọnsi Osẹnobulua uwẹ gene khin. Mẹn lẹn ọnan, ranmhude ebi Jehova taman uwẹ nin uwẹ ta, ọle ọkpa uwẹ ta.’