25 DEVID
Ọle Da Re Izebhudu Lu Ebe Gbale
SỌL wo manman hoẹmhọn Devid yẹ gbaẹkẹ ọle, rẹ sẹbhọ ghe, Devid hi ọnọn ha nanlẹn mun emhin okhọnlẹn mhọnlẹn. Ọle yẹ hi ọkakulo ọsi eyokhọnlẹn nesi Sọl. Bhi ejayenan nian, Devid da ha nẹ nin Sọl nin Ojie. Sọl da ha khu Devid khian nin ọle gbe ọle a. Osẹnobulua da ve nin Devid ghe ọle dẹ kiẹn ojie. Ọreyiriọ, ẹkẹ ojẹgbo ọle ki da nẹko khian, nin ọle da sabọ gbega egbọle bi ikpia nesọle ne bun sẹbhi 600.
Sọl da dọ kiẹn ojie nọn ki wo ha lu emhin ebe. Ikhu nin ọle ha mhọn da Devid da re ẹkẹ ha khọ ọle rẹ sẹbhọ ghe, igba ne bunbun, ọle da ha guanọ nin ọle gbe Devid a. Ẹghe ọkpa ribhọ nin Devid rẹ miẹn isẹhoa rẹ gbe Sọl a. Ọkpakinọn, ọle bha lu iriọ. Ọrẹyiriọ, Sọl da sẹyẹ wo ha guanọ nin ọle gbe Devid a. Bhiriọ, Devid da dọ nẹko bhi ojẹgbo nọn sikẹ agbaẹbho natiọle Zif. Sokpan, ikpia ne nyẹnlẹn bhi ọne agbaẹbho da dọ taman Sọl eji Devid da nẹko. Ugba-ọzeva ọ ki khin nian nin ele rẹ dọ taman Sọl eji Devid da nẹko. Sọl ki lẹn, ọle bi eyokhọnlẹn nesọle da khu rẹkhan Devid.
Be Devid ha ki lu yẹ nian? Ọle da je ikpia nesọle nin ele dọ guanọ eji Sọl ye. Arẹmiẹn eyokhọnlẹn ọsi Sọl bun sẹbhi 3,000, Devid bha kpokpo egbe hiehie. Bhi ọsi ẹmhọanta, ọne ẹghe nan Devid rẹ gbẹn yọle: “Ghọle! Osẹnobulua hi urẹkpa nọnsẹmhẹn; Jehova ne ẹbho ne rẹkpa mẹn dia.” (Ps. 54:4; ebi a gbẹn ọbhi okhun ọlẹn) Bhiriọ, Devid da ha khian eji Sọl da mun agọ bhi ọsasọn. Ọle da taman ọkpa bhi ẹwẹ eyokhọnlẹn nesọle nọn rẹkhan ọlẹn.
Abishai da rẹkhan Devid. Obhio Devid ọle khin. Ọyokhọnlẹn nin ofẹn i mun ọle yẹ khin. Ẹgheso, ọle bhọ i re itohan man. Ẹghe nin Devid bi Abishai rẹ do nabhi agọ nin Sọl ye, ele da kere ghe ọrebhe wẹ. Bhi ọsi ẹmhọanta, Jehova lu ọle nin ene ikpia nan rebhe ha wẹ owe nọn dinmhin. Devid bi Abishai da yẹ kere ghe Sọl nin Ojie yẹ wo wẹ! Ọria soso bha ha gbega ọle, sẹyẹ, ọle da fi opo nọnsọle ba bhi otọ.
Be Devid ha ki lu yẹ? Ọ ha rẹ wo lẹkhẹ nanlẹn rẹ gbe Sọl a! Ahamiẹn ọle gbe Sọl a, ọle i yẹ da ha nẹ khian, sẹyẹ, ọle ki dọ kiẹn ojie. Abishai bha lẹn ebezẹle nin Devid bha da ka gbe Sọl a. Ọle da fẹkẹ taman ọlẹn yọle: “Ẹlẹnan Osẹnobulua mun oghian nọnsẹ uwẹ bhi obọ. Bhiriọ, huẹan, ji mẹn da re ọne opo rẹ ha ọle mun otọ ọsukpa, imẹn i da lu ọle igba eva.”
Devid da wo yere ẹghe nin ọle ka rẹ ha ribhi idia nọn sẹ inian. Bhi ojẹgbo ọsi Ẹn-gẹdi, Sọl da nabhi uhio nọn ribhi ẹkẹ udo nin Devid da nẹko. Sọl bha daghe ọle. Ọ ha rẹ wo lẹkhẹ nin Devid rẹ gbe Sọl a. Sokpan, ọle bha lu iriọ. Ọle da fẹkẹ hian obhiọ khere bhi ukpọn nin Sọl re yọ. Ọkhọle nọnsi Devid bhọ da ha gbe ọle asan bhi ọne emhin nin ọle lu. Ọne emhin nan nin Devid lu bha zẹwẹ re ọle ha ghọnghọn, ranmhude, ọle bha mun ekpẹn nin ojie nin Jehova zẹle.
Bhi ọne ukpasọn nin, asabọmiẹn ọ bha lẹkhẹ nin Devid rẹ mun Abishai mhọnlẹn nin ọle hẹi gbe Sọl a, ranmhude, Abishai tobọle bhọ yẹ nẹ nin Sọl. Bhi ọsi ẹmhọanta, ikpia nesi Devid rebhe bhọ guanọ nin Sọl hẹi yẹ kpokpo ele. Ọrẹyiriọ, Devid bha guanọ nin ọle gbe Sọl a. Arẹmiẹn ọ rẹ ha ri Abishai bhi ọkhọle nin ọle rẹ gbe Sọl a, Devid da taman ọlẹn nin ọle mhọn iziẹngbe. Devid da taman ọlẹn yọle: “Jehova dẹ tobọle gbe [Sọl] a, la ẹghe nọnsọle ha sẹ, ọle ki yu, la ọle dẹ yo okhọnlẹn, a ki gbe ọle a.” Ọle da yẹ yọle: “Akhailu nọn bhi ẹlo nọnsi Jehova nin mẹn rẹ re obọ so ọria nin Jehova zẹle!”
Be Devid lu yẹ ẹghe nin ọle rẹ miẹn isẹhoa rẹ gbe oghian ọlẹn a?
Devid lẹnmhin ghe Jehova dẹ re oya nin Sọl bhi ẹghe nọn khẹke ranmhude emhin ebe nin ọle lu. Bhi ebe ọsi Psalms 54:5, Devid da yẹ gbẹn yọle: “[Jehova] dẹ re ihaosa nin ẹbho ne kpokpo mẹn bhi emhin ebe nin ele lu.” Bhiriọ, Devid bi Abishai da sibhi agọ ọsi Sọl re, yẹ ha khian eje yoyo nọn bha ree gbe bhi enin. Devid da na bhi enin sotie Sọl bi eyokhọnlẹn nesọle. Devid da ha nin ikpia nesi Sọl van nin ele bha rẹ sabọ gbega ojie nọnsele. Devid da yẹ taman Sọl ghe nin ọle hẹi yẹ khu rẹkhan ọlẹn ranmhude, ọle i yi oghian nọnsọle. Ọle da yẹ re egbe ọle khọkhọ “iru ọkpa sẹsẹ” nọn i da sabọ si okhẹnan ji ọle. Ẹkhọle da wo ha lu Sọl. Ọle da yọle: “Mẹn wo lu emhin uuki, sẹyẹ, ebi mẹn lu bha gba hiehie.”
Ọnan be re Sọl fidenọ? Eye! Devid lẹnmhin ghe Sọl bha sẹ fidenọ. Ọkpakinọn, ọle da wo ha ghọnghọn ghe ọle sabọ re izebhudu zẹ emhin nọn gbale rẹ lu nọn ti Jehova bhọ. Akizẹbue, Jehova da wo manman nan erọnmhọn nin Devid bhi uwedẹ nin ọle bha rẹ mun ọkhọle ọ i.
Tie ọne okha bhi Baibo:
1 Samuel 16:21; 18:5-14; 23:19; 24:3-7; 26:1-25
Inọnta:
Uwedẹ nela Devid rẹ re izebhudu man bhi ẹghe nin ọle rẹ ha nẹ nin Sọl?
Manman Guanọ Otọle
1. Arẹmiẹn ọyokhọnlẹn nọn i mhọn itohan nọn yẹ re ẹjẹje lu emhin Abishai khin, be ọle rẹ sabọ re izebhudu gbega ẹbho nesi Jehova yẹ, yẹ rẹkpa Devid? (it “Abishai” ¶3-5)
2. Bezẹle nin Devid da re egbọle khọkhọ afianmhẹn natiọle patrig nan miẹn bhi uke oke? (1 Sam. 26:20; it “Patrig” ¶4) 1
Ekaterina Kolomeets/stock.adobe.com
Ifoto 1
3. Bezẹle nọn da khẹke nin Devid ha mhọn iziẹngbe? (w17.08 6 ¶14-15)
4. Be Devid rẹ sẹyẹ ha re obọ rẹkhan emhanmhan nọnsi Jehova yẹ arẹmiẹn ikpe ne bunbun gbera? (w21.09 10 ¶8) 2
Ifoto 2
Ria Eria Nyan Emhin Nin Uwẹ Luẹle
Arẹmiẹn Sọl wo dobọ igba ne bunbun, Devid da sẹyẹ ha mun ekpẹn nanlẹn. Be imhan ha rẹ re egbe khọkhọ Devid yẹ bhi uwedẹ nin mhan rẹ ghe . . .
ene biẹ mhan? 3
Ifoto 3
ene gbẹloghe? 4
Ifoto 4
ewanlẹn bhi agbotu? 5
Ifoto 5
Devid lẹn ebe ha ti Jehova bhọ, ọle da re izebhudu zẹ emhin nọn mhẹn rẹ lu. Idia nela mhan ha da re izebhudu zẹ emhin nọn mhẹn rẹ lu?
Uwedẹ ebhebhe nela uwẹ ha rẹ sabọ re egbe khọkhọ Devid bhi izebhudu nin ọle rẹman nan tẹmhọnlẹn bhi ọne okha nan?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Devid le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Fẹ ebi a rẹ re ọne okha nan man yẹ.
Yere Ebi Ahoẹmhọn-egbe Rẹ Lu Emhin Yẹ—Ọ Miẹn Emhin Rebhe Ọbhi Egbe (1:29)
Sọl ka ha mhọn idegbere yẹ lu emhin ọbhi oleghe, akizẹbue, ọle da ha tẹngbemun. Be ibhokhan ha sabọ miẹn luẹ bhi obọ Sọl?